SAMBIRO 39
Kasi Chiuta Wakuziwona Wuli Ndopa?
Ndopa ni zakuzirwa chomene. Palije uyo wangalutilira kuŵa wamoyo para ndopa zamara. Pakuti Chiuta ndiyo wali kutilenga, ntheura ndiyo wali na wanangwa wakutiphalira umo tikwenera kugwiliskira ntchito ndopa. Kasi Chiuta wakuti wuli pa nkhani ya ndopa? Kasi ŵanthu ŵakwenera kurya panji kuŵikika ndopa? Kasi mungachita wuli kuti musankhenge mwamahara pa nkhani ya ndopa?
1. Kasi Yehova wakuziwona wuli ndopa?
Yehova wakaphalira ŵateŵeti ŵake ŵa mu nyengo yakale kuti: “Umoyo wa chamoyo chilichose ni ndopa zake.” (Levitiko 17:14) Yehova wakuwona kuti ndopa zikwimira umoyo. Umoyo ntchawanangwa chakupatulika chakufuma kwa Chiuta, ntheura ndopa nazo ni zakupatulika.
2. Kasi Chiuta wakukana kugwiliskira ntchito ndopa mu nthowa wuli?
Yehova wakaphalira ŵateŵeti ŵake ŵa mu nyengo yakale kuti ŵakwenera yayi kurya ndopa. (Ŵazgani Genizesi 9:4 na Levitiko 17:10.) Iyo wakadidimizgaposo dango ili apo wupu wakulongozga ukaphalira Ŵakhristu kuti “mulutilire kuziŵizga . . . ndopa.”—Ŵazgani Milimo 15:28, 29.
Kasi kuziŵizga ndopa chikung’anamura vichi? Para dokotala wakumuphalirani kuti muleke kumwa moŵa, wakung’anamura kuti muleke kumwa mu nthowa yiliyose. Kweni kasi mungarya vyakurya ivyo kuli moŵa panji kujigwaza sindano ya moŵa? Mungachita yayi. Mwakuyana waka, dango ilo Chiuta wali kupeleka lakuti tiziŵizge ndopa, likung’anamura kuti tikwenera yayi kumwa ndopa panji kurya nyama yambura kuchinja (kucheka pa singo). Tikweneraso yayi kurya vyakurya ivyo ŵasazgako ndopa.
Kweni wuli pakuyowoya za kugwiliskira ntchito ndopa nga munkhwala? Nthowa zinyake zikuwonekerathu kuti zikuswa dango la Chiuta. Nthowa izi zikusazgapo kupokera ndopa zose panji chimoza mwa vigaŵa vikuruvikuru vya ndopa nga maselo ghaswesi, maselo ghatuŵa, mapulateleti, na pulazima. Kweni nthowa zinyake zingaŵa kuti zikuswa yayi dango la Chiuta. Mwachiyelezgero, nthowa zinyake zikusazgapo kugwiliskira ntchito tuvigaŵa tuchokovichoko twa ndopa. Nthowa zinyake zikusazgapo kugwiliskira ntchito ndopa za mweneko mulwari. Munthu wakwenera kusankha yekha nthowa izo ŵangamovwilira. a—Ŵagalatiya 6:5.
MANYANI VINANDI
Wonani umo tingasankhira mwamahara wovwiri wa munkhwala pa nkhani ya kugwiliskira ntchito ndopa.
3. Sankhani nthowa izo zingakondweska Yehova
Kasi mungasankha wuli wovwiri wa munkhwala mwakukolerana na umo Chiuta wakuwonera ndopa? Wonelerani VIDIYO, kufuma apo dumbiskanani uwemi wa kulondezga nthowa zakulondezgapo izi.
-
Lombani vinjeru.—Yakobe 1:5.
-
Fufuzani fundo za mu Baibolo kweniso umo mungazilondezgera.—Zintharika 13:16.
-
Manyiranithu nthowa zakuchizgira izo zikusangika uko mukukhala.
-
Sankhani nthowa izo mukuwona kuti ni ziwemi kwa imwe.
-
Sankhani nthowa izo zingamovwirani kuti muŵe na njuŵi yituŵa.—Milimo 24:16. b
-
Manyani kuti munyinu wa mu nthengwa, ŵalara ku mpingo, kweniso uyo wakumusambizgani Baibolo ŵangamusankhirani chakuchita yayi pa nkhani izo munthu wakwenera kwendera njuŵi yake.—Ŵaroma 14:12.
-
Lembani ivyo mwasankha.
4. Ŵakaboni ŵa Yehova ŵakusankha nthowa ziwemi zakuchizgira
Ntchiwemi chomene kulondezga dango la Chiuta lakukhwaskana na ndopa na kuleka kupokera munkhwala uwo ŵasazgako ndopa. Wonelerani VIDIYO.
Ŵazgani Tito 3:2, kufuma apo dumbiskanani fumbo ili:
-
Chifukwa wuli tikwenera kuzikira kweniso kulongora ntchindi para tikuyowoya na dokotala?
|
Vyambura kuzomerezgeka |
Ivyo Mkhristu wakwenera kusankha yekha |
|---|---|
|
A. Pulazima |
Tuvigaŵa twakufuma ku pulazima |
|
B. Maselo ghatuŵa |
Tuvigaŵa twakufuma ku maselo ghatuŵa |
|
C. Mapulateleti |
Tuvigaŵa twakufuma ku mapulateleti |
|
D. Maselo ghaswesi |
Tuvigaŵa twakufuma ku maselo ghaswesi |
5. Usange pakukhumbikwa vigaŵa vichokovichoko vya ndopa
Ndopa zili na vigaŵa vikuruvikuru vinayi. Pali maselo ghaswesi, maselo ghatuŵa, mapulateleti, na pulazima. Vigaŵa vikuruvikuru ivi viliso na tuvigaŵa tunyake tuchokotuchoko. c Tuvigaŵa tunyake tuchokotuchoko ndito ŵakupangira mapilisi ghanyake agho ghakovwira kulimbana na matenda mu thupi kweniso kuti ndopa zileke kufuma chomene para tajipweteka.
Pa nkhani yakupokera tuvigaŵa tuchokotuchoko twa ndopa, Mkhristu waliyose wakwenera kusankha yekha chakuchita kuyana na njuŵi yake yakusambizgika Baibolo. Ŵakhristu ŵanyake ŵakukana kupokera munkhwala panji nthowa zakuchizgira izo zikusazgapo tuvigaŵa tuchokotuchoko twa ndopa. Ŵanyake njuŵi yawo yingaŵazomerezga kupokera munkhwala panji nthowa zakuchizgira izo zikusazgapo tuvigaŵa tuchokotuchoko twa ndopa.
Para mukusankha vyakuchita, ghanaghanirani fumbo ili:
-
Kasi ningamulongosolera wuli dokotala chifukwa icho nkhukanira panji kuzomera kuŵikika tuvigaŵa tunyake tuchokotuchoko twa ndopa?
ŴANYAKE ŴANGAFUMBA KUTI: “Kasi pali uheni wuli usange ŵanganiŵika ndopa?”
-
Imwe mukuwona wuli?
MWAKUDUMURA
Yehova wakukhumba kuti tigwiliskirenge ntchito mwakwenelera ndopa.
Kuweleramo
-
Chifukwa wuli Yehova wakuwona kuti ndopa ni zakupatulika?
-
Kasi tikumanya wuli kuti dango la Chiuta lakuti tiziŵizge ndopa likung’anamura kuleka kupokera ndopa?
-
Kasi mungachita wuli kuti musankhe mwamahara nthowa zakuchizgira izo ŵakugwiliskira ntchito ndopa?
SANGANI FUNDO ZAKUSAZGIKIRA
Kasi ni vinthu wuli ivyo mukwenera kughanaghanirapo pa nkhani ya nthowa zakuchizgira izo ŵangagwiliskira ntchito ndopa zinu?
“Mafumbo Ghakufumira ku Ŵaŵazgi” (Gongwe la Mulinda, Novembala 1, 2000)
Kasi ni vinthu wuli ivyo mukwenera kughanaghanirapo pa nkhani ya kusankha tuvigaŵa tuchokotuchoko twa ndopa?
“Mafumbo Ghakufumira ku Ŵaŵazgi” (Gongwe la Mulinda, Juni 15, 2004)
Kasi ntchivichi chikawovwira dokotala munyake kupulikiska kuti umo Yehova wakuwonera ndopa ntchakwenelera nadi?
“Nkhuwona Ndopa nga Umo Chiuta Wakuziwonera” (Wukani!, Disembala 8, 2003)
Wonani umo ŵalara awo ŵakuteŵetera mu Komiti Yakudumbiskana na Chipatala ŵakovwilira ŵabali na ŵadumbu.
a Wonani Sambiro 35, “Kasi Tingachita Wuli Kuti Tisankhenge Vinthu Mwamahara?”
b Wonani fundo ya nambara 5, yakuti “Usange Pakukhumbikwa Vigaŵa Vichokovichoko vya Ndopa,” na Mazgu Ghakuumaliro 3, “Nthowa Zakuchizgira Izo Zikusazgapo Ndopa.”
c Madokotala ghanyake ghakuwona kuti vigaŵa vikuruvikuru ivi, vikuyana waka na tuvigaŵa tuchokotuchoko. Ntheura mukwenera kuŵalongosolera kuti mukukhumba yayi kupokera ndopa zose panji vigaŵa vikuruvikuru vinayi, ivyo ni maselo ghaswesi, maselo ghatuŵa, mapulateleti, na pulazima.
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
