1-3. (a) Kasi Yesu wakasuzgika wuli maghanoghano mu munda wa Getisemane, ndipo chifukwa wuli? (b) Kasi tingayowoya vichi za kuzizipizga kwa Yesu, ndipo pakufumbika mafumbo wuli?

 VINTHU vikasuzga. Yesu wakaŵa kuti wandasuzgikepo nthena maghanoghano. Pa nyengo iyi, kukakhala maora ghachoko waka kuti wafwe. Iyo pamoza na ŵapositole ŵake ŵakaluta ku malo ghakuzgoŵereka, munda wa Getisemane. Kanandi ŵakatemwanga kuluta ku malo agha. Ndipouli, pa usiku wura Yesu wakakhumbanga kuŵa payekha. Wakaleka ŵapositole ŵake pa malo ghanyake, wakanjira mukati mwa munda, ndipo wakati wajikama wakamba kulomba. Wakalomba mwakufwilirapo chomene ndipo wakakweŵeka chomene mwakuti mavuchi ghake ghakaŵa “nga ni manthonyezi gha ndopa ghakunthonyera pasi.”—Luka 22:39-44.

² Chifukwa wuli Yesu wakasuzgika chomene maghanoghano? Nangauli wakamanyanga kuti kukakhala pachoko kuti wasuzgike chomene, kweni pakaŵaso chifukwa chinyake icho wakasuzgikira chomene maghanoghano. Pakaŵa nkhani zinyake zakuzirwa chomene izo wakaghanaghaniranga. Wakafipiranga chomene mtima zina la Adada ŵake kweniso wakamanyanga kuti umoyo wa munthazi wa ŵanthu ukathembanga pa kugomezgeka kwake. Yesu wakamanya kuti chikaŵa chakukhumbikwa chomene kuti wazizipizge. Para wangatondeka kuzizipizga, ndikuti zina la Yehova lilengeskekenge. Nakuti wakazizipizga nadi! Pa zuŵa lenelira, nyengo yichoko waka pambere wandamalizgike, Yesu uyo wakaŵa munthu wakuzizipizga chomene, wakachemerezga na lizgu likuru, wakati: “Chafiskika!”—Yohane 19:30.

³ Baibolo likutichiska kuti: “Ghanaghanirani chomene [Yesu] uyo wazizipizga.” (Ŵahebere 12:3) Ntheura, pangawuka mafumbo ghakuzirwa nga ghakuti: Kasi ni viyezgo wuli vinyake ivyo  Yesu wakazizipizga? kasi ni vinthu wuli ivyo vikamovwira kuzizipizga? Kasi ise tingamulondezga wuli? Pambere tindazgore mafumbo agha, tiyeni tisande ivyo vikukhumbikwa kuti munthu wazizipizge.

4, 5. (a) Kasi ‘kuzizipizga’ chikung’anamurachi? (b) Kasi tingayowoya chiyelezgero wuli chakulongora kuti kuzizipizga nkhukumana waka na masuzgo yayi?

⁴ Nyengo na nyengo, tose tikuchita “chitima chifukwa cha viyezgo vyakupambanapambana.” (1 Petrosi 1:6) Kasi kuyezgeka ndiko nkhuzizipizga? Yayi. Lizgu Lachigiriki ilo lilikung’anamurika kuti “kuzizipizga” likung’anamura “kuŵa wakukhora panji kukhomezga mu nyengo ya suzgo.” Pakuyowoya za lizgu la kuzizipizga, nkhwantha yinyake yakusanda Baibolo yikalongosora kuti: “Kuzizipizga nkhukhomezga, kusulako waka yayi, kweni na chigomezgo chakukhora. . . . Ni mukhaliro uwo ukovwira munthu kutchintha mu nyengo ya suzgo. Mukhaliro uwu ukuzgora chiyezgo chinonono chomene kuŵa uchindami chifukwa ukovwira munthu kuwona viwemi kunthazi kwa suzgo.”

⁵ Ntheura kuzizipizga nkhukumana waka na masuzgo yayi. Mwakuyana na Baibolo, kuzizipizga chikung’anamura kutchintha, kuŵa na maghanoghano ghawemi kweniso kuŵa na chigomezgo kuti vinthu viŵenge makora para tikuyezgeka. Wonani chiyelezgero ichi: Ŵanthu ŵaŵiri ŵajalirika mu jele, kweni pa vifukwa vyakupambana. Munyake ntchigeŵenga ndipo wakugwira jele mwakukwenyelera. Apo munyake ni Mkhristu ndipo wakakika chifukwa cha chipulikano chake, wakutchintha ndipo wali na maghanoghano ghawemi chifukwa wakuwona kuti kukakika kwake ni mwaŵi wa kulongolera chipulikano chake. Chigeŵenga tingati chikuzizipizga yayi, apo Mkhristu wakugomezgeka wakulongora kuti ngwakuzizipizga.—Yakobe 1:2-4.

6. Kasi tikusambira wuli kuzizipizga?

⁶ Kuzizipizga nkhwakukhumbikwa kuti tizakaponoskeke. (Mateyu 24:13) Ndipouli, kuzizipizga tikuchita kubabika nako  yayi, kweni tikuchita kusambira. Tingachita wuli? Lemba la Ŵaroma 5:3 likuti: “Suzgo yikubaba chizizipizgo.” Usange tikukhumba nadi kuŵa ŵakuzizipizga, tikwenera yayi kuchimbira masuzgo ghose chifukwa cha wofi. Kweni tikwenera kulimbana nagho. Tingaŵa ŵakuzizipizga usange zuŵa na zuŵa tikukumana na viyezgo na kulimbana navyo, kwali ni vikuru panji vichoko. Chiyezgo chilichose icho tingatonda chikutipa nkhongono kuti tizizipizge chakulondezgapo. Kweni patekha tingakwaniska yayi kuzizipizga. Tikuthemba “nkhongono izo Chiuta wakupeleka.” (1 Petrosi 4:11) Kuti tiŵe ŵakutchintha, Yehova watipa wovwiri ukuru chomene. Watipa Mwana wake uyo tingasambirako. Tiyeni tiwone umo Yesu wakazizipizgira mwakufikapo.

7, 8. Kasi Yesu wakazizipizga vichi apo umaliro wa umoyo wake pa charu chapasi ukaŵa pafupi?

⁷ Apo wakaŵa pafupi kufwa, Yesu wakazizipizga nkhaza zakupambanapambana. Padera pa kusuzgika maghanoghano pa usiku waumaliro wura, ghanaghanirani umo Yesu wakwenera kuti wakakhuŵalira ndiposo umo wakalengeskekera. Mubwezi wake wakamwendera mphiska, ŵabwezi ŵake ŵakamusida. Kweniso ŵakamutolera ku khoti ndipo wakeruzgika mwakupambana na dango. Apo wakaŵa ku khoti, ŵeruzgi ŵa khoti likuru lachisopa ŵakamunena, kumuthunyira mata na kumutimba na mafayiti. Ndipouli, wakazizipizga vyose ivi.—Mateyu 26:46-49, 56, 59-68.

⁸ Mu maora ghaumaliro gha umoyo wake, Yesu wakazizipizga vyakuŵinya vinandi chomene. Wakathyapulika, wakatimbika chomene mwakuti minofu yake yikalalawuka, ndipo ndopa zikafuma zinandi. Ŵakamupayika kuti wafwenge pachokopachoko uku wakupulika vyakuŵinya vikuru. Ghanaghanirani waka umo wakapulikira vyakuŵinya apo ŵakamukhomanga pa khuni na mizumali yikuruyikuru mu mawoko na malundi. (Yohane 19:1, 16-18) Kweniso ghanaghanirani umo wakanyongozekeranga na urwirwi apo ŵakimikanga khuni lira, uku uzito wa  thupi lake ukupangiska kuti vilonda vya mizumali visazgikirengeko ndipo msana wake wavikomokomo ukukwentha ku khuni. Nakuti apo wakazizipizganga vyakuŵinya ivi, wakaŵa kuti wakusuzgika kale maghanoghano na vinthu ivyo vyayowoyeka kukwambilira kwa mutu uwu.

9. Kasi kunyamura “khuni lakusuzgikirapo” na kulondezga Yesu chikung’anamurachi?

⁹ Kasi ŵalondezgi ŵa Khristu nawo ŵangazizipizga vinthu wuli? Yesu wakati: “Usange munthu wakukhumba kunilondezga, . . . [wanyamure] khuni lake lakusuzgikirapo ndipo walutilire kunilondezga.” (Mateyu 16:24) Apa, mazgu ghakuti “khuni lakusuzgikirapo” ghakwimira kusuzgika, kulengeskeka, panji nyifwa. Kulondezga Khristu ntchipusu yayi. Chifukwa cha fundo za Chikhristu izo tikulondezga tikupambana na charu. Charu ichi chikutitinkha chifukwa tili ku chigaŵa chake chara. (Yohane 15:18-20; 1 Petrosi 4:4) Ndipouli, tili ŵakunozgeka kunyamura khuni lithu lakusuzgikirapo, enya, tili ŵakunozgeka kusuzgika, nanga nkhufwa, m’malo mwa kuleka kulondezga Mulongozgi withu.—2 Timote 3:12.

10-12. (a) Chifukwa wuli maubudi gha awo wakakhalanga nawo chikaŵa chiyezgo kwa Yesu? (b) Kasi ni vinthu wuli vinyake ivyo Yesu wakazizipizga?

¹⁰ Apo wakaŵa pa charu chapasi, Yesu wakakumana na viyezgo vinyake ivyo vikiza chifukwa cha maubudi gha awo wakakhalanga nawo. Kumbukani kuti wakaŵa “misiri,” uyo Yehova wakamugwiliskira ntchito pakulenga charu chapasi na vyamoyo vyose ivyo vilimo. (Zintharika 8:22-31) Ntheura Yesu wakamanyanga ivyo Yehova wakakhumbanga kuti ŵanthu ŵachitenge. Ŵanthu ŵakeneranga kulongora mikhaliro yake na kusangwa na umoyo wakufikapo. (Genizesi 1:26-28) Apo Yesu wakaŵa pa charu chapasi, uheni wa kwananga wakawuwona munthowa yinyake. Nayo wakaŵa munthu, ndipo wakasangananga na masuzgo nga umo vikuŵira na ŵanthu wose. Vikwenera kuti vikamuŵinya chomene kuwona kuti ŵanthu ŵakaŵa ŵakupeleŵera chomene pa umoyo wakufikapo uwo Adamu na Eva ŵakaŵa nawo pakwamba. Ntheura chikaŵa chiyezgo chakuti  Yesu wazizipizge. Kasi wakagongowa na kuleka? Panji wakamba kughanaghana kuti ŵanthu ŵakwananga palijirethu chiwemi icho ŵangachita? Tiyeni tiwone.

¹¹ Yesu wakakwenyelera chomene na unonono mtima wa Ŵayuda mwakuti wakalira. Kasi ivi vikamuwezgera nyuma panji kumulekeska kupharazga? Yayi, kweni “wakasambizganga zuŵa lililose mu tempile.” (Luka 19:41-44, 47) Wakaŵa na “chitima chikuru” chifukwa cha unonono mtima wa Ŵafarisi awo ŵakamulaŵisiskanga kuti ŵawone usange wachizgenge munthu munyake pa Sabata. Kasi wakazomerezga kuti ŵanthu awo ŵakajiwonanga kuti mbarunji ŵara ŵamofye? Yayi. Wakasunkhunyika yayi ndipo wakachizga munthu yura, nakuti wakamuchizgira mwenemura mu sunagoge.—Mariko 3:1-5.

¹² Chinthu chinyake icho chikwenera kuti chikaŵa chiyezgo kwa Yesu ni maubudi gha ŵasambiri ŵake. Nga umo tikasambilira mu mutu 3, ŵasambiri ŵakalongora kuti ŵakakhumbanga  chomene malo ghapachanya. (Mateyu 20:20-24; Luka 9:46) Yesu wakaŵawovwira kanandi waka kuti ŵaŵe ŵakujiyuyura. (Mateyu 18:1-6; 20:25-28) Ndipouli, ŵakachedwanga kusambira. Nakuti pa usiku wake waumaliro, ŵasambiri ŵakapindana “chomene” pa nkhani ya uyo wakaŵa mukuru pakati pawo. (Luka 22:24) Kasi Yesu wakaŵaleka waka, kughanaghana kuti ŵangasintha yayi? Yayi. Wakazikira nawo, wakawonamo waka viwemi mwa iwo na kugomezga kuti ŵachitenge makora. Wakamanya kuti ŵakamutemwanga Yehova ndipo ŵakakhumbanga nadi kuchita khumbo lake.—Luka 22:25-27.

13. Kasi tingakumana na viyezgo wuli vyakuyana na ivyo Yesu wakazizipizga?

¹³ Nase tingakumana na viyezgo vyakuyana na ivyo Yesu wakazizipizga. Mwachiyelezgero, tingakumana na ŵanthu awo ŵakuŵikako mahara yayi ku uthenga wa Ufumu panji awo ŵakutisuska. Kasi tizomerezgenge vinthu ivi kuti vitigongoweske, panji tilutilirenge kupharazga mwamwamphu? (Tito 2:14) Tingayezgeka na maubudi gha ŵabali ŵithu ŵauzimu. Tingakhuŵara na mazgu ghawakawaka panji vyakuchita vyambura kwenelera. (Zintharika 12:18) Kasi tiŵazerezgenge waka Ŵakhristu ŵanyithu chifukwa cha maubudi ghawo, panji tilutilirenge kuŵazizipizgira na kuwonamo waka viwemi mwa iwo?—Ŵakolose 3:13.

14. Kasi ni vinthu wuli viŵiri ivyo vikawovwira Yesu kuŵa wakukhora?

¹⁴ Kasi ni vinthu wuli ivyo vikawovwira Yesu kuŵa wakukhora na kulutilira kugomezgeka nangauli ŵanthu ŵakamulengeska, kumukhuŵazga, kweniso kumusuzga? Pali vinthu viŵiri vyapadera ivyo vikamovwira. Chakwamba, wakagomezganga wovwiri wa kuchanya, kulomba ‘Chiuta uyo wakutipa nkhongono zakuzizipizgira.’ (Ŵaroma 15:5) Chachiŵiri, Yesu wakaghanaghaniranga ivyo vikaŵa munthazi, wakaŵika mtima pa ivyo wazamusanga para wazizipizga. Tiyeni tiwone vinthu ivi chimozachimoza.

15, 16. (a) Ntchivichi chikulongora kuti Yesu wakagomezganga nkhongono zake yayi pakuzizipizga? (b) Kasi Yesu wakaŵa na chigomezgo wuli mwa Adada ŵake, ndipo chifukwa wuli?

 ¹⁵ Nangauli Yesu wakaŵa Mwana wakufikapo wa Chiuta, kweni wakagomezganga nkhongono zake yayi kuti ndizo zingamovwira kuzizipizga. M’malo mwake, wakalombanga Adada ŵake ŵakuchanya kuti ŵamovwire. Mpositole Paulosi wakalemba kuti: “Khristu wakaŵeyelera na kulomba, pamoza na kulira chomene na masozi, kwa Uyo wakaŵa na nkhongono zakumuponoska ku nyifwa.” (Ŵahebere 5:7) Wonani kuti Yesu “wakaŵeyelera na kulomba.” Lizgu lakuti ‘kuŵeyelera’ likung’anamura kulomba mwakufwilirapo kufumira pasi pa mtima, enya, kupempha wovwiri. Ntheura lizgu lakuti “maŵeyelero” likulongora kuti Yesu wakapempha wovwiri kwa Yehova kanandi waka. Nadi, mu munda wa Getisemane, Yesu wakalomba mwakuwerezgawerezga kweniso mwakufwilirapo.—Mateyu 26:36-44.

¹⁶ Yesu wakaŵa na chigomezgo chose kuti Yehova wazgorenge maŵeyelero ghake, pakuti wakamanyanga kuti Adada ŵake “ŵakupulika malurombo.” (Salimo 65:2) Pambere wandize pa charu chapasi, Mwana wakwamba uyu wakawonanga umo Adada ŵake ŵakazgoleranga malurombo gha ŵasopi ŵakugomezgeka. Mwachiyelezgero, Mwana uyu wakaŵako kuchanya apo Yehova wakatuma mungelo kuti wazakazgore lurombo lwakufumira pasi pa mtima lwa ntchimi Daniyeli, pambere ntchimi iyi yindamare kulomba. (Daniyeli 9:20, 21) Ntheura, kasi Dada wangatondeka wuli kupulika malurombo gha Mwana wake wapadera yekha, agho ghakapelekeka “pamoza na kulira chomene na masozi”? Yehova wakazgora nadi maŵeyelero gha Mwana wake ndipo wakatuma mungelo kuzakamukhozga kuti wazizipizge masuzgo.—Luka 22:43.

17. Chifukwa wuli tikwenera kugomezga wovwiri wa kuchanya kuti tizizipizge, ndipo tingachita wuli nthena?

¹⁷ Kuti tizizipizge, nase tikwenera kugomezga wovwiri wa kuchanya, wa Chiuta ‘uyo wakupeleka nkhongono.’ (Ŵafilipi 4:13) Usange Mwana wakufikapo wa Chiuta ndiyo wakaŵeyeleranga Yehova kuti wamovwire, kuli wuli ise? Nga ni Yesu,  tingakhumbikwira kuŵeyelera Yehova mwakuwerezgawerezga. (Mateyu 7:7) Nangauli tikukhazga yayi kuti mungelo wizenge kuzakatikhozga, kweni tikugomezga kuti Chiuta withu wachitemwa wazgorenge malurombo gha Ŵakhristu ŵakugomezgeka awo ŵakukosera “mu maŵeyelero na malurombo usiku na muhanya.” (1 Timote 5:5) Nanga tingakumana na viyezgo wuli, kwali mbulwari, nyifwa ya wakutemweka withu, panji nthambuzgo, Yehova watizgorenge para tikumulomba kufumira pasi pa mtima kuti watipe vinjeru, chikanga, kweniso nkhongono kuti tizizipizge.—2 Ŵakorinte 4:7-11; Yakobe 1:5.

18. Kasi Yesu wakawonanga vichi munthazi?

¹⁸ Chinthu chachiŵiri icho chikawovwira Yesu kuzizipizga ntchakuti wakaghanaghaniranga ivyo vikaŵa munthazi. Pakuyowoya za Yesu, Baibolo likuti: “Chifukwa cha chimwemwe icho chikaŵikika panthazi pake, wakazizipizga khuni lakusuzgikirapo.” (Ŵahebere 12:2) Ivyo Yesu wakachita vikulongora umo chigomezgo, chimwemwe, na kuzizipizga vikugwilira ntchito lumoza. Panji mwakudumura tingayowoya kuti: Chigomezgo chikutovwira kuti tiŵe na chimwemwe, ndipo chimwemwe chikutovwira kuti tizizipizge. (Ŵaroma 15:13; Ŵakolose 1:11) Yesu wakalindiliranga vinthu vyapadera. Wakamanya kuti para wagomezgeka wachindikenge muwuso wa Adada ŵake ndipo vimovwirenge kuti wawombore mtundu wa ŵanthu ku kwananga na nyifwa. Kweniso Yesu wakaŵa na chigomezgo cha kuzakawusa nga ni Themba ndiposo Wasembe  Mukuru, kupeleka vitumbiko vinyake vinandi ku ŵanthu ŵakupulikira. (Mateyu 20:28; Ŵahebere 7:23-26) Pakughanaghanira chigomezgo icho chikaŵa panthazi pake, Yesu wakaŵa na chimwemwe chikuru, ndipo chimwemwe ichi chikamovwira kuzizipizga.

19. Para chipulikano chithu chikuyezgeka, kasi tingazomerezga wuli chigomezgo, chimwemwe, na chizizipizgo kugwilira lumoza ntchito?

¹⁹ Nga ni Yesu, nase tikwenera kuzomerezga kuti chigomezgo, chimwemwe, na chizizipizgo vigwilire lumoza ntchito. Mpositole Paulosi wakayowoya kuti: “Sekelerani mu chigomezgo.” Ndipo wakayowoyaso kuti: “Zizipizgani mu suzgo.” (Ŵaroma 12:12) Kasi pasono chipulikano chinu chikuyezgeka? Mulimose umo vingaŵira, laŵiskani kunthazi. Kuluwa yayi kuti para mwazizipizga mupelekenge malumbo ku zina la Yehova. Ŵikani mtima pa chigomezgo cha Ufumu. Jitorani nga muli mu charu chiphya cha Chiuta, ndipo mwapokera vitumbiko vyose mu Paradiso. Apo mukulindilira vinthu viwemi ivyo Yehova walayizga kuti vizakafiskike, nga nkhuchindikika kwa muwuso wake, kufumiskikapo kwa uheni pa charu chapasi, kweniso matenda na nyifwa, muŵenge na chimwemwe, ndipo chimwemwe ichi chimovwiraninge kuti muzizipizge viyezgo vya mtundu uliwose. Para tikuwona vitumbiko ivyo tizamusanga mu Ufumu wa Chiuta, mbwenu tiwonenge kuti suzgo yiliyose iyo tikukumana nayo “nja kanyengo na yakupepuka.”—2 Ŵakorinte 4:17.

20, 21. Pa nkhani ya kuzizipizga, kasi Yehova wakukhazga vichi kwa ise, ndipo tikwenera kuŵikapo mtima kuchitachi?

²⁰ Yesu wakamanya kuti kuŵa mulondezgi wake chiŵenge chipusu yayi. Pakukhumbikwira kuzizipizga. (Yohane 15:20) Wakaŵa wakunozgeka kuŵalongozga ŵasambiri ŵake, pakumanya kuti ivyo iyo wakachitanga viŵakhozgenge. (Yohane 16:33) Unenesko ngwakuti Yesu wakaŵa wakufikapo, apo ise tili ŵambura kufikapo. Kasi Yehova wakukhazga vichi kwa ise? Petrosi wakalongosora kuti: “Khristu wakasuzgika chifukwa cha  imwe, wali kumulekerani chakuwonerapo kuti mulondezgenge mendero ghake mwakugomezgeka.” (1 Petrosi 2:21) Umo Yesu wakachitira na viyezgo, ‘ntchakuwonerapo,’ panji chinthu chakuti titolereko. a Lumbiri lwake lwa kuzizipizga tingaluyaniska na “mendero,” panji apo lundi lakanda. Tingalondezga fikepo yayi mendero agha, kweni tingaghalondezga “mwakugomezgeka.”

²¹ Ntheura, tiyeni tiŵikepo mtima pakulondezga ivyo Yesu wakachitanga mwakuyana na umo tingafiskira. Tingaluwanga yayi kuti para tikulondezga mendero gha Yesu mwakugomezgeka, tiŵenge ŵakukwana nkhanira kuti tizizipizge “mpaka kuumaliro,” ndiko kuti, umaliro wa mgonezi uwu panji umaliro wa umoyo withu. Tikumanya yayi icho chambenge kwiza, kweni tikumanya fundo yakuti: Yehova wazamutipa njombe yamuyirayira para tikuzizipizga.—Mateyu 24:13.