TOSE tikukhumba kuŵa ŵacimwemwe, kasi ni ntena yayi?— Kweni ni ŵantu wose yayi awo mbacimwemwe. Kasi ukumanya cifukwa cake?— Ncifukwa cakuti ŵandasambire cisisi ca cimwemwe. Iwo ŵakughanaghana kuti kuŵa na vintu vinandi vyakuthupi ndiko kungaŵapa cimwemwe. Kweni para ŵasanga vintu ivi, cimwemwe cawo cikukhala nyengo yitali yayi.

Ici ndico cisisi cake. Msambizgi Waluso wakati: ‘Muli cimwemwe cikuru mu kupereka kuruska kupokera.’ (Milimo 20:35, NW) Nteura, kasi ncivici ico cingatipa cimwemwe?— Ni kupereka vintu ku ŵanji ndiposo kuŵateŵetera. Kasi ukamanyanga?—

Tiye tighanaghanireposo pa fundo iyi. Kasi Yesu wakayowoya kuti muntu uyo wapokera cawanangwa wakukondwa yayi?— Yayi, wakayowoya ntena cara. Iwe ukukondwa para wapokera cawanangwa, asi ntena?— Waliyose  wakukondwa. Tikukondwa para tapokera vintu viweme.

Kweni Yesu wakati tikuŵa na cimwemwe cikuru para tikupereka. Anteura kasi ukughanaghana kuti ni njani uyo wakupereka vintu vinandi ku ŵantu kuruska muntu waliyose?— Enya, ni Yehova Ciuta.

Baibolo likuyowoya kuti Ciuta ‘wakupa ŵantu umoyo, mvuci na vintu vyose.’ Iye wakutipa vula kufuma kucanya na zuŵa, mwakuti mbewu zimere na kutipa vyakurya kuti tirye. (Milimo 14:17; 17:25) Nteura ncakuzizwiska yayi kuti Baibolo likucema Yehova kuti ni ‘Ciuta wacimwemwe’! (1 Timote 1:11, NW) Kupereka vintu ku ŵanji ni cintu cimoza ico cikupangiska Ciuta kuŵa wacimwemwe. Ndipo para tikupereka vintu ku ŵanji, nase tingaŵa ŵacimwemwe.

Sono, kasi ni vici ivyo tingapereka ku ŵanyithu? Kasi ukutipo wuli?— Nyengo zinyake cawanangwa cingakhumbikwira kucita kugula. Usange ni cawanangwa ca ku sitoro, ukwenera kulipira ndarama. Nteura usange ukukhumba kupereka cawanangwa canteura ici, ukwenera kusunga ndarama mupaka zikwane.

Kweni kuti ni vyawanangwa vyose yayi ivyo ukwenera kucita kugula. Mwaciyerezgero, para kwawotca comene, maji ghakuzizima ghakuzikiska mtima. Anteura para ukupereka cawanangwa ca maji ghakuzizima kwa muntu uyo wali na nyota, ungaŵa na cimwemwe ico cikwiza cifukwa ca kupereka.

Zuŵa linyake iwe na ŵamama ŵako mungaphika vikondamoyo. Ici cingaŵa cakukondweska. Kweni kasi ncivici ico ungacita na vikondamoyo vinyake ico cingakupa cimwemwe cikuru kuruska kurya wekha vyose?— Enya, ungapako ŵanyako vinyake. Kasi ungatemwa kucita nteura?—

 Yesu na ŵasambiri ŵake ŵakamanya cimwemwe ico cikwiza cifukwa ca kupereka. Kasi ukumanya ico ŵakapanga ŵantu?— Cikaŵa cintu ciweme comene kuruska vintu vyose pa caru capasi! Ŵakamanyanga unenesko wakuyowoya za Ciuta, ndipo ŵakaŵa ŵakukondwa kuphalirako ŵanyawo makani ghaweme agha. Ŵakacitanga ici kwawanangwa, kwambura kukhumba ndarama kwa muntu uyo ŵamupharazgira.

Zuŵa linyake mpostole Paulos na mubwezi wake Luka ŵakakumana na mwanakazi uyo wakakhumbanga kuŵa na cimwemwe ico cikwiza cifukwa ca kupereka. Ŵakakumana nayo mumpepete mwa mronga. Paulos na Luka ŵakaruta kura cifukwa ŵakapulika kuti ghakaŵa malo ghakuromberako. Ici cikaŵa caunenesko nadi, cifukwa ŵati ŵafika, ŵakasanga ŵanakazi ŵanyake ŵakuromba.

Paulos wakamba kuphalira ŵanakazi ŵara makani ghaweme gha Yehova Ciuta na Ufumu wake. Yumoza wa ŵanakazi ŵara wakaŵa Ludiya, ndipo wakategherezga comene. Pamanyuma pake, Ludiya wakakhumbanga kucita cintu cinyake kurongora kuti wakakondwa nadi na makani ghaweme agho wakapulika. Nteura wakapempa Paulos na Luka kuti: ‘Usange mwandipima wa magomezgeko kwa Yehova, munjire mu nyumba yane, mukhalemo.’ Ndipo wakaŵacicizga kuti ŵarute kunyumba kwake.—Milimo 16:13-15.

Ludiya wakakondwa kuŵa na ŵateŵeti ŵa Ciuta aŵa mu nyumba yake. Wakaŵatemwa cifukwa ŵakamovwira kumanya Yehova na Yesu na umo ŵantu ŵangakhalira kwamuyirayira. Kupereka vyakurya na malo kwa Paulos na Luka kukamupangiska kuti waŵe wacimwemwe. Anteura mzimu wakupereka wa Ludiya ukamupangiska kuti waŵe wakukondwa cifukwa wakakhumbisiska kufumira pasi pa mtima kuti wapereke. Ici ndico tikwenera kukumbukira. Muntu munyake wangatiphalira kuti tikwenera kupereka cawanangwa. Kweni usange ise tikukhumba yayi, cawanangwa ico tingapereka cingatipa cimwemwe cara.

Mwaciyerezgero, wuli usange iwe wuli na switi. Usange ine ningakuphalira kuti ugaŵireko munyako, kasi ungakondwa?— Kweni wuli usange ungakumana na munyako uyo ukutemwana nayo comene? Usange  ungakhumba wekha kuti umugaŵireko mubwezi wako, kasi ici cingakukondweska yayi?—

Nyengo zinyake muntu tikumutemwa comene mwakuti tikukhumba kumupa cilicose ico tiri naco. Peneapo citemwa cithu pa Ciuta cikukura, ndimo tikwenera kucitira na Iye.

Msambizgi Waluso wakawona mwanakazi mukavu uyo wakacita nteura. Wakamuwona mu tempele mu Yerusalemu. Wakaŵa na ndarama ziŵiri pera. Kweni wakaŵika zose ziŵiri mu bokosi nga ncawanangwa, kuti ziwovwire pa tempele. Palije uyo wakamucicizga kuti wacite nteura. Ŵantu ŵanandi awo ŵakaŵapo ŵakamanya yayi ico wakacita. Wakapereka cifukwa wakakhumba ndiposo cifukwa wakatemwanga Yehova na mtima wose. Kupereka kukamupa cimwemwe.—Luka 21:1-4.

Pali ntowa zinandi izo tingaperekera. Kasi ungazunurapo zinyake mwa ntowa izi?— Usange tikupereka cifukwa cakuti tikukhumba kucita nteura, tiŵenge ŵacimwemwe. Ndico cifukwa cake Msambizgi Waluso wakutiphalira kuti: “Ipani.” (Luka 6:38) Usange ticitenge nteura, mbwenu tipangiskenge ŵanyithu kuŵa ŵakukondwa. Ndipo ise tiŵenge ŵakukondwa kuruska wose!