1. Ncivici ico cikucitika usange ‘tasenderera kwa Ciuta’?

YEHOVA wakutemwa ŵantu awo ŵakumuteŵetera. Usange mukusopa Yehova, iye wamutumbikaninge sono ndiposo muntazi. Baibolo likuyowoya kuti: “Sendererani kwa Ciuta, ndipo Iyo wati wasenderere kwa imwe.”—Yakobe 4:8.

2. Ni mwauli umo tingasenderera kwa Ciuta, ndipo ici cikukhwaska wuli malurombo ghithu?

² Kuti musenderere kwa Ciuta, mukwenera kusambira na kugwiriskira ncito Mazgu ghake. Para mukuromba mwakukolerana na khumbo lake, Yehova wazamutegherezga malurombo ghinu na kughazgora. Mpostole wa Cikristu Yohane wakalemba kuti: “Ici ncikanga ico tiri naco pantazi pake, cakuti usange tikuromba kantu kwakuyana na khumbo lake, wakutipulika: ndipo usange tikumanya kuti wakutipulika cose ico tikuromba, tikumanya kuti tiri nagho malurombo agho taromba kwa Iyo.”—1 Yohane 5:14, 15.

3-7. Ni mwauli umo mungasangira vinjeru vya Ciuta, ndipo vingamovwirani wuli?

³ Kusazgiraso apa, penepapo mukusenderera kwa Ciuta muzamupika vinjeru ivyo vizamumovwirani umo mungacitira vintu mu umoyo winu wa zuŵa na zuŵa. Baibolo likuyowoya kuti: “Usange yumoza wa imwe wakuperera vinjeru, warombe Ciuta.”—Yakobe 1:5.

⁴ Kasi mungawovwirika wuli na vinjeru vyakufuma kwa Ciuta? Cakwamba, mungamanya vintu ivyo Yehova wakutinka. Mungamanyaso cifukwa ico Yehova wakutinkira vintu ivyo na umo mungavitceŵera. Kumanya vintu ivi kungamuvikilirani ku masuzgo ghanandi gheneagho ŵantu ŵanandi ŵakusuzgika nagho. Mwaciyerezgero, kupulikira urongozgi wa Ciuta wakukhwaskana na mikhaliro yiwemi kukuvikilira ŵantu ŵa Ciuta kuti ŵaleke kuŵa na nthumbo za pathengere, matenda agho ghakuthandizgika kwizira mu kugonana, ndiposo nthengwa zambura cimwemwe panji kupatana.

⁵ Ni vintu wuli vinyake ivyo vinjeru vyakupika na Ciuta vingamovwirani? Vingamovwirani kuti musangwenge mwakufikapo na umoyo. Vingamovwirani kuti mucitenge vintu mwamahara, nga ni umo mungagwiriskira makora ncito makopara ghinu. Cizamuŵa cipusu kwa imwe kucita vintu vyakukhumbikwa na kuleka vintu ivyo vili na kuzirwa kucoko.

⁶ Vinjeru vya Ciuta vingamovwiraniso kuti muŵe paubwezi uwemi na ŵanji. Mungasangwa na umoyo wa mbumba wa cimwemwe. Mungaŵa pa ubwezi wakukhora na ŵanji, ndipo nanga ŵangaŵa ŵantu awo ŵakuteŵetera Ciuta cara ŵangamucindikani.

⁷ Kusazgirapo apa, vinjeru vyakufuma kwa Ciuta vizamunyolorera kawonero kinu ka vintu. Kumovwiraninge kumazga masuzgo na vintu ivyo vikumukhuŵazgani mu umoyo. Ndiposo mungaŵa na cigomezgo cakukhora ca umoyo winu wa muntazi. Nga ncakufumapo cake, muzamuŵa na kaghanaghaniro kawemi ndiposo umoyo uwemi.—Zintharika 14:30; Yesaya 48:17.

8. Usange mukuteŵetera Ciuta, ni vici ivyo mulekenge kopa?

⁸ Usange mukuteŵetera Ciuta waunenesko, mufwatukenge ku wofi na masuzgo agho ŵantu awo ŵakuleka kuteŵetera Ciuta ŵakukumana nagho. Cifukwa cakuti  mukumanya kuti ŵakufwa ŵakumanya kantu cara mu dindi, muzamuwopaso cara ŵantu awo ŵalikufwa. Cifukwa cakuti muli na cigomezgo kuti Ciuta wazamuwuska ŵakufwa, imwe muzamuwopa cara kufwa. Ndipo cifukwa cakuti mukumanya kuti Ciuta ngwankongono comene, muzamuwopa cara fwiti panji mayere.—Yohane 8:32.

9-11. Mbanjani awo ŵazamukhala mu Paradiso, ndipo mbanjani awo ŵazamukhalamo cara?

⁹ Usange mukusenderera kwa Ciuta, muwopenge cara vintu vya muntazi. Nga ni umo tasambirira, Baibolo likayowoyerathu masuzgo ghanandi agho tikukumana nagho mazuŵa ghano. Yehova wakutiphalira kuti vintu ivi vicitikenge kwa kanyengo; ndipo sono-sono apa Ufumu wa Ciuta uzamuzgora caru capasi kuŵa paradiso.—Luka 21:10, 11, 31; 23:43.

¹⁰ Ŵekha awo ŵakusenderera kwa Yehova na kumuteŵetera ndiwo ŵazamukhala mu Paradiso. Baibolo likuyowoya kuti: “Kwakhala kanyengo, ndipo muheni kuti tiwaŵepo cara; tiuŵanike malo ghake kweni iye nta waŵengemo. Ŵakuzika ndiŵo tiŵaharenge caru, tiŵakondwenge na kusakata comene.”—Salmo 37:10, 11.

¹¹ Ŵantu awo ŵakukanira dala kupulikira marango gha Ciuta gha urunji ŵazamuparanyika kwamuyirayira. (2 Ŵatesalonika 1:8, 9) Ŵazamuŵakoso cara. Ŵazamuŵa lumoza na Satana na viŵanda vyake mu nyifwa yambura ciwuka. (Civumbuzi 20:10, 14) Kweni wose awo ŵakumumanya Yehova na kumuteŵetera ŵazamusangwa na mtende pa caru capasi mu Paradiso.

12. Kasi Baibolo likuyowoyaci za muntazi?

¹² Yehova wali na vintu viwemi comene ivyo wasungira ŵantu awo ŵakumuteŵetera! Aghanaghanirani waka za ivyo Mazgu ghake ghakuyowoya vyakukhwaskana na umoyo mu Paradiso pa caru capasi:

• Vyakurya vinandi: “Kuŵenge fumpha ya vyakurya mu caru; vikupurenge na pa mapiri pacanya.”—Salmo 72:16.

• Nyumba ziwemi: “Tiŵazenge nyumba na kukhalamo.”—Yesaya 65:21.

• Kukhorwa na milimo: “Tiŵasekererenge swi na milimo ya mawoko ghawo. Kuti tiŵateŵetenge waka cara.”—Yesaya 65:22, 23.

• Kuzamuŵavya urwari: “Nanga njumoza wa ŵenecaru tiwanene, ‘Ndarwara.’”—Yesaya 33:24.

• Kuzamuŵavya ŵakupendera: “Penepapo maso gha vinthuru ghamkujurika, makutu gha ŵakumangwa nagho ghamkubanuka; ndipo mugonti wadukenge nga ndi mpala, lulimi lwa mbuwu lwimbenge.”—Yesaya 35:5, 6.

• Kuzamuŵavya kuŵinya, citengero, nyifwa: “[Ciuta] wafyurenge sozi lose ku maso ghaŵo; ndipo nyifwa kuti yiti yiŵengekoso cara; panji nesi citengero kuti citi ciŵengekoso cara, nesi kulira, panji nesi kuŵinya: cifukwa vyakudanga viri kuruta”—Civumbuzi 21:4.

• Kuzamuŵavya nkondo: “[Ciuta] wakurekeska nkondo kumpererekezgo za vyaru.”—Salmo 46:9.

• Umoyo wamuyirayira: “Ŵakunyoroka ŵamkuhara caru na kukhala mwenemumo kwandanda.”—Salmo 37:29.

13. Kasi ni njani uyo wangapanga caru ici kuŵa paradiso, ndipo ncifukwa wuli?

¹³ Ŵantu ŵangiziska cara vintu ivi, kweni Yehova wali na nkongono yakucitira vyose ivyo walayizga kuti wazamucita. Palije ico cingamutondeska kucita ivyo wakukhumba kucita. Baibolo likuyowoya kuti: “Palive mazgu gha Ciuta ghati ghaŵenge ghambura mankharo.”—Luka 1:37.

14. Ni mwauli umo mungayisangira ntowa yakuya ku umoyo wamuyirayira?

¹⁴ Kwizira mu Ŵakaboni ŵake, Yehova ŵakupereka ku ŵantu mwaŵi wakuti ŵanjire pa “cipata cifinyi” na kwenda mu ntowa iyo yikurongozgera ku umoyo wamuyirayira. Mphanyi imwe namwe mwaŵa yumoza wa ŵantu ŵacimwemwe awo ŵakuzomera ncemo iyi. Rondezgani cisopo caunenesko na kusangwa na vitumbiko vya Yehova kwamuyirayira!—Mateyu 7:13, 14.