APO Saulos wakacitanga vintu viheni, kasi ni njani uyo wakakondwanga?— Satana Dyabulosi. Ŵarongozgi ŵa cisopo ca Ciyuda nawoso ŵakakondwanga. Kweni Saulos wakati wazgoka kuŵa musambiri wa Msambizgi Waluso na kucemeka Paulos, ŵarongozgi ŵa cisopo ŵara ŵakamba kumutinka. Mwanteura, kasi wawona cifukwa ico nkhwakusuzga kwa uyo ni musambiri wa Yesu kucita uweme?—

Musofi mukuru munyake zina lake Ananiya nyengo yinyake wakatuma ŵantu kuti ŵamutimbe Paulos ku maso. Ananiya wakayezgayezga kuti Paulos wakakike. Paulos wakasuzgika comene wakati waŵa musambiri wa Yesu. Mwaciyerezgero, ŵantu ŵaheni ŵakamutimba Paulos na kukhumba kumukoma na malibwe.—Milimo 23:1, 2; 2 Ŵakorinte 11:24, 25.

Ŵantu ŵanandi ŵayezgenge kuti ŵatipangiske kucita vintu ivyo vikukwiyiska Ciuta. Nteura, kasi ni mwauli umo ukutemwera ico nciweme? Kasi ukutemwa uweme  comene mwakuti ucitenge ico nciweme nanga ni apo ŵanji ŵakukutinka cifukwa ca kucita uweme? Kucita nteura kukukhumbikwira cikanga, asi ntena?—

Iwe ungazizwa, ‘Kasi ŵantu ŵangatitinkiraci cifukwa ca kucita uweme? Kasi iwo ŵakwenera kuŵa ŵakukondwa yayi?’ Iwe ungaghanaghana nteura. Nyengo zinandi ŵantu ŵakamutemwanga Yesu cifukwa ca vintu viweme ivyo wakacitanga. Pa nyengo yinyake, ŵantu wose ŵa mu msumba ŵakawungana pa muryango wa nyumba iyo Yesu wakakhalanga. Ŵakiza cifukwa Yesu wakacizganga ŵantu ŵarwari.—Marko 1:33.

Kweni nyengo zinyake ŵantu ŵakatemwanga yayi ivyo Yesu wakasambizganga. Nangauli nyengo zose wakasambizganga vintu vyaunenesko, ŵanyake ŵakavitemwanga yayi. Nakwenenako, ŵanji ŵakamutinkanga  comene cifukwa cakuti wakayowoyanga unenesko. Ici cikacitika zuŵa linyake ku Nazareti, msumba uwo Yesu wakakulira. Wakanjira mu sunagoge, malo agho Ŵayuda wakasoperangamo Ciuta.

Kwenekura, Yesu wakayowoya nkani yiweme comene ya mu Malemba. Ŵantu ŵakayitemwa pakwamba. Ŵakazizwa na mazgu agho wakayowoya. Iwo ŵakagomezga yayi kuti ni mwanarumi uyo wakakulira mu msumba wawo.

Kweni Yesu wakayowoya cintu cinyake. Wakayowoya za nyengo apo Ciuta wakarongora citemwa capadera ku ŵantu awo ŵakaŵa Ŵayuda yayi. Yesu wati wayowoya ici, ŵantu awo ŵakaŵa mu sunagoge ŵakakwiya comene. Kasi ukumanya cifukwa cake?— Ŵakaghanaghananga kuti iwo pera ndiwo ŵakatemwekanga mwapadera na Ciuta. Iwo ŵakaghanaghananga kuti ŵakaŵa ŵapacanya kuruska ŵantu ŵanyake. Nteura ŵakamutinka Yesu cifukwa ca ivyo wakayowoya. Kasi ukumanya ico ŵakakhumbanga kucita nayo?—

Baibolo likuyowoya kuti: ‘Ŵakamukora Yesu na kufumira nayo kuwaro kwa msumba. Ŵakaruta nayo mumpepete mwa phiri mwakuti ŵamuponye pasi kuti ŵamukome! Kweni Yesu wakasorota mukati mwawo na kuruta.’—Luka 4:16-30.

Usange ici cicitikirenge iwe, kasi ukatenge uwelerengekoso kukayowoya na ŵantu aŵa za Ciuta?— Kucita nteura kukatenge kukhumbikwirenge cikanga, asi ntena?— Ndipouli, pati pajumpa cirimika cimoza, Yesu wakarutaso ku Nazareti. Baibolo likuti: ‘Wakaŵasambizganga mu sunagoge lawo.’ Yesu wakareka yayi kuyowoya unenesko cifukwa ca kopa ŵantu ŵambura kutemwa Ciuta.—Mateyu 13:54.

Zuŵa linyake, pa sabata, Yesu wakaŵa mu sunagoge umo mukaŵa mwanarumi uyo wakaŵa na woko lakuphapa. Yesu wakaŵa na nkongono zakufuma kwa Ciuta zakucizgira mwanarumi yura. Kweni ŵanarumi ŵanyake awo ŵakaŵa mu sunagoge ŵakakhumbanga kumusuzga Yesu. Kasi Msambizgi Waluso wakacitaci?— Cakwamba wakafumba kuti: ‘Usange muli na mberere iyo yawira mu mbuna pa Sabata, kasi mungayifumyamo yayi?’

 Iwo ŵakatenge ŵacitenge ici ku mberere, nanga pangaŵa pa Sabata, zuŵa ilo ŵakeneranga kupumura. Nteura Yesu wakati: ‘Mbuweme kovwira muntu pa Sabata kuruska kovwira mberere, cifukwa muntu ngwakuzirwa comene kuruska mberere!’ Yesu wakarongosora mwakupulikikwa makora kuti kukaŵa kwakwenelera kuti wacizge mwanarumi yura.

Yesu wakaphalira mwanarumi yura kuti wanyoroske woko lake. Pa nyengo yeneyiyo woko likaŵa makora. Mwee, naco ncimwemwe ico mwanarumi yura wakaŵa naco! Kweni wuli pakuyowoya za ŵanarumi ŵanyake ŵara? Kasi ŵakakondwa?— Yayi. Ŵakamutinka comene Yesu kuruska kale. Iwo ŵakafuma kuti ŵakapangane umo ŵangamukomera!—Mateyu 12:9-14.

Ndimoso viliri mazuŵa ghano. Muli mose umo tingacitira, tingakondweska waliyose yayi. Nteura tikwenera kusanka uyo tikwenera kumukondweska. Usange tikukhumba kukondweska Yehova Ciuta na Mwana wake, Yesu Kristu, mbwenu nyengo zose tikwenera kucita ivyo ŵakusambizga. Kweni usange ticitenge nteura, kasi ni njani uyo watitinkenge? Ni njani uyo wapangiskenge kuti kuŵe kwakusuzga kwa ise kucita ico nciweme?—

Ni Satana Dyabulosi. Kweni kasi mbanjaniso ŵanyake awo ŵatitinkenge?— Awo ŵakupusikika na Dyabulosi kugomezga vintu vyautesi. Yesu wakaphalira ŵarongozgi ŵa cisopo kuti: “Imwe wiskemwe ndi Satana, ndipo makhumbiro gha wiskemwe mukukhumba kucita.”—Yohane 8:44.

Pali ŵantu ŵanandi awo Dyabulosi wakutemwa. Yesu wakathya ŵantu aŵa kuti “caru.” Kasi ukughanaghana kuti “caru” ico Yesu wakayowoya ncivici?— Tiye tiwone pa Yohane cipaturo 15, vesi 19. Apa tikuŵazga mazgu gha Yesu agha: “Muŵenge ŵa caru mphanyi caru catemwa cake. Kweni cifukwa kuti muli ŵa caru cara, kweni ine, nkamusorani mu caru, rekani caru cikumutinkani.”

Nteura caru ico cikutinka ŵasambiri ŵa Yesu cikusazgapo ŵantu wose  awo mbarondezgi ŵake yayi. Ncifukwa wuli caru cikutinka ŵasambiri ŵa Yesu?— Aghanaghanira. Kasi muwusi wa caru ni njani?— Baibolo likuti: “Caru cose cikugona mu nkongono za muheni.” Muheni uyu ni Satana Dyabulosi.—1 Yohane 5:19.

Kasi wawona sono cifukwa ico nkhwakusuzga kucita ico nciweme?— Satana na caru cake ndivyo vikupangiska kuti kuŵe kwakusuzga. Kweni paliso cifukwa cinyake. Kasi ukukumbuka cifukwa ici?— Mu Cipaturo 23 ca buku ili, tikasambira kuti tose tikubabika ŵakwananga. Kasi kuzamuŵa kwakukondweska yayi para zakwananga, Dyabulosi, na caru cake vyose vyafumapo?—

Baibolo likulayizga kuti: “Caru cikuruta.” Ici cikung’anamura kuti wose awo ŵakureka kurondezga Msambizi Waluso ŵazamuŵakoso cara. Ŵazamuzomerezgeka yayi kuti ŵakhale kwamuyirayira. Kasi ukuŵamanya awo ŵazamukhala kwamuyirayira?— Baibolo likurutirizga kuti: “Uyo wakucita khumbo la Ciuta, wakukhalirira muyirayira.” (1 Yohane 2:17) Ŵekha awo ŵakucita uweme, awo ŵakucita “khumbo la Ciuta,” ndiwo ŵazamukhala kwamuyirayira mu caru cipya ca Ciuta. Nteura, nangauli nkhwakusuzga, tikukhumba kucita uweme, asi ntena?—