BOKOSI 14A
Ivyo Tikusambira ku Mboniwoni ya Ezekiyeli ya Tempile
Kusopa Kutuŵa Kwakwezgeka na Kuvikilirika
Tempile la mu mboniwoni lakwezgeka pa “phiri litali chomene” (1). Kasi ise tikukwezga kusopa kutuŵa, ndipo tikuwona kuti ntchinthu chakwamba pa umoyo withu?
Linga lakuwaro (2), ilo likazingilizga tempile ilo likaŵa pakatikati pa malo ghasani (3), likutikumbuska kuti tingazomerezganga yayi chinthu chilichose kunanga kusopa kwithu. Pakuti vinthu vyambura kupatulika vikwenera kuŵa kutali na kusopa kutuŵa, awo ŵakusopa Yehova mazuŵa ghano nawo ŵakwenera kuŵa kutali chomene na ukazuzi, panji makhaliro ghaheni.—Ezek. 42:20.
Vitumbiko Vyambura Kumara
Kamugelo ka maji kakufuma mu malo ghakupatulika gha tempile, kakusanuzgika na kuzgoka mlonga ndipo kakupeleka umoyo na vundira mu charu (4). Tizamusambira za vitumbiko ivi mu Mutu 19 wa buku ili.
Fundo Izo Ŵanthu Wose Ŵakwenera Kwendera
Vipata vitali vyakuwaro (5) na vipata vyamukati (9) vikutikumbuska kuti Yehova wali kuŵika fundo zapachanya za makhaliro ghawemi, izo wose awo ŵakutemwa kusopa kutuŵa ŵakwenera kulondezga. Wonani kuti vipata vyakuwaro na vyamukati vyose vikuyana waka. Ichi ntchakwenelera, chifukwa fundo zaurunji izo Yehova wakukhumba kuti ŵateŵeti ŵake wose ŵalondezgenge ni zimoza, vilije kanthu kuti ŵali na udindo wuli panji ŵakuchita vichi.
Chakurya pa Thebulu la Yehova
Vipinda vyakulyeramo (8) vikutikumbuska kuti kale, ŵanthu ŵakalyeranga pamoza sembe zinyake izo ŵakizanga nazo ku tempile. Para ŵachita nthena, vikaŵa nga kuti ŵakurya chakurya pamoza na Yehova. Ivi vikupambanako na ivyo vikuchitika mu tempile lauzimu ilo Ŵakhristu ŵakusoperamo mazuŵa ghano, pakuti “sembe yimoza” yili kupelekeka kale. (Heb. 10:12) Kweni tichali kupeleka sembe zithu za malumbo.—Heb. 13:15.
Chisimikizgo cha Chiuta
Nyengo zinyake mungapulikiska yayi chifukwa icho vinthu vyose mu mboniwoni iyi vikapimikira. Kweni vikutisambizga fundo yikuru iyi: Vikutisimikizgira kuti khumbo la Yehova la kuwezgerapo kusopa kutuŵa lizamufiskika kwambura kutondeka, ndipo lizamusinthapo yayi. Nangauli Ezekiyeli wandayowoyepo kuti wakawona munthu mu mboniwoni iyi, kweni wakalemba ulongozgi wankhongono uwo Yehova wakapeleka ku ŵasembe, ŵalongozgi, na ŵanthu. Wose awo ŵakuteŵetera Chiuta ŵakwenera kusungilira fundo zake zaurunji.
