KASI uli kuŵapo na citima panji phukwa?— Kasi uli kughanaghanapo usange ukutemweka na ŵanji?— Ŵana ŵanyake ŵakuŵa na citima panji phukwa. Kweni Ciuta wakulayizga kuti: ‘Ine ndikuruwenge cara.’ (Yesaya 49:15) Kasi ici ncakukondweska yayi kucighanaghanira?— Enya, Yehova wakutitemwa nadi!

Mlembi munyake wa Baibolo wakati: ‘Nangauli ŵadada na ŵamama ŵangandisida, kweni Yehova wanditorenge.’ (Salmo 27:10) Kumanya ici kungatipembuzga comene, asi ntena?— Cifukwa Yehova wakuti: ‘Ungofiwanga cara, pakuti ine ndiri nawe. . . . Ndikovwirenge nadi.’—Yesaya 41:10.

Ndipouli, nyengo zinyake Yehova wakuzomerezga Satana kuti watisuzge. Yehova wakazomerezga Satana kuyezga ŵateŵeti Ŵake. Zuŵa linyake, Dyabulosi wakamusuzga comene Yesu mwakuti Yesu wakacemerezga kwa Yehova wakati: “Ciuta wane, Ciuta wane, mwandisidiraci?” (Mateyu 27:46) Nangauli Yesu wakasuzgikanga, iye wakamanya ndipera kuti Yehova wakamutemwanga. (Yohane 10:17) Kweni Yesu wakamanyangaso kuti Ciuta wakuzomerezga Satana kuyezga ŵateŵeti Ŵake na kuŵasuzga. Mu Cipaturo cinyake tizamusambira makora cifukwa ico Ciuta wakuzomerezgera Satana kucita ici.

Para tiri ŵana ŵacoko, nyengo zinyake tikucita wofi. Mwaciyerezgero, Kasi uli kuzgeŵapo?— Kasi ukaŵa na wofi?— Ŵana ŵanandi ŵangaŵa na wofi. Msambizgi Waluso wakayowoyapo za ntharika ya cintu cinyake ico cikazgeŵa. Kweni wakaŵa mwana yayi uyo wakazgeŵa. Yikaŵa mberere.

Mu ntowa yinyake, iwe nawe ukuyana waka na mberere. Cifukwa wuli nkuyowoya kuti ukuyana waka na mberere? Cifukwa ncakuti  mberere zikuŵa zikuru panji za nkongono cara. Ndipo zikukhumba yunji kuti wazipwererere na kuzivikilira. Muntu uyo wakupwererera mberere wakucemeka muliska.

Mu ntharika yake, Yesu wakarongosora za muliska uyo wakaŵa na mberere 100. Ndipo, mberere yimoza yikazgeŵa. Panyake yikakhumbanga kuti yikawone kuseri kwa phiri. Mukuruta kwa nyengo, mberere yira yikasangika kuti yaruta kutali comene kwa yekha. Kasi ungaghanaghanira umo mberere yira yikajipulikira apo yikati yalaŵiska uku na uku na kuwona kuti yikaŵa yekha?—

Kasi muliska wakeneranga kucitaci wakati wawona kuti mberere yimoza yazgeŵa? Kasi iye wakenera kuyowoya kuti njaci yirekani, ni njani uyo wanguyituma kuti yirute kutali, ni suzgo yake? Panji wakenera kureka mberere 99 zira pa malo ghaweme na kuruta kukapenja mberere yakuzgeŵa yira? Kasi iye wakenera kusuzgika cifukwa ca mberere yimoza yira?— Usange iwe ndiwe ukaŵa mberere yakuzgeŵa, kasi nga ukakhumba kuti muliska wakupenje mupaka wakusange?—

Muliska wakatemwanga mberere zake zose, nanga ni iyo yikazgeŵa. Rekani wakaruta kukayipenja. Aghanaghanira waka umo mberere yakuzgeŵa yira yikaŵira na cimwemwe apo yikawona muliska wake wakwiza! Ndipo Yesu wakayowoya kuti  muliska wakakondwa comene cifukwa cakuti wakayisanga mberere yake. Wakakondwa comene cifukwa ca iyo kuruska mberere 99 izo zikazgeŵa yayi. Sono kasi ni njani uyo wali nga ni muliska mu ntharika ya Yesu? Ni njani uyo wakupwererera waliyose wa ise nga ni umo wakacitira muliska yura ku mberere zake?— Yesu wakayowoya kuti Ŵadada ŵake ŵakucanya ŵakucita nteura. Ŵadada ŵake ni Yehova.

Yehova Ciuta ndiyo ni Muliska Mukuru wa ŵantu ŵake. Wakutemwa wose awo ŵakumuteŵetera, kusazgapo ŵana nga ndiwe. Wakukhumba cara kuti ise tipwetekeke panji kuparanyika. Ncakupembuzga nadi kumanya kuti Ciuta wakutipwererera comene nkanira!—Mateyu 18:12-14.

Kasi ukugomezga nadi mwa Yehova Ciuta?— Kasi iwe ukumuwona nga ni muntu wanadi?— Mbunenesko kuti tingamuwona yayi Yehova. Ici ciri nteura cifukwa iye ni Mzimu. Wali na thupi ilo ise tingaliwona yayi na maso ghithu. Kweni iye ni muntu wanadi, wangatiwona ise. Wakumanya para tikukhumba wovwiri. Ndipo tingayowoya naye kwizira mu  lurombo, nga ni umo ise tikuyowoyera na munyithu pano pa caru capasi. Yehova wakukhumba kuti ise tiyowoyenge nayo kwizira mu lurombo.

Anteura, usange uli na citima panji phukwa, kasi ukwenera kucitaci?— Kuyowoya na Yehova. Senderera kwa iye, ndipo iye wakupembuzgenge na kukusanguruska. Kumbukira kuti Yehova wakukutemwa, nanga ni apo uli pa wekha. Tiye titore ma Baibolo ghithu. Pano, pa lemba la Salmo 23, tikuphalirika kuti, kwambira 1: ‘Yehova ndiye muliska wane, kuti ndisaukenge cara; wakundigoneka mu maluhari ghaweme. Wakundirongozga ku maji ghakudama.’

Wona ivyo mlembi wakasazgirako, mu Sal. 23vesi 4: ‘Nanga ndendenge mu malo ghakofya gha mdima wa nyifwa, kuti ndamkopa uheni cara, cifukwa Imwe muli pamoza nane; ntonga yinu na ndodo yinu zikundisanguruska.’ Umu ndimo ŵantu ŵakujipulikira usange Ciuta wawo ndi Yehova. Wakusanguruskika para ŵali mu suzgo. Kasi ndimo nawe ukujipulikira?—

Nga ni umo muliska wacitemwa wakupwererera mberere zake, nteura pera ndimo Yehova wakupwererera ŵantu ŵake. Wakuŵarongora ntowa yiweme, ndipo iwo ŵakumurondezga mwacimwemwe. Nanga ni apo ŵali mu suzgo, palije cifukwa ca kuŵira wakwenjerwa.  Muliska wakugwiriskira ncito ndodo yake kuvikilira mberere ku vikoko. Baibolo likutiphalira umo muliska waciwukirano Davide wakavikilirira mberere zake ku nkaramo na kamburumburu. (1 Samuel 17:34-36) Ndipo Ŵantu ŵa Ciuta ŵakumanya kuti Yehova waŵavikilirenge. Wakujipulika kuti mbakuvikilirika cifukwa Ciuta wali nawo.

Yehova wakutemwa nadi mberere zake, ndipo wakuzipwererera makora. Baibolo likuyowoya kuti: ‘Nga ni muliska, warongozgenge mberere zake. Na mawoko ghake wizamkuwunganya twanamberere.’—Yesaya 40:11.

Kasi ici cikukupangiska iwe kuŵa wakukondwa yayi pa kumanya kuti Yehova ndimo waliri?— Kasi ukukhumba kuti uŵe yumoza wa mberere zake?— Mberere zikupulikira mazgu gha muliska wawo. Zikusenderera comene kwa iye. Kasi iwe ukumupulikira Yehova?— Kasi iwe ukukhala pafupi na Iye?— Mbwenu ukwenera kopa yayi. Yehova wazamuŵa nawe.