1. Kuti timukondweske Ciuta, kasi tikwenera kucitaci?

KUTI TISANGWE na ubwezi uwemi na Ciuta, tikwenera kulekerathu kukolerana na cisopo cautesi. Tikwenera kurondezga cisopo caunenesko. Mazuŵa ghano ŵantu ŵanandi pa caru cose capasi ŵakucita ici.

2. Kasi Ŵakaboni ŵa Yehova ŵangasangika nkhu, ndipo ŵakucita mulimo wuli?

² Nga ni umo Baibolo likayowoyerathu, ŵasopi ŵaunenesko ndiwo ŵakupanga “mzinda ukuru” uwo ‘wukufuma ku mitundu yose, na ku mafuko na ku ŵantu na ku malulimi.’ (Civumbuzi 7:9) Mu vyaru 235, Ŵakaboni ŵanandi ŵa Yehova ŵakovwira ŵanji kusambira mikhaliro yacitemwa ya Yehova na ivyo wakukhumba.

3. Kasi Ŵakaboni ŵakusopa njani, ndipo iwo ŵakutceŵa mitundu wuli ya kasopero?

³ Ŵakaboni ŵakumanya kuti Yehova yekha ndiye pera wakukhumbikwira kumusopa. Iwo ŵakukanirathu nkanira kujikamira vikozgo panji vithuzithuzi vya cisopo. (1 Yohane 5:21) Iwo ŵakopa cara ŵakufwa mwa kugona pa civumbe kuti ŵalinde citanda panji kucita maluso ghanyake agho ghakurutiska pantazi vigomezgo vya cisopo cautesi na ‘visambizgo vya viŵanda.’ (1 Timote 4:1) Ndipouli, iwo ŵakupembuzga awo mbali wawo wafwa mwakuŵakonkoskera layizgo la Ciuta lakuti kuzamuŵa ciwuka ca ŵakufwa mu caru capasi ca paradiso.—Yohane 5:28, 29; Milimo 24:15.

4. Kasi ŵantu ŵa Ciuta ŵakughawona wuli mayere?

⁴ Ŵakaboni ŵakucita cara mayere, panji ufwiti, cifukwa ŵakumanya kuti vithu ivi nvyakufuma kwa Diabolosi. Iwo ŵakujivikilira cara na mayere, kweni ŵakugomezga mwa Yehova.—Zintharika 18:10.

5. Ni mwauli umo Ŵakaboni ŵa Yehova kuti “mba caru cara”?

⁵ Yesu wakayowoya kuti ŵarondezgi ŵake “mba caru cara.” (Yohane 17:16) Yesu iye mwene wakakana nkanira kunjizgikamo mu ndyari penepapo wakaŵa pano pa caru capasi. (Yohane 6:15) Mwakuyana waka, Ŵakaboni ŵakunjizgikamo cara mu ndyari, ŵakusankana mitundu cara, panji kupenjerezga maudindo ghanyake gha caru ici. Ndipouli, iwo ŵakupereka msonko na kupulikira marango gha caru ico ŵakukhalamo.—Yohane 15:19; Ŵaroma 13:1, 7.

6. Kasi ni urongozgi wuli uwo ŵateŵeti ŵa Ciuta ŵakurondezga wakukhwaskana na ntengwa ndiposo kupatana?

⁶ Cifukwa cakuti iwo ŵakupulikira urongozgi wa boma, Ŵakaboni ŵakuwoneseska kuti ntengwa zawo nzakuzomerezgeka mwa dango. (Tito 3:1) Ŵakupulikira urongozgi wa Ciuta, mwanteura iwo ŵakutora mitara cara. (1 Timote 3:2) Kusazgirapo apa, cifukwa cakuti ŵakugwiriskira ncito marango gha Baibolo mu umoyo ŵawo, ntengwa za ŵateŵeti ŵa Ciuta zikumara bweka cara panji kupatana.

7. Kasi Ŵakaboni ŵa Yehova ŵakutemwana wuli yumoza na munyake?

⁷ Ŵakaboni ŵakutemwana. Citemwa ici, pamoza na citemwa cawo pa Ciuta, cikuŵakoleraniska mu ubali weneco, nangauli iwo ŵakufuma mu mafuko na mitundu yakupambana-pambana. Para masuzgo ghacitika, panji usange pakukhumbikwira covwiro, Ŵakaboni ŵakovwirana mwaluŵiro. Ŵakaboni ŵakurongora citemwa mu kakhaliro kawo.—Yohane 13:35.

8. Kasi ni maluso wuli ghaheni agho ŵantu ŵa Ciuta ŵakutceŵa?

⁸ Ŵakaboni ŵa Yehova ŵakulimbikira kucita vintu mwaunenesko na mwaurunji. Iwo ŵakutceŵa kwiba, utesi, uzaghali, uroŵevu, na kucita malonda mwa upusikizgi. Ŵafumu ŵakutimba cara ŵawoli ŵawo. Penepapo ŵakaŵa ŵandaŵe Ŵakaboni, ŵanji ŵakacitanga vintu ivi, kweni na covwiro ca Yehova iwo ŵalikuleka. “Ŵakatuŵiskika” pamaso pa Ciuta.—1 Ŵakorinte 6:9-11.

9. Kasi buku linyake likuyowoyaci za matcharitchi gha Cikristu gha muno mu Africa?

⁹ Mbunenesko kuti visopo vinandi vikuyowoya kuti vikusambizga unenesko. Ŵasopi ŵake ŵangarongora milimo yiwemi iyo ŵakucita kukhozgera ivyo ŵakuyowoya. Mwaciyerezgero, pakuyowoya za matcharithci gha Cikristu gha muno mu Africa, buku linyake likuyowoya kuti: “Milimo ya ŵantu awo ŵakucita mayere panji ng’anga, sono yikucitika na [magulu ghapya gha Cikristu]. . . . Iwo ŵakuphara kuti ŵakuyowoyerathu vintu ivyo vizamucitika muntazi, na kucita mintondwe. Ncimi zawo zikulota maloto na kupataura maloto agho. Ŵakugwiriskira ncito maji-ghatuŵa, dongo lakupaturika, vyoto, makandulo, na vithu vyakununkira, kucizga na kujivikilira ku matenda.”

10, 11. Kasi ncifukwa wuli mintondwe iyo yikucitika mazuŵa ghano ncirongorero cara cakuti cisopo ico cikuyicita ncakuzomerezgeka na Ciuta?

¹⁰ Mamembara gha visopo ivi ghakuyowoya kuti mintondwe iyo ŵakucita yikurongora kuti cisopo cawo ncakutumbikika na Ciuta. Kweni mintondwe kuti ncirongorero cakuti cisopo ncakuzomerezgeka na Yehova cara. Satana ŵakucitiska ŵasopi ŵatesi kucita ‘milimo ya nkongono.’ (2 Ŵatesalonika 2:9) Kusazgirapo apa, Baibolo likayowoyerathu kuti vyawanangwa vyakuzizwiska vyakufuma kwa Ciuta, nga ni kuyowoyerathu vyamuntazi, kuyowoya m’malulimi na mahara ghapadera, ‘viti vimarenge.’—1 Ŵakorinte 13:8.

¹¹ Yesu wakacenjezga: “Kuti ndi yose wakunena nane, Fumu, Fumu, uyo wati wanjirenge mu Ufumu wa kucanya cara; kweni uyo wakucita khumbo la Ŵadada ŵa kucanya ndiyo. Ŵanandi ŵati ŵanenenge nane pa zuŵa leneilo, Fumu, Fumu, asi tikapharazganga mu zina linu, ndipo mu zina linu asi tikafumyanga mizimu yiheni, ndipo mu zina linu asi tikacitanga vya nkongono vinandi? Penepapo nditi ndiŵafiskirenge kuti, Nkamumanyani cara: fumaniko kwa Ine, imwe mukucita ucikanamarango.”—Mateyu 7:21-23.

12. Kasi mbanjani awo ŵazamunjira mu Ufumu wakucanya?

¹² Kasi ipo mbanjani awo ŵazamunjira mu Ufumu wakucanya? Ni awo ŵakucita khumbo la Yehova.

13. Kasi ni mulimo wuli uwo Ciuta waphalira ŵantu ŵake kuti ŵacitenge mazuŵa ghano, ndipo mbanjani awo ŵakucita mulimo uwu?

¹³ Kasi khumbo la Ciuta ndakuti wuli kurazga ku ŵantu ŵake mazuŵa ghano? Yesu wakayowoya kuti: “Makani ghaweme gheneagha gha Ufumu ghamkupharazgika mu vyaru vyose ghaŵe cipanikizgo ku mitundu yose.” (Mateyu 24:14) Uwu ni mulimo uwo Ŵakaboni ŵa Yehova ŵakucita mwa mwampu.

14. Kasi Ufumu wa Ciuta ncici, ndipo ninjani uyo wazamuwusa mu Ufumu uwu?

¹⁴ “Mu vyaru vyose” pa caru capasi, Ŵakaboni ŵa Yehova ŵakupharazga Ufumu wa Ciuta nga ni boma lakucanya ilo lizamuwusa caru cose capasi mu urunji. Ŵakusambizga kuti Yehova wali kwimika Yesu Kristu kuŵa Themba la Ufumu uwo, pamoza na ŵawusi ŵanyake ŵa 144,000, awo ŵalikusankika kufuma pakati pa ŵantu.—Daniel 7:14, 18; Civumbuzi 14:1, 4.

15. Kasi Ufumu uzamuparanya vintu wuli?

¹⁵ Mwakugwiriskira ncito Baibolo, Ŵakaboni ŵakurongora ŵantu kuti Ufumu wa Ciuta uzamuparanya Satana na kaŵiro kake kose. Mwee, cisopo cautesi cizamuparanyikirathu nkanira petu pamoza na visambizgo vyake ivyo vikuyuyura Ciuta na kutumbika Diabolosi! (Civumbuzi 18:8) Maboma gha ŵantu agho ghakwimikana na Ciuta ghose ghazamuparanyikirathu!—Daniel 2:44.

16. Kasi mbanjani awo ŵazamuwusika na Yesu Kristu, ndipo ŵazamukhala nkhu?

¹⁶ Ndiposo, Ŵakaboni ŵa Yehova ŵakupharazga kuti Yesu Kristu wazamwiziska vitumbiko vyambura mayowoyeko ku ŵantu awo ŵakucita vintu ivyo Ciuta wakukhumba. Iwo ŵazamukhala pa caru capasi na kuwusika na Yesu. Baibolo likulayizga kuti: ‘Wakuthaska musauci para wacema, na mukavu, na uyo walije movwiri. Wakufwira lusungu ŵakutempenta na ŵakavu, na kuponoska mizimu ya ŵasauci.’—Salmo 72:12, 13.

17. Kasi mbanjani awo ŵakupharazga za Ufumu wa Ciuta?

¹⁷ Palije ŵantu ŵanyake awo ŵakucita khumbo la Ciuta mwa kupharazga makani ghaweme gha Ufumu. Mbakaboni ŵa Yehova pera awo ŵakupharazga za Ufumu wa Ciuta pa caru cose capasi.