KASI ncivici ico ukucitemwa comene, kugwira ncito panji kuseŵera?— Kuyowoya unenesko, palije uheni uliwose na kuseŵera. Baibolo likuyowoya za ‘ŵasepuka na ŵasungwana awo ŵakaseŵeranga mu msumba’ wa Yerusalemu.—Zekariya 8:5.

Msambizgi Waluso wakakondwanga comene kuwonelera ŵana ŵakuseŵera. Apo wakaŵa wandize pa caru capasi, iye wakati: ‘Nkaŵa pafupi na [Ciuta] nga ndi fundi; [panji kuti nkhwanta pa kucita vintu] nkakondwa pamaso pake nyengo zose.’ Awona kuti Yesu wakagwiranga ncito lumoza na Yehova kucanya. Ndipo peneapo wakaŵa kucanya, iye wakati: ‘Nkakondweraso na ŵana ŵa ŵantu.’ Nadi, nga ni umo  tasambilira, Msambizgi Waluso wakatemwanga muntu waliyose, kusazgapo ŵana.—Zintharika 8:30, 31.

Kasi ukughanaghana kuti Yesu wakaseŵeranga apo wakaŵa mwana?— Mwambura kukayika wakaseŵeranga. Kweni cifukwa cakuti wakaŵa nkhwanta pakucita vintu kucanya, kasi iye wakagwirangaso ncito apo wakaŵa pa caru capasi?— Yesu wakamanyikwanga nga ndi “mwana wa muŵaji” [panji kuti kalipentara]. Kweni nayeso wakacemanga “muŵaji.” Kasi ici cikurongoraci?— Yosefe, uyo wakamulera Yesu nga ni mwana wake, wakwenera kuti wakamusambizganga. Mwanteura Yesu nayo wakazgoka kalipentara.—Mateyu 13:55; Marko 6:3.

Kasi Yesu wakaŵa kalipentara wa mtundu wuli?— Cifukwa cakuti wakaŵa nkhwanta pakucita vintu kucanya, kasi ukughanaghana  kuti iye wakaŵa kalipentara waluso comene pano pa caru capasi?— Aghanaghanira umo ncito ya ukalipentara yikaŵira yinonono pa nyengo iyo. Mwambura kukayika Yesu wakarutanga kuthengere kukadumura makuni, na kughatolera kunyumba, ndipo pamanyuma pake wakayiparanga mwakuti wapange mathebulo, mipando, na vintu vinyake.

Kasi ukughanaghana kuti Yesu wakakondwanga na ncito iyi?— Kasi ungakondwa usange ungapanga mathebulo na mipando ndiposo vintu vinyake vyakutowa nkanira vyakuti ŵantu ŵagwiriskirenge ncito?— Baibolo likuyowoya kuti nciweme kuti ‘muntu wakondwenge na ncito yake.’ Ncito yikupangiska kuti muntu waŵe na cimwemwe ico wangacisanga yayi mu maseŵero.—Mupharazgi 3:22.

Nadi pano, ncito njiweme cifukwa yikutovwira pose paŵiri, mu maghanoghano ghithu ndiposo kuti thupi lithu likule makora. Ŵana ŵanandi ŵakukhara waka na kucezga waka ndiposo ŵakuseŵera waka na ŵanyawo. Mwanteura iwo ŵakuŵa ŵakata ndiposo ŵakuŵa ŵankhwesa nakuti ŵakuŵa ŵambura cimwemwe. Ndipo ŵakupangiska ŵanyawo kuti ŵaŵe ŵambura cimwemwe. Kasi tikwenera kucitaci kuti tikondwenge?—

Mu Cipaturo 17 tikasambira kuti kugaŵira ŵanyako vintu na kovwira ŵanji kukwiziska cimwemwe. (Milimo 20:35, NW) Baibolo likuyowoya kuti Yehova ndi “Ciuta wa cimwemwe.” (1 Timote 1:11, NW) Ndipo tikuŵazga mu buku la Zintharika kuti Yesu ‘wakakondwanga nyengo zose.’ Cifukwa wuli Yesu wakakondwanga?— Wakapereka cifukwa cimoza apo wakati: ‘Ŵadada ŵane ŵakugwira ncito mupaka sono, ndipo nane nkucita nteura.’—Yohane 5:17.

Peneapo Yesu wakaŵa pa caru capasi, wakagwira ncito ya ukalipentara umoyo wake wose cara. Yehova Ciuta wakamupa ncito yapadera comene yakuti wagwire pa caru capasi. Kasi ukuyimanya ncito yake?— Yesu wakati: ‘Nkwenera kupharazga makani ghaweme gha Ufumu wa Ciuta, cifukwa ceneici ndico nkatumikira.’ (Luka 4:43) Nyengo zinyake apo Yesu wakapharazgiranga ŵantu, ŵakamugomezganga ndipo ŵakaphaliranga ŵanyawo ivyo ŵasambira, nga ndi umo wakacitira mwanakazi wa Cisamariya uyo ukumuwona pa cithuzithuzi ici.—Yohane 4:7-15, 27-30.

 Kasi Yesu wakayiwona wuli ncito iyi? Kasi ukughanaghana kuti iye wakakhumba kugwira nadi ncito iyi?— Yesu wakati: ‘Cakurya cane ncakuti ndicitenge khumbo la uyo wakandituma, na kufiska ncito yake.’ (Yohane 4:34) Kasi cakurya ico ukucitemwa comene ukukhumba kuti uciryenge kalinga?— Ici cingakovwira kumanya umo Yesu wakatemweranga ncito iyo wakapika na Ciuta kuti wacite.

Ciuta wali kutilenga mu ntowa yakuti tisambirenge kugwira ncito mwakuti tikondwenge. Wakayowoya kuti cawanangwa Cake ku muntu ncakuti ‘wakondwenge na ncito yake.’ Mwanteura usange wasambira kugwira ncito para uli mwana, uzamukondwa mu umoyo wako wose.—Mupharazgi 5:19.

Ici cikung’anamura kuti mwana wangagwira ncito ya muntu murara cara, kweni tose tingagwira ncito. Ŵapapi ŵako ŵangaruta ku ncito nyengo zose mwakuti ŵasange ndarama zakugulira cakurya na vintu vyakukhumbikwa pa umoyo. Iwe ukwenera kumanya kuti, pali ncito yinandi iyo yikwenera kugwirika pa nyumba yinu mwakuti paŵe pakutowa.

Kasi ni ncito wuli iyo ungacita iyo yingaŵa yakovwira mbumba yose?— Ungawovwira kunyamura vyakurya ku khicini na kukaŵika pa malo ghakuryerapo, kusuka mbale, kupyera pa luŵaza na kunozga pa malo ghako ghakugona. Mutepanji nyengo zinyake ukucita kale vintu ivi. Ncito izi ni zakovwira comene ku mbumba.

Tiye tiwone ncito yimoza iyo yingaŵa yakovwira. Vidoli ivyo ukuseŵereska ukwenera kuviŵika pa malo ghaweme para wamara kuseŵera. Cifukwa wuli ungayowoya kuti ici ncakovwira?— Cikovwira kuti panyumba paŵe pakutowa, ndiposo kutceŵa ngozi. Usange ukuŵika yayi vintu ivyo ukuseŵereska pa malo ghaweme, nyengo zinyake cingacitika kuti ŵamama ŵako ŵakukhumba kuti ŵajumpe apo iwe waseŵeranga uku ŵanyamura vintu ndipo ŵangakhuŵara na kuwa. Ŵangajipweteka. Ŵangaruta ku cipatala. Kasi ici cingaŵa ciweme?— Mwanteura para ukuŵika vintu ivyo ukuseŵereska pa malo ghaweme para wamara kuseŵera, ici cingawovwira waliyose.

 Paliso ncito yinyake iyo ŵana ŵakwenera kugwira. Mwaciyerezgero, kusambira sukulu. Ku sukulu mukusambira kuŵazga. Ŵana ŵanyake ŵakutemwa comene kuŵazga, kweni ŵanji ŵakuwona nga ncintu cakusuzga comene. Nangauli kungaŵa kwakusuzga pakwambilira, uzamukondwa comene usange wamanya kuŵazga makora. Para wamanya kuŵazga, paliso vintu vinandi vyakukondweska ivyo ungasambira. Uzamuŵazganga wekha buku la Ciuta, Baibolo. Mwanteura para wasambira makora sukulu, ni thumbiko, asi ntena?—

Pali ŵantu ŵanyake awo ŵakukhumba cara kugwira ncito. Panji ukumanyapo ŵanji awo ŵakucita nteura. Kweni cifukwa cakuti Ciuta walikutilenga kuti tigwirenge ncito, tikwenera kusambira umo tingacitira. Ni mwauli umo Msambizgi Waluso wakasangwira na ncito yake?— Yikaŵa nga ndi cakurya ico wakacitemwa comene. Ndipo, kasi ni ncito wuli iyo Yesu wakayowoyanga?— Kuphalira ŵanji za Yehova Ciuta ndiposo umo ŵangasangira umoyo wamuyirayira.

Mwanteura pano pali vintu ivyo vingatovwira ise kukondwa na ncito. Jifumbe kuti, ‘ncifukwa wuli nkwenera kuyigwira?’ Para wamanya kuzirwa kwa ncito iyo, cikuŵa cipusu kugwira ncito. Nanga yiŵe ncito yikuru panji yicoko, gwira waka mwakulimbikira. Usange wagwira makora ungakondwa nga ni umo wakakondwera Msambizgi withu Waluso.