Wona munyamata uyo wali pa cithuzithuzi apa. Wakuwoneka kuti wacita phukwa kweniso wakopa. Asi nthe? Kasi nawe vili kukucitikirapo?— Waliyose vikumucitikira nyengo zinyake. Baibolo likuyowoya za ŵabwezi ŵa Yehova awo ŵakawonanga nga ŵali ŵekha panji kopa. Yumoza wawo ni Eliya. Tiye tisambire vinandi vya Eliya.

Eliya wakakhalanga mu Israyeli. Wakaŵako kale comene pambere Yesu wandababike. Ahabu, fumu ya Israyeli, wakasopanga Yehova yayi. Ahabu na muwoli wake Yezebeli ŵakasopanga Bala, ciuta wautesi. Lekani ŵanthu ŵanandi mu Israyeli ŵakamba kusopa Bala. Yezebeli wakaŵa wankhaza comene ndipo wakakhumbanga kukoma Eliya na ŵanthu wose awo ŵakasopanga Yehova! Kasi ukumanya ivyo Eliya wakacita?—

Eliya wakacimbira! Wakaluta ku thengere na kukabisama mu cikhululu. Kasi ukughanaghana  kuti cifukwa wuli Eliya wakacimbira?— Enya, wakawopa. Kweni Eliya wakeneranga kopa yayi. Cifukwa wuli? Cifukwa wakamanyanga kuti Yehova wangamovwira. Yehova wakamovwirapo kale Eliya. Nyengo yinyake, Eliya wati walomba, Yehova wakatuma moto kufuma kucanya. Ntheura Yehova watenge wamovwirenge!

Apo Eliya wakaŵa mu cikhululu, Yehova wakayowoya nayo. Wakati: “Kasi ukucitaci pano?” Eliya wakazgora kuti: ‘Ŵakoma ŵanthu ŵinu na lupanga. Nakhala nekha, ndipo ŵakukhumba kunikoma.’ Eliya wakaghanaghananga kuti ŵanthu wose awo ŵakusopa Yehova ŵakomeka. Kweni Yehova wakamuphalira kuti: ‘Yayi, ndimo viliri ca. Pali ŵanthu 7,000 awo ŵacali kunisopa. Kopa yayi. Pali nchito yinandi yakuti ucite!’ Kasi ukughanaghana kuti Eliya wakakondwa kupulika mazgu agha?—

Kasi ungasambirako vici kwa Eliya?— Ukwenera kujiwona nga uli wekha yayi panji kopa. Uli na ŵabwezi awo ŵakutemwa Yehova na iwe wuwo. Kweniso, Yehova ngwankhongono comene. Wakovwirenge nyengo zose! Kasi wakondwa kumanya kuti Yehova waŵenge nawe nyengo zose?—