YESU wakalira apo mubwezi wake Lazaro wakapotera. Kasi ukughanaghana kuti Yehova naye wakaŵa na citima apo Yesu wakasuzgikanga ndipo paumaliro pake wakafwa?— Baibolo likuyowoya kuti Ciuta ‘wangadandaula’ ndiposo ‘kukweŵeka’ na vintu ivyo vikucitika.— Salmo 78:40, 41; Yohane 11:35.

Kasi ukughanaghana kuti Yehova wakajipulika wuli apo wakawonanga Mwana wake wakufwa?— Yesu wakaŵa na cigomezgo kuti Ciuta wamuruwenge yayi. Ndico cifukwa cake mazgu ghake ghaumaliro pambere wandafwe ghakaŵa ghakuti: ‘Ŵadada, nkupereka umoyo wane mu mawoko ghinu.’—Luka 23:46.

Yesu wakasimikizga kuti wazamuwuskika, kuti wakeneranga kusidika “mu hadesi” panji kuti mu dindi yayi. Apo Yesu wakati wawuskika ku ŵakufwa, mpostole Petros wakazunura mazgu agho ghakalembeka mu Baibolo ghakuyowoya za Yesu, wakati: ‘Umoyo wake ukasidika mu dindi yayi, ndiposo thupi lake likavunda  yayi.’ (Milimo 2:31, King James Version; Salmo 16:10) Nadi pano, thupi la Yesu likavunda yayi mu dindi mura.

Apo Yesu wakaŵa pano pa caru capasi, wakaŵaphalirathu ŵasambiri ŵake kuti wazamuŵa wakufwa kwa nyengo yitali comene yayi. Wakaŵarongosolera kuti ‘wakomekenge, na kuwuskika para ghajumpapo mazuŵa ghatatu.’ (Luka 9:22) Anteura, ŵasambiri ŵakeneranga kuzizwa yayi apo Yesu wakawuskika. Kweni kasi ndimo vikaŵira?— Tiye tiwone ivyo vikacitika.

Nyengo yikaŵa ca mu ma fili koloko pa Cinkondi na muhanya apo Msambizgi Waluso wakafwira pa khuni lakusuzgikirapo. Yosefe, uyo wakaŵa muntu musambazi ndiposo wa khoti likuru la Sanhedrin, wakaŵa musambiri wa Yesu kweni wakajibisanga. Apo wakapulika kuti Yesu wafwa, wakaruta kwa Pilato, mwimiliri wa boma la Roma. Wakamupempa kuti wamuzomerezge kuti wafumyepo thupi la Yesu pa khuni kuti wakaliŵike mu dindi. Wakati walifumyapo, Yosefe wakatora thupi la Yesu na kuruta nalo mu munda uwo mukaŵa dindi.

Thupi likati laŵikika mu dindi, pa muryango wa dindi ŵakajarapo libwe likuru comene. Zuŵa lacitatu likafika, ilo pakaŵa pa Sabata. Ukaŵa mulenji comene, zuŵa likaŵa lindafume, anteura kukaŵa mdima. Pa dindi para pakaŵa ŵasirikari awo ŵakaligadanga. Iwo ŵakatumika na ŵasofi ŵakuru. Kasi ukumanya cifukwa cake?—

Ŵasofi nawo ŵakapulika kuti Yesu wakayowoya kuti wazamuwuskika ku ŵakufwa. Kuti ŵarekeske ŵasambiri ŵake kuti ŵize ku dindi kura kuti ŵatore thupi la Yesu na kuyowoya kuti Yesu wawuka, ŵasofi ŵakaŵikapo ŵalonda pa dindi kuti ŵaligadenge. Mwamabuci pasi pakayamba kusunkunika comene. Pakuti yikaŵa nyengo ya mdima, ungweru ukuru ukawoneka. Ni mungelo wa Yehova uyo wakacitiska nteura! Ŵasirikari ŵara ŵakagadanga ŵakacita wofi comene mwakuti ŵakatondeka kuti ŵende. Mungelo yura wakiza pa dindi para na kugadabura libwe ilo likajara pa muryango wa dindi. Mu dindi mulije kantu!

Pamanyuma pake mpostole Petros wakayowoyapo nkani iyi kuti: ‘Ciuta wakamuwuska Yesu.’ (Milimo 2:32) Ciuta wakamuwukiska Yesu ku  ŵakufwa na thupi ilo wakaŵa nalo pambere wakaŵa wandize pano pasi. Iye wakawuskika ku ŵakufwa na thupi lauzimu lakuyana na ŵangelo. (1 Petros 3:18) Pa nyengo yira kuti ŵantu ŵawone Yesu, wakeneranga kusinta kuti waŵe na thupi lakuyana na ŵantu. Kasi wakacita nadi nteura?— Tiye tiwone ivyo vikacitika.

Nyengo yikajumpapo ndipo dazi likamba kufuma. Ŵasirikari ŵakacimbira. Mariya wa ku Magadala na ŵanakazi ŵanyake awo ŵakaŵa ŵasambiri ŵa Yesu ŵakizanga ku dindi. Ŵakayowoyeskananga kuti: ‘Ndi njani wamkutigadabulira libwe likuru lira pa muryango wa dindi?’ (Marko 16:3) Kweni ŵakati ŵafika pa dindi, libwe likuru lira likaŵa lafumiskikapo kale. Dindi likaŵa mwazi! Thupi la Yesu mukaŵavya! Mwaluŵiro Mariya wa ku Magadala wakacimbira kuti wakaphalire ŵasambiri ŵa Yesu.

Ŵanakazi ŵanyake ŵara ŵakakhalira pa dindi penepara. Ŵakazizwanga waka kuti: ‘Thupi la Yesu lirinku?’ Mwamabuci ŵanarumi ŵaŵiri ŵakawoneka awo vyakuvwara vyawo vikanyezimiranga nkanira tu-tu-tu. Ŵanarumi aŵa ŵakaŵa ŵangelo! Iwo ŵakaphalira ŵanakazi ŵara kuti: ‘Ncifukwa wuli mukupenja Yesu pano? Wawuskika. Rutani luŵiro mukaphalire ŵasambiri ŵake.’ Aghanaghanira waka sipidi iyo ŵakacimbiranga ŵanakazi aŵa! Ŵali mu ntowa, ŵakakumana na mwanarumi. Kasi ukumumanya zina lake?—

Ni Yesu uyo pa nyengo iyi wakaŵa mu thupi lakuyana na ŵantu! Iye wakaphalira ŵanakazi ŵara kuti: ‘Rutani mukaphalire ŵasambiri ŵane.’ Ŵanakazi ŵara ŵakasangwa comene. Ŵakaŵasanga ŵasambiri ndipo ŵakaŵaphalira kuti: ‘Yesu ngwamoyo! Tangumuwona!’ Mariya wakaŵa kuti waphalira kale Petros na Yohane kuti dindi ŵangulisanga mwazi. Sono ŵiza kuti ŵazakajiwonere ŵekha nga ni umo ukuwonera pano. Ŵakulaŵiska salu izo ŵakavungamo Yesu, kweni mbakuzizwa comene. Iwo ŵakukhumba kuti ŵagomezge nadi kuti Yesu ngwamoyo, kweni iwo mbakukayika comene kuti Yesu wawuskika nadi.

Pa nyengo yinyake pa zuŵa lenelira la Sabata, Yesu wakawoneka ku ŵasambiri ŵake ŵaŵiri awo ŵakendanga mu ntowa kuruta ku muzi wa Emausi. Yesu wakenda nawo na kuyowoyeskana nawo, kweni ŵakamumanya  yayi cifukwa wakaŵa na thupi lakupambana na ilo wakaŵa nalo pambere wandafwe. Pakwambilira ŵakamumanya yayi Yesu, kweni ŵakamumanya apo wakati warya nawo cakurya na kuromba. Ŵasambiri aŵa ŵakakondwa comene mwakuti ŵakenda luŵiro-luŵiro kuwelera ku Yerusalemu, mtunda uwo ŵakenda ukaŵa makilomita ghanandi comene. Mutepanji nyengo yikajumpapo yicoko waka peneapo Yesu wakawonekera kwa Petros kuti wagomezge nadi kuti Iye wawuka.

Nyengo ya mise pa Sabata penepara, ŵasambiri ŵanandi ŵakaŵa mu cipinda. Vijaro vyose ŵakakiya. Kweni mwamabuci waka ŵakawona Yesu wali mu cipinda mwenemura! Wose ŵakagomezga kuti Msambizgi Waluso ngwamoyo nadi. Aghanaghanira waka umo ŵakakondwera!—Mateyu 28:1-15; Luka 24:1-49; Yohane 19:38–20:21.

 Kwa mazuŵa 40 Yesu wakawonekera ku ŵasambiri ŵake kuti ngwamoyo. Pamanyuma pake wakakwera kucanya ku Ŵadada ŵake. (Milimo 1:9-11) Mwaluŵiro ŵasambiri ŵake ŵakamba kuphalira waliyose kuti Ciuta wawuska Yesu ku ŵakufwa. Nangauli ŵasofi ŵanyake ŵakatimbanga na kukoma ŵanji mwa ŵasambiri aŵa, iwo ŵakarutilizga kupharazga. Ŵakamanya kuti para ŵangafwa, mbwenu Ciuta waŵakumbukirenge nga ni umo wakakumbukira Mwana wake.

Ŵasambiri ŵa Yesu mbakupambana comene na ŵantu ŵanandi mu nyengo yithu! Mu vyaru vinyake, pa nyengo iyo ŵakukumbukira kuwuka kwa Yesu, ŵantu ŵanandi ŵakukumbukira waka ŵakalulu ŵa pa Isitara na masumbi ghamadonto-madonto. Baibolo likuyowoyapo cilicose yayi pa nkani ya ŵakalulu na masumbi gha pa Isitara. Kweni ilo likuyowoya za kuteŵetera Ciuta.

Nase tingacita nga ni umo ŵakacitira ŵasambiri ŵa Yesu mwakuphalira ŵantu kuti Ciuta wali kucita cintu ciweme comene mwakuwukiska Mwana wake. Tingacitanga wofi yayi, kwali ŵantu ŵatiphalire kuti ŵatikomenge. Para tingafwa, Yehova wazamutikumbukira ndipo wazamutiwuska, nga ni umo wakawuskira Yesu.

Kasi ndise ŵakukondwa yayi kuti Ciuta wakukumbukira ŵantu awo ŵakumuteŵetera, ndiposo kuti wazamuŵawukiska?— Kumanya vintu vyanteura ivi kukwenera kutipangiska kuti timanye ntowa izo tingakondweskera Ciuta. Kasi ukumanya kuti tingamukondweska nadi?— Tidumbiskanenge kuntazi fundo iyi.