Kwa awo ŵakutemwa Yehova Chiuta na Mazgu ghake, Baibolo:

Yesu wakati: “Mumanyenge unenesko, ndipo unenesko umufwaturaninge.” (Yohane 8:32) Kumbukani umo mukajipulikira mukati mwamba kumanya unenesko wa mu Baibolo. Mukwenera kuti mukakondwa kumanya kuti mungasambira unenesko mu charu chakuzura na utesi ichi.—2 Timote 3:1.

Yehova Chiuta wakukhumba kuti timanye unenesko. Pakuti tikutemwa ŵanthu, nase tikukhumba kuŵaphalirako unenesko. Kweni pakukhumbikwira vinandi pakuteŵetera Chiuta. Pakuti tikuchindika chomene fundo za Yehova, tikwenera kuchita chilichose icho chikukhumbikwa kwa Mkhristu. Yesu wakalongosora nthowa yakuzirwa iyo tingalongolera Chiuta kuti tikumutemwa. Wakati: “Usange mukusungilira malango ghane, mukhalilirenge mu chitemwa chane, nga umo nane nasungililira malango gha Adada ndipo nkhukhalilira mu chitemwa chawo.”—Yohane 15:10.

Yesu wakuŵatemwa nadi Adada ŵake, ndipo wakuchita chilichose icho Adada ŵake ŵakukhumba. Usange nase tikuchita nga ni Yesu, Yehova watitemwenge ndipo tiŵenge ŵakukondwa nadi. Yesu wakati: “Usange mukumanya vinthu ivi, ŵakukondwa ndimwe usange mukuvichita.”—Yohane 13:17.

Tikugomezga kuti buku ili limovwiraninge kuti mulondezgenge unenesko wa mu Baibolo na kuŵa mubwezi wa Chiuta. Tikumulomberani kuti mulutilire kutemwa Chiuta kweniso kuti mukhalilire “mu chitemwa cha Chiuta . . . na kuzakasanga umoyo wamuyirayira.”—Yuda 21.