1-3. (a) Kasi tikusambirapo vichi pa Zintharika 13:20? (b) Chifukwa wuli tikwenera kusankha mwamahara ŵabwezi?

KASI muli kuwonapo umo bonda wakulaŵiskira ŵapapi ŵake? Bonda wakusungilira chilichose icho wakuwona na kupulika, nanga ni apo wandambe kuyowoya. Para wakukura, wakwamba kuyezga ŵapapi ŵake nangauli mwenecho wakumanya yayi. Ntchakuzizika yayi kuti ŵanthu ŵalara nawo ŵakwamba kughanaghana na kuchita vinthu nga ni ŵanthu awo ŵakutemwa kuchezga nawo.

² Pa Zintharika 13:20, tikusambirapo kuti: “Uyo wakwenda na ŵavinjeru waŵenge wavinjeru.” Pa vesi ili, “kwenda na” munthu chikung’anamura kuchezga nayo. Ichi chikung’anamura kuchezga na munthu nyengo yichoko waka yayi. Munthu munyake wakusanda Baibolo wakayowoya kuti kwenda na munthu chikung’anamura kumutemwa na kupulikana nayo. Kanandi tikuchita vinthu kuyana na ŵanthu awo tikutemwa kuchezga nawo, chomenechomene usange tikupulikana chomene.

³ Ŵabwezi ŵithu ŵangatovwira panji kutipwetekeska. Lemba la Zintharika 13:20 likulutizga kuti: “Uyo  wakuchita vinthu pamoza na vindere wapwetekekenge.” Mu Chihebere, “kuchita vinthu na” munthu munyake chingang’anamura “kwendezgana” nayo, ndiko kuti, kuŵa nayo paubwezi. (Zintharika 22:24; Ŵeruzgi 14:20) Ŵabwezi awo ŵakutemwa Chiuta ŵatovwirenge kuti tiŵe ŵakugomezgeka. Kuti tisankhe makora ŵabwezi, tiyeni tiwone dankha ŵanthu awo Yehova wakusankha kuŵa ŵabwezi ŵake.

4. Chifukwa wuli ni mwaŵi ukuru kuŵa mubwezi wa Chiuta? Chifukwa wuli Yehova wakachemanga Abrahamu kuti “mubwezi wane”?

⁴ Yehova, Fumu Yikuru ya chilengiwa chose, watipa mwaŵi kuti tiŵe ŵabwezi ŵake. Uwu ni mwaŵi ukuru chomene. Yehova wakupwelelera pakusankha ŵabwezi. Wakusankha awo ŵakumutemwa ndipo ŵali na chipulikano mwa iyo. Wonani umo wakaŵira Abrahamu. Wakaŵa wakunozgeka kuchita chilichose icho Chiuta wamupempha. Abrahamu wakalongora mwakuwerezgawerezga kuti wakaŵa na chipulikano kweniso wakupulikira. Wakaŵa wakunozgeka nanga nkhupeleka mwana wake Yisake kuŵa sembe. Abrahamu wakaŵa na chipulikano kuti “Chiuta wakaŵa na nkhongono kumuwuska [Yisake] nanga nkhu ŵakufwa.” (Ŵahebere 11:17-19; Genizesi 22:1, 2, 9-13) Abrahamu wakaŵa na chipulikano, ndipo wakapulikiranga, lekani Yehova wakamuchemanga kuti “mubwezi wane.”—Yesaya 41:8; Yakobe 2:21-23.

5. Kasi Yehova wakuŵawona wuli awo mbakugomezgeka kwa iyo?

⁵ Yehova wakuwona ŵabwezi ŵake kuŵa ŵakuzirwa. Ŵabwezi ŵake ŵakuŵikapo mtima kuŵa ŵakugomezgeka kwa iyo kuluska chinthu chilichose. (Ŵazgani 2 Samuyeli 22:26.) Mbakugomezgeka ndipo ŵakupulikira  chifukwa chakuti ŵakumutemwa. Baibolo likutiphalira kuti Chiuta ni “mubwezi wa ŵakunyoloka,” awo ŵakumupulikira. (Zintharika 3:32) Yehova wakuchema ŵabwezi ŵake kuti ŵaŵe ŵalendo ŵapadera mu “hema” lake. Wakuŵapempha kuti ŵamusopenge na kulomba kwa iyo nyengo yiliyose.—Salimo 15:1-5.

6. Kasi tingalongora wuli kuti tikutemwa Yesu?

⁶ Yesu wakati: “Usange munthu wakunitemwa, wasungilirenge mazgu ghane, ndipo Adada ŵamutemwenge.” (Yohane 14:23) Ntheura kuti tiŵe ŵabwezi ŵa Yehova, tikweneraso kutemwa Yesu na kuchita ivyo wakatisambizga kuti tichitenge. Tikupulikira ivyo Yesu wakasambizga para tikupharazga makani ghawemi na kovwira ŵanthu kuŵa ŵasambiri. (Mateyu 28:19, 20; Yohane 14:15, 21) Pakuti tikutemwa Yesu, tikulondezga “mendero ghake mwakugomezgeka.” (1 Petrosi 2:21) Yehova wakukondwa para wakuwona kuti tikulimbikira kuyezga Mwana wake mu vyose ivyo tikuyowoya na kuchita.

7. Chifukwa wuli tikwenera kuwoneseska kuti ŵanthu awo mbabwezi ŵithu ŵaŵengeso ŵabwezi ŵa Yehova?

⁷ Ŵabwezi ŵa Yehova ni awo ŵali na chipulikano, mbakugomezgeka, ndipo ŵakupulikira, kweniso ŵakutemwa Yesu. Kasi nase tikusankha ŵabwezi nga umo Yehova wakuchitira? Usange ŵabwezi ŵinu ŵakuyezga Yesu ndipo ŵakutangwanika kusambizga ŵanthu vya Ufumu wa Chiuta, ŵangamovwirani kuti muŵe munthu muwemi na wakugomezgeka kwa Yehova.

8. Kasi ubwezi wa Rute na Naomi ukumukondweskani wuli?

⁸ Mu Baibolo, tikusambira vya ŵanthu ŵanandi awo  ŵakaŵa paubwezi, nga ni Rute na nyinavyara, Naomi. Ŵanakazi aŵa ŵakaŵa ŵakupambana vyaru na mitheto, ndipo Naomi wakaŵa mulara chomene kwa Rute. Kweni ŵakaŵa paubwezi wakukhora chifukwa wose ŵakatemwanga Yehova. Apo Naomi wakafumangako ku charu cha Mowabu na kuwelera ku Israyeli, “Rute wakademelera kwa anyinavyara.” Rute wakaphalira Naomi kuti: “Ŵanthu ŵakwinu ŵamuŵa ŵanthu ŵakwithu, ndipo Chiuta winu wamuŵa Chiuta wane.” (Rute 1:14, 16) Rute wakaŵa walusungu chomene kwa Naomi. Ŵakati ŵafika mu Israyeli, Rute wakalimbikira kugwira ntchito kuti wawovwire mubwezi wake. Naomi wakamutemwanga chomene Rute ndipo wakamupa ulongozgi uwemi chomene. Rute wakapulikira, ndipo wose ŵakasanga vitumbiko vinandi.—Rute 3:6.

9. Kasi chikumuzizikani ntchivichi pa ubwezi wa Davide na Yonatani?

⁹ Ŵanyake awo ŵakaŵa paubwezi uwemi ni Davide na Yonatani. Wose ŵakaŵa ŵakugomezgeka kwa Yehova. Yonatani wakaŵa mulara kwa Davide na vyaka 30, ndipo ndiyo wakeneranga kuŵa themba lakulondezgapo la Israyeli. (1 Samuyeli 17:33; 31:2; 2 Samuyeli 5:4) Kweni Yonatani wakati wamanya kuti Yehova wasora Davide kuŵa themba, wakachita sanji yayi panji kulimbana nayo. M’malo mwake, Yonatani wakachita vyose ivyo wangafiska kuti wawovwire Davide. Nyengo yinyake apo umoyo wa Davide ukaŵa pangozi, Yonatani wakamovwira “kusanga nkhongono mwa Yehova.” Nayo wakaŵika umoyo wake pangozi chifukwa cha Davide. (1 Samuyeli 23:16, 17) Davide nayo wakaŵa mubwezi wakugomezgeka. Wakalayizga kuti wapwelelerenge mbumba ya Yonatani, ndipo wakafiska phangano ili nanga ni apo Yonatani  wakaŵa kuti wafwa.—1 Samuyeli 18:1; 20:15-17, 30-34; 2 Samuyeli 9:1-7.

10. Kasi mukusambirako vichi ku Ŵahebere ŵatatu pa nkhani ya ŵabwezi?

¹⁰ Ŵanyamata Ŵachihebere ŵatatu: Shadireki, Misheki, na Abedinego ŵakatolekera ku wuzga, kutali na kwawo apo ŵakaŵa ŵachoko. Pakuŵa ŵabwezi, ŵanyamata aŵa ŵakawovwirananga kuti ŵaŵe ŵakugomezgeka kwa Yehova, pakuti ŵakaŵa kutali na ŵapapi ŵawo. Ŵakati ŵakura, chipulikano chawo chikayezgeka apo Themba Nebukadinezara likaŵaphalira kuti ŵasope chikozgo chagolide. Shadireki, Misheki, na Abedinego ŵakakana kusopa chikozgo chira ndipo ŵakaphalira themba kuti: “Titeŵeterengepo yayi ŵachiuta ŵinu nesi kusopa chikozgo chagolide icho mwimika.” Ŵabwezi ŵatatu aŵa ŵakalutilira kugomezgeka kwa Chiuta wawo, apo chipulikano chawo chikayezgekanga.—Daniyeli 1:1-17; 3:12, 16-28.

11. Kasi vikenda wuli kuti Paulosi na Timote ŵaŵe paubwezi weneko?

¹¹ Mpositole Paulosi wakati wakumana na munyamata Timote, wakawona kuti Timote wakatemwanga chomene Yehova ndipo wakaghanaghaniranga chomene mpingo. Ntheura Paulosi wakasambizga Timote kuti wakawovwire ŵabali na ŵadumbu mu malo ghakupambanapambana. (Milimo 16:1-8; 17:10-14) Timote wakalimbikiranga chomene uteŵeti, lekani Paulosi wakati: “Wakateŵetera pamoza na ine pakupharazga makani ghawemi.” Paulosi wakamanyanga kuti Timote ‘wamupwelelera nadi’ ŵabali na ŵadumbu. Paulosi na Timote ŵakaŵa paubwezi weneko chifukwa chakuti ŵakateŵeteranga lumoza mwakujipeleka.—Ŵafilipi 2:20-22; 1 Ŵakorinte 4:17.

12, 13. (a) Chifukwa wuli tikwenera kupwelelera pakusankha ŵabwezi nanga mungaŵa mu mpingo? (b) Chifukwa wuli mpositole Paulosi wakapeleka chenjezgo la pa 1 Ŵakorinte 15:33?

¹² Mu mpingo, tingasambirako vinandi ku ŵabali na ŵadumbu na kovwirana kuti tose tiŵe ŵakugomezgeka. (Ŵazgani Ŵaroma 1:11, 12.) Kweni mu mpingo namo tikwenera kuchenjera pakusankha ŵanthu kuti ŵaŵe ŵabwezi ŵithu ŵapamtima. Tili na ŵabali na ŵadumbu ŵanandi ŵakufuma mu vigaŵa na mitheto yakupambanapambana. Ŵanyake ŵamba sonosono kuteŵetera Yehova,  apo ŵanyake ŵateŵetera vyaka vinandi chomene. Pakutora nyengo kuti chipambi chikhome na kuphya (kutona), ndimo viliriso na ubwezi wa munthu na Yehova. Ntheura tikwenera kuzikira na kutemwana, ndipo nyengo zose tisankhenge mwamahara ŵabwezi.—Ŵaroma 14:1; 15:1; Ŵahebere 5:12–6:3.

¹³ Nyengo zinyake mu mpingo munyake wangachita vyambura kwenelera, ndipo tingakhumbikwira kuŵa maso chomene. Vingachitika kuti mubali panji mudumbu munyake mu mpingo wakuchita vinthu ivyo Baibolo likukana. Panji munyake wangamba kuŵa na mtima wakudinginyika uwo ungatimbanizga mpingo. Para vyaŵa nthena, tikuzizwa yayi chifukwa kale napo mu mpingo mukaŵanga masuzgo nyengo zinyake. Nakuti mpositole Paulosi wakachenjezga Ŵakhristu nyengo yira kuti: “Mungapuluskikanga yayi. Mendezgano ghaheni ghakunanga makhaliro ghawemi.” (1 Ŵakorinte 15:12, 33) Paulosi wakachenjezgaso Timote kuti waŵe maso na ŵanthu awo wakusankha kuŵa ŵabwezi ŵake ŵapamtima. Ndimo nase tikwenera kuchitira mazuŵa ghano.—Ŵazgani 2 Timote 2:20-22.

14. Kasi ŵabwezi awo tikusankha ŵangakhwaska wuli ubwezi withu na Yehova?

¹⁴ Tikwenera kuvikilira ubwezi withu na Yehova. Ntchinthu chakuzirwa chomene icho tili nacho. Ntheura tikukhumba yayi kuŵa paubwezi na munthu waliyose uyo wangalopweska chipulikano chithu na kutimbanizga ubwezi uwu. Vingachitika yayi kuzuŵika sipanji mu maji ghakubinkha na kukhazga kuti yizurenge na maji ghawemi. Mwakuyana waka, vingachitika yayi kuti tiŵe paubwezi na ŵanthu ŵakuchita viheni na kukhazga kuti ise tichitenge vinthu viwemi kwambura suzgo. Tikwenera  kupwelelera pakusankha ŵabwezi ŵapamtima.—1 Ŵakorinte 5:6; 2 Ŵatesalonika 3:6, 7, 14.

15. Kasi mungachita wuli kuti musange ŵabwezi ŵawemi mu mpingo?

¹⁵ Mu mpingo, mungasangamo ŵanthu awo ŵakutemwa nadi Yehova. Aŵa ndiwo ŵangaŵa ŵabwezi ŵinu ŵapamtima. (Salimo 133:1) Lekani kusankha waka ŵanthu awo mukuyana msinkhu panji mitheto kuŵa ŵabwezi ŵinu. Kumbukani kuti Yonatani wakaŵa mulara chomene kwa Davide, ndipo Rute wakaŵa mwana muchoko chomene kwa Naomi. Tikukhumba kulondezga fundo ya mu Baibolo yakuti: “Julani mitima yinu.” (2 Ŵakorinte 6:13; ŵazgani 1 Petrosi 2:17.) Para mukulimbikira kuyezga Yehova, ŵanthu ŵanandi ŵakhumbenge kuŵa namwe paubwezi.

16, 17. Kasi tikwenera kuleka kuchitachi para munyake mu mpingo watikwiyiska?

¹⁶ Mu mbumba yiliyose, mukuŵa ŵanthu awo ŵakupambana wunthu, maghanoghano, na kachitiro ka vinthu. Ndimo viliri na mu mpingo. Vinthu vikunozga chifukwa chakuti taŵanthu tili ŵakupambana, ndipo tingasambira vinandi kwa yumoza na munyake. Kweni pakuti tili ŵakupambana, nyengo zinyake tingatondeka kupulikiskana na ŵabali panji ŵadumbu ŵithu, ndipo tingaŵakwiyira. Nyengo zinyake tingakhuŵara panji tingakwenyelera. (Zintharika 12:18) Kasi tigongowenge panji kuleka kuwungana na mpingo chifukwa cha masuzgo ghanthena agha?

¹⁷ Yayi. Nanga munthu wangatikhuŵazga, tingaleka yayi kuwungana na mpingo. Ni Yehova yayi uyo watikhuŵazga. Iyo wali kutipa umoyo na vinthu vinyake  vyose. Ngwakwenelera kuti timutemwenge na kumugomezga. (Chivumbuzi 4:11) Mpingo ntchawanangwa icho Yehova wali kutipa ndipo ukutovwira kuti tiŵe na chipulikano chakukhora. (Ŵahebere 13:17) Tingataya yayi chawanangwa ichi chifukwa chakuti munthu munyake watikhuŵazga.—Ŵazgani Salimo 119:165.

18. (a) Kasi ntchivichi chingatovwira kuti tikhalenge makora na ŵabali kweniso ŵadumbu ŵithu? (b) Chifukwa wuli tikwenera kugowokera ŵanyithu?

¹⁸ Ŵabali na ŵadumbu ŵithu tikuŵatemwa ndipo tikukhumba kuti tikhalenge nawo makora. Yehova wakukhazga kuti tichitenge vinthu ndendende yayi, ndimo nase tikwenera kuchitira. (Zintharika 17:9; 1 Petrosi 4:8) Tose tikubudiska, kweni chitemwa chitovwirenge kuti ‘tigowokeranenge na mtima wose.’ (Ŵakolose 3:13) Chitemwa chitovwirenge kuti tileke kukuzga kankhani kadoo. Unenesko ngwakuti para munyithu watikwiyiska, chikuŵa chakusuzga kusulako waka. Ntchipusu kukwiya na kumusungira chakusingo munthu wanthena. Kweni suzgo ndakuti tisuzgikenge ndise, tikondwenge yayi. Para tamugowokera munthu uyo watikhuŵazga, tikuŵa na mtende mu mtima, mpingo ukuŵa wakukolerana, ndipo kuluska vyose, tikuŵa paubwezi uwemi na Yehova.—Mateyu 6:14, 15; Luka 17:3, 4; Ŵaroma 14:19.

19. Kasi mphawuli apo tikwenera kuleka kwenda na munthu munyake mu mpingo?

¹⁹ Mu banja ilo ŵanthu ŵakutemwana, waliyose wakuchita chigaŵa chake kuti ŵanyake ŵakondwenge. Kweni vingaŵa wuli usange yumoza wagaluka? Panji waliyose pa nyumba wakuyezga kumovwira, kweni iyo wakupulika yayi. Nyengo zinyake yekha wangasankha kufumapo waka pa nyumba, panji mutu wa mbumba wangamuphalira  kuti wafumepo. Vyanthena ivi vingachitikaso mu mpingo. Munthu munyake wangasankha kuchita vinthu ivyo vikukwiyiska Yehova na kunanga mpingo. Wangakana wovwiri, ndipo ivyo wakuchita vingalongora kuti wakukhumba yayi kuŵa chigaŵa cha mpingo. Yekha wangasankha kufuma mu mpingo, panji ŵangachita kumusezga. Usange ndimo vyaŵira, Baibolo likutiphalira kuti tileke “kwenderana” nayo. (Ŵazgani 1 Ŵakorinte 5:11-13; 2 Yohane 9-11) Ichi chikuŵa chakusuzga chomene usange munthu uyo ni mubwezi withu panji mubali withu wakuthupi. Kweni panthena apa ndipo tikwenera kulongora kuti tili ŵakugomezgeka chomene kwa Yehova kuluska kwa munthu waliyose.—Wonani Mazgu Ghakuumaliro 8.

20, 21. (a) Chifukwa wuli kusezga munthu ntchilongolero cha chitemwa? (b) Chifukwa wuli ntchakuzirwa kusankha mwamahara ŵabwezi?

²⁰ Yehova ndiyo wali kuŵika ndondomeko yakusezga wakwananga mu mpingo. Ichi chikovwira kuti mu mpingo muŵavye awo ŵakusulako fundo za Yehova. (1 Ŵakorinte 5:7; Ŵahebere 12:15, 16) Chikutovwira kuti tilongore kuti tikutemwa zina la Chiuta, fundo zake, na Yehova mweneko. (1 Petrosi 1:15, 16) Nakuti kusezga ntchilongolero chakuti tikutemwa munthu uyo wafumiskika mu mpingo. Chilango ichi chingamovwira kuti wamanye kuti ivyo wakuchita ni viheni ndipo wangasintha. Ŵanandi awo ŵakasezgeka ŵali kuwelera kwa Yehova ndipo ŵabali ŵali kuŵapokeleraso mwakukondwa mu mpingo.—Ŵahebere 12:11.

²¹ Ŵabwezi awo tingaŵa nawo ŵangatovwira panji kutipwetekeska. Ntheura ntchakuzirwa kuti tipwelelerenge pakusankha ŵabwezi. Usange tikutemwa awo Yehova wakuŵatemwa, tiŵenge paubwezi na ŵanthu awo ŵangatovwira kuŵa ŵakugomezgeka kwa iyo muyirayira.