KASI ukumanyapo muntu uyo nyengo zose wakukhumba kuti waŵenge wakudanga?— Wangatutuzga munyake pa muzere mwakuti iye waŵe pakwamba. Kasi uli kuwonapo ici?— Msambizgi Waluso wakawona kuti nanga ni ŵantu ŵarara nawo ŵakuyezgayezga kuti ŵaŵe ŵakudanga, panji pa malo ghakuzirwa. Ici cikamukondweska yayi. Tiye tiwone ico cikacitika.

Baibolo likutiphalira kuti Yesu wakacemeka ku ciphikiro ku nyumba ya Mufarisi, uyo wakaŵa murongozgi wakuzirwa wa cisopo. Wakati wafika, wakawonanga ŵalendo ŵakwiza ndipo ŵakasankanga malo  ghakukhala ghaweme comene. Mwanteura iye wakaŵaphalira ntharika yinyake ŵantu awo ŵakacemeka. Kasi ukukhumba kuti uyipulike?—

Yesu wakati: ‘Para muntu wakucema ku ciphikiro ca pa ukwati, ureke kuya kakhara pa malo ghakuzirwa.’ Kasi ukumanya cifukwa ico Yesu wakayowoyera ntena?— Iye wakarongosora kuti muntu munyake wakuzirwa comene wangaŵa kuti wacemeka. Nga ni umo ukuwonera pa cithuzi ici, mweneko ciphikiro wakiza na kumuphalira kuti: ‘Usezgekepo pa malo agha, ndipo ukhale apo.’ Kasi mulendo yura wakajipulika wuli?— Soni zikamukora cifukwa ŵanyake wose ŵakamuwona wakufuma pa malo ghakuzirwa na kuya kakhara pa malo ghapasi.

Yesu wakarongoranga kuti nciheni kupenjerezga malo ghakuzirwa. Rekani wakati: ‘Para wacemeka ku ciphikiro ca ukwati, ukhare pa malo ghapasi. Ndipo uyo wakucema wangiza na kukuphalira kuti, “Iwe wamunyane kwerera kuno ku malo ghakuzirwa.” Apo ndipo uŵenge wakucindikika pa maso gha ŵalendo.’—Luka 14:1, 7-11.

Kasi wamanya fundo yeneco ya ntharika iyo Yesu wakayowoya?— Tiye tiwone ciyerezgero ici kuti tiwone usange wapulikiska nadi. Aghanaghanira kuti ukukhumba kukwera basi iyo yazura. Kasi ukwenera kucimbira kuti usange malo ghakukhala na kureka kuti murara wimilire?— Usange ungacita ici, kasi ukughanaghana kuti Yesu wangakondwa?—

Yunji wangayowoya kuti Yesu wakuwona yayi ivyo tikucita. Kweni kasi ukugomezga ici?— Penepapo Yesu wakaŵa pa ciphikiro ku nyumba ya Mufarisi, wakawonanga ŵantu ŵakusanka malo ghakukhala. Kasi ukughanaghana kuti iye wakumanya ivyo ise tikucita lero?— Cifukwa cakuti Yesu wali kucanya sono, wali na wanangwa wose wakuwona ivyo ise tikucita.

 Usange muntu wakukhumba kuti waŵe wakudanga, ici cingambiska masuzgo. Kanandi pakuŵa mpindano, ndipo ŵantu ŵakukwiya comene. Nyengo zinyake ici cikucitika para ŵana ŵakukhumba kukwera basi. Para cijaro ca basi cajurika waka, waliyose wakucimbira na khumbo lakuti waŵe wakudanga. Ŵakukhumba malo ghaweme ghakukhala, mupando uwo uli kufupi na windo. Kasi ni vici ivyo vingacitika pamanyuma pake?— Ŵangambana.

Kuŵa na khumbo lakuŵa wakudanga kungambiska masuzgo. Kukambiska masuzgo pakati pa ŵasambiri ŵa Yesu. Nga ni umo tikasambilira mu Cipaturo 6, iwo ŵakapindananga ŵekha-ŵekha za uyo wakaŵa mukuru pakati pawo. Kasi Yesu wakacitaci?— Wakaŵanyolorera. Kweni yikati yajumpapo nyengo yicoko waka ŵakambaso kupindana. Tiye tiwone ico cikambiska.

Ŵapostole, pamoza na ŵantu ŵanji ŵakarutanga ku msumba wa Yerusalemu  na Yesu. Yesu wakaŵa kuti waŵaphalira za Ufumu wake, anteura Yakobe na Yohane ŵakaghanaghaniranga za kuwusa nga ni mathemba pamoza na iye. Ndipo ŵakadumbiskana ntharika iyi na anyinawo, a Salome. (Mateyu 27:56; Marko 15:40) Ndipo apo ŵakendanga kuya ku Yerusalemu, Salome wakamufikira Yesu, na kujikama pamaso pake, na kuromba kuti wamucitire lusungu.

“Ukukhumbaci?” Wakafumba Yesu. Wakazgora kuti wakukhumba kuti Yesu wazomerezge ŵana ŵake kuti ŵakakhale naye mu Ufumu wake, munyake ku woko la maryero ndipo munyake ku mazere. Kasi ukughanaghana kuti ŵapostole ŵanyake 10 ŵakacita wuli ŵakati ŵamanya ico anyina ŵa Yakobe na Yohane ŵakaromba?—

Ŵakaŵakwiyira comene Yakobe na Yohane. Mwanteura Yesu wakapereka urongozgi uweme kwa ŵasambiri ŵake wose. Yesu wakaŵaphalira  kuti ŵawusi ŵa caru ŵakutemwa comene kuti ŵaŵe ŵankongono ndiposo ŵakuzirwa. Ŵakukhumba kuti ŵaŵe na udindo wakuti waliyose waŵapulikirenge. Kweni Yesu wakaphalira ŵasambiri ŵake kuti ŵakwenera cara kucita nteura. M’malo mwake, Yesu wakati: “Yose uyo wakukhumba kuŵa ŵakudanga mwa imwe, waŵenge muzga winu.” Ghanaghanira waka za ici!—Mateyu 20:20-28.

Kasi ukumanya ivyo muzga wakucita?— Wakuteŵetera ŵanji, kweni iyo ŵakuteŵetereka cara. Wakukhala pa malo ghapasi comene. Wakucita vintu na ghanoghano lakuti iye ni muntu wapasi, wambura kuzirwa. Ndipo kumbukira kuti Yesu wakayowoya kuti muntu uyo wakukhumba kuŵa wakudanga wakwenera kuŵa nga ni muzga wa ŵanyake.

Sono, kasi ukughanaghana kuti ici cikung’anamuraci kwa ise?— Kasi muzga wangakweskana na fumu yake kuti ni njani uyo wakhalenge pa malo ghaweme? Panji kuti ni njani uyo wadankenge kurya cakurya? Ukughanaghana wuli?— Yesu wakarongosora kuti muzga nyengo zose wakupwererera danka fumu yake ndipo pamanyuma pake wakujovwira yekha.—Luka 17:7-10.

Nteura m’malo mwakuyezgayezga kuŵa wakudanga, kasi tikwenera kucitaci?— Tikwenera kuŵa nga ni muzga ku ŵanyithu. Ici cikung’anamura kuŵika vyakukhumba vya ŵanyithu pantazi pa vithu. Cikung’anamuraso kuwona ŵanji kuŵa ŵakuzirwa kuruska ise. Kasi ungaghanaghanira ntowa zinyake izo ungacitira ici?— Tiye tiwoneso pa mapeji 40 na 41 apo pali ntowa zinyake izo tingapwererera vyakukhumba vya ŵanji cakudanga mwa kuŵateŵetera.

Ukumbukirenge kuti Msambizgi Waluso wakaŵika vyakukhumba vya ŵanji pantazi mwa kuŵateŵetera. Pa usiku wa umaliro uwo wakaŵa na ŵapostole ŵake, wakajikama na kuŵagegiska marundi ghawo. Usange ise nase tiŵikenge vyakukhumba vya ŵanji pakudanga mwa kuŵateŵetera, tikondweskenge wose, Msambizgi Waluso na Ŵadada ŵake, Yehova Ciuta.