Wakutemweka Muŵazgi:

“Wize uŵe mulondezgi wane.” (Mariko 10:21) Apa Yesu Khristu wakutichema kuti timulondezgenge. Kasi muli kwambapo kumulondezga? Para muli kwambapo, muli kuchita makora chomene. Chifukwa wuli?

Yehova wakatuma Mwana wake wapadera yekha pa charu chapasi kuzakapeleka umoyo wake kuŵa sembe. (Yohane 3:16) Padera pakutifwira, Mwana uyu wakalongora umo ise tikwenera kuchitira vinthu. Pa vyose ivyo wakachitanga wakalutilira kugomezgeka na kukondweska mtima wa Adada ŵake. Kweniso Yesu wakalongora umo ise tingayezgera Adada ŵake. Mwana uyu wakavumbura khumbo na nthowa za Adada ŵake kwizira mu mazgu na vyakuchita vyake.—Yohane 14:9.

Baibolo likuti Yesu ‘wali kutilekera chakuwonerapo kuti tilondezgenge mendero ghake mwakugomezgeka.’ (1 Petrosi 2:21) Usange tikukhumba kusendelera kwa Yehova, usange tikukhumba kuŵa na umoyo wakukhorweska sono, kweniso usange tikukhumba kukhalilira pa nthowa yakuya ku umoyo wamuyirayira, tikwenera kulondezga mendero gha Khristu mwakugomezgeka.

Kuti tambe kulondezga Yesu, tikwenera kumanya makora umo iyo wakachitiranga vinthu apo wakaŵa pa charu chapasi. Ntheura tikukhumbikwira kusambira mwakupwelelera nkhani za Yesu izo zili mu Baibolo. Para tikughanaghanirapo pa vinthu ivyo Yesu wakayowoya na kuchita, na kuwona umo tingamuyezgera mu mazgu na vyakuchita, timanyenge makora umo tingamulondezgera.

Mphanyi buku ili lamovwirani kuti mutemwenge chomene Yesu na Yehova. Ndipo mphanyi chitemwa ichi chamuchiskani kulondezga mendero gha Yesu mwakugomezgeka mwakuti mukondweske mtima wa Yehova sono kweniso muyirayira swii!