1-3. (a) Ni vinthu wuli ivyo mphanyi vikagaŵaniska mpingo wakwambilira? (b) Kasi tisangenge fundo wuli zakuzirwa apo tikusanda nkhani iyi?

 PAULOSI na Baranaba ŵakakondwa chomene ŵati ŵafika ku msumba wa Antiyoke wa ku Siriya kufuma ku ulendo wawo wakwamba wa umishonale. Ŵakakondwa chifukwa Yehova “wakajulira ŵamitundu mulyango kuti ŵaŵe na chipulikano.” (Mil. 14:26, 27) Nadi, mu Antiyoke makani ghawemi ghakapharazgikanga palipose ndipo Ŵamitundu “ŵanandi chomene” ŵakasazgikangako ku mpingo ku malo agha.—Mil. 11:20-26.

² Nkhani yakukondweska yakukhwaskana na kusazgikira kwa ŵanthu yikafika mu Yudeya. Kweni m’malo mwakuti wose ŵakondwe nayo, ŵanthu ŵakamba kugazgana vyakukhwaskana na ukotoli. Kasi Ŵakhristu Ŵachiyuda na Ŵamitundu ŵakeneranga kuliwona wuli Dango la Mozesi? Nkhani ya ukotoli yikambiska kugazgana mwakuti mpingo Wachikhristu ukakhumbanga kugaŵikana. Kasi mpingo ukayimazga wuli nkhani iyi?

³ Apo tikudumbiskana nkhani ya mu buku la Milimo iyi, tisambirenge vinthu vinandi vyakuzirwa. Ivyo tisambirenge vitovwirenge kuti tichitenge vinthu mwavinjeru para pawuka nkhani izo zingagaŵaniska mpingo mazuŵa ghano.

4. Kasi Ŵakhristu ŵanji ŵakakoseranga maghanoghano wuli ghakubudika, ndipo ni fumbo wuli ilo likuŵapo?

⁴ Msambiri Luka wakalemba kuti: “Ŵanalume ŵanyake ŵakakhira [ku Antiyoke] kufuma ku Yudeya ndipo ŵakamba kusambizga ŵabali kuti: ‘Kwambura kuti mwakotoleka mwakuyana na dango la Mozesi, mungaponoskeka yayi.’” (Mil. 15:1) Baibolo lindayowoyepo kuti “ŵanalume ŵanyake” aŵa ŵakaŵa Ŵafarisi pambere ŵandazgoke Ŵakhristu. Kwali ŵakaŵa Ŵafarisi kwali yayi, kweni ŵakwenera kuti ŵakakhuŵilizgika na maghanoghano gha Ŵafarisi. Kweniso ŵakwenera kuti ŵakayowoya utesi wakuti ŵakatumika na ŵapositole na ŵanalume ŵalara ŵa mu Yerusalemu. (Mil. 15:23, 24) Kweni chifukwa wuli Ŵakhristu Ŵachiyuda ŵakalutilira kukosera pa ukotoli, nangauli pakajumpha vyaka pafupifupi 13 kufuma apo Petrosi mwakulongozgeka na Chiuta wakapokelera Ŵamitundu ŵambura kukotoleka mu mpingo Wachikhristu? a—Mil. 10:24-29, 44-48.

5, 6. (a) Chifukwa wuli Ŵakhristu ŵanyake Ŵachiyuda ŵakalutilira kukosera nkhani ya ukotoli? (b) Kasi dango la ukotoli likaŵa mu phangano la Abrahamu? Longosorani. (Wonani mazgu ghamusi.)

 ⁵ Pakwenera kuti pakaŵa vifukwa vinandi. Chifukwa chimoza ntchakuti, Yehova ndiyo wakapeleka dango lakuti ŵanalume ŵakotolekenge, ndipo chikaŵa chimanyikwiro cha ubwezi wapadera na iyo. Ukotoli ukambira pa Abrahamu na ŵamunyumba yake, ndipo ukaŵako pambere phangano la Dango lindapelekeke. Kweni pamanyuma ukazakalembekaso mu Dango la Mozesi. b (Lev. 12:2, 3) Mu Dango la Mozesi, ŵalendo nawo ŵakeneranga kukotoleka dankha pambere ŵandazomerezgeke kuchitako vinthu vinyake, nga nkhurya chakurya cha Paska. (Eks. 12:43, 44, 48, 49) Enya, ku Ŵayuda, mwanalume wambura kukotoleka wakaŵanga wakufipirwa kweniso wakuyuyuka.—Yes. 52:1.

⁶ Ntheura Ŵakhristu Ŵachiyuda ŵakakhumbikwiranga chipulikano na kujiyuyura kuti ŵakolerane na unenesko uwo ukavumbukwa. Phangano liphya likanjira mu malo gha phangano la Dango, ntheura vyakuti para munthu wababikira mu mtundu wa Ŵayuda ndikuti njumoza wa ŵanthu ŵa Chiuta vikamara. Kweniso, Ŵakhristu Ŵachiyuda awo ŵakakhalanga na Ŵayuda, nga ni umo ŵakaŵira awo ŵakaŵa mu Yudeya, ŵakakhumbikwiranga chikanga kuti ŵagomezge Khristu na kuwona Ŵakhristu Ŵamitundu awo ŵakaŵa ŵambura kukotoleka kuŵa ŵabali ŵawo.—Yer. 31:31-33; Luka 22:20.

7. Ni fundo wuli izo “ŵanalume ŵanyake” ŵakatondeka kuzimanya?

⁷ Fundo za Chiuta zikasintha yayi. Ukaboni wa fundo iyi ngwakuti chilato cheneko cha Dango la Mozesi chikuwonekaso mu phangano liphya. (Mat. 22:36-40) Mwachiyelezgero, pa nkhani ya ukotoli, Paulosi wakalemba kuti: “Muyuda mwenecho ni uyo ni Muyuda mukati, ndipo ukotoli wake ngwa mu mtima, ukuchitika na mzimu, na dango lakulembeka chara.” (Rom. 2:29; Doto. 10:16) “Ŵanalume” awo ŵakafuma ku Yudeya ŵakazimanya yayi fundo izi, ndipo ŵakaghanaghananga kuti Chiuta wandalekeske dango la ukotoli. Kasi ŵakaŵa kuti ŵangapulikiska para munthu wangaŵalongosolera?

8. Chifukwa wuli nkhani ya ukotoli ŵakayitolera ku wupu wakulongozga mu Yerusalemu?

⁸ Luka wakalutilira kuti: “Paulosi na Baranaba ŵakagazgana nawo na kususkana nawo chomene [“ŵanalume ŵanyake.”] Ntheura [ŵalara] ŵakasora Paulosi, Baranaba, na ŵanyake ŵa iwo kuti ŵakwelere ku Yerusalemu,  ŵakaphalire nkhani iyi ŵapositole na ŵalara.” c (Mil. 15:2) Mazgu ghakuti “ŵakagazgana nawo na kususkana” ghakulongora kuti magulu ghose ghaŵiri ghakagomezganga kuti ivyo ghakayowoyanga ndivyo vikaŵa vyaunenesko, ndipo mpingo wa mu Antiyoke ukatondeka kumazga wekha nkhani iyi. Kuti paŵe mtende na umoza, mpingo ukaghanaghana kutuma nkhani iyi ku “ŵapositole na ŵalara ku Yerusalemu,” awo ukaŵa wupu wakulongozga. Kasi tingasambirako vichi ku ŵalara ŵa ku Antiyoke?

9, 10. Kasi Ŵakhristu ŵa ku Antiyoke, Paulosi na Baranaba ŵakalongora wuli chiyelezgero chiwemi kwa ise mazuŵa ghano?

⁹ Chinthu chimoza icho tikusambirapo ntchakuti tikwenera kugomezga gulu la Chiuta. Ghanaghanirani fundo iyi: Ŵakhristu ŵa mu Antiyoke ŵakamanya kuti mu wupu wakulongozga mukaŵa Ŵakhristu Ŵachiyuda pera. Kweni ŵakagomezga kuti wupu uwu umazgenge nkhani ya ukotoli mwakukolerana na Malemba. Chifukwa wuli ŵakagomezga nthena? Mpingo ukaŵa na chigomezgo kuti Yehova walongozgenge vinthu na mzimu wake utuŵa kweniso Mutu wa mpingo, Yesu Khristu. (Mat. 28:18, 20; Efe. 1:22, 23) Mazuŵa ghano napo para pawuka nkhani zakusuzga, tiyeni tiyezge Ŵakhristu ŵa ku Antiyoke. Tigomezgenge chomene gulu la Chiuta na Wupu wake Wakulongozga wa Ŵakhristu ŵakuphakazgika.

¹⁰ Kweniso tikwenera kuŵa ŵakujiyuyura na kuzikira pakuchita vinthu. Paulosi na Baranaba ndiwo ŵakasankhika na mzimu utuŵa kuluta ku mitundu, kweni ŵakakhumba yayi kuti ŵamazge ŵekha nkhani ya ukotoli kwenekura ku Antiyoke kuyana na mazaza ghawo. (Mil. 13:2, 3) Kweniso, pamanyuma Paulosi wakalemba kuti: “Nkhakwelera [ku Yerusalemu] chifukwa cha ivyo Chiuta wakanivumbulira,” kulongora kuti Chiuta ndiyo wakamulongozga pa nkhani iyi. (Gal. 2:2) Mazuŵa ghano napo, ŵalara ŵakuyezgayezga kuŵa  ŵakujiyuyura, kweniso kuzikira pakuchita vinthu para pawuka nkhani izo zingagaŵaniska mpingo. M’malo mwa kugazgana, ŵakuthemba ulongozgi wa Yehova uwo uli mu Malemba ndiposo wakufuma kwa muzga.—Fil. 2:2, 3.

11, 12. Chifukwa wuli ntchakuzirwa kulindilira Yehova?

¹¹ Nyengo zinyake, tingakhumbikwira kulindilira Yehova kuti watingweluske pa nkhani yinyake. Kumbukani kuti ŵabali ŵa mu nyengo ya Paulosi ŵakalindilira m’paka cha mu 49 C.E., apo Yehova wakamazgira nkhani ya ukotoli. Kufika pa nyengo iyi, pakajumpha vyaka 13 kufuma apo Koroneliyo wakaphakazgikira mu 36 C.E. Chifukwa wuli pakajumpha nyengo yitali nthena? Panyake Chiuta wakakhumbanga kupeleka nyengo yitali ku Ŵayuda ŵa mtima uwemi kuti ŵasintheko dankha maghanoghano ghawo pa nkhani yikuru iyi. Nakuti kumazga dango la ukotoli ilo likakhala vyaka 1,900, ilo Chiuta wakaphalira sekuru wawo Abrahamu yikaŵa nkhani yikuru.—Yoh. 16:12.

¹² Ni mwaŵi ukuru chomene kusambizgika ndiposo kuwumbika na Adada ŵithu ŵakuchanya, awo mbalusungu kweniso ŵakuzikira pakuchita vinthu. Nyengo zose ivyo ŵakutisambizga vikuŵa viwemi kweniso vyachandulo kwa ise. (Yes. 48:17, 18; 64:8) Ntheura tiyeni tileke kwendera maghanoghano ghithu panji kukhuŵara para gulu lasintha umo likwendeskera vinthu vinyake, panji para lasintha kapulikiskiro ka malemba ghanyake. (Muph. 7:8) Usange mwawona kuti vikumusuzgani kuchita nthena, mwalekerachi kughanaghanirapo chomene pa fundo izo zikusangika pa Milimo chaputara 15? d

13. Kasi tingamuyezga wuli Yehova pa nkhani yakuzikira para tili mu uteŵeti?

¹³ Tingakhumbikwira kuzikira pakuchita vinthu para tikusambira Baibolo na ŵanthu awo vikuŵasuzga kuleka vigomezgo vyautesi panji maluso ghakususkana na Malemba agho ŵakughatemwa. Usange vili nthena, tingakhumbikwira kulindilira nyengo yitaliko kuti mzimu wa Chiuta usinthe mtima wa msambiri. (1 Kor. 3:6, 7) Kweniso tikwenera kuyilombera nkhani iyi. Pa nyengo yakwenelera, Chiuta wazamutovwira kuti tichite vinthu mwamahara.—1 Yoh. 5:14.

14, 15. Kasi mpingo wa ku Antiyoke ukachindika wuli Paulosi, Baranaba na ŵanyake awo ŵakaŵa nawo, ndipo iwo ŵakawovwira wuli Ŵakhristu ŵanyawo?

¹⁴ Luka wakalutizga kuti: “Mpingo ukati waŵapelekezga, ŵanthu aŵa ŵakalutilira ulendo wawo kusolota mu Fonike na Samariya, ŵakalongosoranga makora umo ŵanthu ŵamitundu ŵakang’anamukira, ndipo ŵabali wose ŵakaŵa na chimwemwe chikuru.” (Mil. 15:3) Pakuti mpingo ukapelekezga Paulosi, Baranaba, na ŵanyake, ukaŵa ukaboni wakuti ukaŵatemwanga, na kuŵakhumbira vitumbiko vya Chiuta. Apa napo ŵabali ŵa ku Antiyoke ŵakalongora chiyelezgero chiwemi kwa ise. Kasi mukuchindika ŵabali  na ŵadumbu ŵinu ŵauzimu, “chomene [ŵanalume ŵalara] awo ŵakulimbikira kuyowoya na kusambizga”?—1 Tim. 5:17.

¹⁵ Apo ŵakendanga, ŵanthu aŵa ŵakakhozga chomene Ŵakhristu ŵanyawo mu Fonike na Samariya na kuŵalongosolera “makora” umo mulimo ukenderanga pakati pa Ŵamitundu. Pa ŵanthu awo ŵakategherezganga pakwenera kuti pakaŵa Ŵakhristu Ŵachiyuda awo ŵakachimbilira ku vigaŵa ivi Stefano wati wakomeka. Mazuŵa ghano napo, malipoti gha umo Yehova wakutumbikira mulimo wa kuzgora ŵanthu kuŵa ŵasambiri ngakukhozga chomene ku ŵabali ŵithu, chomenechomene awo ŵali mu viyezgo. Kasi mukupindula wuli na malipoti agha para muli pa maungano gha mpingo, gha dera, na gha chigaŵa, kweniso para mukuŵazga nkhani zakukhwaskana na umoyo wa ŵabali na ŵadumbu izo zikulembeka mu mabuku ghithu?

16. Ntchivichi chikulongora kuti nkhani ya ukotoli yikasuzga?

¹⁶ Ŵati ŵenda makilomita 550 kulazga kumwera, ŵanthu ŵakufuma ku Antiyoke aŵa ŵakafika uko ŵakapukwa. Luka wakalemba kuti: “Ŵakati ŵafika mu Yerusalemu, ŵakapokelereka makora na mpingo, ŵapositole, na ŵalara. Ndipo ŵakalongosora vinthu vinandi ivyo Chiuta wakachita kwizira mwa iwo.” (Mil. 15:4) Ndipouli, icho chikachitika ntchakuti, “ŵanyake ŵa Ŵafarisi awo ŵakagomezga Khristu, ŵakawuka pa vitengo vyawo ndipo ŵakati: ‘Ntchakwenelera kuŵakotora na kuŵaphalira kuti ŵasungilirenge Dango la Mozesi.’” (Mil. 15:5) Apa vikulongora kuti nkhani yakuti Ŵakhristu ŵakufuma mu mitundu yinyake ŵakwenera kukotoleka yikasuzga, ndipo yikeneranga kumara.

17. Mbanjani awo ŵakaŵa mu wupu wakulongozga mu Yerusalemu, ndipo chifukwa wuli pakaŵaso “ŵalara”?

¹⁷ Ntharika yinyake yikuti: “vinjeru vili na awo ŵakupenja ulongozgi.” (Zinth. 13:10) Mwakukolerana na fundo iyi, “ŵapositole na ŵalara ŵakawungana pamoza kuti ŵayiwone nkhani iyi [ya ukotoli].” (Mil. 15:6) “Ŵapositole na ŵalara” ŵakimira mpingo wose wa Ŵakhristu, nga umo Wupu Wakulongozga ukuchitira mazuŵa ghano. Chifukwa wuli “ŵalara” ŵakateŵeteranga pamoza na ŵapositole? Kumbukani kuti mpositole Yakobe wakaŵa kuti wakomeka, ndipo kwa kanyengo mpositole Petrosi wakaŵa mu jele. Kasi vinthu vyanthena ivi vikaŵa kuti vingachitikiraso ŵapositole ŵanyake?  Kuti mulimo wa kulaŵilira ulutilire kwenda makora pakakhumbikwiranga ŵanalume ŵakwenelera ŵakuphakazgika.

18, 19. Ni mazgu wuli ghankhongono agho Petrosi wakayowoya, ndipo ŵategherezgi ŵake ŵakwenera kuti ŵakakumbuka fundo wuli?

¹⁸ Luka wakalutilira kuti: “Ŵakati ŵadumbiskana chomene, Petrosi wakawuka ndipo wakati . . . : ‘Mwaŵabali, mukumanya makora kuti kufuma mu mazuŵa ghakwambilira, Chiuta wakasora ine pakati pinu mwakuti kwizira mu mulomo wane ŵanthu ŵamitundu ŵapulike mazgu gha makani ghawemi na kugomezga. Chiuta uyo wakumanya mtima wakachitira ukaboni mwa kuŵapa mzimu utuŵa, nga umo wakachitiraso kwa ise. Wakapambaniska yayi pakati pa ise na iwo, kweni wakatuŵiska mitima yawo na chipulikano.’” (Mil. 15:7-9) Kuyana na buku linyake, lizgu Lachigiriki ilo lili kung’anamurika kuti “kudumbiskana” mu vesi 7, likung’anamuraso “kupenjerezga,” na ‘kufumbana.’ Vikuwoneka kuti ŵabali aŵa ŵakasuskananga pa vinthu ivyo vikaŵa vyakupulikikwa ndipo ŵakaviyowoya mwakufwatuka.

¹⁹ Mazgu ghankhongono gha Petrosi ghakakumbuska wose kuti iyo wakaŵapo apo Koroneliyo, Wamitundu wakwamba wambura kukotoleka na ŵamunyumba yake, ŵakaphakazgikira na mzimu utuŵa mu 36 C.E. Ntheura usange Yehova wakaleka kupambaniska pakati pa Ŵayuda na ŵanthu ŵa mitundu yinyake, kasi ŵanthu ŵangaghatora nkhu mazaza ghakupambaniskira? Kweniso, munthu wakuŵa wakutuŵiskika na chipulikano mwa Khristu, chifukwa cha kulondezga Dango la Mozesi yayi.—Gal. 2:16.

20. Kasi awo ŵakakoseranga pa ukotoli ‘ŵakayezganga Chiuta’ mu nthowa wuli?

²⁰ Fundo za Petrosi zikajintha pa ukaboni wambura kususkika wa mazgu gha Chiuta kweniso mzimu utuŵa. Iyo wakamalizga kuti: “Ntheura chifukwa wuli mukuyezga Chiuta mwa kuŵika joko pa singo ya ŵasambiri ilo ŵasekuru ŵithu na ise tikatondeka kuyegha? Kweni sono, tili na chipulikano kuti tizamuponoskeka kwizira mu lusungu lukuru lwa Fumu Yesu mwakuyana waka na ŵanthu ŵara.” (Mil. 15:10, 11) Awo ŵakakoseranga pa ukotoli ‘ŵakayezganga Chiuta’ ndipo wakamukwiyiskanga waka. Ŵakachichizganga Ŵamitundu kuti ŵalondezgenge dango ilo Ŵayuda ŵakatondeka kulilondezga mwakufikapo, ntheura ŵakaŵa ŵakwenelera nyifwa. (Gal. 3:10) Kweni Ŵayuda awo Petrosi wakayowoyanga nawo mphanyi ŵakawonganga lusungu lukuru ulo Chiuta wakaŵalongora kwizira mwa Yesu.

21. Kasi Baranaba na Paulosi ŵakawovwira wuli pa chidumbirano icho chikaŵapo?

²¹ Vikulongora kuti mazgu gha Petrosi ghakaŵafika pa mtima, chifukwa “wumba wose ukakhala chete.” Kufuma apo, Baranaba na Paulosi ŵakalongosora “vimanyikwiro vinandi na minthondwe ivyo Chiuta wakachita kwizira mwa iwo pakati pa mitundu.” (Mil. 15:12) Sono ndipo ŵapositole na ŵanalume ŵalara ŵakawona kuti ŵangasanda ukaboni wose na kudumura nkhani ya ukotoli mwakuyana na khumbo la Chiuta.

22-24. (a) Kasi Wupu Wakulongozga mazuŵa ghano ukulondezga wuli ivyo wupu wakulongozga wakwambilira ukachitanga? (b) Kasi ŵalara wose ŵangalongora wuli kuti ŵakuchindika ndondomeko yakwendeskera vinthu mu mpingo?

²² Mazuŵa ghano napo, para ŵabali ŵa mu Wupu Wakulongozga ŵakukumana  ŵakugomezga ulongozgi wa mu Mazgu gha Chiuta na kulomba mzimu utuŵa kufumira pasi pa mtima. (Sal. 119:105; Mat. 7:7-11) Kuti ŵakake fundo yakuyana na khumbo la Chiuta, waliyose mu Wupu Wakulongozga wakupokera ndondomeko ya vyakudumbirana mwakutendekera mwakuti walombe na kughanaghanirapo. (Zinth. 15:28) Pa ungano wawo, ŵabali ŵakuphakazgika aŵa ŵakuyowoyapo mwakufwatuka kweniso mwantchindi. Pakudumbiskana ŵakuŵazga Baibolo kanandi waka.

²³ Ŵalara ŵa mpingo nawo ŵakwenera kuchita nthena. Ndipo usange nkhani yakusuzga yindamare para ŵalara ŵadumbiskana, wupu wa ŵalara ungafumba ku ofesi ya munthavi panji awo yaŵimika, nga mbalaŵiliri ŵa dera. Usange ofesi ya munthavi yawona kuti ntchakukhumbikwa, yingafumba ku Wupu Wakulongozga.

²⁴ Yehova wakutumbika awo ŵakuchindika ndondomeko yakwendeskera vinthu iyo wali kunozga kweniso awo mbakujiyuyura, ŵakugomezgeka, na ŵakuzikira pakuchita vinthu. Nga umo tiwonerenge mu mutu wakulondezgapo, para ŵanthu mu mpingo ŵakuchita nthena Chiuta wakuŵapa mtende wenecho, ŵakukura mwauzimu, kweniso pakuŵa umoza.