SAMBIRO 22
Kasi Mungachita Wuli Kuti Mupharazgenge Makani Ghawemi?
Apo mukusambira unenesko wa mu Baibolo panji mungati, ‘Waliyose wakwenera kuvimanya na ivi!’ Mbunenesko, waliyose wakwenera kuwumanya nadi unenesko! Kweni panji mungachita wofi kuphalirako ŵanji ivyo mwasambira. Tiyeni tidumbiskane ivyo mungachita kuti muleke kopa na kwamba kupharazga makani ghawemi mwakukondwa.
1. Kasi mungachita wuli kuti muphalirengeko awo mukuŵamanya ivyo mukusambira?
Ŵasambiri ŵa Yesu ŵakati: “Ise tingaleka yayi kuyowoya vinthu ivyo tili kuwona na kupulika.” (Milimo 4:20) Iwo ŵakawonanga kuti unenesko ngwakuzirwa chomene ndipo ŵakakhumbanga kupharazgira ŵanthu ŵanandi chomene. Kasi ndimo namwe mukuwonera? Usange ni nthena, mbwenu sangani nyengo ya kupharazgirako ŵanyinu na ŵabali ŵinu ivyo mukusambira.—Ŵazgani Ŵakolose 4:6.
Ivyo mungachita kuti mwambe kupharazga
-
Para mukukhumba kupharazgira ŵamumbumba yinu mungamba na kuyowoya kuti: “Sabata iyi nasambira nkhani yakukondweska chomene.”
-
Phaliraniko munyinu uyo wakulwara panji wakwenjerwa lemba lakukhozga.
-
Phaliraniko awo mukugwira nawo ntchito ivyo mwasambira mu Baibolo panji ku maungano.
-
Ŵalongorani webusayiti yithu ya jw.org.
-
Mungapempha ŵanyinu kuti ŵazakaŵepo pa sambiro la Baibolo, panji mungaŵalongosolera umo ŵangapemphera sambiro la Baibolo pa jw.org.
2. Chifukwa wuli ntchakuzirwa kuti mupharazgenge na mpingo?
Ŵasambiri ŵa Yesu ŵakachitanga vinandi padera pa kupharazgira waka ŵanthu awo ŵakaŵamanyanga. Yesu wakaŵatuma “ŵaŵiriŵaŵiri kudangira mu msumba uliwose” kuti ŵakapharazge. (Luka 10:1) Ndondomeko iyi yikawovwira kuti ŵanthu ŵanandi ŵamanye unenesko wa makani ghawemi. Mulimo uwu ukaŵawovwirangaso kuŵa ŵakukondwa. (Luka 10:17) Kasi namwe mungajiŵikira chilato kuti mupharazgenge na mpingo?
MANYANI VINANDI
Wonani ivyo mungachita kuti muleke kopa para mukupharazga makani ghawemi kweniso chimwemwe icho mungasanga.
3. Yehova waŵenge namwe
Ŵanyake ŵangachita wofi para ŵakughanaghanira ivyo ŵamupharazga kweniso umo ŵanthu ŵamuzgolera.
-
Kasi namwe mukuchita wofi kuphalirako ŵanyinu ivyo mwasambira? Chifukwa wuli?
Wonelerani VIDIYO, kufuma apo dumbiskanani fumbo ili.
-
Kasi ŵachinyamata aŵa ŵakachita wuli kuti ŵaleke kopa?
Ŵazgani Yesaya 41:10, kufuma apo dumbiskanani fumbo ili:
-
Kasi lurombo lungamovwirani wuli para mukuchita wofi kupharazga?
Kasi mukumanya?
Ŵakaboni ŵa Yehova ŵanandi ŵakachitanga wofi kupharazgira ŵanyawo makani ghawemi gha Ufumu. Chiyelezgero pa nkhani iyi ni Sergey, iyo wakajiwonanga kuti ngwawakawaka ndipo wakatondekanga kwamba kuchezga na munthu. Kweni wakati wasambira Baibolo, wakayowoya kuti: “Nangauli nkhachitanga wofi kweni nkhamba kuphalirako ŵanyane ivyo nkhusambira. Nkhazizwa kuwona kuti para nkhupharazgira ŵanyane ndipo nkhuŵa na chikanga chomene. Kweniso vikanovwira kuti niŵe na chipulikano chakukhora.”
4. Muŵenge na ntchindi
Para mwamupharazga mughanaghanirenge chomene ivyo mwamuyowoya kweniso umo mwamuyowoyera. Ŵazgani 2 Timote 2:24 na 1 Petrosi 3:15, kufuma apo dumbiskanani mafumbo agha:
-
Kasi mavesi agha ghangamovwirani wuli usange mukuyowoyeskana na ŵanthu vya mu Baibolo?
-
Kasi ni vinthu wuli ivyo mukwenera kuchita na kuleka kuchita para ŵabali kweniso ŵanyinu ŵakukolerana navyo yayi ivyo mukugomezga?
-
Chifukwa wuli ntchakuzirwa kufumba mafumbo mwaluso mu malo mwa kuchichizga waka ŵanthu na ivyo mukugomezga?
5. Tikukondwa chomene para tikuphalirako ŵanji uthenga uwemi
Yehova wakapeleka mulimo wakupharazga kwa Yesu. Kasi Yesu wakawuwonanga wuli mulimo uwu? Ŵazgani Yohane 4:34, kufuma apo dumbiskanani mafumbo agha:
-
Para tikurya chakurya chiwemi tikuŵa na umoyo uwemi kweniso tikukondwa. Chifukwa wuli Yesu wakayaniska kuchita khumbo la Chiuta, ilo likusazgapo kupharazga makani ghawemi na kurya chakurya?
-
Kasi mungasanga vitumbiko wuli usange mukupharazga makani ghawemi?
Ivyo Vingamovwirani
-
Pa maungano gha mukati mwasabata, wonani nthowa izo zingamovwirani kuti mwambe kudumbiskana na munthu.
-
Fumbani msambizgi winu ivyo mungachita kuti namwe mwambe kudumba nkhani mu sukulu. Ivi vingamovwirani kuti munozgekere kukaphalirako ŵanji ivyo mukusambira.
-
Gwiliskirani ntchito chigaŵa cha “Ivyo Ŵanyake Ŵakuyowoya” panji chakuti “Ŵanyake Ŵangafumba Kuti,” mu buku ili kuti mumanye umo mungazgolera mafumbo agho ŵanthu ŵakutemwa kufumba.
ŴANYAKE ŴANGAFUMBA KUTI: “Kasi mukusambira vichi mu Baibolo?”
-
Usange munthu wangamufumbani nthena, kasi mungachita wuli kuti mumuphalireko ivyo mukusambira mu Baibolo?
MWAKUDUMURA
Munthu wakukondwa chomene para wakuphalirako ŵanyake makani ghawemi, ndipo ntchipusu chomene kwamba kupharazga kuluska umo imwe mukughanaghanira.
Kuweleramo
-
Chifukwa wuli mukwenera kuphalirako ŵanji makani ghawemi?
-
Kasi mungachita wuli kuti muyowoyenge mwantchindi?
-
Kasi mungachita wuli kuti muleke kopa para mukupharazga?
SANGANI FUNDO ZAKUSAZGIKIRA
Wonani nthowa zinayi za umo mungapharazgira makani ghawemi pakugwiliskira ntchito kadi ya jw.org.
Wonani mikhaliro yinayi iyo yingamovwirani kuti mupharazgenge makani ghawemi.
“Kasi Muli Ŵakunozgeka Kuŵa Ŵalovi ŵa Ŵanthu?” (Gongwe la Mulinda, Seputembala 2020)
Wonani nkhani ya mu Baibolo iyo yingatovwira kuti tiŵe na chikanga pakupharazga nanga tingaŵa ŵana.
Wonani ivyo mungachita kuti muphalireko ŵamumbumba yinu vya Yehova.
“Umo Mungachonthera Mtima wa Ŵabali Ŵinu Ŵambura Kugomezga” (Gongwe la Mulinda, Malichi 15, 2014)
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
