ŴANTU ŵanyake ŵakuyowoya kuti ŵakugomezga vintu vyekha ivyo ŵangawona. Kweni uwu mbucindere. Pali vintu vinandi vyeneco ivyo tindaviwonepo na maso ghithu. Kasi ungazunurapo cimoza?—

Wuli za mvuci uwo tikuthuta? Kasi tikuwuwona?— Thutira pa woko lako. Kasi wapulika cintu cinyake?— Wapulika, kweni ungawuwona yayi mvuci, asi ntena?—

Tiri kudumbiskanapo kale za ŵantu ŵauzimu, awo tingaŵawona yayi. Tikasambira kuti ŵanyake mbaweme kweni ŵanyake mbaheni. Niphalira ŵantu ŵanyake ŵauzimu ŵaweme awo tingaŵawona yayi.— Pali Yehova Ciuta, Yesu, ndiposo pali ŵangelo ŵaweme. Kasi paliso ŵangelo ŵaheni?— Baibolo likuyowoya kuti ŵalipo. Niphalira ivyo wasambira vyakukhwaskana na iwo.—

Cintu cimoza ico tikumanya ncakuti ŵangelo wose ŵaweme na ŵaheni mbankongono kuruska ise. Msambizgi Waluso wakamanyanga vinandi vya ŵangelo. Ici cikaŵa cifukwa cakuti iye wakaŵa mungelo apo wakaŵa wandababike nga ni bonda pa caru capasi. Wakakhalanga na ŵangelo kucanya. Wakamanyanga ŵangelo mamiliyoni ghanandi. Kasi ŵangelo wose aŵa ŵali na mazina?—

Enya, tikasambira kuti nyenyezi zose Ciuta wakazipa mazina. Mwanteura, tiri na cigomezgo kuti ŵangelo wose ŵaliso na mazina. Ndipo tikumanya kuti ŵakuyowoyeskana, cifukwa Baibolo likuphara za ‘ciyowoyero ca ŵangelo.’ (1 Ŵakorinte 13:1) Kasi ukughanaghana kuti ŵangelo ŵakuyowoyaci? Kasi ŵakuyowoya za ise pa caru capasi?—

Tikumanya kuti ŵangelo ŵa Satana, viŵanda, ŵakuyezgayezga kuticicizga  kuti tireke kupulikira Yehova. Iŵo ŵakwenera kuti ŵakudumbiskana umo ŵangacitira ici. Ŵakukhumba kuti ise tiŵe nga ndiwo mwakuti Yehova wareke kutitemwa. Wuli pakuyowoya za ŵangelo ŵakugomezgeka ŵa Ciuta? Kasi ukughanaghana kuti nawo ŵakudumbiskana za ise?— Enya, ŵakudumbiskana. Ŵakukhumba kutovwira. Leka nikuphalire umo ŵangelo ŵanyake ŵa Ciuta ŵakawovwilira ŵantu awo ŵakatemwanga Yehova na kumuteŵetera.

Mwaciyerezgero, pakaŵa mwanarumi munyake zina lake Daniyeli uyo wakakhalanga ku Babulone. Ŵantu ŵanandi ŵa ku Babulone ŵakamutemwanga yayi Yehova. Ŵakapanga dango lakuti waliyose uyo wakusopa Yehova Ciuta walangike. Kweni Daniyeli wakareka yayi kusopa Yehova. Kasi ukumanya ico ŵakamucitira Daniyeli?—

Ŵantu ŵaheni ŵakamuponya Daniyeli mu cizenje ca nkaramu. Daniyeli wakaŵa yekha mu cizenje mura pamoza na nkaramu  zikari ndiposo zanjara. Kasi ukumanya ico cikacitika pamanyuma pake?— ‘Ciuta wakatuma mungelo wake, ndipo wakajara milomo ya nkaramo,’ wakati nteura Daniyeli. Wakapwetekeka yayi napacoko-pose! Nadi pano, ŵangelo ŵangacita vintu vyakuzizwiska kuvikilira awo ŵakuteŵetera Yehova.—Daniel 6:18-22.

Pakaŵaso nyengo yinyake apo Petros wakaŵa mu jere. Ukukumbuka kuti Petros wakaŵa mubwezi wa Msambizi Waluso, Yesu Kristu. Ŵantu ŵanyake ŵakakondwa yayi apo Petros wakaŵaphalira kuti Yesu Kristu wakaŵa mwana wa Ciuta. Mwanteura wakamuŵika mu jere. Ŵasilikari ŵakamulindanga Petros kuwoneseska kuti wareke kucimbira. Kasi wakaŵapo waliyose uyo nga wakamovwira?—

 Petros wakagonanga pakati pa ŵasilikari ŵaŵiri, wakakakika unyoro mu mawoko na mu marundi. Kweni Baibolo likuyowoya kuti: ‘Wonani! Mungelo wa Yehova wakiza, ndipo kungweruka kukamba kuŵala mu nyumba ya ŵakayidi. Mungelo wakamupamanta Petros pa ciŵegha, wakamuwuska, wakati, “Wuka luŵiro!”’

Mwaluŵiro unyoro ukavulika mu mawoko gha Petros! Ndipo mungelo wakamuphalira wakati: ‘Vwara maraya na skapato zako ndipo unirondezge.’ Ŵalinda ŵakatondeka kuŵakanizga cifukwa mungelo wakamovwiranga Petros. Sono ŵati ŵafika pa cipata cikuru, cintu cakuzizwiska cikacitika. Cipata cikajurika cekha! Mungelo yura wakamusutura Petros kuti wakarutirizge kupharazga.—Milimo 12:3-11.

Kasi ŵangelo ŵa Ciuta nase ŵangatovwira?— Enya. Kasi ici cikung’anamura kuti iwo ŵazomerezgenge yayi kuti ise tisuzgike?— Yayi, Ŵangelo ŵakutivikilira yayi para tikucita vintu vyawakawaka. Ndipo nanga tingaŵa kuti tikucita yayi vintu vyawakawaka, kweni tingasanga masuzgo. Ŵangelo ŵandaphalirike kuti ŵativikilirenge ku vintu ivi. M’malo mwake, Ciuta wali kuŵapa mulimo wapadera wakuti ŵacitenge.

Baibolo likuyowoya za mungelo uyo wakuphalira ŵantu kulikose kuti ŵasopenge Ciuta. (Civumbuzi 14:6, 7) Kasi mungelo wakuŵaphalira wuli ŵantu? Kasi iye wakucemerezga waka kucanya mwakuti waliyose wangamupulika?— Yayi, m’malo mwake ŵarondezgi ŵa Yesu ŵa pa caru capasi ŵakuphalira ŵanji za Ciuta, ndipo ŵangelo ŵakuŵarongozga mu uteŵeti wawo. Ŵangelo ŵakuwoneseska kuti awo ŵakukhumba nadi kumanya za Ciuta wali na mwaŵi wakupulika. Tinganjizgikamo mu uteŵeti wakupharazga uwu, ndipo ŵangelo ŵatovwirenge.

Wuli usange ŵantu awo ŵakumutemwa yayi Ciuta ŵakutisuzga? Wuli usange ŵatiŵika mu jere? Kasi ŵangelo ŵangatisutura?— Enya. Kweni ŵakucita nteura yayi nyengo zose.

Murondezgi wa Yesu nyengo yinyake wakaŵa mu jere. Iye wakendanga pa boti peneapo mpepu yikaputanga comene pa nyanja. Kweni mungelo wakamovwira nyengo yeneyiyo yayi. Ici cikaŵa cifukwa cakuti  pakaŵa ŵantu ŵanyake awo ŵakakhumbikwiranga kuti ŵapulike za Ciuta. Mungelo wakati: ‘Ungopanga yayi Paulos. Ukwenera kwimirira pantazi pa Kesare.’ Enya, Paulos wakenera kutorekera kwa Kesare muwusi wa caru mwakuti wakamupharazgire. Nyengo zose ŵangelo ŵakamanya uko Paulos wakaŵa, ndipo ŵakamovwiranga. Ŵatovwirengeso ise usange tikumuteŵetera nadi Ciuta.—Milimo 27:23-25.

Pali mulimo unyake wakuzirwa comene uwo ŵangelo ŵacitenge, ndipo ŵacitenge sono-sono apa. Nyengo ya Ciuta yakuparanya ŵantu ŵaheni yili pafupi comene. Wose awo ŵakusopa yayi Ciuta waunenesko ŵaparanyikenge. Wose awo ŵakuyowoya kuti ŵakugomezga yayi ŵangelo cifukwa cakuti ŵakuŵawona yayi ŵamanyenge kuti ŵakubudiska.—2 Ŵatesalonika 1:6-8.

Kasi ici cikung’anamuraci kwa ise?— Usange tiri ku cigaŵa cimoza na ŵangelo ŵa Ciuta, iwo ŵatovwirenge. Kweni, kasi ise tiri ku cigaŵa cawo?— Tingaŵa ku cigaŵa cawo usange tikuteŵetera Yehova. Ndipo, usange tikuteŵetera Yehova, tiphalirenge ŵanyithu kuti nawo ŵamuteŵetere.