NYENGO zinyake Yehova wakucita vintu mu ntowa yakuzizwiska kuvikirira ŵana awo ŵangajivikirira ŵekha cara. Usange ungenda mu mizi, ungawona umo Yehova wakucitira ici. Kweni pakudanga ungapulikiska yayi ico cikucitika.

Ungawona kayuni kakudeka pasi pafupi na iwe. Kangawoneka nga nkakupwetekeka. Kangenda nga kapwetekeka phapindo limoza ndipo kakutondeka kuduka, para iwe ukusenderera kufupi iko kakucimbira. Para ukukarondezga kayuni ako, iko kakudukira pantazi. Ndipo pamanyuma pake, mwamabuci kakuduka mwankongono na kuruta. Phapindo lake likaŵa lambura kupwetekeka! Kasi ukumanya ico kayuni kara kakacitanga?—

Reka ni kuphalire cifukwa cake, pafupi na iwe apo kayuni kara kakadeka, pakaŵa twana twake uto tukabisama mu vivwati. Nyinawo wa twana utu wakaŵa na wofi kuti panji iwe ungatuwona twana twake na kutukoma. Anteura kakayerezgeranga nga nkakupwetekeka mwakuti iwe ureke kuwona twana twake. Kasi ukumanya uyo wangativikirira ise nga ni umo kayuni kanakazi kakuvikilirira twana twake?— Mu Baibolo, Yehova wakuyerezgereka na ciyuni cakucemeka Nombo, ico cikovwira ŵana ŵake.—Duteronome 32:11, 12.

 Mwana wakuzirwa ndiposo wakutemweka comene wa Yehova ni Yesu. Peneapo Yesu wakaŵa kucanya, wakaŵa muntu wauzimu wankongono nga ni Ŵadada ŵake. Wakajipwerereranga yekha. Kweni apo iye wakababika pa caru capasi, wakaŵevye covwiro. Mwanteura iye wakakhumbikwiranga civikiriro.

Kuti wafiske khumbo la Ciuta pa caru capasi, Yesu wakeneranga kuti wakure na kuŵa mwanarumi murunji, wakufikapo. Ndipouli, Satana wakayezgayezga kuti wamukome Yesu pambere ici cindacitike. Kuyezgayezga kuti wamukome Yesu apo wakaŵa bonda, na umo Yehova wakamuvikirira ni nkani yakukondweska comene. Kasi ukukhumba kuti uyipulike?—

Apo Yesu wakati wababika waka, Satana wakapangiska cintu cinyake kuwoneka nga ni nyenyezi kuŵala mu mlengalenga Kumafumiro gha Dazi. Ŵantu awo ŵakumanya za nyenyezi ŵakayirondezga nyenyezi yira mtunda utali kurazga ku Yerusalemu. Ŵakati ŵafika ku Yerusalemu ŵakafumba uko kwababikira themba la Ŵayuda. Peneapo ŵantu awo ŵakamanyanga ivyo Baibolo likuyowoya pa nkani iyi ŵakati ŵafumbika, ŵakazgora ŵakati: “Mu Betelehemu.”—Mateyu 2:1-6.

 Pamanyuma pake, Herode fumu yiheni ya ku Yerusalemu, yikati yapulika nkani iyi ya kubabika kwa themba lipya mu tawuni ya pafupi ya Betelehemu, likaphalira ŵamanyi-nyenyezi kuti: ‘Rutaninge mukamupenje mwana; ndipo para mwaya kamusanga mwize kandiphalire.’ Kasi ukumanya cifukwa ico Herode wakakhumbira kuti wamanye uko kuli Yesu?— Ncifukwa cakuti wakaŵa na sanji ndipo wakakhumbanga kuti wamukome Yesu!

Kasi Ciuta wakamuvikirira wuli Mwana wake?— Ŵamanyi-nyenyezi ŵakati ŵamusanga Yesu, ŵakamupa vyawanangwa. Pamanyuma pake, Ciuta wakaŵacenjezga ŵamanyi-nyenyezi ŵara kwizira mu loto kuti ŵareke kwendera kwa Herode. Mwanteura iwo ŵakawera kukwawo kweni ŵakenda ntowa yinyake yambura kwendera ku Yerusalemu. Apo wakati wamanya kuti ŵamanyi-nyenyezi ŵamupusika, ŵendera ntowa yinyake, Herode, wakakwiya comene. Herode wakayezgayezga umu na umu kuti wamukome Yesu, mwanteura wakalangura kuti ŵana wose ŵasepuka ŵa mu Betelehemu ŵa virimika viŵiri kukhira pasi ŵakomeke. Kweni panyengo iyi, Yesu wakaŵa kuti wafumamo kale.

Kasi ukumanya umo Yesu wakaponera?— Pamanyuma pakuti ŵamanyi-nyenyezi ŵawelera ku kwawo, Yehova wakacenjezga Yosefe mufumu wa Mariya kuti ŵafumemo mwaluŵiro ndipo ŵarute ku Egupto. Uko Yesu wakavikilirika ku urwani wa Herode. Vikati vyajumpapo virimika vicoko waka, Mariya na Yosefe pamoza na Yesu ŵakawerako ku Egupto, ndipo Ciuta wakamucenjezga Yosefe kaciŵiri. Wakamuphalira kwizira mu loto kuti warute ku Nazareti, kweneuko Yesu wamukhala makora comene.—Mateyu 2:7-23.

 Kasi wawona umo Yehova wakavikilirira Mwana wake?— Kasi ni njani uyo ungayowoya kuti wali nga ni twana twa kayuni uto nyinawo ŵakatubisa mu vivwati panji uyo wakuyana waka na Yesu apo wakaŵa mwana mucoko? Kasi iwe uli nga ndi iwo?— Paliso ŵantu awo ŵakukhumba kuti ŵakupweteke. Kasi ukuŵamanya?

Baibolo likuyowoya kuti Satana wali nga ni nkaramo yikali comene iyo yikukhumba kuti yitikome. Nga ni umo nkaramo kanandi zikukorera nyama zicoko-zicoko, Satana na viŵanda vyake kanandi ŵakukora ŵana. (1 Petros 5:8) Kweni Yehova ngwankongono kuruska Satana. Yehova wangavikirira ŵana ŵake panji kukanizga vithu viheni ivyo Satana wakuŵacitira.

Kasi ukukumbukira ivyo ukasambira mu Cipaturo 10 ca buku ili, vintu ivyo Satana na viŵanda vyake ŵakukhumba kuti ise ticitenge?— Ŵakuyezgayezga kuti ise tigonanenge, cintu ico Ciuta wakuyowoya kuti nciheni. Kweni mbanjani pera awo ŵakwenera kugonana?— Mwanarumi na mwanakazi awo mbarara ndipo mbakutorana.

Ndipouli, ncacitima kuyowoya kuti, ŵantu ŵanji ŵarara ŵakutemwa kugonana na ŵana. Para ŵakucita ici, ŵanyamata na ŵasungwana ŵangamba kucita vithu viheni ivyo ŵasambira ku ŵantu ŵarara aŵa. Ŵangamba kugwiriskira ncito viŵaro vyakugonanirana mu ntowa yiheni. Ivi ndivyo vikacitikanga mu nyengo zakale mu msumba wa Sodomu. Baibolo likuyowoya kuti ŵantu ŵa mu Sodomu, ‘wose ŵarara na ŵacoko,’ ŵakayezgayezga kuti ŵagonane na ŵanarumi awo ŵakiza kuzakacezga na Loti.—Genesis 19:4, 5.

Mwanteura, nga ni umo Yesu wakakhumbikwiranga civikiliro, iwe nawe ukukhumbikwira kuvikilirika ku ŵantu ŵarara, nanga nku ŵana ŵanyako, awo ŵangayezgayezga kuti ŵagonane nawe. Kanandi, ŵantu aŵa ŵakuyezgayezga kukunyengelera kuti ŵaŵe nga ni mabwezi ghako. Ŵangakuphalira kuti ŵakupenge cithu cinyake usange iwe wamuphara yayi ivyo iwo ŵakukhumba kucita nawe. Kweni ŵantu aŵa mbaheni, nga ni Satana na viŵanda vyake, ŵakukhumba kuti iwo ŵajikondweske  waka. Ndipo ŵakukhumba kuti ŵajikondweske mwakugonana na ŵana. Ici nciheni comene!

Kasi ukumanya ico ŵangacita kuti ŵajikondweske iwoŵene?— Ŵangayezgayezga kukora-kora nkule yako. Panji ŵangakwenteska nkule yako na yawo. Kweni ungazomerezganga muntu waliyose kuseŵereska nkule yako yayi. Nanga wangaŵa mudumbu wako panji ŵamama na ŵadada ŵako.

Kasi ungajivikirira wuli ku ŵantu awo ŵakucita vintu viheni vya nga ndi ivi?— Cakudanga, ungazomerezganga yayi waliyose kuseŵereska nkule yako. Usange yunji wakukhumba kuseŵereska nkule yako, muphalira mwakucemerezga kuti: “Rekerathu! Namuphara!” Ndipo usange muntu uyo wakuyowoya kuti iwe ndiwe uli na suzgo cifukwa ca ivyo vyacitika, ungagomezganga yayi. Mbunenesko yayi. Iwe ruta waka na kukaphara mwambura kupwererako kanthu kuti iye ni njani! Ukwenera kukaphara nanga wangayowoya kuti ivyo mukucitira lumoza ni vya cisisi vyakwenera kumanya iwe na iyo. Nanga muntu uyo wakuphalire kuti wakupenge cithu cinyake ciweme panji kukofya, iwe ukwenera kucimbira kukaphara.

Ungopanga yayi, kweni ukwenera kucenjera. Usange ŵapapi ŵako ŵakucenjezga za ŵantu ŵanyake panji malo agho ghangaŵa gharwani kwa iwe, ukwenera kupulikira. Usange upulikirenge, uperekenge cara mwaŵi ku ŵantu ŵaheni wakucita nawe vintu viheni.