KASI ni mwana nju pa caru capasi uyo ukughanaghana kuti wakakondweska comene Yehova?— Wakaŵa Mwana wake, Yesu. Tiye tidumbiskane vintu ivyo Yesu wakacita kuti wakondweske Ŵadada ŵake ŵakucanya.

Mbumba ya Yesu yikakhalanga pa mtunda wakwenda mazuŵa ghatatu kukafika ku Yerusalemu, uko kukaŵa tempele lakutowa la Yehova. Yesu wakathya tempele ili kuti “nyumba ya Ŵadada.” Iye na mbumba yake ŵakarutanga ku Yerusalemu cirimika cilicose pa ciphikiro ca Paska.

Cirimika cinyake, apo Yesu wakaŵa na virimika 12, mbumba yake yikamba kuwelera kukwawo pamanyuma pa Paska. Iwo ŵakamanya yayi kuti Yesu palije pakati pa ŵabali ŵawo na ŵanyawo mupaka ŵakafika pa malo apo ŵakakhumbanga kugona kukati kwafipa. Nteura pa nyengo yeneyiyo Mariya na Yosefe ŵakawelera ku Yerusalemu kukapenja Yesu. Kasi iwe ukughanaghana kuti wakaŵa nku?—

Ŵakamusanga mu tempele. Wakategherezganga ku ŵasambizgi na kuŵafumba mafumbo. Ndipo para ŵamufumba fumbo, wakazgoranga. Iwo ŵakazizwa comene na mazgoro ghaweme agho wakazgoranga. Kasi wawona cifukwa ico Ciuta wakaŵira wakukondwa na Mwana wake?—

Kwambura kukayika, Mariya na Yosefe ŵakati ŵamusanga Yesu, mtima ukawelera mu malo. Kweni Yesu wakaŵa wakufipa mtima yayi. Wakamanya kuti tempele ni malo ghaweme kukhalamo. Nteura wakaŵafumba kuti: ‘Kasi mwamanyanga yayi kuti nkwenera kuŵa mu nyumba ya Ŵadada?’ Wakamanya kuti tempele likaŵa nyumba ya Ciuta, nteura wakatemwa kuŵa mwenemura.

 Pamanyuma pake, Yosefe na Mariya ŵakatora Yesu na kuwelera nayo ku Nazareti. Kasi ukughanaghana kuti Yesu wakacitanga wuli na ŵapapi ŵake?— Baibolo likuyowoya kuti ‘wakarutirizga kujilambika kwa iwo.’ Kasi ukughanaghana kuti ici cikung’anamuraci?— Cikung’anamura kuti wakaŵapulikiranga. Wakacitanga vyose ivyo ŵapapi ŵake ŵakamutumanga, utepanji nanga kungaŵa kukateka maji ku cisimi.—Luka 2:41-52.

Anteura aghanaghanira fundo iyi: Nangauli Yesu wakaŵa murunji, wakapulikiranga ŵapapi ŵake ŵambura urunji. Kasi ici cikamukondweska Ciuta?— Enya, cifukwa Mazgu gha Ciuta ghakuphalira ŵana kuti: ‘Pulikirani ŵapapi ŵinu.’ (Ŵaefeso 6:1) Iwe nawe ungakondweska Ciuta usange upulikirenge ŵapapi ŵako, nga ni umo Yesu wakacitira.

Ntowa yinyake iyo ungakondweskera Ciuta ndiyo kuphalirako ŵanji za iye. Ŵantu ŵanyake ŵangayowoya kuti ŵana ŵakwenera yayi kucita nteura. Kweni apo ŵantu ŵakakhumba kukanizga ŵana kuti ŵareke kucita nteura, Yesu wakati: ‘Kasi mundaŵazge mu Malemba,  Mu milomo ya ŵabonda na ŵakonka mukufuma marumbo?’ (Mateyu 21:16) Mwanteura tose tingaphalirako ŵanji za Yehova na uweme wake, usange tikukhumba kucita nteura. Ndipo usange ticitenge nteura, tikondweskenge Ciuta.

Kasi ni nku uko tikusambira vintu vyakukhwaskana na Ciuta ivyo tingaphalirako ŵanyithu?— Kufuma ku sambiro lithu la Baibolo. Kweni tikusambira vinandi pa malo apo ŵantu ŵa Ciuta ŵakukumana. Kweni kasi tingaŵamanya wuli awo mbantu ŵake?—

Kasi ŵantu ŵakucitaci pa maungano ghawo? Kasi ŵakusambizga nadi ivyo viri mu Baibolo? Kasi ŵakuliŵazga na kulirongosora? Umu ndimo tikutegherezgera kwa Ciuta, asi ntena?— Ndipo para tiri pa maungano gha Cikristu tikukhumba kuti tipulike ivyo Ciuta wakuyowoya, kasi ni ntena yayi?— Kweni wuli usange ŵantu ŵakuyowoya kuti iwe ukwenera yayi kurondezga ivyo Baibolo likuyowoya? Kasi ungayowoya kuti mbantu ŵa Ciuta?—

Tiye tidumbiskane cintu cinyake ico tikwenera kucighanaghanira. Baibolo likuyowoya kuti ŵantu ŵa Ciuta ŵakwenera kuŵa ‘ŵantu ŵa zina lake.’ (Milimo 15:14) Cifukwa cakuti zina la Ciuta ni Yehova, tingaŵafumba ŵantu usange Yehova ndiyo Ciuta wawo. Usange ŵakuti yayi, mbwenu tamanya kuti mbantu ŵake yayi. Ŵantu ŵa Ciuta ŵakweneraso kuphalirako ŵanyawo za Ufumu wa Ciuta. Ndiposo ŵakwenera kurongora kuti ŵakutemwa Ciuta mwa kusunga marango ghake.—1 Yohane 5:3.

Usange ukumanya ŵantu awo ŵakucita vintu vyose ivi, mbwenu ukwenera kuwungana nawo uko ŵakusopa. Ukwenera kutegherezga comene pa maungano agha na kuzgorapo para mafumbo ghakufumbika. Ici ndico Yesu wakacita apo wakaŵa mu nyumba ya Ciuta. Ndipo usange ucitenge vintu ivi, ukondweskenge Ciuta nga ni umo Yesu wakacitira.

Kasi ungaghanaghanira za ŵana ŵanyake awo ŵali kuzunurika mu  Baibolo ŵeneawo ŵakakondweska Ciuta?— Timote njumoza wa iwo. Ŵadada ŵake ŵakasopanga Yehova cara. Kweni ŵamama ŵake, ŵa Yunike, ndiwo, kusazgapo na ŵabuya ŵake ŵa Loisi. Timote wakategherezganga kwa iwo nkani za Yehova.

Timote wakati wakura, mpostole Paulos wakiza ku tawuni uko wakakhalanga. Wakawona umo Timote wakaŵira wakunweka kuteŵetera Yehova. Nteura wakamucema kuti wendenge nayo mwakuti wakuzgireko uteŵeti wake kwa Ciuta. Kulikose uko ŵakarutanga, ŵakaphaliranga ŵantu za Ufumu wa Ciuta na Yesu.—Milimo 16:1-5; 2 Timote 1:5; 3:14, 15.

Kweni kasi mu Baibolo muli viyerezgero vya ŵanyamata pera awo ŵakakondweska Ciuta?— Yayi. Aghanaghanira za msungwana munyake mucoko wa ku Israyeli. Pa nyengo iyo iye wakaŵako, caru ca Siriya na caru ca Israyeli vikatinkananga. Zuŵa limoza Ŵasiriya ŵakarwa nkondo na Ŵaisrayeli na kutolera msungwana yura ku  wuzga. Iye wakatumika kukakhala ku nyumba ya murara wa ŵasilikari, zina lake Namani. Kura wakaŵa muteŵeti wa muwoli wa Namani.

Namani wakarwaranga ntenda ya vyoni. Madokotala ghose ghakatondeka kumovwira. Kweni msungwana wa ku Israyeli yura wakagomezganga kuti yumoza wa ŵateŵeti ŵapadera ŵa Ciuta, wangamovwira Namani. Namani na muwoli wake ŵakasopanga Yehova yayi. Kasi msungwana yura wakeneranga kuŵaphalira ivyo wakamanyanga? Kasi iwe ukatenge ucitenge wuli?—

Msungwana mucoko yura wakati: ‘Usange Namani wangaruta kwa ncimi ya Yehova iyo yiri ku Israyeli, mbwenu wamucira vyoni vyake.’ Namani wakamupulikira msungwana mucoko yura, ndipo wakaruta kwa ncimi ya Yehova. Wakati wacita ivyo ncimi yikamuphalira, wakacira. Ici cikapangiska Namani kuŵa musopi wa Ciuta waunenesko.—2 Mathemba 5: 1-15.

Kasi iwe ungatemwa kovwira muntu kuti wamanye Yehova na ivyo wangacita, nga ni umo msungwana mucoko yura wakacitira?— Kasi mbanjani awo ungawovwira?— Pakwamba iwo ŵangaghanaghana kuti ŵakukhumbikwira wovwiri yayi. Kweni ungaŵaphalira za vintu viweme ivyo Yehova wakucita. Nyengo zinyake iwo ŵangategherezga. Iwe ungaŵa wakusimikizga kuti ici cikondweskenge Ciuta.