NGA NI umo ukumanyira, ŵantu mazuŵa ghano ŵakucekura, kurwara, na kufwa. Nanga ŵangaŵa ŵana nawo ŵakufwa. Kasi ukwenera kopa nyifwa panji muntu uyo wafwa?— Kasi ukumanya ico cikucitika para muntu wafwa?—

Palije muntu uyo ngwamoyo sono uyo wakafwa na kuwukaso kuti watiphalire ico cikucitika para muntu wafwa. Kweni apo Yesu, Msambizgi Waluso, wakaŵa pa caru capasi, muntu wantena uyu wakaŵapo. Tingasambira vinandi vyakukhwaskana na ico cikucitika kwa awo ŵafwa mwakudumbiskana za iye. Muntu uyu wakaŵa bwezi la Yesu, wakakhalanga ku Betaniya, tawuni yicoko iyo yikaŵa kutali cara na Yerusalemu. Zina lake likaŵa Lazaro, wakaŵa na ŵadumbu ŵake ŵaŵiri, mazina ghawo ghakaŵa Marita na Mariya. Tiye tiwone ivyo Baibolo likuyowoya kuti vikacitika.

Zuŵa linyake Lazaro wakarwara comene. Pa nyengo iyi, Yesu wakaŵa kutali comene. Mwanteura, Marita na Mariya ŵakatuma muntu kuti wakaphalire Yesu kuti mudumbu wawo, Lazaro, wakurwara. Ŵakacita ici cifukwa ŵakamanya kuti Yesu wangiza na kucizga mudumbu wawo. Yesu ni dokotara yayi, kweni wali na nkongono ya Ciuta mwakuti wangacizga matenda ghaliyose.—Mateyu 15:30, 31.

Ndipouli, pambere Yesu wandarute kukawona Lazaro, Lazaro wakarwara comene mupaka kufwa. Kweni Yesu wakaphalira ŵasambiri ŵake kuti Lazaro wakugona tulo ndipo warutenge kukamuwuska. Ŵasambiri ŵakapulikiska cara ivyo Yesu wakang’anamuranga. Nteura Yesu wakaŵaphalira pakweru kuti: ‘Lazaro wafwa.’ Kasi ici cikurongoraci pakuyowoya za nyifwa?— Cikurongora kuti nyifwa yiri nga ni  turo. Nyifwa ni tulo tukuru comene mwakuti muntu wakurota-na-kurota wuwo ha.

Pa nyengo iyi Yesu wakarutanga kukakumana na Marita na Mariya. Mabwezi ghanandi gha mbumba iyi ghakiza. Iwo ŵakiza kuti ŵazakapembuzge Marita na Mariya cifukwa mudumbu wawo wakafwa. Marita wakati wapulika kuti Yesu wakwiza, wakaruta kukakumana nayo. Mwaluŵiro, Mariya nayo wakaruta kuti wakakumane na Yesu. Wakaŵa na citima cikuru comene ndipo wakaliranga, wakawa pa marundi gha Yesu. Mabwezi ghanyake agho ghakarondezganga Mariya naghoso ghakaliranga.

Msambizgi Waluso ŵakafumba uko ŵakaŵika Lazaro. Wakati wafumba, ŵantu ŵakamurongozgera ku dindi uko Lazaro wakasungika. Yesu wakati wawona kuti wose ŵakulira, nayoso wakamba kulira. Wakamanya umo ciliri cakupweteka kutaya muntu wakutemweka mu nyifwa.

Libwe likajarika pa dindi, nteura Yesu wakati: “Sezganipo libwe.” Kasi ŵakeneranga kusezgapo nadi?— Marita wakaghanaghananga kuti ili likaŵa ghanoghano liweme yayi. Wakati: “Fumu, sono wakununka: cifukwa mumo wali kufwira ndi mazuŵa ghanayi.”

Kweni Yesu wakati kwa iye: ‘Asi ndangukuphalira, kuti usange ukupulikana uti uwonenge ucindami wa Ciuta?’ Apa Yesu wakang’anamuranga kuti Marita wawonenge cintu cinyake ico ciperekenge ncindi kwa Ciuta. Kasi Yesu wakacita vici? Libwe likati lasezgekapo, Yesu wakaromba mwakukwezga kwa Yehova. Pamanyuma pake Yesu wakacemerezga kuti: ‘Lazaro, fuma!’ Kasi wakafuma nadi?

Kasi iwe ungawuska muntu uyo wali mu tulo?— Enya, usange ungacemerezga comene, iye mbwenu wawukenge. Kweni kasi ungawuska muntu uyo wali mu tulo twa nyifwa?— Yayi. Kwali ucemerezge wuli we, uyo wafwa wangapulika yayi. Palije ico iwe panji ine panji muntu  munyake waliyose pa caru capasi lero wangacita kuti wawuske muntu wakufwa.

Kweni Yesu ngwakupambana. Wali na nkongono zapadera zakufumira kwa Ciuta. Nteura Yesu wakati wacema Lazaro, pakacitika cintu cakuzizwiska. Muntu uyo wakaŵa wakufwa kwa mazuŵa ghanayi wakafuma mu dindi! Wakaŵaso wamoyo? Wakambaso kwenda na kuyowoya! Inya, Yesu wakawuska Lazaro ku ŵakufwa.—Yohane 11:1-44.

Sono aghanaghanira ici: Ncivici ico cikacitika kwa Lazaro wakati wafwa? Kasi mzimu wake ukafuma mu thupi lake na kuruta ku malo ghanyake? Kasi mzimu wa Lazaro ukaruta kucanya? Kasi wakaŵa wamoyo kwa mazuŵa ghanayi kucanya na Ciuta pamoza na ŵangelo ŵakupatulika?—

Yayi, wakaruta kucanya cara. Kumbuka kuti Yesu wakati Lazaro wakaŵa mu tulo. Kasi ncivici ico cikucitika para uli mu tulo? Para iwe uli mu tulo twakufwa nato, ukumanya yayi ico cikucitika, asi ntena?—  Ndipo para wawuka, ukumanya yayi kuti wanguŵa mu tulo kwa utali wuli pekha para wawona pa nyengo.

Ndimoso viliri na ŵantu ŵakufwa. Ŵakumanya cilicose yayi. Ŵakupulika cilicose yayi. Ndipo Ŵangacita cilicose yayi. Ndimo vikaŵira na Lazaro wakati wafwa. Nyifwa yiri nga ni tulo tukuru twakufwa nato mwakuti muntu wakukumbuka cilicose cara. Baibolo likuyowoya kuti: “Ŵakufwa kuti ŵakumanya kantu cara.”—Mupharazgi 9:5, 10.

Aghanaghaniraso ici: Usange Lazaro wakaŵa kucanya kwa mazuŵa ghanayi, kasi iye wakatenge wayowoyengepo yayi za ici?— Ndipo usange wakaŵa kucanya, kasi mphanyi Yesu wakamuwezgeraso pa caru capasi kufuma ku malo ghaweme ghara?— Na pacoko-pose!

Ndipouli, ŵantu ŵanandi ŵakuyowoya kuti tiri na mzimu uwo ukufumamo mu thupi para tafwa. Iwo ŵakuyowoya kuti mzimu wa Lazaro ukaŵa wamoyo ku malo ghanyake. Kweni Baibolo ndimo likuyowoyera yayi. Likuyowoya kuti Ciuta wakalenga mwanarumi wakwamba Adamu, “mzimu wa moyo.” Adamu wakaŵa mzimu wa moyo. Baibolo likuyowoyaso kuti Adamu wakati wananga, wakafwa. Wakati wafwa wakawelera ku fuvu uko wakafumira. Baibolo likuyowoyaso kuti mpapu yose ya Adamu yiri kupokera zakwananga na nyifwa.—Genesis 2:7; 3:17-19; Ŵaroma 5:12.

 Nteura, ncakuwonekerathu kuti ise tilije mzimu uwo ngwakupatukana na thupi lithu. Ise tose ndise mizimu yamoyo. Ndipo cifukwa cakuti ŵantu ŵali kupokera zakwananga kufuma kwa mwanarumi wakwamba, Adamu, Baibolo likuti: “Mzimu uwo ukwananga, utiufwenge.”—Ezekiel 18:4.

Ŵantu ŵanyake ŵakopa ŵakufwa. Ŵakukana kwenda pafupi na mararo cifukwa ŵakughanaghana kuti ŵakufwa ŵali na mzimu uwo ukupatukana na thupi weneuwo ungapweteka ŵamoyo. Kweni kasi muntu wakufwa wangapweteka muntu wamoyo?— Yayi, wangamupweteka cara.

Ŵantu ŵanyake ŵakugomezga kuti ŵakufwa ŵangiza nga ni mizimu kuzakacezga na ŵamoyo. Mwanteura ŵakuŵika cakurya kusungira ŵakufwa. Kweni ŵantu awo ŵakucita ntena ŵakugomezga yayi ivyo Ciuta wakuyowoya vyakukhwaskana na ŵakufwa. Usange tikugomezga ivyo Ciuta wakuyowoya, mbwenu tiwopenge yayi ŵantu ŵakufwa. Ndipo usange tiri ŵakuwongera nadi kwa Ciuta cifukwa ca umoyo uwo wali kutipa, mbwenu tirongorenge kuwongera uku mwakucita vintu ivyo wakuzomerezga.

Kweni iwe ungazizwa: ‘Kasi Ciuta wazamuwuska ŵana awo ŵali kufwa? Kasi wakukhumba nadi kucita ntena?’ Tiye tidumbiskane za ici mu mutu wakurondezgapo.