SAMBIRO 01
Kasi Baibolo Lingamovwirani Wuli?
Tose tikukhumba kumanya chifukwa icho tiliri na umoyo, tikusuzgikira, tikufwira, kweniso ivyo vichitikenge munthazi. Tikufipaso mtima na vinthu vya zuŵa na zuŵa, nga umo tingasangira vyakukhumbikwa pa umoyo, kweniso umo tingaŵira ŵakukondwa mu banja. Ŵanthu ŵanandi ŵasanga kuti Baibolo likuzgora mafumbo ghakuzirwa agho ŵakuŵa nagho, kweniso likuŵawovwira umo ŵangakhalira makora. Kasi imwe mukughanaghana kuti Baibolo ndakovwira nadi?
1. Kasi ni mafumbo wuli ghanyake agho Baibolo likuzgora?
Baibolo likuzgora mafumbo ghakuzirwa nga ghakuti: Kasi umoyo ukamba wuli? Chifukwa wuli tili na umoyo? Chifukwa wuli ŵanthu ŵawemi ŵakusuzgika? Kasi chikuchitika ntchivichi para munthu wafwa? Usange waliyose wakukhumba mtende, chifukwa wuli pa charu pakuchitika nkhondo? Kasi vinthu vizamuŵa wuli pa charu chapasi munthazi? Baibolo likutichiska kuti tisange mazgoro gha mafumbo agha, ndipo ŵanthu ŵanandi ŵakhorwa na mazgoro agho likupeleka.
2. Kasi Baibolo lingatovwira wuli kuti tikondwenge?
Mu Baibolo muli ulongozgi uwemi. Mwachiyelezgero, likusambizga umo mabanja ghangaŵira ghakukondwa nadi. Likutiphalira ivyo tingachita para tikusuzgika maghanoghano, kweniso umo tingakondwera na ntchito iyo tikugwira. Apo mukusambira buku ili, mumanyenge ivyo Baibolo likusambizga pa nkhani izi na zinyake zinandi. Namwe muzamukolerana na fundo yakuti “Malemba ghose [vyose ivyo vili mu Baibolo] . . . ngachandulo.”—2 Timote 3:16.
Buku ili likunjira mu malo mwa Baibolo yayi. Kweni limovwiraninge kuti mupulikiske makora ivyo Baibolo likusambizga. Ntheura tikumupemphani kuti muŵazgenge malemba gha mu sambiro lililose, na kuyaniska na ivyo mukusambira.
MANYANI VINANDI
Wonani umo Baibolo lawovwilira ŵanthu, ivyo mungachita kuti mukondwenge para mukuliŵazga, kweniso uwemi wakupempha ŵanthu ŵanyake kuti ŵamovwirani kulipulikiska.
3. Baibolo lingatilongozga
Baibolo tingaliyaniska na ungweru ukuru. Lingatovwira kuti tisankhenge makora vinthu, kweniso kumanya ivyo vichitikenge munthazi.
Ŵazgani Salimo 119:105, kufuma apo dumbiskanani mafumbo agha:
-
Kasi uyo wakalemba salimo ili wakaliwonanga wuli Baibolo?
-
Kasi imwe mukuliwona wuli Baibolo?
4. Baibolo likuzgora mafumbo agho tili nagho
Mwanakazi munyake wakati Baibolo likazgora mafumbo ghose agho wakajifumbanga kwa vyaka vinandi. Wonelerani VIDIYO, kufuma apo dumbiskanani mafumbo agha.
-
Kuyana na ivyo mwawona mu vidiyo, kasi mwanakazi uyu wakajifumbanga mafumbo wuli?
-
Kasi kusambira Baibolo kukamovwira wuli?
Baibolo likutichiska kuti tifumbenge mafumbo. Ŵazgani Mateyu 7:7, kufuma apo dumbiskanani fumbo ili:
-
Kasi ni mafumbo wuli agho mukukhumba kuti Baibolo limuzgorani?
5. Vingamunozgerani pakuŵerenga Baibolo
Ŵanthu ŵanandi ŵakukondwa para ŵakuŵerenga Baibolo ndipo laŵawovwira chomene. Wonelerani VIDIYO, kufuma apo dumbiskanani mafumbo agha.
-
Kuyana na ivyo mwawona mu vidiyo, kasi ŵachinyamata ŵanandi ŵakuyiwona wuli nkhani ya kuŵerenga?
-
Nangauli ŵanandi ŵakutemwa yayi vyakuŵerenga, kweni chifukwa wuli ŵakutemwa kuŵerenga Baibolo?
Baibolo lili na ulongozgi uwo ungatisanguluska na kutipa chigomezgo. Ŵazgani Ŵaroma 15:4, kufuma apo dumbiskanani fumbo ili:
-
Kasi ivyo Baibolo likulayizga pa nkhani ya chisangulusko na chigomezgo vikumukondweskani?
6. Ŵanyithu ŵangatovwira kuti tilipulikiske Baibolo
Padera pakuŵerenga Baibolo paŵekha, ŵanthu ŵanandi ŵawona kuti para ŵakudumbiskana na ŵanyawo ndipo ŵakulipulikiska makora. Ŵazgani Milimo 8:26-31, kufuma apo dumbiskanani fumbo ili:
-
Kasi tingachita wuli kuti tilipulikiskenge Baibolo?—Wonani vesi 30 na 31.
Nduna ya ku Etiyopiya yikakhumbikwiranga munthu kuti wayiwovwire kupulikiska Baibolo. Mazuŵa ghano napo ŵanthu ŵanandi ŵakuwona kuti para ŵakudumbiskana Baibolo na ŵanyawo ndipo ŵakulipulikiska makora chomene kuluska para ŵakuŵerenga paŵekha
IVYO ŴANYAKE ŴAKUYOWOYA: “Kusambira Baibolo nkhusoŵa waka chakuchita.”
-
Kasi imwe mukuti wuli? Chifukwa wuli?
MWAKUDUMURA
Baibolo lili na ulongozgi wakuzirwa wa umo tingakhalira makora, likuzgora mafumbo ghakuzirwa, ndipo likutisanguluska na kutipa chigomezgo.
Kuweleramo
-
Kasi mu Baibolo muli ulongozgi wuli?
-
Kasi ni mafumbo wuli ghanyake agho Baibolo likuzgora?
-
Kasi imwe mungatemwa kusambira vichi mu Baibolo?
SANGANI FUNDO ZAKUSAZGIKIRA
Wonani umo fundo za mu Baibolo zikutovwilira mazuŵa ghano.
“Baibolo Lili na Vinjeru Vyambura Kumara” (Gongwe la Mulinda Na. 1 2018)
Wonani umo Baibolo likawovwilira mwanalume uyo wakasuzgikanga maghanoghano kufuma waka apa wakaŵa munyamata.
Wonani ulongozgi wakovwira uwo Baibolo likupeleka ku mbumba.
“Vinthu 12 Ivyo Vingawovwira Banja Kuti Liŵe Lakukondwa” (Wukani! Na. 2 2018)
Wonani ivyo Baibolo likuyowoya pa nkhani ya uyo wakulamulira charu chose chapasi.
Chifukwa Wuli Mukwenera Kusambira Baibolo?—Vidiyo Yose (3:14)
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
