Apo mwaŵazganga kabuku aka, panji mwanguzizwa mwati mwamanya kuti ivyo Baibolo likuyowoya vikukolerana na ivyo ŵasayansi ŵabowozga, ŵati? Nakuti ndimwe pera yayi. Ŵanandi ŵakuzizwa para ŵamanya kuti Baibolo likuyowoyapo yayi vinyake ivyo visopa vinandi vikuti likuyowoya. Chiyelezgero chimoza ni ichi: Ŵanyake ŵakuti Baibolo likulongosora kuti Chiuta wakalenga vinthu vyose, na vyamoyo wuwo, mu mazuŵa sikisi gha maora 24. Unenesko ngwakuti mu Baibolo mulije fundo yakususkana na masachizgo gha ŵasayansi pa nkhani ya vyaka ivyo chilengiwa panji charu chaŵirako. *

Chinyake ntchakuti, Baibolo likulongosora mwakudumura umo Chiuta wakalengera vyamoyo pa charu, ndipo likupeleka mwaŵi kuti ŵasayansi ŵasambire na kuyowoyapo masachizgo ghawo. Likuyowoyaso kuti Chiuta wakalenga vyamoyo vyose “kuyana na mitundu yake.” (Genizesi 1:11, 21, 24) Nangauli ivi vingapambana na masachizgo ghanyake gha ŵasayansi, kweni vikukolerana na fundo zaunenesko izo ŵasayansi ŵabowozga. Nakuti kwamba kale, masachizgo gha ŵasayansi ghakwiza na kuluta, kweni fundo zaunenesko zikusintha yayi.

Kweni pali ŵanthu ŵanandi awo ŵakukhumba yayi kusambira ivyo Baibolo likuyowoya. Iwo ŵali kukhuŵara na visopa. Ŵakuwona kuti ŵavisopa mbapusikizgi, ŵakuchita katangale, kweniso ŵakutemwa nkhondo. Kasi tingamanya nadi uwemi panji uheni wa Baibolo para tingawonera waka vyakuchita vya ŵanyake awo ŵakuti ŵakulondezga fundo zake? Kuli ŵasayansi ŵanandi awo ŵakutemwa unenesko kweniso mbakupulikiska. Iwo ŵakukwenyelera para ŵanthu ŵankhaza ŵakubisama ku chisambizgo chakuti ŵanthu ŵakafuma ku vinyama, na kuyuzga ŵanthu ŵamitundu yinyake. Kasi tingakora utesi panji unenesko wa chisambizgo ichi para tingawonera waka nkharo ya ŵanthu aŵa? Chingaŵa chakovwira kuwona dankha fundo izo pagona chisambizgo ichi na kuziyaniska na ukaboni uwo ulipo, asi ŵati?

Lekani tikumupemphani kuti muliwone makora Baibolo. Mungazizwa na kukondwa  kumanya kuti ivyo likusambizga vikupambana chomene na ivyo visopa vinandi vikusambizga. Mbunenesko yayi kuti likusambizga ŵanthu nkhondo panji kuwukirana pakati pa mafuko, kweni likuti ŵateŵeti ŵa Chiuta ŵakwenera kutinkha nkhondo na kutinkhana. (Yesaya 2:2-4; Mateyu 5:43, 44; 26:52) Baibolo likuyowoyapo yayi kuti tigomezgenge bweka, kweni likuti tipenjenge dankha ukaboni, na kukhorwa, mwakuti tiŵe na chipulikano chanadi. Likuti nkhongono yithu ya kughanaghana yikwenera kutovwira pakuteŵetera Chiuta. (Ŵaroma 12:1; Ŵahebere 11:1) Baibolo likugongoweska ŵanthu kufumba mafumbo yayi, kweni likuti tifumbenge; mafumbo ghakuzirwa na ghakuzizika wuwo.

Fumbo linyake ilo panyake namwe muli kujifumbapo ndakuti, ‘Usange Chiuta waliko, chifukwa wuli wakulekelera viheni?’ Baibolo likuzgora mwakupulikikwa makora fumbo ili, na ghanyakeso ghanandi. * Tikumupemphani kuti mulutilire kupenja unenesko. Mu Baibolo mukusangika mazgoro ghakukondweska, ghakukhorweska, kweniso ghakupulikikwa agho ghali na ukaboni wakukwana. Likaŵako lekha yayi.