Kwa Imwe Mukutemwa Yehova:

Mu 1971, wose awo ŵakiza pa Ungano wa Chigaŵa wa mutu wakuti “Divine Name” (Zina la Chiuta) ŵakakondwa chomene kupokera mabuku ghanandi agho ghakafuma pa ungano uwu. Ŵanthu ŵakayowoya kuti ‘ŵakakhazganga yayi’ kuti ŵangapokera mabuku ghanandi nthena. Pakuyowoya vya buku linyake ilo likafuma pa ungano uwu, mubali munyake wakati: “Buku ili latijura kumaso pa vinthu ivyo vikwiza!” Kasi wakanenanga buku wuli? Buku lakuti “The Nations Shall Know That I Am Jehovah”—How? (“Mitundu Yizamumanya Kuti Ine Ndine Yehova”—Munthowa Wuli?) Chifukwa wuli ŵanthu ŵakakondwa chomene na buku ili? Chifukwa likalongosoraso makora mauchimi agho ghali mu buku la Ezekiyeli, agho ghakukhwaska munthazi mwa ŵanthu wose.

Kufuma waka apo buku lakuti ‘Know Jehovah’ likafumiskikira, ŵanthu ŵa Chiuta ŵasazgikira chomene, kufuma pa 1.5 miliyoni m’paka kujumpha 8 miliyoni. (Yes. 60:22) Ŵateŵeti ŵa Yehova aŵa ŵakufuma mu viyowoyero vyakujumpha 900 ndipo ŵalipo mamiliyoni ghanandi. (Zek. 8:23) Ŵanandi ŵandaŵepo na mwaŵi wakusambira buku ilo likulongosora makora mauchimi agho ntchimi Ezekiyeli yili kulemba.

Chinyake ntchakuti, kufuma waka mu 1971, kapulikiskiro ka fundo zinyake za mu Baibolo kasintha chomene chifukwa ungweru ukuŵaliraŵalira. (Zinth. 4:18) Mu 1985 tikamba kupulikiska makora umo ŵa “mberere zinyake” ŵakupimikira ŵarunji kuti ŵaŵe ŵabwezi ŵa Chiuta. (Yoh. 10:16; Rom. 5:18; Yak. 2:23) Kufuma apo, mu 1995 tikapulikiska kakwamba fundo yakuti ŵanthu ŵazamweruzgika kaumaliro kuti ni “mberere” panji “mbuzi” pa “suzgo yikuru” iyo yikwiza. (Mat. 24:21; 25:31, 32) Kusintha kose uku kwapangiska kuti kapulikiskiro kithu ka buku la Ezekiyeli nako kasinthe.

Mu vyaka vyasonosono apa, ungweru walutilira kuŵala. Ghanaghanirani ivyo tikusambira ku ntharika za Yesu. Sono ndipo tikuzipulikiska chomene ntharika izi. Zinandi mwa ntharika izi, zikuyowoya za vinthu ivyo vichitikenge sonosono apa pa suzgo yikuru iyo yikwiza mwaluŵiro. Mwakuyana waka, kapulikiskiro ka mauchimi ghanyake gha mu buku la Ezekiyeli nako kasintha. Ghanyake mwa mauchimi agha ni uchimi wa Gogi wa Magogi (chaputara 38 na 39), mulimo wa mwanalume wakachikwama ka mulembi (chaputara 9), na dambo la viwangwa vyakomira na kubamphika pamoza tumakuni tuŵiri (chaputara 37). Vyose ivi vikulongora kuti vinthu ivyo vikalongosoreka mu buku la ‘Know Jehovah’ vikakhumbikwiranga kusinthika.

Lekani ŵanthu ŵa Yehova ŵanandi ŵafumbanga kuti: “Kasi mphawuli apo tizamuŵa na buku ilo likulongosora umo sono tikupulikiskira mauchimi gha Ezekiyeli?” Zgoro ni buku lakuti Yehova Wawezgerapo Kusopa Kutuŵa! Apo mukusambira buku la mitu 22 ili na kughanaghanirapo pa vithuzi vyakutowa ivyo vilimo, muwonenge kuti pakachitika kafukufuku wakukwana kuti buku ili lilembeke. Tikalomba chomene kuti tipulikiske chifukwa icho Yehova wakatumira Ezekiyeli kulemba buku lakukondweska ili la mu Baibolo. Tikaghanaghanirapo chomene mafumbo nga ghakuti: Kasi nkhani za mu buku la Ezekiyeli zikaŵasambizga vichi ŵanthu ŵa mu nyengo ya Ezekiyeli, ndipo ise zikutisambizga vichi? Kasi ni mauchimi wuli agho ghakuyowoya za vinthu ivyo vichitikenge munthazi? Kasi tikwenera kughanaghana  kuti kalikose ako kakuzunulika mu mauchimi gha Ezekiyeli kakwimira chinthu chinyake? Mazgoro gha mafumbo agha ghakutovwira kuti tipulikiske makora buku la Ezekiyeli.

Apo mukuŵazga buku la Ezekiyeli kufuma kukwamba m’paka kuumaliro, mukukondwa kuwona umo gulu lakuchanya la Yehova likuchitira vinthu. Tikukayika yayi kuti mukuzizwa na fundo zapachanya izo Yehova wali kuŵikira awo ŵakukhumba kumusopa mwakuzomerezgeka, ŵa kuchanya na charu chapasi. Buku ili limovwiraninge kumanya makora ivyo Yehova wachitira kale ŵanthu ŵake, kweniso ivyo waŵachitirenge munthazi. Muwonenge kuti buku ili likudidimizga fundo ziŵiri mwakuwerezgawerezga. Fundo yakwamba njakuti, para tikukhumba kukondweska Yehova, tikwenera kumanya na kuzomera kuti iyo ndiyo Fumu ya Chilengiwa chose. Fundo yachiŵiri, tikwenera kusopa Yehova munthowa iyo wakukondwa nayo, ndipo umoyo withu ukwenera kukolerana na fundo zake zapachanya.

Khumbo lithu ndakuti mphanyi buku ili lamukhozgani kuti musopenge Yehova munthowa iyo yikuchindika na kutuŵiska zina lake likuru na lituŵa. Kweniso mphanyi lamuchiskani kuti mulindilirenge mwakunweka nyengo iyo mitundu yose yizamumanya kuti iyo ni Yehova.—Ezek. 36:23; 38:23.

Mphanyi Yehova, Dada withu wachitemwa, wamutumbikani apo mukuyezgayezga kupulikiska mauchimi agho Ezekiyeli wakakhuŵilizgika kulemba.