1, 2. Chifukwa wuli mukumutemwa Yehova Chiuta?

KASI mukumutemwa Chiuta? Panji mukumutemwa chomene, nakuti muli kujipeleka kwa iyo. Mukumuwona kuti ni Mubwezi winu wapamtima. Kweni Yehova wakamutemwaninge kale pambere imwe mundambe kumutemwa. Baibolo likutiphalira kuti: “Ise tili na chitemwa chifukwa ndiyo wakamba kutitemwa.”—1 Yohane 4:19.

² Wonani vinthu ivyo vikulongora kuti Yehova wakutitemwa. Wali kutipa charu chapasi kuti tikhalengemo, wali kutipaso vyose vyakukhumbikwa kuti tiŵe ŵamoyo. (Mateyu 5:43-48; Chivumbuzi 4:11) Chiuta wakukhumba kuti tiŵe ŵabwezi ŵake, ndipo watovwira kuti timanye vinandi vya iyo. Para tikuŵazga Baibolo ndikuti tikutegherezga kwa Yehova. Wakupulikizga para tikumulomba. (Salimo 65:2) Wakutilongozga na kutipa nkhongono kwizira mu mzimu wake utuŵa. (Luka 11:13) Wakafika na pakutuma Mwana wake wakuzirwa pano pasi kuti watifwature ku kwananga na nyifwa.—Ŵazgani Yohane 3:16; Ŵaroma 5:8.

3. Kasi tingachita wuli kuti tiŵe paubwezi uwemi na Yehova?

³ Para muli na ŵabwezi, ghanaghanirani vya mubwezi  winu wapamtima yumoza, uyo wakuŵa namwe pamtende na pa masuzgo. Pakukhumbikwira kulimbikira kuti tiŵe na ŵabwezi ŵanthena. Ndimo vikukhumbikwira kuti tiŵe paubwezi na Yehova, Mubwezi muwemi chomene uyo munthu wangaŵa nayo. Ubwezi withu na iyo ungaŵa wambura kumara. Lekani Baibolo likutiphalira kuti: “Mujisungilire mu chitemwa cha Chiuta.” (Yuda 21) Kasi tingachita wuli? Baibolo likuti: “Ili ni ng’anamuro la kutemwa Chiuta lakuti tisungilire malango ghake, ndipo malango ghake ngazito yayi.”—1 Yohane 5:3.

4, 5. (a) Kasi “kutemwa Chiuta” chikung’anamurachi? (b) Kasi vikenda wuli kuti mwambe kumutemwa chomene Yehova?

⁴ Kasi Baibolo likung’anamura vichi para likuti “kutemwa Chiuta”? Likung’anamura umo ise tikujipulikira mu mtima withu pakuyowoya vya Chiuta. Kasi mukukumbuka umo vikaŵira mukati mwamba waka kutemwa Yehova?

⁵ Kumbukani umo mukajipulikira mwati mwamanya kuti Yehova wakukhumba kuti muzakakhale mu charu chiphya kwamuyirayira. Mukasambira ivyo wali kuchita kuti muzakakhale nadi mu charu chiphya. Mukamanya kuti Yehova wakapeleka chawanangwa chakuzirwa chomene kwa ise apo wakatuma Mwana wake pa charu chapasi. (Mateyu 20:28; Yohane 8:29; Ŵaroma 5:12, 18) Mukati mwamanya kuti Yehova wakumutemwani chomene, mukakondwa, ndipo namwe mukamba kumutemwa chomene.—Ŵazgani 1 Yohane 4:9, 10.

6. Kasi ntchivichi chikukhumbikwa pakutemwa munthu? Kasi mwachita vichi chifukwa cha kutemwa Chiuta?

⁶ Kweni kutemwa Chiuta kukaŵa kwamba waka. Para tikutemwa munthu munyake, tikuchita vinandi padera  pakuyowoya waka kuti “nkhukutemwa.” Chitemwa chikutituma kuchita vinthu ivyo vikukondweska munthu uyo tikumutemwa. Namwe mukati mwamba kutemwa Yehova mukamba kuchita vinthu ivyo wangakondwa navyo. Chitemwa ichi chikati chakura, panji mukajipeleka kwa iyo na kubatizika. Ivyo mukachita apa vikulongora kuti mukalayizga Yehova kuti mumuteŵeterenge umoyo winu wose. (Ŵazgani Ŵaroma 14:7, 8.) Kasi mungachita wuli kuti mufiske layizgo ili?

7. Kasi tichitenge vichi usange tikutemwa Yehova? Kasi malango ghake ghanyake ngakuti wuli?

⁷ Pakuti tikumutemwa Yehova, ‘tikusungilira malango ghake.’ Kasi tikuchita wuli? Para tikumupulikira. Mu Baibolo, Yehova wakutiphalira umo taŵanthu tingakhalira. Wakutiphalira kuti ntchiheni kuloŵera, kwiba panji kuteta, kugonana na munthu uyo ni mfumu panji muwoli wako yayi, kweniso kusopa munthu panji chinthu m’malo mwa iyo.—1 Ŵakorinte 5:11; 6:18; 10:14; Ŵaefeso 4:28; Ŵakolose 3:9.

8, 9. Kasi tingamanya wuli ivyo Yehova wakukhumba para mu Baibolo mulije dango lakudunjika pa nkhani yinyake? Yowoyani chiyelezgero.

⁸ Kweni tikwenera kuchita vinandi kuti tikondweske Yehova padera pa kupulikira waka malango ghake. Chiuta wandatipe ndondomeko ya malango agho ghangatovwira pa chilichose. Ntheura nyengo zinyake tingalisanga yayi dango lakudunjika mu Baibolo lakutiphalira chakuchita pa nkhani yinyake. Kasi tingachita wuli kuti tisankhe mwamahara panthena apa? (Ŵaefeso 5:17) Mu Baibolo muli fundo, izo ni unenesko wakuzirwa uwo ukutisambizga umo Yehova wakuwonera vinthu. Para tikuŵazga  Baibolo, tikumumanya makora Yehova nga ni Munthu. Tikumanya umo wakughanaghanira, ivyo wakutemwa na ivyo wakutinkha.—Ŵazgani Salimo 97:10; Zintharika 6:16-19; wonani Mazgu Ghakuumaliro 1.

⁹ Chiyelezgero, kasi tikusankha wuli pulogiramu yakuti tiwonelere pa TV panji ivyo tingawona pa Intaneti? Yehova wandayowoyepo chilichose pa nkhani izi. Kweni fundo izo wakutipa zingatovwira kuti tisankhe vinthu mwamahara. Vyakusanguluska vinandi mazuŵa ghano ni vyakuzura na nkhaza na vya kugonana. Baibolo likutiphalira kuti Yehova “wakutinkha waliyose uyo wakutemwa nkhaza” kweniso kuti “wazamweruzga ŵazaghali.” (Salimo 11:5; Ŵahebere 13:4) Kasi fundo izi zingatovwira wuli kuti tisankhe vinthu mwamahara? Para tamanya kuti chinthu chinyake Yehova wakuchitinkha panji wakuti ntchiheni, tikwenera kuchileka.

10, 11. Chifukwa wuli tikupulikira Yehova?

¹⁰ Chifukwa wuli tikupulikira Yehova? Tikupulikira chifukwa cha kopa kulangika yayi panji kopa masuzgo agho ghangaŵapo para tachita vinthu mwambura mahara. (Ŵagalatiya 6:7) Kweni tikupulikira Yehova chifukwa chakuti tikumutemwa. Ŵana ŵakukhumba kukondweska adada ŵawo, nase tikukhumba kukondweska Dada withu wakuchanya. Tikujipulika makora chomene pakumanya kuti Yehova wakukondwa nase!—Salimo 5:12; Zintharika 12:2; wonani Mazgu Ghakuumaliro 2.

¹¹ Tikupulikira Yehova para tawona kuti ntchipusu pera yayi panji para tasoŵa kwakunjilira. Tikuchita kusankha yayi pakulondezga malango panji fundo zake. (Dotoronome 12:32) Kweni tikumupulikira na mtima  wose, nga ngwamasalimo uyo wakati: “Nkhukondwa na malango ghinu, enya, nkhughatemwa.” (Salimo 119:47; Ŵaroma 6:17) Tikukhumba kuŵa nga ni Nowa, uyo wakalongora kuti wakamutemwanga nadi Yehova pakuchita vyose ivyo wakamutuma. Baibolo likuti Nowa “wakachita ndendende.” (Genizesi 6:22) Kasi mukukhumba kuti Yehova wazakayowoyeso nthena vya imwe?

12. Kasi tingachita wuli kuti tikondweske Yehova?

¹² Kasi Yehova wakujipulika wuli para tikumupulikira? ‘Tikukondweska mtima wake.’ (Zintharika 11:20; 27:11) Uwu ni mwaŵi wamaseŵera cha! Para tikupulikira tikukondweska Mlengi wa vinthu vyose. Kweni iyo wakutichichizga yayi kuti timupulikirenge. M’malo mwake, wali kutipa wanangwa wa kusankha. Ichi chikung’anamura kuti tili na wanangwa wa kusankha kuchita chiwemi panji chiheni. Yehova wakukhumba kuti tichitenge vinthu mwamahara chifukwa chakuti tikumutemwa mwakuti tiŵe na umoyo uwemi.—Dotoronome 30:15, 16, 19, 20; wonani Mazgu Ghakuumaliro 3.

13, 14. Kasi tikumanya wuli kuti malango gha Chiuta nganonono yayi? Yowoyani chiyelezgero.

¹³ Wuli usange tikuwona nga malango gha Yehova nganonono chomene panji ghakutipoka wanangwa? Baibolo likutiphalira kuti: “Malango ghake ngazito yayi.” (1 Yohane 5:3) Lizgu Lachigiriki ilo lang’anamulika kuti “ngazito” lingalembekaso kuti “ngakufyenya.” Mu malemba ghanyake, lizgu ili likuyowoya vya tumalango twambura kwenelera panji ŵanthu awo ŵakufyenya na kupweteka ŵanyawo. (Mateyu 23:4; Milimo 20: 29, 30) Pa vesi ili, Baibolo linyake (New English Translation) likuti:  “Malango ghake ghakutiphyora yayi.” Malango gha Yehova “ngazito” yayi, kung’anamura kuti nganonono yayi kuti titondeke kupulikira. Nyengo zose, iyo wakutipempha kuchita vinthu ivyo wakumanya kuti tingakwaniska.

¹⁴ Tiyelezgere kuti mukukhumba kovwira mubwezi winu uyo wakusamira ku nyumba yinyake. Mubwezi winu wapakira vinthu vyose mu makatoni. Makatoni ghanyake ngapepu na ghapusu kunyamura, kweni ghanyake ngazito ndipo ghakukhumbikwira ŵanthu ŵaŵiri kuti ŵanyamuzgane. Kasi mukughanaghana kuti mubwezi winu wangamupemphani kuti munyamure mwekha makatoni ghazito chomene? Wangachita nthena yayi! Chifukwa wuli? Chifukwa wangakhumba yayi kuti imwe mupwetekeke. Ndimo Yehova nayo waliri, wangatipempha yayi kuchita vinthu ivyo wakumanya kuti patekha tingatondeka kukwaniska. (Dotoronome 30:11-14) Yehova wakutimanya makora chomene. “Wakumanya makora umo tili kupangikira, wakukumbuka kuti tili fuvu.”—Salimo 103:14.

15. Kasi tingagomezga wuli kuti Yehova wali kutipa malango kuti vinthu vitiyendere makora?

¹⁵ Mozesi wakaphalira mtundu wa Israyeli kuti Yehova wakaŵapa malango kuti ‘vinthu viŵayendere makora mazuŵa ghose’ kweniso kuti para ŵapulikira ŵaŵenge “ŵamoyo.” (Dotoronome 5:28-33; 6:24) Lero napo ndimo viliri. Ivyo Yehova wakutipempha kuchita vikutovwira kuti tikhalenge makora. (Ŵazgani Yesaya 48:17.) Yehova, Dada withu, wakumanya ivyo vingatovwira pa umoyo withu. (Ŵaroma 11:33) Baibolo likutiphalira kuti: “Chiuta ntchitemwa.” (1 Yohane 4:8) Ichi chikung’anamura kuti chitemwa ndicho chikumutuma Yehova kuyowoya na kuchita chilichose icho wakhumba.

16. Kasi tikumanya wuli kuti tingapulikira Chiuta nangauli tili ŵakwananga kweniso tikukhala mu charu chiheni?

 ¹⁶ Ntchipusu yayi kupulikira Chiuta nyengo zose. Tikukhala mu charu chiheni icho chikulongozgeka na Dyabulosi. Satana wakupuluska ŵanthu kuti ŵachitenge viheni. (1 Yohane 5:19) Chinyake ntchakuti tikulimbana na maghanoghano ghithu ghakwananga, agho ghangatitondeska kupulikira Chiuta. (Ŵaroma 7:21-25) Kweni tikuŵa na nkhongono zakuchitira icho ntchiwemi chifukwa chakuti tikutemwa Yehova. Chiuta wakuwona apo tikuyezgayezga kumupulikira, ndipo wakutovwira na mzimu wake utuŵa uwo ngwankhongono chomene. (1 Samuyeli 15:22, 23; Milimo 5:32) Mzimu utuŵa ukutovwira kuŵa na makhaliro agho ghangatipangiska kuti tipulikirenge Chiuta.—Ŵagalatiya 5:22, 23.

17, 18. (a) Kasi tisambirenge vichi mu buku ili? (b) Kasi tidumbiskanenge vichi mu mutu wakulondezgapo?

¹⁷ Mu buku ili, tisambirenge umo tingakondweskera Yehova mu umoyo withu. Tisambirenge umo tingalondezgera fundo za Chiuta na nthowa zake. Kumbukani kuti Yehova wakutichichizga yayi kuti timupulikirenge. Para tasankha kupulikira, tikhalenge makora sono kweniso tizamusanga vinthu viwemi chomene munthazi. Chikuru chomene ntchakuti para tikupulikira tikulongora Chiuta kuti tikumutemwa nadi.—Wonani Mazgu Ghakuumaliro 4.

¹⁸ Tose Yehova wali kutipa njuŵi kuti yitovwirenge kumanya icho ntchiwemi na icho ntchiheni. Usange njuŵi yithu tayisambizga, yingatovwira kuti “tisungilire malango ghake.” Ipo kasi njuŵi ni vichi, ndipo tingayisambizga wuli? Tiyeni tiwone.