Uchimi wa Baibolo kweniso mdauko vikulongolerathu kuti Yesu wakakhala pa mpando waufumu kuchanya mu 1914. Nakuti apa ndipo ghakambira mazuŵa ghaumaliro gha charu cha Satana. Kasi Yesu wakachita vichi wakati waŵa Themba? Kasi wakamba nyengo yeneyiyo kufwatura ŵateŵeti ŵake pa charu chapasi kufuma ku wuzga wa Babuloni Mukuru? Kasi wakimika “muzga wakugomezgeka na wavinjeru” mu 1914 na kwambapo ntchito yikuru ya kuvuna?—Mat. 24:45.

Ukaboni ukulongora kuti ndimo vikaŵira yayi. Kumbukani kuti mpositole Petrosi wakalemba kuti cheruzgo chizamwambira “pa nyumba ya Chiuta.” (1 Pet. 4:17) Ntchimi Malaki nayo yikayowoya kuti yizamuŵapo nyengo apo Yehova wazamwiza mu nyumba yake iyo ŵanthu ŵakusoperamo pamoza na “thenga la phangano,” Mwana wa Chiuta. (Mal. 3:1-5) Wakati nyengo iyi yizamuŵa ya kutozga na kuyezga. Kasi mdauko ukulongora kuti mauchimi agha ghakafiskika?

 Enya, ghakafiskika! Kwambira mu 1914 kuzakafika kuuyambiro wa 1919 yikaŵa nyengo yakusuzga chomene ku Ŵasambiri ŵa Baibolo (umo Ŵakaboni ŵa Yehova ŵakachemekeranga kale) chifukwa ndipo ŵakayezgeka na kutozgeka. Ŵanthu aŵa ŵakakhazganga kuti mu 1914 umaliro wizenge, kweni apo umaliro ukizako yayi ŵanandi ŵakakhuŵara. Ŵanyake ŵakakhuŵaraso chomene mu 1916, apo Charles T. Russell, uyo wakalongozganga pakati pa ŵanthu ŵa Chiuta, wakafwa. Ŵanyake awo ŵakademelera chomene kwa Mubali Russell ŵakakana kukolerana na Joseph F. Rutherford, uyo wakanjira mu malo gha Russell. Mu gulu mukawuka mphindano mwakuti pakakhala pachoko kuti gulu ligaŵikane mu 1917. Kufuma apo, mu 1918, Mubali Rutherford na ŵanyake 7 ŵakeruzgika mu khoti, ŵakaŵavwalika waka mulandu, ndipo ŵakajalirika mu jele. Vikulongora kuti ŵalongozgi ŵa visopa ndiwo ŵakachochozera. Likuru ku Brooklyn likajalika. Apa vikulongolerathu kuti ŵanthu ŵa Chiuta ŵakaŵa ŵandafwatulike ku Babuloni Mukuru!

Kweni ntchivichi chikachitika mu 1919? Vinthu vikasintha mwakuzizwiska kweniso mwaluŵiro chomene. Kuuyambiro wa chaka ichi, Rutherford na ŵanyake ŵakafumiskika mu jele. Nyengo yeneyiyo ŵakambaso ntchito yawo! Mwaluŵiro ŵakanozga vyakuti paŵe ungano wapadera, ndipo ntchito ya kulemba magazini yiphya, The Golden Age, (sono ni Wukani!) yikambika. Magazini yiphya iyi yikalembeka kuti yiwovwire pakupharazgira ŵanthu. Chinyakeso ntchakuti mu mpingo uliwose mukimikika mulaŵiliri kuti wanozgenge ndondomeko ya kupharazga na kukhukiska ŵabali kupharazga. Chaka chenechira, pakafuma Bulletin (sono Uteŵeti na Umoyo Wachikhristu—Kabuku ka Maungano) kuti kawovwire pakunozga ndondomeko ya upharazgi.

Kasi vinthu vikachitikirachi nthena? Apa vikulongolerathu kuti Khristu wakafwatura ŵanthu ŵake ku wuzga wa Babuloni Mukuru. Wakimika muzga wakugomezgeka na wavinjeru. Nakuti ntchito yakuvuna yikaŵa mukati. Kwambira mu chaka cha 1919, ntchito yakupharazga yatotoma chomene.