1, 2. Kasi tingachita wuli kuti tikhalilire mu chitemwa cha Chiuta?

TOSE tikukhumba kuŵa ŵankhongono na umoyo uwemi. Lekani tikuyezgayezga kurya vyakurya viwemi, kuchita maseŵero ghakukhozga thupi, na kupwelelera thupi lithu. Nangauli pakukhumbikwira chitatata kuti ivi vichitike, kweni tikusanga chandulo, ntheura tikugongowa yayi. Tikukhumbikwiraso kuŵa ŵankhongono na umoyo uwemi munthowa zinyake.

² Nangauli pasono tamba kumumanya makora Yehova, kweni tikwenera kulutilira kukhozga ubwezi withu na iyo. Apo Yuda wakachiskanga Ŵakhristu kuti: “Mujisungilire mu chitemwa cha Chiuta,” wakalongosoraso umo ŵangachitira. Wakaŵaphalira kuti: “Jizengani pa chipulikano chinu chituŵa nkhanira.” (Yuda 20, 21) Kasi tingazenga wuli chipulikano chakukhora?

3-5. (a) Kasi Satana wakukhumba kuti muziwonenge wuli fundo za Yehova? (b) Kasi imwe mukughawona wuli malango kweniso fundo za Yehova?

³ Mukwenera kukhorwa pamwekha kuti nthowa za Yehova ni ziwemi chomene. Satana wakukhumba kuti mughanaghanenge kuti fundo za Yehova ni zakusuzga kuzilondezga kweniso kuti mungaŵa wakukondwa chomene para mungajisankhira  mwekha icho ntchiwemi na chiheni. Kwambira waka mu munda wa Edeni, Satana wakupusika ŵanthu kuti ŵagomezgenge fundo iyi. (Genizesi 3:1-6) Nakuti pasono ndipo wakulimbikira chomene kupusika ŵanthu.

⁴ Kasi Satana wakuneneska? Kasi fundo za Yehova zikutipoka wanangwa? Yayi. Tiyelezgere kuti mukwenda mu malo ghakutowa. Ndipo mukuwona kuti ku chigaŵa chinyake kuli mpanda utali wawaya. Panyake mungaghanaghana kuti, ‘Chifukwa wuli ŵali kuŵikapo mpanda uwu?’ Kweni apo mukughanaghana nthena, mukupulika nkhalamu yikubangura mukati mwa mpanda. Kasi mungalutilira kughanaghana kuti ŵakabudiska kuŵika mpanda uwu? Ntchakumanyamanya kuti mungakondwa kuti mpanda uwu wamuvikilirani ku nkhalamu. Fundo za Yehova zikuyana waka na mpanda uwu, ndipo Dyabulosi wakuyana waka na nkhalamu. Mazgu gha Chiuta ghakutichenjezga kuti: “Sungilirani maghanoghano ghinu, muŵe maso. Mulwani winu Dyabulosi wakuyingayinga nga ni nkhalamu yakuwuluma, wakupenja munthu wakuti wamumilimitizge.”—1 Petrosi 5:8.

⁵ Yehova wakutikhumbira umoyo uwemi chomene. Wakukhumba yayi kuti tipusikike na Satana. Lekani wali kutipa malango na fundo kuti vitivikilire na kutovwira kuti tikondwenge. (Ŵaefeso 6:11) Yakobe wakalemba kuti: “Uyo wakulaŵisiska mu dango lakufikapo ilo nda wanangwa na kulutilira kulilondezga, waŵenge wakukondwa na ivyo wakuchita.”—Yakobe 1:25.

6. Kasi tingakhorwa wuli kuti nthowa za Yehova ni ziwemi chomene?

⁶ Para tikupulikira ulongozgi wa Yehova tikuŵa na umoyo uwemi kweniso ubwezi withu na iyo ukukhora chomene. Mwachiyelezgero, tikusanga chandulo para tikupulikirapempho lake lakuti tilombenge kwa iyo nyengo zose.  (Mateyu 6:5-8; 1 Ŵatesalonika 5:17) Tikukondwa chomene para tikupulikira ulongozgi wake wakuti tiwunganenge pamoza pakumusopa na kukhozgana yumoza na munyake kweniso kuchitako mwakukwana ntchito ya kupharazga na kusambizga. (Mateyu 28:19, 20; Ŵagalatiya 6:2; Ŵahebere 10:24, 25) Apo tikughanaghanira umo vinthu ivi vyatovwilira kukhozga chipulikano chithu, tikukhorwa nadi kuti nthowa za Yehova ni ziwemi chomene.

7, 8. Kasi ntchivichi chingatovwira kuti tileke kufipa mtima na viyezgo ivyo vingiza kunthazi?

⁷ Nyengo zinyake tingafipa mtima kuti panji munthazi chipulikano chithu chizamuyezgeka ndipo tizamutondeka kutchintha. Para muli kughanaghanapo nthena, kumbukani ivyo Yehova wakuyowoya. Iyo wakuti: “Ine Yehova, ndine Chiuta winu, Uyo wakumusambizgani kuti musange chandulo,  Uyo wakumulongozgani mu nthowa iyo mukwenera kwendamo. Muŵenge kuti mwapulikira malango ghane! Mphanyi mtende winu waŵa nga ni mlonga na urunji winu nga ni majigha gha nyanja.”—Yesaya 48:17, 18.

⁸ Para tikupulikira Yehova, mtende withu uŵenge nga ni mlonga uwo ukukamuka yayi. Urunji withu uŵenge nga ni majigha gha nyanja, agho ghakuthavukira pa mchenga nyengo zose. Chilichose icho chingatichitikira pa umoyo withu, tingaŵa ŵakugomezgeka. Baibolo likuti: “Katundu wako umuthwikiske Yehova, ndipo wakovwirenge. Wazomerezgenge chara kuti murunji wawe.”—Salimo 55:22.

9, 10. Kasi munthu wakukhwima wakuŵa wuli?

⁹ Apo mukukhozga ubwezi winu na Yehova, mukwenera ‘kulimbikira kuti muŵe ŵakukhwima.’ (Ŵahebere 6:1) Kasi munthu wakukhwima wakuŵa wuli?

¹⁰ Munthu wakuŵa wakukhwima mwauzimu chifukwa chakuti ni mulara msinkhu yayi. Kuti tiŵe ŵakukhwima, tikwenera kuwona Yehova kuŵa mubwezi withu wapamtima na kuwona vinthu umo iyo wakuviwonera. (Yohane 4:23) Paulosi wakalemba kuti: “Awo ŵakwenda mwakuyana na makhumbiro gha thupi, ŵakuŵika maghanoghano ghawo pa vinthu vya thupi, kweni awo ŵakwenda mwakuyana na mzimu, ŵakughanaghana vinthu vya mzimu.” (Ŵaroma 8:5) Munthu wakukhwima mwauzimu wakuŵika mtima pa vyakusanguluska panji vinthu vyakuthupi yayi. Kweni wakuŵika mtima pakuteŵetera Yehova na kuchita vinthu mwavinjeru pa umoyo wake. (Zintharika 27:11; ŵazgani Yakobe 1:2, 3) Wakupusikika yayi kuti wachite vinthu viheni. Munthu wakukhwima wakumanya icho ntchiwemi ndipo wakuŵikapo mtima kuchichita.

11, 12. (a) Kasi Paulosi wakayowoya vichi vyakukhwaskana na ‘nkhongono zakamanyiro’? (b) Kasi kuŵa Mkhristu wakukhwima vikuyanako wuli na kwamba kuchita maseŵero?

 ¹¹ Pakukhumbikwira kufwilirapo kuti munthu waŵe wakukhwima. Mpositole Paulosi wakalemba kuti: “Chakurya chakukhoma ntcha ŵanthu ŵakukhwima, awo ŵali kuzgoŵezga nkhongono zawo zakamanyiro kupambaniska pakati pa chiwemi na chiheni.” (Ŵahebere 5:14) Mazgu ghakuti “kuzgoŵezga” ghangatipangiska kughanaghana vya umo munthu uyo wakuchita maseŵero ghakugadabuka wakuchitira.

¹² Para tikuwona munthu uyo ni nkhwantha pakugadabuka, tikumanya kuti pakatora nyengo yitali kuti wasambire na kuyezgelera kuti waŵe na luso lwanthena. Munthu uyu wakababika na luso lwa kugadabuka yayi. Para mwana wababika waka, wangakolera yayi chinthu mu mawoko panji kwenda. Kweni para pajumpha nyengo, wakwamba kukora vinthu na kwenda. Para wasambizgika wangamba kuchita maseŵero. Mwakuyana waka, pakukhumbikwira nyengo kweniso kujizgoŵezga kuti munthu waŵe Mkhristu wakukhwima.

13. Kasi ntchivichi chingatovwira kuti tighanaghanenge nga ni Yehova?

¹³ Mu buku ili, tawona umo tingachitira kuti tighanaghanenge nga ni Yehova na kuwona vinthu nga umo iyo wakuviwonera. Tasambira uwemi wa fundo za Yehova na umo tingachitira kuti tizitemwenge. Para tikusankha vyakuchita, tikwenera kujifumba kuti: ‘Kasi ni dango panji fundo wuli za mu Baibolo izo zinganilongozga pa nkhani iyi? Kasi ningazilondezga wuli? Kasi Yehova wakukhumba nichite wuli apa?’—Ŵazgani Zintharika 3:5, 6; Yakobe 1:5.

14. Kasi tikwenera kuchita vichi para tikukhumba kuzenga chipulikano chithu?

¹⁴ Tingalekanga yayi kuzenga chipulikano chithu mwa Yehova. Para tikurya vyakurya vyamagulu, mathupi ghithu ghakuŵa ghankhongono, mwakuyana waka, para tikusambira  vya Yehova chipulikano chithu chikuŵa chankhongono. Apo tikambanga kusambira Baibolo, tikamanya fundo zakwambilira zakukhwaskana na Yehova kweniso nthowa zake. Kweni apo nyengo yikujumphapo, tikwenera kupulikiska vinthu vyakung’anyamira. Ndivyo Paulosi wakang’anamuranga apo wakati: “Chakurya chakukhoma ntcha ŵanthu ŵakukhwima.” Para tikulondezga vinthu ivyo tikusambira, tikuŵa na vinjeru. Baibolo likutiphalira kuti: “Vinjeru ntchinthu chakuzirwa chomene.”—Zintharika 4:5-7; 1 Petrosi 2:2.

15. Chifukwa wuli ntchakuzirwa kuti titemwenge chomene Yehova kweniso ŵabali na ŵadumbu ŵithu?

¹⁵ Munthu wangaŵa wankhongono kweniso umoyo uwemi, kweni wakumanya kuti wakwenera kulutilira kujipwelelera kuti walutilire kuwoneka nthena. Mwakuyana waka, munthu wakukhwima wakumanya kuti wakwenera kulimbikira kuti wakhozge ubwezi wake na Yehova. Paulosi wakutikumbuska kuti: “Lutilirani kupima usange muli mu chipulikano, lutilirani kuyezga umo imwe muliri.” (2 Ŵakorinte 13:5) Kweni tikukhumbikwira kuchita vinandi kuluska kuŵa waka na chipulikano chakukhora. Tikwenera kulutilira kutemwa Yehova kweniso ŵabali na ŵadumbu ŵithu. Paulosi wakati: ‘Usange nkhumanya vinthu, ndipo nili na chipulikano mwakuti ningasezga mapiri, kweni nilije chitemwa, vyose ivi vilije ntchito.’—1 Ŵakorinte 13:1-3.

16. Kasi Satana wakukhumba kuti tighanaghanenge vichi?

¹⁶ Satana wakukhumba kuti tighanaghanenge kuti tingakwaniska yayi kukondweska Yehova. Wakukhumba kuti tigongowenge na kughanaghana kuti masuzgo agho tikusangana nagho ghazamumarapo yayi. Wakukhumba yayi kuti tigomezgenge Ŵakhristu ŵanyithu, ndipo wakukhumba yayi kuti tikondwenge. (Ŵaefeso 2:2) Satana wakumanya kuti maghanoghano ghaheni ghangatipweteka taŵene na kunanga ubwezi withu na Yehova. Kweni Yehova  watipa chinthu chinyake icho chingatovwira kuti tilimbane na maghanoghano ghaheni. Watipa chigomezgo.

17. Kasi chigomezgo ntchakuzirwa wuli?

¹⁷ Pa 1 Ŵatesalonika 5:8, Baibolo likuyaniska chigomezgo na chisoti icho chikuvikilira mutu wa msilikari para wakurwa nkhondo, ndipo likuchema chisoti ichi kuti “chigomezgo cha chiponosko.” Para tili na chigomezgo mu malayizgo gha Yehova, tingavikilira maghanoghano ghithu na kukana maghanoghano ghaheni.

18, 19. Kasi chigomezgo chikamukhozga wuli Yesu?

¹⁸ Chigomezgo icho Yesu wakaŵa nacho chikamovwira kuŵa wankhongono. Pa usiku wakuti namachero wakomekenge, Yesu wakasangana na masuzgo ghambura kukata. Mubwezi wake wakamwendera mphiska. Munyake wakamukana kuti wakumumanya. Ŵanyake ŵakamuleka na kuchimbira. Ŵanthu ŵakwake ŵakamuwukira, ŵakapempha kuti wakomeke. Kasi ntchivichi chikamovwira Yesu kuzizipizga vinthu vyose ivi? “Chifukwa cha chimwemwe icho chikaŵikika panthazi  pake, wakazizipizga khuni lakusuzgikirapo, wakasulako soni, ndipo wakhala pasi ku woko lamalyero la chitengo cha Chiuta.”—Ŵahebere 12:2.

¹⁹ Yesu wakamanyanga kuti usange wagomezgeka, wapelekenge uchindami kwa Yehova na kulongora kuti Satana ni mutesi. Chigomezgo ichi chikamupa chimwemwe chikuru chomene. Wakamanyangaso kuti para pajumpha kanyengo kachoko waka, wamuŵiraso lumoza na Adada ŵake kuchanya. Chigomezgo ichi chikamovwira kuti wazizipizge. Nga ni Yesu, nase tikwenera kuŵika mtima pa chigomezgo chithu. Ivi vitovwirenge kuti tizizipizge nanga tingakumana na masuzgo wuli.

20. Kasi ntchivichi chingamovwirani kuti muŵe na maghanoghano ghawemi?

²⁰ Yehova wakuwona chipulikano na kuzizipizga kwinu. (Yesaya 30:18; ŵazgani Malaki 3:10) Wakulayizga kuti ‘wamupaninge ivyo mtima winu ukukhumba.’ (Salimo 37:4)  Ntheura ŵikani mtima pa chigomezgo chinu. Satana wakukhumba kuti mutaye chigomezgo na kughanaghana kuti Yehova wazamufiska yayi ivyo wali kulayizga. Kweni lekani kupusikika na maghanoghano ghanthena. Para mwawona kuti chigomezgo chinu chamba kufota, pemphani Yehova kuti wamovwirani. Kumbukani mazgu agho ghali pa Ŵafilipi 4:6, 7, agho ghakuti: “Lekani kwenjerwa na chinthu chilichose, kweni mu vinthu vyose, mu lurombo na maŵeyelero pamoza na kuwonga, madandawuro ghinu ghamanyikwe kwa Chiuta. Ndipo mtende wa Chiuta uwo ukuluska maghanoghano ghose, uvikilirenge mitima yinu na maghanoghano ghinu kwizira mwa Khristu Yesu.”

21, 22. (a) Kasi Yehova wakukhumba kuzakachita vichi pa charu chapasi? (b) Kasi mwaŵikapo mtima kuchitachi?

²¹ Nyengo zose paturani nyengo ya kughanaghanira vinthu viwemi ivyo vikwiza munthazi. Sonosono apa, waliyose uyo wazamukhala pa charu wazamusopa Yehova. (Chivumbuzi 7:9, 14) Ghanaghanirani waka umo umoyo uzamuŵira mu charu chiphya. Umoyo uzamuŵa wakunozga chomene kuluska umo tingaghanaghanira. Satana, viŵanda vyake, na uheni wose vizamuŵa kuti vyafumapo. Tizamulwara yayi panji kufwa. Kweni zuŵa lililose tizamuwuka na nkhongono na ŵakukondwa. Tose tizamovwirana kunozga charu kuŵa paradiso. Waliyose wazamuŵa na chakurya chiwemi na malo ghawemi ghakukhalamo. Ŵanthu ŵazamuŵaso ŵankhaza yayi panji ŵambembe, ŵazamuchitirananga waka lusungu. Para nyengo yajumphapo, ŵanthu wose pa charu chapasi ŵazamusangwa na “wanangwa wauchindami wa ŵana ŵa Chiuta.”—Ŵaroma 8:21.

²² Yehova wakukhumba kuti waŵe Mubwezi winu wapamtima. Ntheura chitani chilichose icho mungafiska kuti mupulikire Yehova na kusendelera kwa iyo zuŵa lililose. Nadi, mphanyi tose takhalilira mu chitemwa cha Chiuta muyirayira!—Yuda 21.