MU VIPATURO viŵiri ivyo vyajumpa, mbantu ŵalinga awo tikasambira kuti ŵakawuka?— Ŵakaŵa ŵankondi. Pa ŵantu ŵankonde aŵa, kasi ŵana ŵakaŵa ŵalinga?— Ŵatatu. Ndipo wacinayi wakaŵa munyamata. Kasi ukughanaghana kuti ici cikurongoraci?—

Cikurongora kuti Ciuta wakutemwa ŵana. Kweni wazamuwuskaso ŵanyake ŵanandi. Kasi Ciuta wazamuwuska awo ŵakucita viweme pera?— Tingaghanaghana nteura. Kweni, ŵantu ŵanandi ŵakaŵavya mwaŵi wakusambira unenesko wakuyowoya za Yehova Ciuta na Mwana wake. Nteura ŵakacitanga uheni cifukwa ŵakasambizgika vintu viheni. Kasi ukughanaghana kuti Yehova wazamuwuska ŵantu ŵanga ni aŵa?—

Baibolo likuyowoya kuti: ‘Kwamkuŵa ciwuka ca ŵarunji na ŵambura urunji wuwo.’ (Milimo 24:15) Ncifukwa wuli awo ŵakaŵa ŵarunji  yayi, panji awo ŵakareka kucita ico nciweme, ŵazamuwuka?— Ncifukwa cakuti ŵakaŵavya mwaŵi wakusambira za Yehova na ivyo wakukhumba kuti ŵantu ŵacitenge.

Kasi ukughanaghana kuti ŵantu ŵazamuwuka pauli?— Kumbukira Lazaro wakati wafwa ndipo Yesu wati walayizga mudumbu wake Marita kuti: ‘Mudumbu wako wawukenge.’ (Yohane 11:23, 24) Marita wakazgora kuti: “Nkumanya kuti wati wawukenge pa ciwuka pa zuŵa la kumarira.” Kasi Marita wakang’anamurangaci pakuyowoya kuti Lazaro wawukenge pa “zuŵa la kumarira”?—

Marita wakapulikapo za layizgano la Yesu lakuti: ‘Wose awo ŵali mu mararo ŵati ŵafumengemo.’ (Yohane 5:28, 29) Nteura “zuŵa la kumarira” ni apo wose awo ŵali mu cikumbukiro ca Ciuta ŵazamuwuka. Zuŵa la kumarira ili kuti ni zuŵa la maora 24 yayi. Ni zuŵa la virimika 1000. Pa zuŵa ili, Baibolo likuti: ‘Ciuta wazamweruzga ŵantu wose pa caru capasi.’ Awo ŵazamweruzgika ŵazamusazgapo awo ŵazamuwuka ku ŵakufwa.—Milimo 17:31; 2 Petros 3:8.

Aghanaghanira waka cimwemwe ico cizamuŵapo pa zuŵa ili! Mukati mu zuŵa la virimika 1000 ili, ŵantu mamiliyoni ghanandi awo ŵali kufwa ŵazamuwuka. Yesu wakathya malo agho ŵazamukhala para ŵawuka kuti Paradiso. Tiye tiwone uko Paradiso wazamuŵa na umo wazamuŵira.

Maora ghatatu pambere Yesu wandafwe pa khuni lakusuzgikirapo, wakayowoya za Paradiso kwa muntu uyo wakapayikika pafupi  na iye. Muntu yura wakapayikika pa khuni kuti wakomeke cifukwa ca ucigeŵenga uwo wakacita. Kweni peneapo cigeŵenga ici cikalaŵiskanga Yesu na kupulika ivyo ŵantu ŵakayowoyanga za Iye, cikamba kugomezga mwa Yesu. Nteura cigeŵenga cira cikati: ‘Muzakanikumbuke para mukwiza mu Ufumu winu.’ Yesu wakazgora kuti: ‘Nkukunenera nadi muhanya uno, Wazamuŵa na ine mu Paradiso.’—Luka 23:42, 43.

Kasi Yesu wakang’anamurangaci pakuyowoya nteura? Kasi Paradiso wali nku?— Aghanaghanira za ici? Kasi Paradiso wakwamba wakaŵa nku?— Kumbukira kuti Ciuta wakapereka paradiso kwa Adamu na muwoli wake kuti ŵakhalengemo penepano pa caru capasi. Ukacemekanga munda wa Edeni. Mu munda uwu mukaŵa nyama, kweni zikapwetekanga muntu waliyose yayi. Mukaŵaso makuni agho ghakaŵa na vipasi vinandi, ndiposo mukaŵa mronga ukuru. Ghakaŵa malo ghaweme comene kukhalamo!—Genesis 2:8-10.

Nteura para tikuŵazga kuti cigeŵenga cira cizamuŵa mu Paradiso, tikwenera kuŵa na cithuzithuzi cakuti caru capasi cizamuzgoka malo ghakutowa kukhalamo. Kasi Yesu wazamuŵa mu Paradiso pa caru capasi penepano na cigeŵenga cira?— Yayi. Kasi ukumanya cifukwa ico Yesu wazamuŵa pano yayi?—

Ncifukwa cakuti Yesu wazamuŵa kucanya kuwusa nga ni Themba pa caru capasi ca Paradiso. Mwanteura Yesu wazamuŵa na muntu yura mu ghanoghano lakuti wazakumuwuska ku ŵakufwa na kumupa vyose ivyo wazamukhumbikwira. Kweni kasi ncifukwa wuli Yesu wakazomerezga  cigeŵenga cira kuzakakhala mu Paradiso?— Tiye tiwone usange tingasanga zgoro la fumbo ili.

Pambere cigeŵenga cira cikaŵa cindayowoye na Yesu, kasi cikamanyanga vilato vya Ciuta?— Yayi, cikamanyanga yayi. Cikacitanga vintu viheni cifukwa cikamanyanga yayi unenesko wakuyowoya za Ciuta. Mu Paradiso cizamusambizgika vilato vya Ciuta. Para casambizgika, cizamuŵa na mwaŵi wakuti cirongore kuti cikutemwa nadi Ciuta mwakucita khumbo Lake.

Kasi waliyose uyo wazamuwuka wazamukhala mu Paradiso pa caru capasi?— Yayi. Kasi ukumanya cifukwa cake?— Cifukwa ŵanyake ŵazamuwuskikira kucanya kukakhala na Yesu. Iwo ŵazamuwusa pamoza na iye nga ni mathemba pa caru capasi ca Paradiso. Tiye tiwone umo tikumanyira ici.

Usiku unyake pambere wandafwe, Yesu wakaphalira ŵapostole ŵake kuti: ‘Mu nyumba ya Ŵadada muli malo ghanandi ghakukhalamo; ndipo nkuruta kuya kamunozgerani malo.’ Pamanyuma pake Yesu wakaŵalayizga kuti: ‘Nkwizaso, ndipo ndizakumupokererani kwa ndamwene; mwakuti uko ndiri ine, ndiko namweso mukaŵenge.’—Yohane 14:2, 3.

 Kasi Yesu wakaruta nku wakati wawuka?— Enya, wakawelera kucanya kukakhala na Ŵadada ŵake. (Yohane 17:4, 5) Nteura Yesu wakalayizga ŵasambiri ŵake na ŵarondezgi ŵake ŵanyake kuti wazamuŵawuska mwakuti ŵakakhalenge na iye kucanya. Kasi ŵamucita vici kucanya na Yesu?— Baibolo likuyowoya kuti ŵasambiri ŵake awo ŵali na cigaŵa mu “ciwuka cakudanga” ŵamukhala kucanya ndipo ŵazamuwusa pa caru capasi nga ni mathemba pamoza na iye kwa virimika 1000.—Civumbuzi 5:10; 20:6; 2 Timote 2:12.

Kasi mbalinga awo ŵazamuŵa na cigaŵa mu “ciwuka cakudanga” na kuwusa pamoza na Yesu nga ni mathemba?— Yesu wakaphalira ŵasambiri ŵake kuti: ‘Mungopanga yayi ŵa kamskambo kacoko; pakuti Ŵawiskemwe ŵakukondwa kumupani ufumu.’ (Luka 12:32) Ŵa “kamskambo kacoko” aŵa, awo ŵazamuwuka kuti ŵakakhale na Yesu mu Ufumu wake wakucanya, ni ciŵerengero cakumanyikwa. Baibolo likurongora kuti ŵantu 144,000 ndiwo ŵazamuwuka kufuma pa caru capasi.—Civumbuzi 14:1, 3.

Kasi mbalinga awo ŵazamukhala mu Paradiso pa caru capasi?— Baibolo likuyowoya yayi. Kweni Ciuta wakaphalira Adamu na Heva apo ŵakaŵa mu munda wa Edeni kuti ŵababe ŵana na kuzuzga caru. Na unenesko, iwo ŵakatondeka kufiska ici. Kweni Ciuta wazamuwoneseska kuti khumbo lake la kuzuzga caru na ŵantu ŵaweme lakwaniriskika.—Genesis 1:28; Yesaya 45:18; 55:11.

Aghanaghanira waka umo kuzamuŵira kwakukondweska kukhala mu Paradiso! Caru cose cizamuŵa nga ni munda wakutowa. Cizamuzura na viyuni, nyama, makuni na maluŵa ghakutowa gha mitundu yakupambana-pambana. Palije uyo wazamupulika vyakuŵinya cifukwa ca matenda, nesi kufwa. Wose ŵazamuŵa paubwezi. Usange tikukhumba kuzakakhala mu Paradiso kwamuyirayira, sono ndiyo nyengo yakunozgekera.