1-3. (a) Kasi Yesu wakalayirana nawo wuli ŵapositole ŵake, ndipo chifukwa wuli kulayirana uku kukaŵa kwakuchitiska chitima yayi? (b) Chifukwa wuli tikwenera kumanya ivyo Yesu wakuchita kufuma apo wakakwelera kuchanya?

 ŴANALUME 11 ŵakimilira pa phiri. Wose maso ghakaŵa dodoli pa munthu munyake uyo ŵakaŵa nayo. Munthu uyu wakaŵa Yesu wati wawuka ku ŵakufwa, ndipo apa wakaŵaso Mwana wauzimu wankhongono chomene wa Yehova. Yesu wakawungana na ŵapositole kaumaliro pa Phiri la Maolive.

² Phiri ili lili kulazgirana na Yerusalemu, ndipo pakati pali Dambo la Kidironi. Yesu wakwenera kuti wakakumbuka vinandi apo wakaŵa pa phiri ili. Musi mwa phiri ili mukaŵa tawuni ya Betaniya, uko Yesu wakawuska Lazaro. Masabata ghachoko waka pambere ungano uwu undachitike, Yesu wakanjira mu Yerusalemu nga Fumu apo wakafumanga ku Betifage. Munda wa Getisemane ukwenera kuti ukaŵaso kufupi na Phiri la Maolive, uko Yesu wakasuzgikira maghanoghano pambere wandakakike. Pa nyengo iyi, Yesu wakaŵa pafupi kusida ŵabwezi ŵake ŵa pa mtima kweniso ŵalondezgi ŵake. Wakayowoya mazgu ghalusungu, kulayirana nawo. Kufuma apo, wakamba kukwera kuchanya. Ŵapositole ŵakimilira penepara kwa nyengo yitaliko, kudodoliska Fumu yawo yakutemweka apo yikakweranga kuchanya. Paumaliro bingu likamubisa, ndipo ŵakamuwonaso yayi.—Milimo 1:6-12.

³ Kasi mukughanaghana kuti kulayirana uku kukaŵa kwakuchitiska chitima? Ndimo vikaŵira yayi. Nga umo ŵangelo ŵaŵiri ŵakakumbuskira ŵapositole ŵara, nkhani ya Yesu yikamalira penepara yayi. (Milimo 1:10, 11) Ulendo wake wakuchanya uwu, kukaŵa kwamba kwa milimo yinyake. Mazgu gha Chiuta ghakutibisira yayi ivyo vikachitika Yesu wati wakwera  kuchanya. Ntchakuzirwa kumanya ivyo Yesu wakuchita kufuma apo wakakwelera kuchanya. Chifukwa wuli? Kumbukani mazgu agho Yesu wakaphalira Petrosi ghakuti: “Lutilira kunilondezga.” (Yohane 21:19, 22) Tose tikwenera kupulikira dango ili umoyo withu wose. Kuti tichite nthena tikwenera kumanya ivyo Fumu yithu yikuchita sono, ndiposo ntchito iyo yili nayo kuchanya.

4. Kasi Baibolo likayowoyerathu kuti chizamuchitika ntchivichi para Yesu wawelera kuchanya?

⁴ Malemba ghakuyowoyapo chilichose yayi chakukhwaskana na umo Yesu wakafikira kuchanya, umo ŵakamupokelelera, kweniso umo wakakondwera pakuŵaso pamoza na Adada ŵake. Ndipouli, Baibolo likayowoyerathu ivyo vizamuchitika para Yesu wawelera kuchanya. Fundo njakuti, kwambira mu nyengo ya Mozesi m’paka mu nyengo ya Yesu, Ŵayuda ŵakaŵa na kaluso ako ŵakachitanga nyengo zose. Zuŵa limoza chaka chilichose, wasembe mukuru wakanjiranga mu Malo Ghatuŵa Chomene mu tempile na kumija ndopa za sembe za pa Zuŵa la Mphepiska panthazi pa likasa la phangano. Pa zuŵa ili, wasembe mukuru wakimiranga Mesiya. Wati wawelera kuchanya, Yesu wakafiska kamoza pera ivyo kaluso aka kakimiranga. Wakafika kuchanya panthazi pa Yehova, malo ghatuŵa chomene mu chilengiwa chose, ndipo wakapeleka kwa Adada ŵake mtengo wa sembe yake yakuwombora. (Ŵahebere 9:11, 12, 24) Kasi Yehova wakayipokelera sembe iyi?

5, 6. (a) Kasi pali ukaboni wuli wakuti Yehova wakapokelera sembe yakuwombora ya Khristu? (b) Kasi mbanjani awo ŵakusanga chandulo na sembe iyi, ndipo chandulo chake ntchakuti wuli?

⁵ Tikusanga zgoro para tikuwona ivyo vikachitika mazuŵa ghachoko waka Yesu wati wakwelera kuchanya. Ŵakhristu ŵachoko waka ŵakukwana 120 ŵakawungana mu Yerusalemu mu chipinda chapachanya, apo mwamabuchi kukapulikikwa chiwawa nga kukuputa mphepo yankhongono. Malulimi nga gha moto ghakawoneka pa mitu yawo, ŵakazuzgika na mzimu  utuŵa, na kwamba kuyowoya malulimi ghakupambanapambana. (Milimo 2:1-4) Ichi chikaŵa chilongolero cha kubabika kwa mtundu uphya, Israyeli wauzimu, uwo ukaŵa “mtundu [uphya] wakusoleka” wa Chiuta, na “ŵasembe na mafumu” kuti uchite khumbo la Chiuta pa charu chapasi. (1 Petrosi 2:9) Apa vikulongora kuti Yehova wakapokelera na kuzomerezga sembe yakuwombora ya Khristu. Mzimu utuŵa uwu ntchimoza mwa vitumbiko vyakwamba vya sembe yakuwombora.

⁶ Kwambira nyengo yira, ŵalondezgi ŵa Khristu pa charu chose ŵasanga chandulo na sembe yake. Kwali ndise “ŵakamskambo kachoko,” awo ŵazamuwusa lumoza na Khristu kuchanya, panji ndise ‘ŵamberere zinyake,’ awo ŵazamukhala pa charu chapasi, tikusanga chandulo na sembe yake. (Luka 12:32; Yohane 10:16) Chigomezgo chithu na kugowokereka kwa zakwananga zithu vyajintha pa sembe iyi. Chikuru tikulutilira ‘kuŵa na chipulikano’ mu sembe iyi na kulondezga Yesu zuŵa na zuŵa, tiŵenge na njuŵi yakutowa ndiposo chigomezgo chiwemi cha munthazi.—Yohane 3:16.

7. Kasi Yesu wakapika mazaza wuli wati wawelera kuchanya, ndipo imwe mungalongora wuli kuti muli ku chigaŵa chake?

⁷ Kasi Yesu wakuchita vichi kuchanya kufuma apo wakakwelera? Wali na mazaza ghakuru chomene. (Mateyu 28:18) Nadi, Yehova wali kumwimika kuti wadangilirenge mpingo, ndipo wakuchita mulimo uwu mwachitemwa kweniso mwaurunji. (Ŵakolose 1:13) Nga umo uchimi ukayowoyera, Yesu wapeleka ŵanalume ŵakwenelera kuti ŵapwelelere mskambo wake. (Ŵaefeso 4:8) Mwachiyelezgero, wakasora Paulosi kuti waŵe “mpositole ku mitundu,” kumutuma kukathandazga makani ghawemi ku vyaru vyakutali. (Ŵaroma 11:13; 1 Timote 2:7) Kuumaliro wa vyaka 100 vyakwambilira vya nyengo yithu yino, Yesu wakatumizga mauthenga ghakulumba, ghaulongozgi, na ghakuchenya ku mipingo 7 ya mu Asia, chigaŵa icho chikaŵa pasi pa Romu. (Chivumbuzi, chaputara 2-3) Kasi mukuzomerezga kuti Yesu ni Mutu wa mpingo? (Ŵaefeso 5:23) Kuti mulutilire kumulondezga, mukwenera kulutilira kupulikira na kukolerana mu mpingo winu.

8, 9. Kasi Yesu wakapika mazaza wuli mu 1914, ndipo ichi chikung’anamura kuti tichitenge wuli zuŵa na zuŵa?

 ⁸ Yesu wakapikaso mazaza ghanyake mu 1914. Mu chaka ichi wakimikika kuŵa Themba la Ufumu wa Yehova. Yesu wati wamba kuwusa, “kukawuka nkhondo kuchanya.” Ntchivichi icho chikachitika? Satana na viŵanda vyake ŵakaponyeka pa charu chapasi, ndipo nyengo ya masoka yikambira penepara. Nkhondo, kuswa malango, uchigeŵenga, matenda, vindindindi na njara, ivyo ŵanthu ŵakukomwa navyo mazuŵa ghano vikutikumbuska kuti Yesu wakuwusa kuchanya. Satana wachali “fumu ya charu ichi” kwa “nyengo yifupi.” (Chivumbuzi 12:7-12; Yohane 12:31; Mateyu 24:3-7; Luka 21:11) Ndipouli, Yesu wakupeleka mwaŵi ku ŵanthu pa charu chose kuti ŵazomere muwuso wake.

⁹ Ntchakukhumbikwa chomene kuti tikolerane na Themba ili. Ntheura vyose ivyo tikuchita zuŵa na zuŵa, vikwenera kulongora kuti tikulongozgeka na Yesu, Fumu ya Ufumu wa Chiuta. Apo “Themba la mathemba na Fumu ya mafumu” iyi yikwendera ŵanthu, mtima wake ukugolera na ukali kweniso ukuzura na chimwemwe. (Chivumbuzi 19:16) Chifukwa wuli?

10. Kasi Yesu wali wuli mwakawiro, kweni ni vinthu wuli ivyo Fumu yithu iyi yikukwiya navyo?

¹⁰ Nga Mbadada ŵake, mwakawiro Fumu yithu njakukondwa. (1 Timote 1:11) Apo wakaŵa pa charu chapasi, Yesu wakaŵa munonono yayi nesi wambura kuwonga. Ndipouli, mazuŵa ghano, pa charu chapasi pakuchitika vinthu vinandi chomene ivyo vikumukwiyiska. Iyo wakukwiya na mawupu gha visopa agho ghakuteta kuti ghakwimira iyo. Wakayowoyerathu kuti: “Ni waliyose yayi uyo wakuyowoya kwa ine kuti, ‘Fumu, Fumu,’ wazamunjira mu Ufumu wa kuchanya, kweni yekha uyo wakuchita khumbo la Adada awo ŵali kuchanya. Mu zuŵa ilo, ŵanandi ŵazamuyowoya kwa ine kuti, ‘Fumu, Fumu, asi [tikachitanga] . . . milimo yankhongono yinandi mu zina  linu?’ Penepapo nizamuŵaphalira kuti: ‘Nkhamumanyani chara! Fumaniko kwa ine, imwe mukuchita viheni!’” (Mateyu 7:21-23)

11-13. Chifukwa wuli ŵanji ŵangazizwa na mazgu ghankhongono agho Yesu wakayowoya ku awo ŵakuchita “milimo yankhongono yinandi” mu zina lake, kweni chifukwa wuli iyo wakukwiya? Yowoyani chiyelezgero.

¹¹ Ŵanthu ŵanandi awo ŵakujichema kuti Mbakhristu mazuŵa ghano ŵangazizwa na mazgu gha Yesu agha. Chifukwa wuli Yesu wangayowoya mazgu ghankhongono nthena ku ŵanthu awo ŵakachitanga “milimo yankhongono yinandi” mu zina lake? Visopa vya charu vikupeleka wovwiri, kovwira ŵakavu, kuzenga vipatala na masukulu, na kuchita milimo yinyake yinandi. Kuti mumanye chifukwa icho Yesu wakukwiyira nawo, wonani chiyelezgero ichi.

¹² Tiyelezgere kuti dada na mama ŵali pa ulendo. Ŵakukhumba yayi kuluta na ŵana ŵawo, ndipo ŵalemba wantchito kuti wapwelelere ŵana ŵawo. Iwo ŵakumuphalira kuti: “Pwelelera ŵana ŵithu. Uŵalyeskenge, kuŵageziska, na kuŵavikilira ku ulwani.” Kweni ŵapapi aŵa ŵati ŵawerako, ŵakuzizwa kuwona kuti ŵana ŵali na njara. Ŵali nakanaka, mbalwari, kweniso mbambura kukondwa. Ŵakulilira wantchito kuti waŵawovwire, kweni wakuŵalaŵiska waka. Chifukwa wuli? Iyo wali pa matanda pachanya, wakupuputa mawindo. Ŵapapi ŵakwiya ndipo ŵakumufumba chifukwa icho wakuchitira nthena. Wantchito uyu wakuzgora kuti: “Wonani vyose ivyo nachita. Asi mawindo ghatowa? Nyumba yinu nayo nanozga kuti imwe mukhalengemo makora.” Kasi ŵapapi aŵa ŵakondwenge na ivyo wayowoya? Yayi. Iwo ŵakamutuma kuchita milimo iyi yayi, kweni kuti wapwelelerenge ŵana ŵawo. Ŵapapi ŵangakwiya chomene chifukwa chakuti watondeka kuchita ivyo ŵakamutuma.

¹³ Visopa vya charu navyo vikuchita nga ngwantchito uyu. Yesu wakaphalira ŵalondezgi ŵake kuti ŵasambizge ŵanthu unenesko wa mu Mazgu gha Chiuta na kuŵawovwira kuti ŵasopenge Yehova munthowa yakwenelera. (Yohane 21:15-17)  Ndipouli, Visopa vya charu vyatondeka kuchita ivyo iyo wakayowoya. Vikuŵaleka waka ŵanthu na njara yauzimu, ŵakutimbanizgika na mautesi kweniso ŵakumanya yayi unenesko wa mu Baibolo. (Yesaya 65:13; Amosi 8:11) Nangauli ŵakuyezgayezga kuti ŵanozge vinthu mu charu ichi, kweni chifukwa chakuti ŵatondeka kupulikira, ŵakuchita makora yayi. Nakuti mgonezi uwu uli nga ni nyumba iyo yili pafupi kupankhulika. Mazgu gha Chiuta ghakulongosora makora kuti mgonezi wa Satana uparanyikenge sonosono apa.—1 Yohane 2:15-17.

14. Kasi Yesu wakukondwa na mulimo wuli mazuŵa ghano, ndipo chifukwa wuli?

¹⁴ Yesu wakwenera kuti wakukondwa chomene para wakulaŵiska pa charu chapasi na kuwona ŵanthu mamiliyoni ghanandi ŵakufiska mulimo wa kuzgora ŵanthu kuŵa ŵasambiri uwo wakapeleka ku ŵalondezgi ŵake pambere wandafumepo pa charu chapasi. (Mateyu 28:19, 20) Ni mwaŵi ukuru chomene kusazgirako chimwemwe cha Themba lithu. Tiyeni tiŵikepo mtima kuti tileke kuwelera nyuma pakovwira “muzga wakugomezgeka na wavinjeru.” (Mateyu 24:45) Mwakupambana na ŵalongozgi ŵa visopa vya charu, gulu la Ŵakhristu ŵakuphakazgika ili likulongozga makora mulimo wa kupharazga ndiposo kulyeska mberere za Khristu mwakugomezgeka.

15, 16. (a) Kasi Yesu wakujipulika wuli na mtima wambura chitemwa uwo wazara mazuŵa ghano, ndipo tikumanya wuli kuti ndimo wakujipulikira? (b) Chifukwa wuli Visopa vya charu vikumukwiyiska Yesu?

¹⁵ Tikugomezga kuti Themba ili likukwiya na mzimu wambura chitemwa uwo wazara pa charu mazuŵa ghano. Tikukumbuka umo Ŵafarisi ŵakasuskiranga Yesu chifukwa cha kuchizga ŵanthu pa Sabata. Ŵanthu ŵara ŵakaŵa na mtima unonono chomene, ŵankhwesa, ŵakabendezganga chomene pakulongosora Dango la Mozesi ndipo ŵakagomezganga malango ghawo. Minthondwe iyo Yesu wakachitanga yikaŵawovwiranga chomene ŵanthu. Nangauli ŵanthu ŵakawovwirikanga kweniso chipulikano chawo chikakhozgekanga chifukwa cha minthondwe yira, kweni ku ŵalongozgi ŵara yikaŵa yambura ntchito. Kasi Yesu wakaŵawonanga wuli ŵanthu aŵa? Nyengo  yinyake wakaŵalaŵiska “mwakukwenyelera, wakaŵa na chitima chikuru chifukwa cha unonono wa mitima yawo.”—Mariko 3:5.

¹⁶ Mazuŵa ghano napo, Yesu wakuwona vinthu vinandi ivyo vikwenera kuti vikumuchitiska “chitima chikuru.” Ŵalongozgi ŵa visopa vya charu ŵabulumutizgika chifukwa cha kukoleska maluso na visambizgo ivyo vikususkana na Malemba. Kweniso ŵanthu aŵa ŵakukwiya para makani ghawemi gha Ufumu wa Chiuta ghakupharazgika. Mu vigaŵa vinandi pa charu chapasi, ŵalongozgi ŵa visopa ŵapangiska kuti Ŵakhristu awo ŵakuyezgayezga kupharazga uthenga uwo Yesu wakapharazganga ŵatambuzgike. (Yohane 16:2; Chivumbuzi 18:4, 24) Pa nyengo yeneyiyo pera, ŵalongozgi ŵa visopa aŵa kanandi ŵakukhuŵilizga awo ŵakuŵalondezga kuti ŵalutenge ku nkhondo na kukoma ŵanyawo, nga kuti para ŵachita nthena ndipo ŵakukondweska Yesu Khristu.

17. Kasi ŵalondezgi ŵanadi ŵa Yesu ŵakukondweska wuli mtima wake?

¹⁷ Mwakupambana na ŵanthu aŵa, ŵalondezgi ŵanadi ŵa Yesu ŵakuyezgayezga kutemwa ŵanji. Nga ni Yesu, ŵakuphalirako “ŵanthu ŵa mitundu yose” makani ghawemi, nangauli ŵakususkika. (1 Timote 2:4) Ndipo chitemwa icho ŵakulongorana ntchapadera chomene. Nakuti ndicho ntchimanyikwiro chawo chikuru. (Yohane 13:34, 35) Para ŵakuchita vinthu na Ŵakhristu ŵanyawo mwachitemwa ndiposo mwantchindi, ŵakulongora kuti ŵakulondezga nadi Yesu, ndipo ŵakukondweska mtima wa Themba ili.

18. Kasi Fumu yithu yikukwenyelera na vichi, ndipo ise tingayikondweska wuli?

¹⁸ Kweniso tikumbuke kuti Fumu yithu yikukwenyelera para ŵalondezgi ŵake ŵatondeka kuzizipizga, ŵaleka kutemwa Yehova na kumuteŵetera. (Chivumbuzi 2:4, 5) Ndipouli, Yesu wakukondwa na awo ŵakuzizipizga m’paka ku umaliro. (Mateyu 24:13) Mphanyi tayezgayezga kukumbuka dango la Khristu lakuti: “Lutilira kunilondezga.” (Yohane 21:19) Tiyeni tiwone vitumbiko vinyake ivyo Mesiya wazamupeleka ku awo ŵakuzizipizga m’paka ku umaliro.

19, 20. (a) Kasi munthu wangasanga vitumbiko wuli sono chifukwa cha kulondezga Yesu? (b) Kasi para tikulondezga Khristu tingakhorweska wuli khumbo lithu la kuŵa na “Dada Wamuyirayira”?

¹⁹ Ŵalondezgi ŵa Yesu ŵakutumbikika chomene nanga ni sono nthena. Usange tikuzomera Khristu kuŵa Fumu yithu, kulondezga ulongozgi wake na kutolera ivyo iyo wakachitanga, tisangenge usambazi uwo ŵanthu pa charu chose ŵakupenja kweni ŵakutondeka kuwusanga. Tiŵenge na mulimo wakukhorweska, tiŵenge mu mbumba ya Ŵakhristu ŵanyithu iyo njakukolerana kweniso kutemwana. Tiŵengeso na njuŵi yituŵa na mtende wa mu mtima. Mwakudumura, tiŵenge na umoyo wakukondweska, wakukhorweska, kweniso tisangenge vitumbiko vinyake vinandi.

²⁰ Yehova wapeleka Yesu kuŵa “Dada Wamuyirayira” ku awo ŵali na chigomezgo cha kuzakakhala kwamuyirayira pa charu chapasi. Yesu wali kunjira mu malo gha Adamu, dada uyo wali kunjizga ŵana ŵake wose mu suzgo. (Yesaya 9:6, 7) Chifukwa cha kuzomera kuti Yesu ni “Dada [withu] Wamuyirayira,” na kupulikana mwa iyo, tili na chigomezgo chose kuti tizamusanga umoyo wamuyirayira. Kweniso para tachita nthena tikusendelera chomene kwa Yehova Chiuta. Nga umo tasambilira, kuyezgayezga kulondezga Yesu zuŵa na zuŵa ni nthowa yiwemi chomene yakulongolera kuti tikulondezga dango lakuti: “Yezgani Chiuta.”—Ŵaefeso 5:1.

21. Kasi ŵalondezgi ŵa Khristu ŵakuŵaliska wuli ungweru mu charu cha chisi ichi?

²¹ Titumbikikenge chomene para nyengo zose tikuyezgayezga kulondezga Yesu kweniso Adada ŵake. Tikuŵaliska ungweru mu charu cha chisi ichi. Ŵanthu ŵanandi mu charu cha Satana ichi ŵakupuluskika na Satana ndipo ŵali mu chisi chikuru chomene. Kweni ise tikulondezga Khristu, tikuthandazga ungweru wa unenesko wa mu Malemba, uwo ukovwira ŵanthu kuti ŵaŵe na nkharo Yachikhristu, ŵachimwemwe, ŵamtende, kweniso kuti ŵalutilire kutemwana. Pa nyengo yeneyiyo pera,  tikusendelera kwa Yehova, ndipo ichi ndicho ntchilato chikuru cha chilengiwa chilichose chamahara.

22, 23. (a) Kasi ni vitumbiko wuli ivyo awo ŵakulutilira kulondezga Yesu mwakugomezgeka ŵazamusanga? (b) Kasi tikwenera kuŵikapo mtima kuchitachi?

²² Kweniso ghanaghanirani ivyo Yehova wakukhumba kuzakamuchitirani munthazi kwizira mwa Mesiya. Sonosono apa, Themba ili lizamurwa nkhondo yaurunji kwimikana na Satana. Ntchakumanyamanya kuti Yesu wazamutonda. (Chivumbuzi 19:11-15) Kufuma apo, Khristu wazamwamba kuwusa kwa Vyaka 1,000 pa charu chapasi. Boma lake lakuchanya ili, lizamupeleka vitumbiko vya sembe yakuwombora ku ŵanthu wose  ŵakugomezgeka, na kuŵawovwira kuŵa ŵakufikapo. Jitorani kuti namwe mulipo pa nyengo iyo, ndipo muli na umoyo wambura masuzgo, muli ŵawukirano, ndiposo mukukondwa kuteŵetera na ŵanyinu pakunozga charu chapasi kuŵa paradiso. Paumaliro wa Muwuso wa Vyaka 1,000, Yesu wazamuwezgera Ufumu kwa Adada ŵake. (1 Ŵakorinte 15:24) Usange mukulutilira kulondezga Khristu mwakugomezgeka, muzamutumbikika chomene. Muzamuŵa na “wanangwa wauchindami wa ŵana ŵa Chiuta.” (Ŵaroma 8:21) Tizamusangwaso na vitumbiko vyose ivyo Adamu na Eva ŵakataya. Pakuŵa ŵana ŵanalume na ŵanakazi ŵa Yehova pa charu chapasi, muzamufwatuka kwamuyirayira ku kabanga kalikose ka kwananga kwa Adamu. Nadi, “nyifwa yizamuŵakoso chara.”—Chivumbuzi 21:4.

²³ Kumbukani muwusi musambazi uyo tikadumbiskana mu mutu 1. Wakakana ntchemo ya Yesu yakuti: “Wize uŵe mulondezgi wane.” (Mariko 10:17-22) Imwe mungachitanga nthena yayi. Mphanyi mwazomera ntchemo ya Yesu mwachimwemwe kweniso na mtima wose. Mphanyi mwaŵikapo mtima kuzizipizga, kulutilira kulondezga Muliska Muwemi zuŵa na zuŵa, chaka na chaka, na kuzakawona kuti paumaliro wakufiska vilato vyose vya Yehova mwauchindami.