MUTU 5
“Tikwenera Kupulikira Chiuta nga Muwusi”
Ŵapositole ŵakachita chinthu icho Ŵakhristu wose ŵaunenesko ŵakwenera kulondezga
Nkhani iyi yili pa Milimo 5:12–6:7
1-3. (a) Chifukwa wuli ŵapositole ŵakatolekera panthazi pa Sanihedirini, ndipo nkhani yikuru yikaŵa yakuti wuli? (b) Chifukwa wuli tikukhumbisiska kumanya ivyo ŵapositole ŵakachita?
ŴERUZGI ŵa mu Sanihedirini ŵakakwiya chomene. Ŵapositole ŵa Yesu ŵakimilira panthazi pa khoti likuru ili. Chifukwa wuli? Yosefe Kayafa, wasembe mukuru ndiposo pulezidenti wa Sanihedirini wakayowoya nawo mwaukali kuti: “Tikamuphalirani kuti muleke kulutilira kusambizga mu zina ili.” Pulezidenti mukali uyu wakakhumba chara nanga nkhuzunura zina lakuti Yesu. Kayafa wakalutizga kuti: “Kweni . . . . mwazuzga Yerusalemu na chisambizgo chinu, ndipo mukukhumba kuti mulandu wa ndopa za munthu uyu uŵe pa ise.” (Mil. 5:28) Uthenga wake ukaŵa wakuti: Lekani kupharazga, para cha mbwenu mulangikenge.
2 Kasi ŵapositole ŵakachita wuli? Uyo wakaŵapa mulimo wa kupharazga ni Yesu, mweneuyo wali kupika mazaza na Chiuta. (Mat. 28:18-20) Kasi ŵapositole ŵakachita wofi na kukhala chete? Panji kasi ŵakaŵa na chikanga kwimilira nganganga na kulutilira kupharazga? Apa nkhani yikuru yikaŵa yakuti: Kasi ŵapulikirenge Chiuta panji munthu? Nyengo yeneyiyo, mpositole Petrosi wakayowoya m’malo mwa ŵapositole ŵanyake wose. Wakayowoya mwakupulikikwa makora ndiposo mwachikanga.
3 Pakuŵa Ŵakhristu ŵaunenesko, tikukhumbisiska kumanya umo ŵapositole ŵakachitira apo ŵakawofyekanga na Sanihedirini. Mulimo wa kupharazga uli kupika na kwa ise wuwo. Pakuchita mulimo uwu, uwo Chiuta wali kutipa, nase ŵanthu ŵangatisuska. (Mat. 10:22) Ŵakususka ŵangakanizga panji kulekeska mulimo withu. Kasi tingachita wuli? Tingasanga chandulo para tingawona ivyo ŵapositole ŵakachita, ndiposo ivyo vikapangiska kuti ŵimilire panthazi pa Sanihedirini. a
“Mungelo wa Yehova Wakajura Milyango” (Milimo 5:12-21a)
4, 5. Chifukwa wuli Kayafa na Ŵasaduki “ŵakachita sanji”?
4 Kumbukani kuti pakwamba apo ŵakaphalirika kuti ŵaleke kupharazga, Petrosi na Yohane ŵakazgora kuti: “Ise tingaleka yayi kuyowoya vinthu ivyo tili kuwona na kupulika.” (Mil. 4:20) Ŵakati ŵafuma mu Sanihedirini pa nyengo yira, Petrosi na Yohane pamoza na ŵapositole ŵanyawo wose, ŵakalutilira kupharazga mu tempile. Ŵapositole ŵakachita vimanyikwiro vikuru, nga kuchizga ŵalwari na kufumiska viŵanda. Ivi ŵakachitiranga “mu khonde la Solomoni,” malo gha mu tempile agho ghakaŵa kumafumiro gha dazi, uko Ŵayuda ŵanandi ŵakawungananga. Vikuwoneka kuti ŵanthu ŵakachiranga nanga ni para muzgezge wa Petrosi wajumpha pa iwo. Ŵanandi awo ŵakachizgika ŵakapulikira mazgu gha Chiuta. Lekani “ŵanalume na ŵanakazi ŵanandi awo ŵakagomezga Fumu ŵakalutilira kusazgikira.”—Mil. 5:12-15.
5 Kayafa na Ŵasaduki, gulu la chisopa ilo nayo wakaŵamo, “ŵakachita sanji” ndipo ŵakajalira ŵapositole mu gadi. (Mil. 5:17, 18) Chifukwa wuli Ŵasaduki ŵakakwiya? Ŵakakwiya chifukwa chakuti ŵapositole ŵakasambizganga kuti Yesu wawuskika, apo Ŵasaduki ŵakagomezganga yayi chiwuka. Ŵapositole ŵakatenge munthu wangaponoskeka pekha para wali na chipulikano mwa Yesu, apo Ŵasaduki ŵakopanga kuti Ŵaroma ŵangakwiya para ŵanthu ŵangagomezga Yesu kuŵa Mulongozgi wawo. (Yoh. 11:48) Lekani Ŵasaduki ŵakaŵikapo mtima chomene kukanizga ŵapositole kupharazga.
6. Kasi mbanjani mazuŵa ghano awo ŵakupangiska kuti ŵateŵeti ŵa Yehova ŵatambuzgikenge, ndipo chifukwa wuli tikwenera yayi kuzizwa?
6 Mazuŵa ghano napo, ŵavisopa ndiwo ŵakupangiska kuti ŵateŵeti ŵa Yehova ŵatambuzgikenge. Iwo ŵakuyezga kulekeska mulimo withu wa kupharazga kwizira mu ŵamazaza ŵa boma, mawayilesi, manyuzipepara kweniso nthowa zinyake. Kasi tikwenera kuzizwa? Yayi. Uthenga withu ukuvumbura chisopa chautesi. Para ŵanthu ŵa mitima yiwemi ŵazomera unenesko wa mu Baibolo, ŵakufwatuka ku vigomezgo na maluso agho ghakususkana na malemba. (Yoh. 8:32) Kasi ntchakuzizika nthena kuti ŵalongozgi ŵa visopa ŵakuŵa na sanji na kutitinkha chifukwa cha uthenga uwo tikupharazga?
7, 8. Kasi dango la mungelo likwenera kuti likaŵawovwira wuli ŵapositole, ndipo tingajifumba fumbo wuli?
7 Apo ŵakaŵa mu jele kulindilira kweruzgika, ŵapositole ŵakwenera kuti ŵakajifumbanga usange ŵalwani ŵawo ŵakaŵa pafupi kuŵakoma chifukwa cha chipulikano chawo. (Mat. 24:9) Kweni usiku, chinthu chinyake chakuzizika chikachitika, “mungelo wa Yehova wakajura milyango ya jele.” b (Mil. 5:19) Mungelo wakaŵapa ulongozgi wakuti: Lutani ‘mukimilire mu tempile,’ na ‘kulutilira kuyowoya.’ (Mil. 5:20) Dango ili likwenera kuti likaŵasimikizgira ŵapositole kuti ŵakachitanga icho ntchiwemi. Kweniso mazgu gha mungelo ghakwenera kuti ghakaŵakhozga kuti ŵakoleske visuzge viti wuli. Na chipulikano chikuru ndiposo chikanga, ŵapositole “kukati kwacha ŵakanjira mu tempile ndipo ŵakamba kusambizga.”—Mil. 5:21.
8 Waliyose wa ise wangachita makora kujifumba kuti, ‘Kasi ine ningaŵa na chipulikano ndiposo chikanga kuti nilutilire kupharazga para vinthu vingaŵa nthena?’ Tingasanga nkhongono chifukwa cha kumanya kuti ŵangelo ŵakutovwira na kutilongozga pa mulimo wakuzirwa uwu wa “kuchitira ukaboni mwakukwana vya Ufumu wa Chiuta.”—Mil. 28:23; Chivu. 14:6, 7.
“Tikwenera Kupulikira Chiuta nga Muwusi M’malo mwa Ŵanthu” (Milimo 5:21b-33)
“Ntheura ŵakiza nawo na kuŵayimika panthazi pa Khoti Likuru.”—Milimo 5:27
9-11. Kasi ŵapositole ŵakachita wuli khoti la Sanihedirini lati laŵaphalira kuti ŵaleke kupharazga, ndipo chifukwa wuli Ŵakhristu ŵaunenesko ŵakwenera kulondezga ivyo ŵapositole ŵakachita?
9 Kayafa na ŵeruzgi ŵanyake ŵa mu Sanihedrini ŵakaŵa ŵakunozgeka kumarana na ŵapositole. Kwambura kumanya ivyo vikachitika mu jele, ŵakatuma ŵasilikari kuti ŵakatore ŵakayidi. Ghanaghanirani waka umo ŵasilikari ŵakwenera kuti ŵakazizwira ŵati ŵasanga kuti ŵakayidi mulije mujele, nangauli jele likaŵa lakujara “na kulokeka makora ndipo ŵalinda ŵangwimilira pa milyango.” (Mil. 5:23) Kapitawo wa pa tempile wakapulika kuti ŵapositole ŵakaŵaso mu tempile, kuchitira ukaboni vya Yesu Khristu, mulimo wura ŵakajalilikira mu jele. Kapitawo na ŵasilikari ŵake ŵakaluta mwaluŵiro mu tempile kukakora ŵasambiri na kuluta nawo ku Sanihedirini.
10 Nga umo tawonera kale kukwambilira kwa mutu uwu, ŵalongozgi ŵa chisopa aŵa ŵakaphalira ŵapositole kuti ŵaleke kupharazga. Kasi ŵapositole ŵakazgora wuli? M’malo mwa ŵanyake, Petrosi wakazgora mwachikanga kuti: “Tikwenera kupulikira Chiuta nga muwusi m’malo mwa ŵanthu.” (Mil. 5:29) Ntheura icho ŵapositole ŵakachita ndicho Ŵakhristu ŵaunenesko mu miwiro yose ŵakwenera kulondezga. Para ŵawusi ŵakukanizga ivyo Chiuta wakukhumba panji ŵakukhumba ivyo Chiuta wakukanizga, ndikuti ŵakutaya wanangwa wawo wakuti ŵanthu ŵaŵapulikirenge. Ntheura usange “ŵamazaza” ŵakukanizga mulimo wa kupharazga, tingaleka yayi kuchita mulimo uwo Chiuta watipa wa kupharazga makani ghawemi. (Rom. 13:1) Kweni tisangenge nthowa na kulutilira kuchitira ukaboni mwakukwana vya Ufumu wa Chiuta.
11 Ntchakuzizika yayi kuti ŵeruzgi ŵakakalipa chomene chifukwa chakuti ŵapositole ŵakazgora mwachikanga. Ŵeruzgi aŵa ŵakasimikizga mtima kuti ‘ŵakomenge’ ŵapositole. (Mil. 5:33) Ŵakaboni ŵachikanga na ŵamwamphu aŵa ŵakawona nga kuti ŵakaŵa pafupi kufwira chipulikano chawo. Kweni ŵakaŵa pafupi kovwirika mu nthowa yakuzizwiska chomene.
“Muvimazgenge Yayi” (Milimo 5:34-42)
12, 13. (a) Kasi Gamaliyeli wakapeleka ulongozgi wuli ku ŵanyake, ndipo iwo ŵakachita wuli? (b) Kasi Yehova wangawovwira wuli ŵanthu ŵake mazuŵa ghano, ndipo tikwenera kumanya vichi usange wangazomerezga kuti ‘tisuzgike chifukwa cha urunji’?
12 Gamaliyeli, “msambizgi wa Dango uyo ŵanthu wose ŵakamuchindikanga,” wakayowoyapo. c Munthu uyu wakwenera kuti ŵanyake wose ŵakamuchindikanga chomene, chifukwa ndiyo wakadangiliranga na kuyowoya kuti “ŵapositole ŵaŵafumiskire kuwaro nyengo yichoko waka.” (Mil. 5:34) Wakati wayowoya za magulu ghanyake agho ghakamara chifukwa chakuti ŵalongozgi ŵawo ŵakafwa, Gamaliyeli wakaphalira khoti ili kuti lizikire pakuchita vinthu na ŵapositole, awo Mulongozgi wawo Yesu wakaŵa kuti wafwa sonosono. Gamaliyeli wakati: “Kulimbana nawo yayi ŵanthu aŵa, kweni muŵaleke waka. Pakuti usange chisambizgo ichi panji mulimo uwu ni vyakufuma ku ŵanthu, vimalenge vyekha. Kweni usange ni vyakufuma kwa Chiuta, muvimazgenge yayi. Paumaliro mungasangika kuti mukulimbana na Chiuta.” (Mil. 5:38, 39) Ŵeruzgi ŵakapulikira ivyo wakayowoya. Ndipouli, ŵakaŵathyapura ŵapositole na kuŵaphalira kuti ŵaleke “kuyowoya mu zina la Yesu.”—Mil. 5:40.
13 Mazuŵa ghano napo Yehova wangimika ŵanthu nga Gamaliyeli kuti ŵawovwire ŵanthu ŵake. (Zinth. 21:1) Kwizira mu mzimu wake, Yehova wangakhuŵilizga ŵawusi ŵankhongono, ŵeruzgi, panji ŵakupanga malango kuchita vinthu mwakuyana na khumbo lake. (Neh. 2:4-8) Kweni usange wangazomerezga kuti ‘tisuzgike chifukwa cha urunji,’ tikwenera kumanya vinthu viŵiri. (1 Pet. 3:14) Chakwamba, Chiuta wangatipa nkhongono kuti tizizipizge. (1 Kor. 10:13) Chachiŵiri, ŵakususka ‘ŵangamazga yayi’ mulimo wa Chiuta.—Yes. 54:17.
14, 15. (a) Kasi ŵapositole ŵakachita wuli ŵati ŵathyapulika, ndipo chifukwa wuli? (b) Yowoyani chiyelezgero icho chikulongora kuti ŵanthu ŵa Yehova ŵakuzizipizga na chimwemwe.
14 Kasi ŵapositole ŵakagongowa panji kulopwa chifukwa cha kuthyapulika? Ndimo ŵakachitira yayi. “Ŵakafumapo panthazi pa Khoti Likuru, ŵakasekeleranga.” (Mil. 5:41) Chifukwa wuli “ŵakasekeleranga”? Ŵakasekeleranga chifukwa chakuti ŵakathyapulika yayi. Ŵakasekeleranga chifukwa chakuti ŵakamanya kuti ŵakatambuzgika chifukwa cha kuŵa ŵakugomezgeka kwa Yehova ndiposo chifukwa chakuti ŵakalondezga mendero gha Yesu, chakuwonerapo chawo.—Mat. 5:11, 12.
15 Nga umo ŵakachitira ŵabali ŵithu ŵakwambilira, tikuzizipizga na chimwemwe para tikusuzgika chifukwa cha makani ghawemi. (1 Pet. 4:12-14) Vikutinozgera yayi para ŵanthu ŵakutiwofya, kutitambuzga, panji kutijalira mu jele. Kweni tikukhorwa chifukwa cha kuŵa ŵakugomezgeka. Wonani ivyo vikachitikira Henryk Dornik, uyo kwa vyaka vinandi wakazizipizga apo wakatambuzgikanga na maboma ghankhaza. Mu Ogasiti 1944, ŵamazaza ŵakamutumizga iyo na mubali wake ku misasa yakusuzgirako ŵanthu. Awo ŵakaŵasuzganga ŵakati: “Ŵanthu aŵa ŵangasintha yayi nanga mungaŵanyengelera. Ŵakukondwa kufwira chipulikano chawo.” Mubali Dornik wakalongosora kuti: “Nangauli khumbo lane likaŵa lakuti nifwire chipulikano yayi, kweni nkhaŵa wakukondwa chifukwa cha kuŵa wakugomezgeka kwa Yehova mukati mu suzgo.”—Yak. 1:2-4.
Nase tikupharazga “kunyumba na nyumba” nga umo ŵakachitiranga ŵapositole
16. Kasi ŵapositole ŵakalongora wuli kuti ŵakaŵikapo mtima kuchitira ukaboni mwakukwana, ndipo ise tikulondezga wuli nthowa ya ŵapositole yakupharazgira?
16 Mwaluŵiro, ŵapostole ŵakambiraso mulimo wa kupharazga. Ŵakawopa yayi. Ŵakalutilira “zuŵa lililose mu tempile na ku nyumba na nyumba” kuchita mulimo wa “kupharazga makani ghawemi ghakuyowoya vya Khristu.” d (Mil. 5:42) Ŵapharazgi ŵamwamphu aŵa ŵakaŵikapo mtima kuchitira ukaboni mwakukwana. Wonani kuti ŵakalutanga ku nyumba za ŵanthu na uthenga, nga umo Yesu Khristu wakaŵaphalilira. (Mat. 10:7, 11-14) Tikukayika yayi kuti ndicho ntchifukwa ŵakazuzga Yerusalemu na chisambizgo chawo. Mazuŵa ghano, Ŵakaboni ŵa Yehova ŵakumanyikwa chifukwa cha kulondezga nthowa ya ŵapositole iyi yakupharazgira. Para tikuluta ku nyumba yiliyose mu chigaŵa chithu, tikulongora kuti nase tikuchitira ukaboni mwakukwana, kupeleka mwaŵi kwa waliyose kuti wapulike makani ghawemi. Kasi Yehova watumbika uteŵeti withu wa ku nyumba na nyumba? Enya, watumbika. Mu mazuŵa ghaumaliro agha, ŵanthu mamiliyoni ghanandi ŵapulikira uthenga wa Ufumu, ndipo ŵanandi kakaŵa kakwamba kupulika makani ghawemi apo Kaboni wakiza pa nyumba yawo.
Ŵanalume Ŵakukwana Kuti Ŵachite “Mulimo Wakwenelera” (Milimo 6:1-6)
17-19. Kasi pakawuka suzgo wuli, ndipo ŵapositole ŵakapeleka ulongozgi wuli kuti ŵamazge suzgo ili?
17 Mpingo uphya wura ukaŵa na suzgo linyake lakufuma mu mpingo mwenemumo. Kasi likaŵa suzgo wuli? Ŵasambiri ŵanandi awo ŵakabatizikanga ŵakaŵa ŵalendo ku Yerusalemu ndipo ŵakakhumbanga kuti ŵasambire vinandi pambere ŵandawelere kwawo. Ŵasambiri awo ŵakakhalanga mu Yerusalemu ŵakapeleka ndalama zakugulira chakurya na vinthu vinyake. (Mil. 2:44-46; 4:34-37) Pa nyengo iyi pakawuka suzgo. “Vyokoro [ivyo vikayowoyanga Chigiriki] ŵakavizerezganga pa kugaŵa vyakurya zuŵa na zuŵa.” (Mil. 6:1) Ndipouli, vyokoro ivyo vikayowoyanga Chihebere, ŵakavizerezganga yayi. Ntheura suzgo likwenera kuti likaŵa sankho. Sankho ntchimoza mwa vinthu ivyo vikukaŵa yayi kugaŵaniska ŵanthu.
18 Ŵapositole, awo ŵakaŵa wupu wakulongozga wa mpingo uwo ukakuranga, ŵakamanya kuti chikaŵa chiwemi chara kwa iwo kuleka “kusambizga mazgu gha Chiuta na kwamba kukagaŵa vyakurya.” (Mil. 6:2) Kuti ŵamazge nkhani iyi, ŵakaphalira ŵasambiri kuti ŵapenje ŵanalume 7 “awo ŵali na mzimu kweniso vinjeru” kuti ŵapositole ŵaŵape “mulimo wakwenelera uwu.” (Mil. 6:3) Ŵanalume ŵakwenelera ŵakakhumbikwanga chifukwa mulimo uwu ukwenera kuti ukaŵa wa kugaŵa vyakurya pera yayi, ukwenera kuti ukaŵaso wa kusunga ndalama, kugura vinthu, na kuvilemba mu mabuku. Ŵanalume wose awo ŵakasoleka ŵakaŵa na mazina Ghachigiriki, icho panji chikawovwira kuti vyokoro ivyo vikadandawuranga vikolerane nawo. Ŵapositole ŵati ŵaghanaghanirapo na kulomba pa mazina agho ŵabali ŵakasachizga, ŵakimika ŵanalume 7 kuti ŵachite “mulimo wakwenelera uwu.” e
19 Kasi ŵanalume 7 awo ŵakasankhika kuti ŵagaŵenge vyakurya ŵakenera kuleka kupharazga makani ghawemi? Yayi. Yumoza wa awo ŵakasoleka wakaŵa Stefano, uyo wakaŵa wachikanga ndiposo wankhongono pakuchitira ukaboni. (Mil. 6:8-10) Filipu nayo wakaŵa yumoza wa ŵanalume 7 aŵa, ndipo wakuchemeka kuti “mupharazgi.” (Mil. 21:8) Ntheura vikuwoneka kuti ŵanalume aŵa ŵakalutilira kupharazga Ufumu mwamwamphu.
20. Kasi ŵanthu ŵa Chiuta mazuŵa ghano ŵakuchita wuli vinthu nga mbapositole?
20 Ŵanthu ŵa Yehova mazuŵa ghano ŵakuchita vinthu nga mbapositole. Ŵanalume awo ŵakupika milimo mu mpingo ŵakwenera kulongora dankha vinjeru vya Chiuta ndiposo ukaboni wakuti mzimu utuŵa ukugwira ntchito pa iwo. Mwakulongozgeka na Wupu Wakulongozga, ŵanalume awo ŵakufiska ivyo Malemba ghakuyowoya ŵakwimikika kuŵa ŵalara panji ŵateŵeti ŵakovwira mu mipingo. f (1 Tim. 3:1-9, 12, 13) Awo ŵakufiska ivyo vikukhumbikwa tingati ŵimikika na mzimu utuŵa. Ŵanalume ŵakulimbikira aŵa ŵakuchita “mulimo wakwenelera” mu nthowa zinandi chomene. Mwachiyelezgero, ŵalara ŵanganozga ndondomeko yakuti ŵachekuru ŵakugomezgeka awo mbakusoŵerwa chomene ŵawovwirike. (Yak. 1:27) Ŵalara ŵanyake ŵakutangwanika na kuzenga Nyumba za Ufumu, kunozga vya maungano, panji kuchita mulimo wa kudumbiskana na chipatala. Ŵateŵeti ŵakovwira ŵakuchita milimo yinandi iyo kuti nja kuliska panji kusambizga mwakudunjika yayi. Ŵanalume wose ŵakwimikika aŵa ŵakwenera kuchita makora milimo yose, ya mpingo na yinyake iyo ŵangapika na gulu kweniso mulimo wa kupharazga makani ghawemi gha Ufumu.—1 Kor. 9:16.
“Mazgu gha Chiuta Ghakalutilira Kuthandazgika” (Milimo 6:7)
21, 22. Kasi ntchivichi chikulongora kuti Yehova wakatumbika mpingo uwo ukambanga waka?
21 Na wovwiri wa Yehova, mpingo wura ukajumpha nthambuzgo ndiposo suzgo la mukati mu mpingo ilo mphanyi likagaŵaniska mpingo. Yehova wakatumbika nadi, chifukwa tikuphalirika kuti: “Mazgu gha Chiuta ghakalutilira kuthandazgika, ndipo ŵasambiri ŵakalutilira kusazgikira mu Yerusalemu. Ŵasembe ŵanandi ŵakamba kuŵa na chipulikano.” (Mil. 6:7) Ili ndimoza mwa malipoti ghakukondweska agho ghakusangika mu buku la Milimo. (Mil. 9:31; 12:24; 16:5; 19:20; 28:31) Kasi mazuŵa ghano tikukhozgeka yayi para tikupulika malipoti ghakukondweska gha umo mulimo wa kupharazga Ufumu ukwendera mu vigaŵa vinyake vya charu chapasi?
22 Mu nyengo ya ŵapositole, ŵalongozgi ŵa chisopa ŵakakhumba chara kuleka kutambuzga Ŵakhristu ŵaunenesko. Nthambuzgo yikuru yikaŵa pafupi kwamba. Stefano ndiyo wakaŵa wakwamba kumuwukira, nga umo tiwonerenge mu mutu wakulondezgapo.
a Wonani bokosi lakuti “Sanihedirini, Khoti Likuru la Ŵayuda.”
b Agha ni malo ghakwamba pa malo 20 agho pakuzunulika zina lakuti mungelo mu buku la Milimo. Kukwambilira, pa Milimo 1:10, ŵangelo ŵakuyowoyeka kuti ‘ŵanalume awo ŵakavwara malaya ghatuŵa.’
c Wonani bokosi lakuti “ Gamaliyeli, Munthu Wakuchindikika Pakati pa Ŵarabi.”
d Wonani bokosi lakuti “ Kupharazga ‘Nyumba na Nyumba,’”
e Ŵanalume aŵa ŵakwenera kuti ŵakafiska ivyo vikukhumbikwa kuti munthu waŵe mulara, chifukwa “mulimo wakwenelera” uwu ukaŵa ukuru. Ndipouli, Malemba ghakuyowoyapo yayi nyengo yenecho iyo ŵanalume ŵakamba kwimikika kuŵa ŵalara panji ŵalaŵiliri mu mpingo Wachikhristu.
f Mu nyengo ya Ŵakhristu ŵakwambalira, ŵanalume ŵakwenelera ndiwo wakimikanga ŵalara mu mpingo. (Mil. 14:23; 1 Tim. 5:22; Tito 1:5) Mazuwa ghano, Wupu Wakulongozga ukusora ŵalaŵiliri ŵa dera kuti ndiwo ŵazomerezgenge munthu kuŵa mulara panji muteŵeti ŵakovwira.
