KASI ukukumbukira cifukwa ico yumoza wa ŵangelo ŵa Ciuta wakaŵira Satana Dyabulosi?— Khumbo lake liheni lakuti nayo wasopekenge ndilo likamupangiska kugarukira Ciuta. Kasi ŵangelo ŵanyake ŵakamurondezga Satana?— Enya, ŵakamurondezga. Baibolo likuŵacema kuti ‘ŵangelo ŵa Satana,’ panji kuti viŵanda.—Civumbuzi 12:9.

Kasi ŵangelo ŵaheni aŵa, panji kuti viŵanda, ŵakugomezga kuti kuli Yehova?— ‘Viŵanda vikugomezga kuti Ciuta waliko,’ likuyowoya nteura Baibolo. (Yakobe 2:19) Kweni pa nyengo yasono vili na wofi. Vikopa cifukwa vikumanya kuti vilangikenge na Ciuta cifukwa ca vintu viheni ivyo vyacita. Kasi vyacitaci?—

Baibolo likuyowoya kuti ŵangelo aŵa ŵakareka malo ghawo ghaweme kucanya na kwiza pa caru capasi kuzakakhala nga ni ŵantu. Ŵakacita ici cifukwa ŵakakhumbanga kuti  ŵagonanenge na ŵanakazi ŵakutowa ŵa pa caru capasi. (Genesis 6:1, 2; Yuda 6) Kasi iwe ukumanyapo vici pakuyowoya za kugonana?—

Kugonana ni apo mwanarumi na mwanakazi ŵakukhalira pamoza mu ntowa yapadera. Pamanyuma pake, kabonda kangakura mu nthumbo ya ŵanyina. Kweni, kugonana nkhwakukanizgika kwa ŵangelo. Ciuta wakukhumba kuti mwanarumi na mwanakazi ŵakutorana ŵekha ndiwo ŵagonanenge. Mu ntowa iyi bonda wakubabika, ndipo adada na amama ŵangamupwererera.

Peneapo ŵangelo ŵakajipangira ŵekha thupi la ŵantu, ŵakamba kugonana na ŵanakazi pa caru, ŵana ŵawo ŵakakura ndipo ŵakaŵa ŵankongono comene. Ŵakaŵa ŵakari comene ndipo ŵakatimbanga ŵantu. Mwanteura Ciuta wakiziska cigumula cikuru kuparanya ŵana ŵankongono comene aŵa na ŵantu wose ŵaheni. Kweni wakaphalira Nowa kuti wazenge cingaraŵa, panji boti likuru, mwakuti waponoske ŵantu ŵacoko awo ŵakacitanga vintu viweme. Msambizgi Waluso wakayowoya kuti tikwenera kukumbukira ivyo vikacitika pa nyengo ya Cigumula cifukwa ni vyakuzirwa comene.—Genesis 6:3, 4, 13, 14; Luka 17:26, 27.

Peneapo Cigumula cikiza,  kasi ukumanya ico cikacitikira ŵangelo ŵaheni aŵa?— Ŵakareka kugwiriskira ncito mathupi gha ŵantu agho ŵakajipangira, ndipo ŵakawerera kucanya. Kweni ŵakaŵaso yayi ŵangelo ŵa Ciuta, anteura ŵakazgoka ŵangelo ŵa Satana, panji kuti viŵanda. Kasi ncivici ico cikaŵacitikira ŵana ŵawo ŵankongono comene?— Ŵakafwa na Cigumula. Ŵantu wose awo ŵakapulikiranga yayi Ciuta nawo ŵakafwa.

Kwambira nyengo ya Cigumula, Ciuta wakuzomerezgaso yayi viŵanda kuti viŵenge nga ni ŵantu. Nangauli tingaviwona yayi, viŵanda vikuyezgayezga kupuruska ŵantu kuti ŵacitenge vintu viheni. Vikucitiska masuzgo ghanandi kuruska kale. Ici cili nteura cifukwa viri kucimbizgikira pa caru capasi.

Viŵanda tingaviwona yayi, kasi ukumanya cifukwa cake?— Cifukwa vilije mathupi gha nga ndise. Kweni tingaŵa na cigomezgo kuti viliko. Baibolo likuyowoya kuti Satana ‘wakupuruska ŵantu pa caru cose,’ mwakovwirika na viŵanda vyake.—Civumbuzi 12:9, 12.

Kasi ise nase tingapuruskika panji kupusikika na Satana na viŵanda vyake?— Enya, usange tingapusa. Kweni tikwenera yayi kufipa mtima. Msambizgi Waluso wakati: ‘Dyabulosi wali na mazaza pa ine cara.’ Usange tisendererenge kwa Ciuta, iye wativikilirenge kwa Dyabulosi na viŵanda vyake.—Yohane 14:30.

Ncakukhumbikwa comene kumanya vintu viheni ivyo viŵanda vingayezgayezga kuti ticitenge. Aghanaghanira. Ni vintu wuli ivyo viŵanda vikacita apo vikiza pa caru capasi?— Apo Cigumula cikaŵa cindacitike, vikagonananga na ŵanakazi, cintu ico cikaŵa cambura kuzomerezgeka kwa ŵangelo. Lero viŵanda vikukondwa comene usange ŵantu ŵakupulikira yayi dango la Ciuta lakukhwaskana na kugonana. Kasi ungazgora wuli fumbo ili, kasi mbanjani pera awo ŵakwenera kugonana?— Waneneska nadi, ŵantu ŵakutorana pera.

Mazuŵa ghano ŵanyamata na ŵasungwana ŵakugonana, kweni ici ncakukanizgika comene kwa iwo. Baibolo likuyowoya za nkule ya canarumi. (Leviticus 15:1-3) Paliso nkule ya canakazi. Yehova wakalenga  viŵaro vya thupi ivi na cilato capadera mwakuti ŵantu ŵakutorana pera ndiwo ŵasangwenge navyo. Viŵanda vikukondwa para ŵantu ŵakucita vintu ivyo ni vyakukanizgika na Yehova. Mwaciyerezgero, viŵanda vikukondwa para munyamata wakuseŵereska nkule ya msungwana panji msungwana kuseŵereska nkule ya munyamata. Tikukhumba yayi kukondweska viŵanda, asi ntena?—

Paliso cintu cinyake ico viŵanda vikutemwa kweni Yehova wakutinkana naco comene. Kasi ukucimanya?— Nkaza. (Salmo 11:5) Nkaza ni para ŵantu ŵakukaripa na kutimba ŵanyawo. Kumbukira kuti, ŵana ŵa viŵanda awo ŵakaŵa ŵankongono comene ŵakacitanga ivi.

Viŵanda vikutemwaso kofya ŵantu. Nyengo zinyake vikuyelezgera kuŵa nga ni ŵantu awo ŵalikufwa. Vingayelezgera mazgu gha ŵantu awo ŵalikufwa. Mu ntowa iyi viŵanda vikupusika ŵantu ŵanandi kugomezga kuti ŵantu ŵakufwa ŵali na umoyo ndipo ŵangayowoya na ŵantu awo mbamoyo. Nadi pano, viŵanda vikupangiska ŵantu ŵanandi kugomezga mizguka.

 Mwanteura tikwenera kuŵa ŵakucenjera kuti Satana na viŵanda vyake ŵareke kutipuruska. Baibolo likucenjezga kuti: ‘Satana wakuyezgayezga kujizgora mungelo muweme, ndipo ŵateŵeti ŵake ŵakucitaso nteura pera.’ (2 Ŵakorinte 11:14, 15) Kweni, kuyowoya unenesko viŵanda ni viheni comene. Tiye tiwone umo vingatipuruskira kuti tiŵe nga ndivyo.

Kasi ŵantu ŵakusambira nku nkaza, kugonana kwambura kuzomerezgeka, mizimu yiheni na mizguka?— Kasi ŵakusambira ivi para ŵakulaŵilira maprogramu ghanyake gha pa wayalesi ya sinema yayi, mafilimu, na kuŵazga mabuku ghanyake na ŵantu awo ŵakucezga nawo? Kasi para tikucita vintu ivi, tikusenderera kwa Ciuta panji kwa Dyabulosi na viŵanda vyake? Ukughanaghana wuli?—

Kasi ukughanaghana kuti ni njani uyo wakukhumba kuti titegherezgenge na kulaŵilira vintu viheni?— Satana na viŵanda vyake. Sono, kasi iwe na ine tikwenera kucitaci?— Tikwenera kuŵazga, kutegherezga, na kulaŵilira vintu ivyo ni viweme kwa ise ndipo ici citovwirenge kuti tisenderere kwa Yehova Ciuta. Aghanaghanira za vintu viweme ivyo tingacita?—

Usange tikucita ico nciweme, palije cifukwa cakuti tiwoperenge viŵanda. Yesu ngwankongono comene kuruska ivyo, ndipo vikumopa comene. Zuŵa linyake viŵanda vikacemerezga kwa Yesu kuti: “Mwizira kutiparanya kasi?” (Marko 1:24) Kasi tizamusangwa yayi apo nyengo yizamufika iyo Yesu wazamuparanya Satana na viŵanda vyake?— Pa nyengo sono, tingaŵa na cisimikizgo kuti Yesu wativikilirenge ku viŵanda usange tikusenderera kwa iye ndiposo kwa Ŵadada ŵake ŵakucanya.