PENEAPO Yesu wakati wakura na kumanya umo ŵakamuvikilirira apo wakaŵa mwana, kasi ukughanaghana kuti iye wakaromba kwa Yehova na kuwonga?— Kasi ukughanaghana kuti Yesu wakaŵaphaliraci Mariya na Yosefe apo wakati wamanya kuti iwo ŵakamuponoska mwa kuya naye ku Egupto?—

Kweni, sono Yesu ni bonda yayi. Wakukhalaso pa caru capasi yayi nga ndi umo wakacitira nyengo yinyake. Kasi uli kuwonapo ŵantu ŵanji mazuŵa ghano awo ŵakughanaghana kuti Yesu wali nga ni bonda mu cakuryeramo viŵeto?— Ici cikuwoneka pa nyengo ya Krisimasi apo Yesu wakurongoreka nga ndi bonda mu vithuzithuzi mu vigaŵa vinandi.

Nangauli Yesu waliso pa caru capasi cara, kasi iwe ukugomezga kuti iye ngwamoyo?— Enya, wakawuka ku ŵakufwa, ndipo sono ni Themba la nkongono kucanya. Kasi ukughanaghana kuti iye wangacitaci kuti wavikirire awo ŵakumuteŵetera?— Mwaciyerezgero, peneapo wakaŵa pa caru capasi, Yesu wakarongora umo wangavikilirira awo ŵakumutemwa. Tiye tiwone umo wakacitira ici zuŵa linyake apo wakaŵa mu boti na ŵasambiri ŵake.

 Yikaŵa nyengo ya mise. Yesu wakasambizganga zuŵa lose mu mpepete mwa Nyanja ya Galileya, iyo ni nyanja yikuru pafupifupi makilomita 20 mu utali ndiposo makilomitala 12 mu usani wake. Sono iye wakaphalira ŵasambiri ŵake kuti: ‘Tiyeni tambukire ku sirya linyake la nyanja.’ Mwanteura ŵakakwera boti na kwambukira ku sirya linyake. Yesu wakavuka comene, mwanteura wakagona kumanyuma kwa boti. Wakagona tulo twa zanimuwone.

Ŵasambiri ŵakaŵa maso mwakuti ŵapwerererenge boti. Vintu vikaŵa makora pa kanyengo kacoko, kweni kukiza cimpepo cikuru. Cikaputa mwankongono comene ndipo majigha ghakakuranga comene. Maji ghakamba kunjira mu boti, ndipo boti likamba kuzura na maji.

Ŵasambiri ŵakaŵa na wofi kuti ŵabirenge. Kweni Yesu wakenjerwanga yayi. Wakaŵa wacali kugona kumanyuma kwa boti. Vikati vyasuzga, ŵasambiri ŵakamuwuska, ŵakati, ‘Msambizgi, Msambizgi, tiponoskani; takhala pacoko waka kuti tifwe na mpepo iyi.’ Nyengo yeneiyo, Yesu wakawuka na kuyowoya ku mpepo na majigha kuti: ‘Nyanja! Cetama! ute waka yi!’

 Nyengo yeneiyo mpepo yikareka kuputa, ndipo kukaŵa bata. Ŵasambiri ŵakazizwa cifukwa ŵakaŵa ŵandawonepo cithu ca nga ndi ici. Ŵakamba kuyowoyeskana ŵakati: ‘Kasi ni njani muntu uyu, pakuti nanga ndi mpepo na nyanja wakuvilangura, ndipo vikumupulikira?’—Luka 8:22-25; Marko 4:35-41.

Kasi ukumumanya Yesu?— Kasi ukumanya uko wakusanga nkongono zake?— Ŵasambiri ŵakenera kopa cara apo Yesu wakaŵa nawo, cifukwa Yesu wakaŵa muntu bweka yayi. Iye wakacitanga vithu vyakuzizwiska vyakuti muntu bweka wangacita yayi. Reka nikuphalire cintu cinyake ico wakacita zuŵa linyake pa nyanja iyo yikawuka.

Zuŵa linyake, nyengo yakumise, Yesu wakaphalira ŵasambiri ŵake kuti ŵakwere boti kuti ŵarute ku cigaŵa cinyake ca nyanja. Ndipo Yesu wakakwerera ku phiri kwa yekha. Ni malo ghaweme gha yi-i-i uko wangaromba kwa Ŵadada ŵake, Yehova Ciuta.

Ŵasambiri ŵake ŵakakwera boti na kuruta ku cigaŵa cinyake ca  nyanja. Kweni mu kanyengo kacoko waka, mpepo yikamba kuputa. Yikaputanga mwankongono comene. Kukati kwafipa, ŵakakhizga matanga na kwamba kuvigha boti. Kweni boti likendanga pacoko-pacoko cifukwa mpepo yikaputanga mwankongono. Boti likayeghekanga waka na majigha kuruta kuntazi na kumanyuma, nakuti maji ghakanjiranga mukati. Ŵanarumi ŵakayezgayezga na nkongono kuti ŵakafike ku mtunda, kweni ŵakatondeka.

Kweni Yesu wacali yekha mu phiri. Wakakhalako kwa nyengo yitali. Kweni iye wakawona kuti ŵasambiri ŵake ŵakasuzgikanga comene na majigha ghankongono. Mwanteura wakikha kuya ku nyanja. Yesu wakakhumbanga kuti wawovwire ŵasambiri ŵake, nteura wakamba kwenda kurazga kwa iwo pacanya pa maji mu nyanja yakofya!

Kasi cingacitika ncivici usange ungayezga kwenda pacanya pa maji?— Ungabira na kukhapira. Kweni Yesu wakabira yayi. Cifukwa wali na nkongono zapadera. Yesu wakenda kamtunda kuti wakafike apo pakaŵa boti. Mwanteura yikaŵa nyengo ya mlenji apo ŵasambiri ŵakawona Yesu wakwiza kwa iwo wakwenda pacanya pa maji. Kweni iwo ŵakagomezga yayi kuti ndiyo. Wose ŵakaŵa na wofi, ndipo ŵakacemerezga na citente. Ndipo Yesu wakaŵaphalira kuti: ‘Khwimani mtima; ndine; mungopanga yayi.’

Apo Yesu wakati wanjira mu boti mura mbwenu mpepo yira yikareka. Ŵasambiri ŵake ŵakazizwaso comene. Ŵakagwada pamaso pa Yesu ndipo ŵakati: “Nadidi ndimwe Mwana wa Ciuta.”—Mateyu 14:22-33; Yohane 6:16-21.

Kasi nga ukakondwa yayi kuŵa na umoyo pa nyengo yira na kuwona Yesu wakucita vintu vya nga ndi ivi?— Kasi ukumanya cifukwa ico Yesu wakacitiranga vyakuzizwiska ivi?— Wakacitanga vintu ivi cifukwa wakatemwanga ŵasambiri ŵake ndipo wakakhumbanga kuŵavwira. Kweni wakacitangaso vintu vyakuzizwiska kurongora kuti wakaŵa na nkongono zapadera ndipo wazamuzigwiriskira ncito nga ni Muwusi wa Ufumu wa Ciuta.

 Nanga ndi sono, Yesu wakugwiriskira ncito nkongono zake kuvikilira ŵarondezgi ŵake kuti Satana wareke kuŵakanizga kuphalira ŵanji za Ufumu wa Ciuta. Kweni Yesu wakugwiriskira ncito nkongono zake kuvikirira ŵasambiri ŵake kuti ŵareke kurwara panji kuŵacizga yayi. Nanga mbasambiri wose ŵa Yesu ŵakafwa mukuruta kwa nyengo. Yakobe mbali wa Yohane wakakomeka, ndipo Yohane iyemwene wakaŵikika mu jere.—Milimo 12:2; Civumbuzi 1:9.

Ndimo viliriso mazuŵa ghano. Nanga ni ŵantu awo ŵakuteŵetera Yehova panji yayi, ŵangarwara panji kufwa. Kweni sono-sono apa, peneapo Yesu wazamuwusa nga ndi Themba la Ufumu wa Ciuta pacaru capasi, vintu vizamuŵa vyakupambana. Pazamuŵavye muntu wakwenjerwa, cifukwa Yesu wazamugwiriskira ncito nkongono zake kutumbikira wose awo ŵakumupulikira iye.—Yesaya 9:6, 7.