KASI yunji walikukufumbapo kuti ucite cintu ciheni?— Kasi wakacita kukucicizga kuti ucite? Panji kasi wakakuphalira kuti ciŵenge cakukondweska ndiposo wakati nciheni yayi kucicita?— Para yunji wakutifumba mafumbo ghanteura agha ndiko kuti wakutiyezga.

Kasi tikwenera kucitaci para tikuyezgeka? Kasi tikwenera kuthera ndipo pamanyuma pake kucita ico nciheni?— Ici mbwenu cingamukondweska yayi Yehova Ciuta. Kweni kasi ukumanya uyo wangaŵa wakukondwa?— Satana Dyabulosi ndiye wangakondwa para tacita ico nciheni.

Satana ni murwani wa Ciuta, ndiposo ni murwani withu. Tingamuwona Satana yayi cifukwa wali na thupi lauzimu. Kweni iye wakutiwona. Zuŵa linyake Dyabulosi wakayowoya na Yesu, Msambizgi Waluso, ndipo wakamuyezga. Tiye tiwone ivyo Yesu wakacita. Para tamanya nkani iyi mbwenu timanyenge cintu ciweme ico tikwenera kucita para tikuyezgeka.

Nyengo zose Yesu wakakhumbanga kucita khumbo la Ciuta. Wakarongora pakweru khumbo lake apo wakabapatizika mu Mronga wa Yordani. Yesu wakati bapatizike waka, Satana wakamuyezga. Baibolo likuyowoya kuti “kucanya kukamujurikira” Yesu. (Mateyu 3:16) Mazgu agha ghakung’anamura kuti Yesu wakamba kukumbukira umoyo uwo wakaŵa nawo pakudanga kucanya apo wakaŵa na Ciuta.

 Pamanyuma pa ubapatizo wake, Yesu wakaruta ku mayiyi kuti wakaghanaghanire vintu ivyo wakamba kukumbukira. Pakajumpa mazuŵa na mausiku 40. Kwa nyengo yose iyi Yesu wakarya kalikose yayi, anteura wakaziya comene. Pakaŵa pa nyengo iyi peneapo Satana wakayezga Yesu.

Dyabulosi wakati: ‘Usange ndiwe Mwana wa Ciuta, phalira malibwe agha ghazgoke vingwa.’ Vingwa vinyake vikaŵa vyakunowa comene! Kasi cikaŵa camacitiko kuti Yesu wazgore malibwe kuŵa vingwa?— Enya, ntena wakaghazgora. Cifukwa wuli? Ncifukwa cakuti, Yesu, Mwana wa Ciuta, wakaŵa na nkongono zapadera.

Kasi iwe ntena ukazgora malibwe kuti ghazgoke vingwa usange Satana wafumbenge iwe?— Kumbuka kuti Yesu wakaŵa na njara. Kasi ntena cikaŵa ciweme kuti Yesu wazgore malibwe kuti ghazgoke vingwa kwa nyengo yimoza pera?— Yesu wakamanya kuti cikaŵa ciheni kuti wagwiriskire ncito nkongono zake mu ntowa iyi. Yehova wakapereka nkongono kwa Yesu kuti wasambizgire ŵantu kuti ŵamumanye Ciuta, wakeneranga yayi kuti wazigwiriskire ncito kuti wafiske khumbo lake.

Anteura Yesu wakazgora Satana mwakuyana na ivyo vilikulembeka mu Baibolo kuti: “Muntu kuti wakhalenge wamoyo na cingwa pera cara, kweni na mazgu ghose agho ghakufuma mu mlomo wa Ciuta.” Yesu wakamanya kuti kucita ico cikukondweska Yehova cikaŵa cakuzirwa comene kuruska cakurya.

 Kweni Dyabulosi wakakoserezga kumuyezga Yesu. Wakamutolera Yesu ku Yerusalemu ndipo wakimilira pa malo ghatali gha tempele. Pamanyuma pake Satana wakati: ‘Usange ndiwe Mwana wa Ciuta, ujiponye pasi, cifukwa kuli kulembeka kuti, Ciuta watumenge ŵangelo ŵake kuti ŵakovwire kuti ureke kujipweteka.’

Ncifukwa wuli Satana wakayowoya mazgu agha?— Wakayowoya kuti wayezge Yesu kuti wacite cintu cauzeleza. Kweni Yesu wakakanaso kuti wapulikire Satana. Wakaphalira Satana kuti: ‘Kuli kulembekaso kuti, Kuyezga Fumu Ciuta wako yayi.’ Yesu wakamanya kuti cikaŵa ciheni kuyezga Yehova mwakuŵika umoyo wake pangozi.

Ndipouli, Satana wakarekera penepara yayi. Wakatolera Yesu pa phiri litali comene. Pa phiri ili, Satana wakarongora Yesu maufumu panji kuti maboma ghose gha pa caru na mausambazi ghawo. Pamanyuma pake Satana wakati kwa Yesu: ‘Vyose ivi nikupenge, usange uwenge pasi na kunisopa.’

Ghanaghanirapo pa ivyo Dyabulosi wakayowoya. Kasi mbunenesko nadi kuti maufumu, panji maboma ghose gha ŵantu ngake Satana?— Yesu wakakana yayi kuti maboma agha nga Satana. Usange maboma agha gharekenge kuŵa gha Satana, Yesu ntena wakasuska. Nadi pano, Satana ndiye muwusi wa vyaru vyose. Baibolo likuyowoya za Satana kuti ni ‘Fumu ya caru cose.’—Yohane 12:31.

Kasi ntena iwe ukacita wuli usange Dyabulosi wakalayizga kuti wakupenge cintu cinyake usange wamusopa?— Yesu wakamanya kuti nciheni comene kusopa Dyabulosi, kwali nanga wangalayizga vintu wuli vyakuti watipe. Ndico cifukwa cake Yesu wakamuzgora kuti: ‘Wukapo Satana: cifukwa Baibolo likuyowoya kuti, Usopenge Fumu Ciuta wako, ndipo umuteŵeterenge iye yekha.’—Mateyu 4:1-10; Luka 4:1-13.

Ise nase tikuyezgeka. Kasi vinyake mwa viyezgo ivi ukuvimanya?— Pano pali ciyerezgero. Anyoko ŵangakazinga skaŵa zakuthirako mucere panji ŵangaphika vibama. Iwo ŵangakuphalira kuti kuryapo skaŵa panji vibama yayi mupaka nyengo yakuti muzakaryere pamoza yikwane. Ungaŵa kuti uli na njara, anteura ungaghanaghana kuti uryepo skaŵa panji vibama. Kasi ungaŵapulikira anyoko?—

 Kumbukira ivyo Yesu wakacita. Iye wakaziya comene. Kweni iye wakamanya kuti kupulikira Ciuta cikaŵa cintu cakuzirwa comene kuruska kurya. Nawe ungarondezga Yesu usange ungacita ivyo anyoko ŵakukuphalira.

Nyengo zinyake ŵanyako ŵangakupa mapirisi kuti umwe. Iwo ŵangakuphalira kuti ghakupangiskenge kuti ukondwenge. Kweni mapirisi agha ghangaŵa  munkhwara wakuzweteska wongo. Ghangakupangiska kuti urware panji kukukoma. Nyengo zinyake munyako wangakupa ndudu kuti ukhweŵe. Mu ndudu iyi mungaŵa munkhwara wakuzweteska wongo nga ni camba. Iwo ŵangakucicizga kuti ukhweŵe. Kasi ungacitaci?—

Kumbukira ivyo Yesu wakacita. Satana wakacicizga Yesu kuti waŵike umoyo wake pangozi mwakuduka kufuma pacanya pa tempele. Kweni Yesu wakakana. Kasi ungacitaci usange munyako wakukucicizga kuti ucite cintu ico ncangozi?— Yesu wakakana kupulikira Satana. Nawe ukanenge para munyako wakukucicizga kuti ucite vintu viheni.

Nyengo zinyake ungaphalirika kuti usope cikozgo, kweni Baibolo likukana kuti tisopenge vikozgo. (Exodus 20:4, 5) Nyengo zinyake kusopa vikozgo kukucitika ku sukulu. Ungaphalirika kuti para ukukana kusopa vikozgo, mbwenu ureke kuyako ku sukulu. Kasi ungacita wuli?—

Ncipusu comene kucita vintu viweme para ŵanyako wose ŵakucita vintu ivyo. Kweni kucita vintu viweme kungaŵa kwakusuzga comene usange ŵanyithu ŵakuticicizga kucita vintu viheni. Iwo ŵangayowoya kuti ivyo ŵakucita kuti ni viheni comene yayi. Kweni fumbo lakuzirwa ndakuti, Kasi Ciuta wakuti wuli na ivyo iwo ŵakukucicizga kuti ucite? Ciuta ndiye wakumanya makora kuruska ise.

Anteura, kwali ŵanyithu ŵayowoye kwa mtundu wuli, ise tikwenera kukana kucita vintu ivyo Ciuta wakuti ni viheni. Para tingacita nteura, mbwenu tikondweskenge Ciuta nyengo zose, ndipo para tacita nteura mbwenu tikondweskenge Dyabulosi yayi.