TIYEREZGERE kuti uli mu boti ilo lambapo kubira. Kasi ungatemwa kuti muntu munyake wakuponoske kuti ureke kubira?— Uli usange muntu munyake wajipereka kuti wakuponoske?— Ici ndico Yesu wakacita. Nga ni umo tikasambilira mu Cipaturo 37, iye wakapereka umoyo wake kuŵa sembe ya kuwombora kuti tisange ciponosko.

Yesu kuti wakutiponoska kuti tireke kubira yayi. Kasi ukukumbuka kuti Yesu wakutiponoska ku vici?— Wakutiponoska kufuma ku zakwananga na nyifwa izo tiri kupokera kwa Adamu. Nangauli ŵantu ŵanyake ŵakucita vintu viheni comene, kweni Yesu wali kufwira na iwo wuwo. Kasi ungatemwa kuti upereke umoyo wako kuti uponoske ŵantu ŵanteura awo?—

Baibolo likuyowoya kuti: ‘Pakuti nkunonono kuti muntu wamufwire murunji: kweni muntu muweme nyengo zinyake wangaŵapo uyo wangamufwira.’ Mwakusazgirapo, Baibolo likurongosora kuti Yesu ‘wakafwira ŵantu ŵakwananga.’ Ŵantu aŵa ŵakusazgapo awo ŵakureka kuteŵetera Ciuta. Baibolo likurutilira kuyowoya kuti: “Tikaŵa ticali ŵakwananga [apo tikaŵa ticali kucita vintu viheni], Kristu wakatifwira.”—Ŵaroma 5:6-8.

Kasi ungazunura mpostole uyo pakwamba wakacitanga vintu viheni comene?— Mpostole uyu wakalemba kuti: ‘Yesu Kristu wakiza mu caru kwiza kaponoska ŵakwananga; pa ŵakwananga aŵa, ine ndine muheni comene.’ Mpostole Paulos ndiye wakayowoya mazgu agha. Iye wakayowoya kuti kale ‘wakaŵa wakupusa’ ndiposo ‘wakacitanga vintu viheni.’—1 Timote 1:15; Tito 3:3.

Aghanaghanira waka, ici cikurongora pakweru kuti Ciuta wali na  citemwa cikuru comene kuti watumizge Mwana wake kuti wazakafwire ŵantu ŵaheni! Sono tora Baibolo lako ndipo tiŵazgire pamoza lemba la Yohane 3, vesi la 16. Lemba ili likuti: ‘Ciuta wakamanya kucitemwa caru, rekani wakapereka Kananda wake, mwakuti yose uyo wakupulikana nayo wareke kutayika, kweni waŵenge na umoyo wa muyirayira.’

Yesu wakarongora kuti iye naye wakutitemwa comene nga ni umo Ŵadada ŵake ŵakutitemwera. Panji ungakumbuka kuti mu Cipaturo 30 ca buku lino, tikasambira vintu vinyake ivyo Yesu wakakomwa navyo nyengo ya usiku apo ŵakamukaka. Wakatorekera ku nyumba ya Musofi Mukuru, Kayafa, kweneuko Iye ŵakamweruzga. Ŵakacema ŵakaboni ŵautesi kuti ŵamuyowoyere utesi Yesu, ndipo ŵantu ŵanyake ŵakamutimba na mafayiti Yesu. Pa nyengo iyi Petros wakakana kuti wakumumanya Yesu. Sono tiye tiyerezgere kuti tikaŵapo pa nyengo yira, ndipo tiye tiwone ivyo vikacitika.

Yikaŵa nyengo ya mulenji. Yesu wakagona yayi usiku wose wula. Pakuti ŵakaswa dango mwakweruzga mrandu nyengo ya usiku, ŵasofi mwaluŵiro ŵakacema ŵantu wose awo ŵakagwiranga ncito mu khoti likuru la Ciyuda lakucemeka Sanhedrin. Ŵantu aŵa ŵakamweruzgaso Yesu. Iwo ŵakamupusikizgira Yesu kuti wali na mirandu yakubudira Ciuta.

Pamanyuma pake ŵasofi ŵakamukaka Yesu na kuruta naye kwa Pilato, uyo wakaŵa mwimiliri wa boma la Roma. Iwo ŵakaphalira Pilato kuti: ‘Yesu wakuwukira boma. Wakwenera kukomeka.’ Kweni Pilato wakawona kuti ŵasofi ŵara ŵakayowoyanga utesi. Anteura Pilato wakaŵaphalira kuti: ‘Muntu uyu wandabude yayi. Nimufwaturenge warutenge.’ Kweni ŵasofi na ŵantu ŵanyake ŵakacemerezga kuti: ‘Yayi! Wakomeke!’

Pilato wakayezgaso kuphalira ŵantu kuti wafwaturenge Yesu. Kweni ŵasofi ŵakapangiska ŵantu kuti ŵacemerezge kuti: ‘Usange mwamufwatura, mbwenu imwe namwe mukuwukira boma! Uyu wakwenera kukomeka!’ Wumba wa ŵantu ukacita congo comene. Kweni kasi ukumanya ico Pilato wakacita?—

Wakathera na kupulikira ivyo ŵantu ŵakayowoya. Cakudanga wakathyapula Yesu. Pamanyuma pake wakamupereka ku ŵasirikari kuti  ŵamukome. Iwo ŵakavwarika Yesu cisoti ca minga na kwamba kumunyoza mwa kumugwadira. Pamanyuma pake ŵakamupa Yesu khuni lakuti wanyamure, ndipo ŵakaruta naye kuwaro kwa msumba na kufika pa malo ghakucemeka Malo gha Bwaza. Ŵakakhomelera Yesu na mizumali ku khuni ilo wakanyamura. Pamanyuma pake ŵakaliyimika khuni lira uku Yesu wali penepapo wakukhomeka. Thupi lake likafumanga ndopa. Wakapulikanga vyakuŵinya comene.

Yesu wakafwa nyengo yeneyiyo yayi. Wakaŵa pa khuni penepara. Ŵasofi ŵakuru ŵakamusekanga. Ŵantu awo ŵakajumpanga apo wakapayikika ŵakayowoyanga kuti: ‘Usange ndiwe Mwana wa Ciuta, khira pa khuni apo!’ Kweni Yesu wakamanya cifukwa ico Ŵadada ŵake ŵakamutuma kuti wacite. Wakamanya kuti wakeneranga  kupereka umoyo wake wambura zakwananga kuti tizakasange umoyo wamuyirayira. Paumaliro pake, ca muma fili koloko kumise, Yesu wakacemerezga na mazgu ghakuru ku Ŵadada ŵake ndipo wakafwa.—Mateyu 26:36–27:50; Marko 15:1; Luka 22:39–23:46; Yohane 18:1–19:30.

Yesu wakaŵa wakupambana comene na Adamu! Adamu wakarongora yayi kuti wakatemwanga Ciuta. Wakareka kupulikira Ciuta. Adamu wakatondekaso kurongora citemwa kwa ise. Cifukwa cakuti iye wakananga, ise tose ndise ŵakwananga. Kweni Yesu wakarongora citemwa kwa Ciuta na kwa ise wuwo. Iye nyengo zose wakapulikiranga Ciuta. Wakapereka umoyo wake kuti wafumiskepo uheni uwo tiri kupokera kwa Adamu.

Kasi ukuwongera ico Yesu wali kuticitira?— Para ukuromba kwa Ciuta, kasi ukumuwonga cifukwa ca kutipa Mwana wake?— Mpostole Paulos wakawongera ivyo Kristu wakamucitira. Paulos wakalemba kuti Mwana wa Ciuta “wakanditemwa, ndipo wakajipereka cifukwa ca ine.” (Ŵagalatiya 2:20) Yesu wakafwira iwe na ine wuwo. Wakapereka umoyo wake wambura zakwananga kuti tizakasange umoyo wamuyirayira. Nadi pano, ici ncifukwa cakuzirwa cakuti timutemwe Yesu.

Mpostole Paulos wakalembera Ŵakristu ŵa mu msumba wa Korinte kuti: “Citemwa ca Kristu cikutipangiska kuti ticitepo kantu.” Kasi ncivici ico citemwa ca Kristu cikutipangiska kuti ticite? Iwe ukughanaghana wuli?— Wona zgoro la Paulos: “Kristu wakafwira ŵantu wose mwakuti wose ŵacitenge vintu mwakuyana na umo Iye wakukhumbira. Iwo ŵangacitanga  vintu kuti ŵajikondweske ŵekha yayi.”—2 Ŵakorinte 5:14, 15, New Life Version.

Kasi ukughanaghana kuti ni mwauli umo ungarongolera kuti ukumutemwa Kristu?— Ntowa yimoza ndiyo kuphalira ŵanji vintu ivyo wasambira vyakukhwaskana na iye. Panji tiyerezgere nteura: Ungaŵa wekha mwakuti adada na amama ŵako ŵakuwona yayi ivyo ukucita, ndiposo palijeso muntu munyake uyo wangakuwona. Kasi ungalaŵilira maprogramu ghanyake gha pa wayilesi ya sinema panji kucita vintu vinyake ivyo ukumanya kuti vingamukondweska yayi Yesu?— Kumbukira kuti, Yesu ngwamoyo, ndipo wakuwona cilicose ico tikucita!

Cifukwa cinyake ico tikwenera kumutemwera Yesu ncakuti tikukhumba kurondezga Yehova. Yesu wakayowoya kuti: ‘Ŵadada ŵakunitemwa.’ Kasi ukumanya cifukwa ico Ciuta wakutemwera Yesu ndiposo ico ise tikwenera kumutemwera?— Ncifukwa cakuti Yesu wakatemwa kuti wafwe mwakuti khumbo la Ciuta licitike. (Yohane 10:17) Anteura tiye ticite ivyo Baibolo likutiphalira kuti: “Muŵe ŵakumuyezga Ciuta, nga mbana ŵakutemweka; ndipo endaninge mu kutemwa, umo Kristu nayo wakamutemwerani, ndipo wakajiperekera cifukwa ca ise.”—Ŵaefeso 5:1, 2.