KASI ukuwona kuti ncipusu kuteŵetera Yehova?— Msambizgi Waluso wakayowoyapo cara kuti cizamuŵa cipusu kucicita. Usiku unyake pambere Yesu wandakomeke, iye wakaphalira ŵasambiri ŵake kuti: “Usange caru cikumutinkani imwe, mukumanya kuti cadanga catinka Ine, cikaŵa cindamutinkani imwe.”—Yohane 15:18.

Petros wakajiŵikamo kuti iye wazamureka cara kurondezga Yesu, kweni Yesu wakayowoya kuti Petros wazamumukana katatu usiku wenewura. Ndipo ivi ndivyo Petros wakacita nadi! (Mateyu 26:31-35, 69-75) Kasi cintu ca nga ndi ici cikacitika wuli?— Cikacitika cifukwa cakuti Petros wakacita wofi, na nteura pera ŵapostole ŵanyake.

Kasi ukumanya cifukwa ico ŵapostole ŵakacitira wofi?— Iwo ŵakatondeka kucita cintu cinyake cakuzirwa comene. Kusambira za cintu ici kungatovwira ise kuteŵetera Yehova, kwambura kupwererako kantu za ivyo ŵanji ŵangayowoya panji kuticitira. Ndipouli, tikukhumbikwira kuweleramo danka ivyo vikacitika pa usiku wa umaliro uwo Yesu wakacezgera na ŵapostole ŵake.

Pakwamba, ŵakakondwelera ciphikiro ca Paska pamoza. Paska uyu cikaŵa ciphikiro capadera cakucitika cirimika cilicose kukumbuska ŵantu ŵa Ciuta za kuthaskika kwawo kufuma ku wuzga ku Egupto. Pamanyuma pake, Yesu wakambiska ciphikiro cinyake ca padera na ŵasambiri ŵake. Tidumbiskanenge za ciphikiro ici mu vipaturo vya kuntazi na kurongosora umo ciphikiro ici cikutovwilira kukumbukira Yesu. Pamanyuma pa ciphikiro cira ndiposo panyuma pa kuŵakhuŵirizga ŵapostole ŵake, Yesu wakaruta nawo ku munda wa Gesemane. Agha ni malo ghaweme uko ŵakatemwanga kuyako.

 Yesu wakasezgekapo pacoko waka na kuruta payekha kuti wakarombe. Wakaphaliraso Petros, Yakobe, na Yohane kuti ŵarombenge. Kweni iwo ŵakagona tulo. Katatu kose ako Yesu wakarutanga na kuwerako kukaromba, wakasanganga kuti Petros na ŵanyake ŵakugona! (Mateyu 26:36-47) Kasi ukumanya cifukwa ico ŵakeneranga kuŵa maso na kuromba?— Tiye tiwone za nkani iyi.

Pakwamba Yuda Iskariote wakaŵapo pa Paska pamoza na Yesu na ŵapostole ŵanyake mise yira. Para ungakumbukira, Yuda wakaŵa munkhungu. Sono wazgoka cigeŵenga. Wakumanya za malo gha mu munda wa Gesemane uko Yesu wakakumananga na ŵasambiri ŵake. Anteura Yuda wakiza na ŵasirikari kwenekura kuti ŵakamukore Yesu. Apo ŵakati ŵafika, Yesu wakaŵafumba kuti: “Mukupenja njani?”

Ŵasirikari ŵakazgora kuti: “Yesu.” Yesu wakacita wofi cara, nteura wakazgora kuti: “Ndine.” Ŵasirikari ŵakazizwa comene na cikanga ca Yesu mwakuti ŵakawelera cafuta-nyuma ndipo ŵakawa pasi. Ndipo Yesu wakati: ‘Usange mukupenja Ine, ŵarekani ŵasambiri ŵane ŵarutenge.’—Yohane 18:1-9.

Apo ŵasirikari ŵakati ŵamukora Yesu na kumukaka mawoko, ŵasambiri ŵakacita wofi ndipo ŵakacimbira. Kweni Petros na Yohane ŵakakhumbanga kuwona ivyo vicitikenge, anteura ŵakarondezganga mu manyuma. Paumaliro, Yesu wakaruta nayo ku nyumba ya Kayafa, musofi mukuru. Pakuti Yohane wakamanyikwanga kwa musofi mukuru, mulinda wa pa muryango wakaŵanjizga iye na Petros mu mphara.

Ŵasofi ŵakawungana kale mu nyumba ya Kayafa kuti ŵeruzge mrandu. Ŵakakhumbanga kuti Yesu wakomeke. Anteura ŵakiza na ŵakaboni awo ŵakaphara mautesi kukhwaskana na Yesu. Ŵantu ŵakamugonyozga Yesu na kumupamanta na malupi. Apo vintu vyose ivi vikacitikanga, Petros wakaŵa pafupi.

Msungwana uyo wakalindanga pa muryango, mweneuyo wakaŵanjizga Petros na Yohane, wakamuwona Petros. Ndipo iye wakayowoya kuti: “Naweso, ukaŵa pamoza na Yesu”! Kweni Petros wakakana kuti  wakumumanya yayi Yesu. Pakati pajumpa kanyengo kacoko waka, msungwana munyake wakamumanya Petros ndipo wakayowoya na ŵantu awo ŵakaŵapo wakati: “Muntu uyu nayo wakaŵa pamoza na Yesu.” Ndipera Petros wakakanaso kuti wakumumanya cara. Khalepo pacoko waka, gulu la ŵantu likamuwona Petros ndipo ŵakati kwa iye: “Nadidi, naweso uli yumoza wa iwo.” Kwa nyengo yacitatu Petros wakakana, wakati: ‘Kuti nkumumanya muntu uyu cara!’ Petros wakarapa-na-kurapa kuti wakuyowoya unenesko, ndipo Yesu wakang’anamuka na kumulaŵiska.—Mateyu 26:57-75; Luka 22:54-62; Yohane 18:15-27.

Kasi ukumanya cifukwa ico Petros wakayowoyera utesi?— Inya, cifukwa wakaŵa na wofi. Kweni kasi ncifukwa wuli iye wakacita wofi? Kasi ncici ico iye wakatondeka kucita kuti waŵe na cikanga? Ghanaghanira za fundo iyi. Kasi ncici ico Yesu wakacita kuti waŵe na cikanga?— Iye wakaromba kwa Ciuta, ndipo Ciuta wakamovwira kuti waŵe na cikanga. Ndiposo kumbukira, Yesu wakaphalira Petros katatu kose kuti warombenge na kuŵa maso nyengo zose. Kweni kasi ncivici cikacitika?—

Nyengo yose iyo Yesu wakiziranga, Petros wakaŵa mu tulo. Wakarombanga cara, ndiposo wakaŵa maso cara. Anteura wakazizwa para Yesu  wakakakikanga. Pamanyuma pake ku mphara kura, para ŵakamutimbanga Yesu na kupangana kuti ŵamukome, Petros wakahangayika. Ndipouli, maora ghacoko waka pambere ivi vindacitike, kasi Yesu wakaphalira ŵasambiri ŵake kulindizga vici?— Yesu wakaŵaphalira kuti nga ni umo caru cikamutinkira iye, ciŵatinkengeso na iwo wuwo.

Sono tiye tighanaghanire cintu cinyake ico cingaticitikira ise ico cikuyana waka na ico cikacitikira Petros. Tiyerezgere kuti uli mu kalasi apo ŵanji ŵakwamba kuyowoya vintu viheni kukhwaskana na ŵantu awo ŵakukana kulambira ndembera panji awo ŵakukana kukondwelera Krisimasi.  Ndipo, wuli usange munyake wang’anamukira kwa iwe nakukufumba kuti: “Kasi mbunenesko imwe mukukana kulambira ndembera?” Panji ŵanji wakuyowoya kuti: “Tikupulika kuti mukukondwelera na Krisimasi wuwo ha!” Kasi ungacita wofi kuti uŵaphalire unenesko?— Kasi ungayezgeka kuti uyowoye utesi, nga ni umo wakacitira Petros?—

Pamanyuma pake, Petros wakaŵa na citima comene cifukwa cakuti wakakana kuti wakumumanya cara Yesu. Apo wakati wamanya ivyo wakacita, iye wakafumira kuwaro ndipo wakalira. Inya, wakawelera kwa Yesu. (Luka 22:32) Sono ghanaghanira za ici. Kasi cingatovwira ncivici kuti tireke kuŵa na wofi na kuyowoya cintu cinyake nga ni umo Petros wakacitira?— Kumbukira kuti Petros wakatondeka kuromba na kuŵa maso. Anteura, kasi ungayowoya ico tikukhumbikwira kucita kuti tiŵe ŵarondezgi ŵa Msambizgi Waluso?—

Tikukhumbikwira nadi kuromba kwa Yehova kuti watovwire. Peneapo Yesu wakati waromba, kasi ukumanya ico Ciuta wakamucitira?— Iye wakatuma mungelo kuzakamukhozga. (Luka 22:43) Kasi ŵangelo ŵa Ciuta ŵangatovwira ise?— Baibolo likuti: “Mungelo wa Yehova wakuzingirizga aŵo ŵakumopa Yehova, na kuŵaponoska.” (Salmo 34:7) Kweni kuti tipokere wovwiri wa Ciuta, tikukhumbikwira kucita cintu cinyake padera pa kuromba. Kasi ukucimanya cintu cinyake ico tikukhumbikwira kucita?— Yesu wakaphalira ŵasambiri ŵake kuŵa maso nyengo zose. Kasi ukughanaghana kuti cingatovwira ncivici kuti tiŵe maso?—

Tikukhumbikwira kutegherezga mwakupwererera comene ku ivyo vikuyowoyeka pa maungano gha Cikristu na kughanaghanira comene pa ivyo tikuŵazga mu Baibolo. Kweni tikukhumbikwiraso kuromba kwa Yehova ruta-ruta ndiposo kumupempa kuti watovwire kuti timuteŵeterenge. Usange tikucita ivi, tipokerenge wovwiri wakumazgira wofi uwo tiri nawo. Ndipo tizamukondwa apo tizamuŵa na mwaŵi wakuphalira ŵanji za Msambizgi Waluso na Ŵadada ŵake.