SAMBIRO 16
Kasi Yesu Wakachita Vichi Apo Wakaŵa pa Charu Chapasi?
Ŵanthu ŵanandi ŵakughanaghana kuti Yesu wakaŵa mwana wakusuzgika, ntchimi ya vinjeru, panji munthu uyo wakaŵako na kufwa waka. Kweni kasi wakachita vichi apo wakaŵa pa charu chapasi? Mu sambiro ili, tisambirenge vinthu vyakuzirwa ivyo Yesu wakachita apo wakaŵa pa charu chapasi, kweniso umo vingatovwilira.
1. Kasi Yesu wakachitanga ntchito wuli yakuzirwa?
Ntchito yakuzirwa chomene kwa Yesu yikaŵa ‘ya kupharazga makani ghawemi gha Ufumu wa Chiuta.’ (Ŵazgani Luka 4:43.) Iyo wakapharazganga uthenga uwemi wakuti Chiuta wazamwimika Ufumu, panji kuti boma ilo lizamumazga masuzgo ghose gha ŵanthu. a Yesu wakalimbikira kupharazga uthenga uwemi uwu vyaka vitatu na hafu.—Mateyu 9:35.
2. Chifukwa wuli Yesu wakachitanga minthondwe?
Baibolo likuyowoya “milimo yankhongono na yakuzizwiska na vimanyikwiro ivyo Chiuta wakachita kwizira mwa [Yesu].” (Milimo 2:22) Chiuta wakamupa nkhongono Yesu kuti waŵe na mazaza pa chilengiwa, kulyeska ŵanthu ŵanandi, kuchizga ŵalwari, na kuwuska ŵakufwa. (Mateyu 8:23-27; 14:15-21; Mariko 6:56; Luka 7:11-17) Minthondwe iyo Yesu wakachitanga yikalongoranga pakweru kuti wakatumika na Chiuta, kweniso kuti Yehova wali na nkhongono zakumazgira masuzgo.
3. Kasi tingasambirako vichi kwa Yesu?
Yesu wakapulikiranga Yehova pa chilichose. (Ŵazgani Yohane 8:29.) Nangauli ŵanthu ŵakamususkanga chomene, kweni wakapulikira Adada ŵake m’paka nyifwa. Iyo wakalongora kuti ŵanthu ŵangapulikira Chiuta nanga ŵangasangana na masuzgo wuli. Yesu wakatilekera ‘chakuwonerapo kuti tilondezgenge mendero ghake mwakugomezgeka.’—1 Petrosi 2:21.
MANYANI VINANDI
Wonani umo Yesu wakapharazgiranga makani ghawemi kweniso umo wakachitiranga minthondwe.
4. Yesu wakapharazganga makani ghawemi
Yesu wakendanga mitunda yitali, kweniso mu misewu yiheni kuti wakapharazge makani ghawemi ku ŵanthu ŵanandi. Ŵazgani Luka 8:1, kufuma apo dumbiskanani mafumbo agha:
-
Kasi Yesu wakapharazgiranga waka ŵanthu awo ŵakizanga kwa iyo pera?
-
Kasi Yesu wakachitanga wuli kuti wasange ŵanthu ŵakuti waŵapharazgire?
Chiuta wakayowoyerathu kuti Mesiya wazamupharazga makani ghawemi. Ŵazgani Yesaya 61:1, 2, kufuma apo dumbiskanani mafumbo agha:
-
Kasi Yesu wakafiska wuli uchimi uwu?
-
Kasi mukughanaghana kuti mazuŵa ghano napo ŵanthu ŵakwenera kupulika makani ghawemi?
5. Yesu wakasambizganga unenesko
Padera pakupharazga uthenga uwemi wakukhwaskana na Ufumu wa Chiuta, Yesu wakasambizgaso fundo izo zingatovwira pa umoyo withu wa zuŵa na zuŵa. Wonani viyelezgero vichoko waka ivyo wakayowoya pa Upharazgi wa pa Phiri uwo ukumanyikwa chomene. Ŵazgani Mateyu 6:14, 34 na 7:12, kufuma apo dumbiskanani mafumbo agha:
-
Kasi Yesu wakapeleka ulongozgi wuli wakovwira mu mavesi agha?
-
Kasi mukuwona kuti ulongozgi uwu uchali wakovwira mazuŵa ghano?
6. Yesu wakachita minthondwe
Yehova wakamupa nkhongono Yesu zakuchitira minthondwe yinandi. Kuti muwone munthondwe unyake, ŵazgani Mariko 5:25-34 panji wonelerani VIDIYO. Kufuma apo dumbiskanani mafumbo agha.
-
Kuyana na ivyo mwawona mu vidiyo, kasi mwanakazi mulwari uyu wakagomezganga vichi?
-
Kasi ntchivichi chamukondweskani chomene na munthondwe uwu?
Ŵazgani Yohane 5:36, kufuma apo dumbiskanani fumbo ili:
-
Kasi minthondwe iyo Yesu wakachita ‘yikamuchitira ukaboni’ wuli, panji yikavumburachi vya iyo?
Kasi mukumanya?
Tikumanya vinandi ivyo Yesu wakachita kwizira mu mabuku gha Makani Ghawemi agho ni Mateyu, Mariko, Luka, na Yohane. Wose ŵanayi ŵakalemba vyakupambanapambana vyakukhwaskana na Yesu. Ivi vikutovwira kuti timanye vinandi ivyo Yesu wakachita apo wakaŵa pa charu chapasi.
-
MATEYU
ndiyo wakalemba buku lakwamba la Makani Ghawemi. Wakalemba vinandi ivyo Yesu wakasambizganga, chomene vya Ufumu wa Chiuta.
-
MARIKO
ndiyo wakalemba buku lifupi chomene. Wakalemba vinandi vyakukondweska na umoyo wa Yesu.
-
LUKA
wakalemba kuti Yesu wakawonanga kuti lurombo lukaŵa lwakuzirwa chomene, kweniso wakalemba umo Yesu wakachitiranga vinthu na ŵanakazi.
-
YOHANE
wakalemba vinandi vyakukhwaskana na wunthu wa Yesu kweniso umo wakachitiranga vinthu na ŵabwezi ŵake kweniso ŵanthu ŵanyake.
IVYO ŴANYAKE ŴAKUYOWOYA: “Yesu wakaŵa waka munthu muwemi, kweni wakaŵa Mesiya yayi.”
-
Kasi imwe mukughanaghana wuli?
MWAKUDUMURA
Yesu wakapharazganga vya Ufumu wa Chiuta, kuchita minthondwe, kweniso kupulikira Yehova pa chilichose.
Kuweleramo
-
Kasi ni ntchito wuli iyo yikaŵa yakuzirwa chomene kwa Yesu apo wakaŵa pa charu chapasi?
-
Kasi minthondwe iyo Yesu wakachitanga yikuvumburachi?
-
Kasi wakasambizga fundo wuli izo zingatovwira?
SANGANI FUNDO ZAKUSAZGIKIRA
Kasi Yesu wakatemwanga kusambizga vichi?
Wonani chifukwa icho tikugomezgera kuti minthondwe iyo Yesu wakachitanga yikachitika nadi.
“Kasi Tingasambirako Vichi ku Minthondwe Iyo Yesu Wakachita?” (Gongwe la Mulinda, Julayi 15, 2004)
Wonani umo mwanalume munyake wakasinthira wati wasambira kuti Yesu wakapeleka umoyo wake kuti wawombore ŵanthu ŵanandi.
“Nkhaŵa Wakujighanaghanira Nekha” (Gongwe la Mulinda, Okutobala 1, 2014)
Wonani vinthu vyakupambanapambana ivyo Yesu wakachitanga.
a Mu sambiro 31-33 tizamusambira vinandi vya Ufumu wa Chiuta.
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
