TIYEREZGERE kuti muntu munyake wakupa cawanangwa capacanya comene. Kasi ungajipulika wuli mu mtima?— Kasi ungawongera waka na kuruwirathu muntu uyo wakupa? Panji kasi umukumbukirenge muntu wanteura uyo cifukwa ca ivyo wakakucitira?—

Yehova Ciuta walikutipa cawanangwa capacanya comene. Wakatuma Mwana wake pano pasi kuti wazakatifwire. Kasi ukumanya cifukwa ico Yesu wakatifwira?— Iyi ni nkani yakuzirwa comene yakuti tiyimanye makora.

Nga ni umo tikasambilira mu Cipaturo 23, Adamu wakaswa dango la Ciuta. Ise tiri kupokera zakwananga kufuma kwa Adamu, mweneuyo ni dada wa ise tose. Anteura, kasi ukughanaghana kuti ise tikukhumbikwira vici?— Kuyowoya mwakuyerezgera, tikukhumbikwira dada mupya wambura zakwananga. Kasi ukughanaghana kuti dada wanteura uyu wangaŵa njani?— Yesu.

Yehova wakatuma Yesu pano pasi kuti wazakaŵe nga ni dada withu mu malo mwa Adamu. Baibolo likuti: “Muntu wakudanga, Adamu, wakaŵa mzimu [umoyo] wakuthuta. Adamu wa umaliro ndi mzimu wakulenga umoyo.” Kasi Adamu wakudanga wakaŵa njani?— Wakaŵa muntu uyo Ciuta wakalenga kufuma ku dongo. Kasi Adamu waciŵiri ni njani?— Ni Yesu. Baibolo likurongora fundo iyi peneapo likuti: “Muntu wakudanga [Adamu] ngwa caru ca pasi, ngwa dongo: muntu waciŵiri [Yesu] ngwa kucanya.”—1 Ŵakorinte 15:45, 47; Genesis 2:7.

Pakuti Ciuta wakasamuska umoyo wa Yesu kufuma kucanya na kuwuŵika mu nthumbo ya Mariya, Yesu wakapokera yayi zakwananga  kufuma kwa Adamu. Ici ndico cifukwa cake Yesu wakaŵa muntu wambura zakwananga. (Luka 1:30-35) Ici ndico cifukwa cake mungelo wakaphalira ŵaliska pa nyengo iyo Yesu wakababikira kuti: “Lero . . . wamubabiwirani Mponoski.” (Luka 2:11) Kweni kuti waŵe Mponoski withu, kasi ncivici ico Yesu wakeneranga kucita pakuti pa nyengo iyo wakaŵa bonda?— Wakeneranga kukura danka, nga ni umo wakaŵira Adamu. Paumaliro pake Yesu wakeneranga kuŵa ‘Adamu waciŵiri.’

Yesu, Mponoski withu, wazamuŵaso ‘Dada withu Wamuyirayira.’ Umu ndimo wakucemekera ntena mu Baibolo. (Yesaya 9:6, 7) Yesu wambura zakwananga wangaŵa dada withu mu malo mwa Adamu, mweneuyo wakiziska zakwananga. Mwa ntowa iyi tingasanka kuti tiŵe na ‘Adamu waciŵiri’ nga ni dada withu. Padera pa fundo iyi, Yesu wakucemekaso Mwana wa Yehova Ciuta.

Para tingamumanya makora Yesu, tingamupokelera kuŵa Mponoski withu. Kasi ukukumbuka kuti ise tikwenera kuponoskeka kuvici?— Tikwenera kuponoskeka kufuma ku zakwananga na nyifwa izo tilikupokera kwa Adamu. Umoyo wambura zakwananga uwo Yesu wakapereka mu malo mwa ise apo wakaŵa muntu murara ukucemeka kuti sembe ya kuwombora. Yehova wakapereka sembe ya ciwombolero kuti zakwananga zithu zigowokereke.—Mateyu 20:28; Ŵaroma 5:8; 6:23.

Mwanadi, tingaruwanga yayi ivyo Yehova na Mwana wake ŵaticitira, asi ntena?— Yesu wakarongora ŵarondezgi ŵake ntowa yapadera iyo nase yingatovwira kuti  tikumbukirenge ivyo wakacita. Tiye tidumbiskane ico wakacita.

Yerezgera kuti uli mu cipinda capacanya ca nyumba ya mu Yerusalemu. Ni nyengo ya usiku. Yesu na ŵapostole ŵake ŵakhala mwakuzingilira thebulu. Pa thebulu pali nyama yakotca ya mwana wa mberere, vingwa vyambura ntukumusi na vinyo liswesi. Ŵakurya cakurya capadera comene. Kasi ukumanya cifukwa cake?—

Cakurya ici cikaŵa ca kuŵakumbuska ivyo Yehova wakaŵacitira virimika vinandi ivyo vikajumpapo apo ŵantu ŵake, Ŵaisrayeli, ŵakaŵa ŵazga mu Egupto. Pa nyengo yira Yehova wakaphalira ŵantu ŵake kuti: ‘Mbumba yiliyose yikome mwana wa mberere,  ndipo yiphake ndopa zake pa mafuremu gha vijaro vya nyumba yake.’ Yehova wakarutilizga kuyowoya kuti: ‘Njirani mu nyumba zinu, ndipo murye mwana wa mberere.’

Ŵaisrayeli ŵakacita nteura. Mu usiku wa zuŵa lenelira mungelo wa Ciuta wakiza mu caru ca Egupto. Mu nyumba zinandi, mungelo yura wakakoma ŵana ŵakwamba kubabika. Kweni apo mungelo wakawona ndopa za mwana wa mberere izo zikaphakika pa mafuremu gha vijaro, wakajumpilira pa nyumba zose izo zikaŵa na ndopa. Palije mwana uyo wakafwa mu nyumba izi. Faro, themba la Egupto, likatentema pakuwona ivyo mungelo wa Yehova wakacita. Anteura Faro wakaphalira Ŵaisrayeli kuti: ‘Wukani, fumanimo mu Egupto!’ Ŵakati ŵapulika mazgu agha Ŵaisrayeli ŵakarongezga katundu wawo pa ngamila na pa mbunda ndipo ŵakanyamuka.

Yehova wakakhumba yayi kuti ŵantu ŵake ŵaruwe umo wakaŵaponoskera. Anteura wakaŵaphalira kuti: ‘Kamoza pa cirimika mukwenera kurya cakurya cakuyana na ico mwarya usiku uno.’ Cakurya ici ŵakacicemanga kuti Paska. Mu usiku wura mungelo wa Ciuta “wakajumpirira” nyumba izo zikaphakika ndopa.—Exodus 12:1-13, 24-27, 31.

Yesu na ŵapostole ŵake ŵakakumbukiranga zuŵa ili peneapo ŵakaryanga Paska. Ŵakati ŵarya Paska, Yesu wakacita cintu cakuzirwa comene. Ndipouli, pambere Yesu wakaŵa wandayambe, wakafumiska kuwaro mpostole wambura kugomezgeka, Yuda. Pamanyuma pake Yesu wakatora cingwa ico cikakhalapo, wakatumbika, ndipo wakacimenya; na kuŵapa ŵasambiri ŵake. “Torani,” wakaŵaphalira nteura. Wakaŵaphaliraso kuti: ‘Cingwa ici cikwimira thupi lane ilo niperekenge kwa imwe para nafwa.’

Pamanyuma pake Yesu wakatora nkombo ya vinyo liswesi. Wakati wapereka lurombo lwaciŵiri, wakapereka nkombo ku ŵasambiri ŵake ndipo wakati: “Mwanipo mose.” Wakaŵaphaliraso kuti: ‘Vinyo ili likwimira ndopa zane. Sono-sono apa ndopa zane zithikenge kuti  nimuponoskani ku zakwananga. Mucitenge ici kuti mundikumbukirenge.’—Mateyu 26:26-28; 1 Ŵakorinte 11:23-26.

Kasi wapulikiska ivyo Yesu wakaphalira ŵasambiri ŵake kuti ŵamukumbukirenge?— Ŵakeneranga kureka kurya cakurya ca Paska. Mu malo mwake, ŵakeneranga kurya cakurya capadera ici kuti ŵakumbukirenge Yesu na nyifwa yake. Cakurya ici cikucemeka Mugonero wa Fumu. Lero kanandi tikutemwa kucicema Cikumbusko. Cifukwa wuli?— Cifukwa cakuti cikutikumbuska ico Yesu na Ŵawiske, Yehova Ciuta, ŵakaticitira.

Cingwa cikwenera kutikumbuskanga thupi la Yesu. Iye wakatemwa comene kupereka thupi lake kuti tizakasange umoyo wamuyirayira. Wuli pakuyowoya za vinyo liswesi?— Likwenera kutikumbuskanga kuzirwa kwa ndopa za Yesu. Ndopa zake ni zakuzirwa comene kuruska zira za mberere iyo yikakomeka pa Paska ku Egupto. Kasi ukumanya cifukwa cake?— Baibolo likuyowoya kuti ndopa za Yesu zikupangiska kuti zakwananga zithu zigowokereke. Ndipo para zakwananga zithu zose zazakamara, tizamurwaraso yayi, kucekura yayi, nesi kufwa. Umu ndimo tikwenera kughanaghaniranga para tiri pa Cikumbusko.

Kasi waliyose wakwenera kurya cingwa na kumwa vinyo pa Cikumbusko?— Yesu wakaphalira awo ŵakurya kuti: ‘Muzamuwusa na ine mu Ufumu wane kucanya ndipo muzamukhala pa mipando ya mathemba na ine kucanya.’ (Luka 22:19, 20, 30) Ici cikung’anamura kuti ŵarutenge kucanya kuti ŵakaŵe mathemba pamoza na Yesu. Anteura, ni ŵekha awo ŵazamuwusa na Yesu kucanya ndiwo ŵakwenera kurya cingwa na kumwa vinyo.

Kweni ndipera, awo ŵakureka kurya cingwa panji kumwa vinyo ŵakwenera kufikapo pa Cikumbusko. Kasi ukumanya cifukwa cake?— Ncifukwa cakuti Yesu wakapereka umoyo wake na kwa ise wuwo. Para tikuruta ku Cikumbusko, cikurongora kuti tindaruwe yayi. Tikumbukirenge cawanangwa cakuzirwa cakufuma kwa Ciuta.