Wakutemweka Mupharazgi Munyithu:

JITORANI kuti namwe muli pa Beteli ku Brooklyn, ndipo mukaŵapo pa Chinkhondi mulenji Okutobala 2, 1914. Ni nyengo ya chakurya cha mulenji ndipo mwakhala pa malo ghinu, mukulindilira Mubali C. T. Russell. Mbwenu mukuwona chijaro chikujulika ndipo Mubali Russell wakunjira. M’malo mwakuti wakhale pasi, iyo wakwima dankha nga umo wakuchitira nyengo zose, na kuyowoya mwachimwemwe kuti: “Mwawuka wuli mose?” Ndipo wakwamba kukuŵa mapi na kuyowoya chipharazgo chakukondweska. Wakuti: “Nyengo za Ŵamitundu zamara, nyengo ya mafumu ghawo yamara.” Namwe mwakondwa chomene chifukwa ndivyo mwalindilira nyengo yitali. Ndipo namwe pamoza na mbumba yose mukukuŵa mapi nyengo yitali.

 Sono pajumpha vyaka vinandi kufuma apo Mubali Russell wakayowoyera chipharazgo chakukondweska ichi. Kasi ni vichi ivyo Ufumu wafiska kufuma nyengo yira? Pali vinandi chomene. Kwizira mu Ufumu uwu, Yehova watozga ŵanthu ŵake na kuŵasambizga. Mu 1914, ŵanthu aŵa ŵakaŵa ŵachoko chomene, kweni sono ŵalipo pafupifupi 8 miliyoni. Kasi masambiro agha ghamovwirani wuli imwe?

Mazuŵa ghano ŵabali ŵanandi ŵakutemwa kuyowoya kuti, “Gileta la Yehova likwenda!” Nakuti uwu mbunenesko nadi. Kufuma mu 1914, gileta ilo likwimira chigaŵa cha kuchanya cha gulu la Yehova likuchimbira chomene, nga umo muwonerenge mu buku ili. Kuti ŵateŵeti ŵa Yehova ŵapharazge makani ghawemi pa charu chose, ŵayezgapo nthowa zakupambanapambana. Zinyake mwa nthowa izi ni, manyuzipepara, vikhwangwani, Sinema, makadi ghakupharazgira, magiramu, wayilesi, kweniso Intaneti.

Pakuti Yehova wakutumbika mulimo uwu, pasono mabuku ghithu ghakung’anamulika mu viyowoyero vyakujumpha 670, ndipo tikupeleka kwa waliyose mwawanangwa. Ŵanthu ŵanyake ŵakujipeleka kuti ŵawovwire pa mulimo wa kuzenga Nyumba za Ufumu, Malo Ghakuchitirapo Ungano na maofesi. Ŵakuzenga mu vyaru visambazi na vikavu wuwo. Ndipo para kwachitika masoka, ŵabali na ŵadumbu ŵakuchimbilirako na kukawovwira. Nakuti uwu mbukaboni wakuti ŵakababikira “kovwira mu suzgo.”—Zinth. 17:17.

Nangauli nyengo zinyake ŵaliska na ŵanthu ŵanyake awo ŵakutisuska ŵakupangiska kuti tiwonekenge nga ivyo tikuchita ‘vikupambana na dango,’ kweni ntchakukhozga kumanya kuti kanandi ivyo ŵakuyezgayezga vikutondeka. Nakuti ivyo ŵakuchita vyawovwira waka “kuthandazga makani ghawemi.”—Sal. 94:20; Fil. 1:12.

Ntchakukondweska chomene kuchitira lumoza mulimo uwu na imwe “ŵateŵeti” ŵanyithu. (Mat. 24:45) Manyani kuti tikumutemwani chomene. Tikulomba kuti mphanyi buku ili lamovwirani kukoleska chomene chiharo chinu.

Tikumukhumbirani viwemi vyose

Ndise ŵabali ŵinu,

Wupu Wakulongozga wa Ŵakaboni ŵa Yehova