1, 2. (a) Chifukwa wuli ŵalinda awo ŵakatumika kuti ŵakakore Yesu ŵakawerako mawoko ghawaka? (b) Chifukwa wuli Yesu wakaŵa msambizgi waluso?

 ŴAFARISI ŵakakwiya chomene. Yesu wakaŵa mu tempile, wakasambizganga vya Adada ŵake. Awo ŵakamupulikizganga ŵakagaŵikana; ŵanandi ŵakapulikana mwa Yesu, kweni ŵanyake ŵakakhumbanga kuti wakakike. Ŵati ŵatondeka kujikora, ŵalongozgi ŵa chisopa aŵa ŵakatuma ŵalinda kuti ŵakakake Yesu. Ndipouli, ŵalinda ŵara ŵakawerako mawoko ghawaka. Ŵalara ŵa ŵasembe na Ŵafarisi ŵakakhumba kumanya chifukwa chake, ŵakafumba kuti: “Chifukwa wuli mundize nayo?” Ŵalinda ŵakazgora kuti: “Palije munthu uyo wali kuyowoyapo nthena.” Ŵakatoleka mtima chomene na visambizgo vya Yesu mwakuti ŵakaŵavya nkhongono zakumukakira. a—Yohane 7:45, 46.

² Mbalinda pera yayi awo ŵakatoleka mtima na umo Yesu wakasambizgiranga. Ŵanthu ŵanandi ŵakawungananga kuti ŵamupulike para wakusambizga. (Mariko 3:7, 9; 4:1; Luka 5:1-3) Chifukwa wuli Yesu wakaŵa msambizgi waluso nthena? Nga umo tikawonera mu Mutu 8, iyo wakatemwanga unenesko uwo wakapharazganga, ndiposo wakatemwanga ŵanthu awo wakaŵasambizganga. Kweniso wakaŵa na nthowa zakusambizgira mwaluso. Tiyeni tiwonepo nthowa zitatu izo wakasambizgiranga kweniso umo ise tingazilondezgera.

3, 4. (a) Chifukwa wuli Yesu wakayowoyanga mazgu ghapusu pakusambizga? (b) Kasi Upharazgi wa pa Phiri ukulongora wuli kuti Yesu wakasambizganga mu nthowa yipusu?

³ Pakuti Yesu wakaŵa wa vinjeru chomene, wakhumbenge  mphanyi wakayowoyanga mazgu ghanonono chomene. Ndipouli, pakusambizga, wakayowoyanga vinthu vinonono yayi ku ŵategherezgi ŵake, awo ŵanandi ŵakaŵa “ŵambura kusambira ndiposo ŵanthu bweka.” (Milimo 4:13) Wakaghanaghaniranga umo ŵasambiri ŵakaŵira, wakakhumba yayi kuŵasambizga vinthu vinandinandi pa nyengo yimoza. (Yohane 16:12) Nangauli wakayowoyanga mazgu ghapusu, kweni ivyo wakasambizganga vikaŵa vyakuzirwa chomene.

⁴ Mwachiyelezgero, ghanaghanirani za Upharazgi wa pa Phiri uwo uli kulembeka pa Mateyu 5:3–7:27. Pa upharazgi uwu, Yesu wakayowoya fundo izo zikaŵafika chomene pamtima ŵategherezgi ŵake, wakayowoyanga icho chikwambiska suzgo. Wakayowoyapo yayi fundo panji mazgu ghanonono. Wakayowoyanga mazgu agho na ŵana wuwo ŵakaghapulikiskanga kwambura kusuzga. Ntheura ntchakuzizika yayi kuti Yesu wakati wamara kuyowoya, mizinda, iyo pakwenera kuti pakaŵa ŵalimi, ŵaliska, na ŵalovi, “yikazizikika na kasambizgiro kake.”—Mateyu 7:28.

5. Zunurani ghanyake mwa mazgu agho Yesu wakayowoya agho ghakaŵa ghapusu kweni ghakaŵa na ng’anamuro likuru.

⁵ Pakusambizga, kanandi Yesu wakayowoyanga mazgu ghapusu, na ghafupi agho ghakaŵanga na ng’anamuro likuru. Pakuti nyengo yira mabuku ghakaŵa kuti ghandambe kusindikizgika, iyo wakayowoyanga uthenga wake mu nthowa yakuti uleke kufumamo mu maghanoghano gha ŵategherezgi ŵake. Wonani viyelezgero vinyake ivi: “Lekani kweruzga kuti muleke kweruzgika.” “Ŵanthu awo ŵali makora ŵakukhumbikwira dokotala chara, kweni ŵalwari ndiwo.” “Mzimu ngwakukhumbisiska nadi, kweni thupi ndakulopwa.” “Pelekani vinthu vya Kesare kwa Kesare, ndipo vya Chiuta kwa Chiuta.” “Uyo wakupeleka wakukondwa chomene kuluska uyo wakupokera.” b (Mateyu 7:1; 9:12; 26:41; Mariko 12:17; Milimo 20:35) Nangauli  pajumpha vyaka pafupifupi 2,000 kufuma apo mazgu agha ghakayowoyekera, kweni ghakuluwika yayi m’paka sono.

6, 7. (a) Chifukwa wuli ntchakuzirwa kuti tiyowoyenge mazgu ghapusu para tikusambizga? (b) Kasi tingachita wuli kuti tileke kukhapizga msambiri wa Baibolo na fundo zinandinandi pa nyengo yimoza?

⁶ Kasi ise tingasambizga wuli mu nthowa yipusu? Tiyowoyenge mazgu ghapusu agho ŵanthu ŵangapulika luŵiro. Unenesko wa mu Mazgu gha Chiuta ngunonono yayi. Yehova wavumbura vilato vyake ku awo ŵali na mitima yiwemi ndiposo ŵakujiyuyura. (1 Ŵakorinte 1:26-28) Para tasankha mazgu ghapusu viwovwirenge kuti ŵanthu ŵapulikiske makora chomene unenesko wa Mazgu gha Chiuta.

⁷ Kuti tisambizge mu nthowa yipusu, tikwenera kuchenjera kuti tileke kukhapizga msambiri wa Baibolo na fundo zinandinandi pa nyengo yimoza. Ntheura, para tikuchitiska sambiro la Baibolo, tikwenera kulongosora kalikose yayi; ndipo ntchakukhumbikwa yayi kuchimbilira pakusambizga nga ni para kumalizga ndime zinandi ndicho ntchinthu chakuzirwa. M’malo mwake, ntchamahara kuchita sambiro mwakuyana na ivyo vikukhumbikwa kwa msambiri ndiposo umo wakupulikiskira. Chilato chithu nkhovwira msambiri kuŵa mulondezgi wa Khristu kweniso kuti wasopenge Yehova. Pa chifukwa ichi, tikwenera  kuchimbilira yayi para tikusambizga msambiri withu kuti wapulikiske ivyo wakusambira. Para tachita nthena ndipo wangamanya makora unenesko wa mu Baibolo na kulondezga ivyo wakusambira.—Ŵaroma 12:2.

8, 9. (a) Chifukwa wuli Yesu wakafumbanga mafumbo? (b) Kasi Yesu wakafumba wuli mafumbo kuti wamovwire Petrosi kufika pa zgoro lakwenelera pa nkhani ya kupeleka msonkho?

⁸ Yesu wakatemwanga chomene kufumba mafumbo, nanga mphakuti wangaŵaphalira waka fundo ŵategherezgi ŵake. Chifukwa wuli wakatemwanga kufumba mafumbo? Nyengo zinyake, wakafumbanga mafumbo kuti wavumbure maghanoghano ghakubudika gha awo ŵakamususkanga, ndipo para wachita nthena ŵakalekanga kumususka. (Mateyu 21:23-27; 22:41-46) Ndipouli, kanandi wakafumbanga mafumbo kuti ŵasambiri ŵake ŵayowoye ivyo ŵakaghanaghananga ndiposo kuti waŵasambizge kuti ŵaghanaghanirengepo. Ntheura, wakafumbanga mafumbo nga ni agha, “Imwe mukughanaghana wuli?” na “Kasi ukugomezga ichi?” (Mateyu 18:12; Yohane 11:26) Ivi vikawovwiranga kuti waŵafike pamtima ŵasambiri ŵake. Wonani chiyelezgero ichi.

⁹ Zuŵa linyake ŵakusonkheska msonkho ŵakafumba Petrosi usange Yesu wakapelekanga msonkho wa pa tempile. c Petrosi wakazgora kwambura kughanaghanirapo dankha, wakati: “Enya.” Pamanyuma, Yesu wakamufumba kuti: “Ukughanaghana wuli Simoni? Kasi mathemba gha charu chapasi ghakupokera kwa njani muthulo panji msonkho? Ku ŵana ŵawo panji ŵalendo?” Petrosi wakazgora kuti: “Ku ŵalendo.” Yesu wakati: “Nadi, ŵana ŵakusonkha chara msonkho.” (Mateyu 17:24-27) Petrosi wakwenera kuti wakapulikiska fundo ya mafumbo agha, chifukwa ŵa mu mbumba  ya mathemba ŵakasonkhanga yayi msonkho. Ntheura, Yesu wakeneranga yayi kupeleka msonkho, chifukwa wakaŵa Mwana wapadera yekha wa Themba lakuchanya, ilo ŵakalisopanga pa tempile. Wonani kuti m’malo mwa kumuphalira waka Petrosi zgoro lakwenelera, Yesu wakafumba mafumbo mwaluso kuti wamovwire Petrosi kusanga zgoro lakwenelera kweniso kuti panyake Petrosi wamanyenge kuti ntchakuzirwa chomene kughanaghanirapo dankha pambere wandazgore.

10. Kasi tingafumba wuli mafumbo mwaluso para tikupharazga ku nyumba na nyumba?

¹⁰ Kasi tingafumba wuli mafumbo mwaluso para tili mu uteŵeti? Para tikupharazga nyumba na nyumba, tingafumba mafumbo kuti ŵanthu ŵanweke na ivyo tikuyowoya, panji kujura nthowa kuti tiŵaphalireko makani ghawemi. Mwachiyelezgero, usange tasanga munthu muchekuru pa nyumba, tingamufumba mwantchindi fumbo lakuti, “Kasi mukuwona kuti charu chasintha wuli mu umoyo winu?” Para wazgora, tingafumbaso kuti, “Kasi mukughanaghana kuti chikukhumbikwa ntchivichi kuti charu ichi chiŵe malo ghawemi ghakukhalapo?” (Mateyu 6:9, 10) Usange tasanga mama uyo wali na ŵana ŵachokoŵachoko, tingamufumba kuti, “Kasi muli kughanaghanirapo umo charu chizamuŵira para ŵana ŵinu aŵa ŵakura?” (Salimo 37:10, 11) Usange tikuwoneseska para tikufika pa nyumba ya munthu, tingafumba fumbo ilo lingakolerana na ivyo mwenekonyumba wakutemwa.

11. Kasi tingafumba wuli mafumbo mwaluso para tikuchitiska sambiro la Baibolo?

¹¹ Kasi tingafumba wuli mafumbo mwaluso para tikuchitiska sambiro la Baibolo? Para tasankha makora mafumbo tingamanya  ivyo vili mu mtima wa msambiri. (Zintharika 20:5) Mwachiyelezgero, Jitorani kuti mukusambira na munthu sambiro 43, mu buku la “Mungakondwa na Umoyo Kwamuyirayira!” d ilo likuti “Kasi Ŵakhristu Ŵakwenera Kuwuwona Wuli Moŵa?” Sambiro ili likulongosora umo Yehova wakuwonera uloŵevu. Mazgoro gha msambiri ghangalongora kuti wakupulikiska ivyo Baibolo likusambizga, kweni kasi wakukolerana navyo ivyo wakusambira? Tingamufumba kuti, “Kasi umo Chiuta wakuwonera nkhani izi, imwe mukuti navyo wuli? Kasi mungalondezga wuli fundo iyi mu umoyo winu?” Kweni kumbukani kuti ntchakukhumbikwa kuŵa ŵaluso, na kumupa ntchindi msambiri. Tikukhumba yayi kufumba mafumbo agho ghangamulengeska.—Zintharika 12:18.

12-14. (a) Kasi Yesu wakawovwiranga wuli ŵanthu kuti ŵafikenge pa iyo ni fundo yeneko? (b) Kasi Yesu wakamarana nawo wuli Ŵafarisi awo ŵakatenge nkhongono zake zikufuma kwa Satana?

¹² Pakuti wakaŵa na maghanoghano ghakufikapo, Yesu wakaŵa na luso pakudumbiskana na ŵanthu. Nyengo zinyake, wakayowoyanga fundo zakukhorweska kuti wasuske mautesi gha awo ŵakamususkanga. Kanandi, wakayowoyanga fundo zakukopa kuti wasambizge ŵalondezgi ŵake vinthu vyakuzirwa. Tiyeni tiwone umo wakachitira.

¹³ Yesu wati wachizga munthu wakukoleka na viŵanda uyo wakaŵa wachibulumutira ndiposo wambura kuyowoya, Ŵafarisi ŵakati: “Munthu uyu wakufumiska viŵanda payekha chara, kweni na nkhongono za Belezebule [Satana] fumu ya viŵanda.” Ichi chikulongora kuti ŵakamanyanga kuti pakukhumbikwa nkhongono yapadera kuti munthu wafumiske viŵanda. Ndipouli, ŵakatenge nkhongono za Yesu zikafumanga kwa Satana. Fundo iyi yikaŵa yautesi kweniso yambura kupulikikwa. Pakuvumbura utesi wawo, Yesu wakati: “Ufumu uliwose uwo ukugaŵikana ukupasuka, ndipo msumba panji nyumba yiliyose iyo yikugaŵikana yiyimenge chara. Mwakuyana waka, usange  Satana wakufumiska Satana, ndikuti wagaŵikana. Kasi ufumu wake ungima wuli?” (Mateyu 12:22-26) Apa Yesu wakaŵa nga ni para wakuyowoya kuti: “Usange ine nili kutumika na Satana, kuparanya ivyo Satana wakachita, mbwenu ndikuti Satana wakujiwukira yekha ndipo wawenge.” Kasi ŵakate ŵasuskenge wuli fundo yakukhorweska iyi?

¹⁴ Yesu wakaŵa kuti wandamare kudumbiskana nawo. Wakamanyanga kuti ŵasambiri ŵanyake ŵa Ŵafarisi nawo ŵakafumiskanga viŵanda, ntheura wakaŵafumba fumbo lipusu kweni lankhongono, lakuti: “Usange ine nkhufumiska viŵanda na nkhongono za Belezebule, kasi ŵana [panji kuti ŵasambiri] ŵinu ŵakuvifumiska na nkhongono za njani?” (Mateyu 12:27) Fundo ya Yesu apa yikaŵa yakuti: “Usange ine nkhufumiska viŵanda na nkhongono ya Satana, ipo ŵasambiri ŵinu nawo ŵakuvifumiska na nkhongono yeneyiyi.” Kasi Ŵafarisi ŵakaŵa na chakuyowoya? Ŵakaŵa ŵakuti ŵangazomerezga yayi kuti ŵasambiri ŵawo ŵakafumiskanga viŵanda mu nkhongono ya Satana. Ntheura kwizira mu maghanoghano ghawo ghakubudika, Yesu wakaŵachichizga kuti ŵafike pa zgoro ilo likaŵakondweska yayi. Kasi ntchakukondweska yayi kuŵazga umo Yesu wakadumbiskirana nawo? Kweni ghanaghanirani umo mizinda iyo yikapulikizganga kwa Yesu yikajipulikiranga. Ntchakukayikiska yayi kuti mazgu ghake ghakaŵa na nkhongono chomene kwa iwo chifukwa chakuti ŵakamuwonanga na kumupulika wakuyowoya nawo maso na maso.

15-17. Yowoyani chiyelezgero cha umo Yesu wakayowoyeranga mazgu ghakuti “ipo kuli wuli” pakukhumba kusambizga unenesko wakukhwaskana na Adada ŵake.

¹⁵ Kweniso, Yesu wakayowoyanga mwakukhorweska ndiposo mwakukopa kuti wasambizge unenesko wakukondweska wakukhwaskana na Adada ŵake. Kanandi wakachitanga nthena mwakuyowoya mazgu ghakuti “ipo kuli wuli,” kuti wawovwire ŵategherezgi ŵake kupulikiska ndiposo kukhorwa na fundo iyo ŵakayimanyanga kale. Kayowoyero kanthena kakukhorweska chomene ŵategherezgi. Tiyeni tiwonepo viyelezgero viŵiri.

¹⁶ Pakuzgora pempho la ŵasambiri ŵake lakuti waŵasambizge kulomba, Yesu wakalongosora umo ŵapapi ŵambura kufikapo  ŵakuchitira pa “kupeleka vyawanangwa viwemi” ku ŵana ŵawo. Kufuma apo, wakamalizga kuti: “Usange imwe, nangauli muli ŵaheni, mukumanya kupeleka vyawanangwa viwemi ku ŵana ŵinu, ipo kuli wuli Adada ŵakuchanya? Asi ŵapelekenge mzimu utuŵa ku awo ŵakuŵalomba?” (Luka 11:1-13) Apa Yesu wakapambaniska vinthu viŵiri. Usange ŵapapi awo mbakwananga ŵakupwelelera ŵana ŵawo, ipo Adada ŵithu ŵakuchanya, awo mbakufikapo na ŵarunji mu vyose, ŵangaleka yayi kupeleka mzimu utuŵa ku awo ŵakuŵasopa mwakugomezgeka na kuŵalomba mwakujiyuyura.

¹⁷ Yesu wakayowoyaso fundo yanthena iyi apo wakapelekanga ulongozgi pa umo tingachitira na vinthu ivyo tikwenjerwa navyo. Iyo wakati: “Wonani ŵachaholi: Ŵakuseŵa chara nesi kuvuna, ndipo ŵalije nthamba nesi pakulonga, ndipouli, Chiuta wakuŵalyeska. Asi imwe muli ŵakuzirwa chomene kuluska viyuni?” “Wonani umo maluŵa ghakukulira: Ghakugwira ntchito chara nesi kupanga salu. . . . Sono usange ndimo Chiuta wakuvwalikira vyakumera vyamuthengere, ivyo muhanya uno vilipo ndipo namachero vikuponyeka pa moto, asi wavwalikenge chomene imwe, imwe ŵachipulikano chichoko?” (Luka 12:24, 27, 28) Usange Yehova wakupwelelera viyuni na maluŵa, ipo ŵanthu awo ŵakumutemwa na kumusopa ndiwo waŵapwelelerenge chomene. Tikukayika yayi kuti Yesu wakaŵafikanga pamtima ŵategherezgi ŵake na umo wakayowoyeranga.

18, 19. Kasi tingadumbiskana wuli na munthu uyo wakuti wakugomezga yayi kuti kuli Chiuta chifukwa wandamuwonepo?

¹⁸ Para tili mu uteŵeti, tikukhumba kuti tiyowoyenge fundo zakukhorweska kuti tisuske vigomezgo vyautesi. Kweniso tikukhumba kuyowoya fundo zakukopa pakusambizga unenesko wakuzirwa wakukhwaskana na Yehova. (Milimo 19:8; 28:23, 24) Kasi fundo zakukhorweska zikwenera kuŵa zakuzizika? Yayi. Fundo iyo tikusambirako kwa Yesu njakuti tikwenera kuyowoya munthowa yipusu kuti tiŵafike pamtima ŵategherezgi ŵithu.

¹⁹ Mwachiyelezgero, kasi tingamuzgora wuli munthu uyo wakuyowoya kuti wakugomezga yayi kuti kuli Chiuta chifukwa  wandamuwonepo? Tingadumba nayo kuti kulije chinthu icho chili kuŵako chekha. Para tawona chinthu chinyake, tikumanya kuti pali munyake uyo wakachipanga. Tingayowoya kuti: “Usange mwaluta kuthondo, ndipo mwawona nyumba yakuzengeka makora iyo muli kuzura vyakurya, kasi mungazomerezga yayi kuti pakwenera kuŵa munthu munyake uyo wali kuzenga nyumba iyi na kuŵikamo vyakurya? Mwakuyana waka, para tikuwona vinthu ivyo vili mu charu na chakurya chinandi icho chilimo, kasi ntchakupulikikwa yayi kuti Munthu munyake ndiyo wali kuvilenga? Baibolo likuyowoya makora pa nkhani iyi, likuti: ‘Nyumba yiliyose yikuzengeka na munthu, kweni uyo wakazenga vinthu vyose ni Chiuta.’” (Ŵahebere 3:4) Ndipouli, nanga tingalongosora makora wuli, ni wose yayi ŵangakhorwa.—2 Ŵatesalonika 3:2.

20, 21. (a) Kasi tingagwiliskira wuli ntchito mazgu ghakuti “ipo kuli wuli,” kuti tilongosore mikhaliro na nthowa za Yehova? (b) Kasi tizamudumbiskana vichi mu mutu wakulondezgapo?

²⁰ Para tikusambizga, kwali tili mu uteŵeti wa m’munda panji ku mpingo, nase tingayowoya mazgu ghakuti “ipo kuli  wuli” kuti tilongosore mikhaliro na nthowa za Yehova. Mwachiyelezgero, pakukhumba kulongora kuti chisambizgo chakuti ŵanthu ŵakulangika mu moto chikuyuyura Yehova, tingayowoya kuti: “Kasi walipo dada wachitemwa uyo wangalanga mwana wake mwa kumotcha mawoko pa moto? Ipo Dada withu wakuchanya uyo ngwachitemwa wakukondwa yayi na chisambizgo chakuti wakulanga ŵanthu ku moto.” (Yeremiya 7:31) Kuti tovwire Mkhristu munyithu uyo wakusuzgika maghanoghano kumanya kuti Yehova wakumutemwa, tingayowoya kuti: “Usange Yehova wakuwona kuti kampheta kachoko chomene nkhakuzirwa, ipo kuli wuli ŵateŵeti ŵake awo ŵakumutemwa na kumusopa, kusazgapo na imwe wuwo?” (Mateyu 10:29-31) Para tingalongosora mu nthowa iyi tingaŵafika pamtima ŵanthu.

²¹ Kuyana na nthowa zitatu izo Yesu wakasambizgiranga izo tadumbiskana mu nkhani iyi, ntchakupulikikwa kuti ŵalinda awo ŵakiza kuzakakora Yesu ŵayowoye kuti: “Palije munthu uyo wali kuyowoyapo nthena.” Mu mutu wakulondezgapo, tizamudumbiskana nthowa yakusambizgira iyo Yesu wakamanyikwanga nayo chomene, yakugwiliskira ntchito ntharika.