Satana na viŵanda vyake ŵarutilirenge cara kupusika ŵantu. Yehova wali kuŵacimbizgako kale kucanya. (Chivumbuzi 12:9) Sono-sono apa Ciuta wawukirenge Satana na viŵanda vyake. Mu mboniwoni yakufuma kwa Ciuta, mpostole Yohane wakati: “Nkawona mungelo wakwikha kufuma kucanya, wakuŵa na cijuriro ca cizongwe na unyoro ukuru mu woko lake. Ndipo wakacikora Cinjoka cira, njoka ya ciyamwaka, ico ndi Musesi na Satana ndipo wakacikaka myaka cikwi, ndipo wakaciponya mu cizongwe, ndipo wakajarapo na kudidimizgapo pacanya, mwakuti cireke kupusikaso mitundu yisuke yimare myaka cikwi.” (Chivumbuzi 20:1-3) Paumaliro pake Satana na viŵanda vyake ŵazamuparanyika kwamuyirayira.—Chivumbuzi 20:10.

Ŵantu ŵaheni ŵazamudumulika.—Salimo 37:9, 10; Luka 13:5.

Pamanyuma pakuti Satana na viŵanda ŵafumapo, Yehova wazamupereka  vitumbiko vinandi ku ŵantu. Mukumanya kuti ŵakufwa ŵalije umoyo, iwo ŵakumanya kantu cara. Yesu wakayerezgera nyifwa na tulo—enya, kugona kwambura kulota maloto. (Yohane 11:11-14) Iye wakayowoya ntena cifukwa wakamanya kuti nyengo yizenge penepapo awo ŵalikufwa ŵazamuŵaso na umoyo. Wakayowoya kuti: “Ora likwiza mu leneilo ŵose aŵo ŵali mu mararo ŵati . . . ŵafumengemo.”—Yohane 5:28, 29; yerezgerani na Milimo 24:15.

Ŵakufwa ŵazamuŵaso na umoyo pano pacaru capasi. Mu malo mwa kupharazga kuti kuli nyifwa, kuzamuŵa cipharazgo cakukondweska cakuti ŵantu ŵawuka! Mwee, naco cizamuŵa cimwemwe kupokelera ŵabali ŵithu ŵakutemweka awo ŵalikufwa!