Kasi ŵasayansi ŵanandi ŵakuti wuli? Ŵanandi ŵakuyowoya nga kuti vinthu vyakale ivyo vyasangika mu dongo vikulongora kuti vyamoyo vikafuma nadi kumoza. Kweniso chifukwa chakuti vyamoyo vyose vili na DNA, ŵakuti mbukaboni unyake wakuti vyamoyo vikafuma kumoza.

Kasi Baibolo likuti wuli? Buku la Genizesi likuti vyakumera, vyamoyo vyamunyanja, vyamoyo vyapamtunda, na viyuni, vikalengeka “kuyana na mitundu yake.” (Genizesi 1:12, 20-25) Mazgu ghakuti “mitundu” ghakulongora kuti vilengiwa vya gulu limoza vingaŵa vyakupambanako, kweni mtundu uliwose ngwapadera. Chifukwa cha ivyo Baibolo likulongosora, tingazizwa yayi usange vinthu vyakale ivyo vyasangika mu dongo vikulongora kuti vyamoyo vinyake vikaŵako kamoza na kamoza.

Kasi ukaboni ukuvumbura vichi? Kasi ukaboni ukukolerana na ivyo Baibolo likulongosora? Panji Darwin ndiyo wakaneneskanga? Kasi ivyo ŵanthu ŵasanga mu vyaka 150 ivyo vyajumpha vikutipa ukaboni wuli?

Mu vyaka vyasonosono apa, ŵasayansi ŵayaniska majini gha twamoyo tunandi twa selo limoza kweniso gha vyakumera na vinyama. Ŵakupenja ukaboni wakuti sachizgo la Darwin lakuti vyamoyo vikafuma kumoza ndanadi. Kweni ndivyo ŵakusanga yayi.

Kasi ŵasanga ukaboni wuli? Mu 1999, Malcolm S. Gordon wakalemba kuti: “Vikuwoneka kuti umoyo ukafuma kwakupambana. Vyamoyo vikafuma kumoza yayi.” Kasi ulipo ukaboni wakuti mitundu yose ya vyamoyo yikafuma kumoza umo wakagomezgeranga Darwin? Gordon wakuti: “Chisambizgo chakale na kale chakuti vyamoyo vyamitundumitundu vikafuma kumoza chikuŵa nga chikukolerana yayi na umo tikumanyira mitundu ya vyamoyo mazuŵa ghano. Chikovwira yayi pakugaŵa magulu (phyla) ghanyake gha vinyama panji ghose  waka, kweniso pakulongosora makilasi gha vinyama vinyake mukati mwa magulu ghawo.”²⁹ *

Ivyo ŵasayansi ŵakubowozga vichali kupambana na sachizgo la Darwin lakuti vyamoyo vikafuma kumoza. Mu 2009, mu magazini ya New Scientist ŵakalembamo fundo ya wasayansi zina lake Eric Bapteste, uyo wakugomezga kuti umoyo ukaŵako waka mwamwaŵi. Iyo wakati: “Tilije ukaboni wakulongora kuti khuni la umoyo ndanadi.”³⁰ Mu nkhani iyi mukaŵaso fundo iyo wakayowoya Michael Rose, uyoso wakugomezga kuti umoyo ukaŵako mwamwaŵi. Iyo wakati: “Khuni la umoyo likusoŵa ukaboni ndipo likuwundika nga ni maseŵera. Tose tikumanya ichi, kuti waka vikutisuzga kuzomera ivyo tikusambira.³¹ *

Ŵasayansi ŵanandi ŵakuti vinthu vyakale ivyo vyasangika mu dongo vikulongora kuti vyamoyo vikafuma kumoza. Iwo ŵakuti vinthu ivi vikulongora kuti somba zikazgoka kuŵa vyamoyo ivyo vikukhala mu maji na pamtunda wuwo. Kweniso ŵakuti vinyama vyakukhwaŵa vikasintha na kuŵa vyakonkheska. Kasi ndivyo vikachitika nadi?

David M. Raup ni kaswiri wakusambira ivyo vikusangika mu dongo, kweniso wakugomezga kuti umoyo ukaŵako wekha. Iyo wakuti: “Kwambira mu nyengo ya Darwin, ukaboni uwo tikusanga ukulongora kuti vyamoyo vikachita kusintha pachokopachoko yayi, kweni vikabulika waka, kung’anamura kuti vikaŵako kamoza na kamoza kuyana na mitundu yawo, nakuti vikasinthanga viŵi yayi m’paka vikamaliramo waka.”³²

Fundo njakuti vinandi ivyo vyasangika mu dongo vikulongora kuti vinyama vikasinthanga yayi nanga pajumphe nyengo yitali. Palije ukaboni wakuti vinyama vikazgokanga na kuŵa vyamtundu unyake. Kukaŵa vinyama vyamitundumitundu panyengo yimoza. Nanga ni ivyo vikupambanako pachoko waka na vinyake vikaŵangako kamoza na kamoza. Chiyelezgero ni ichi: Pali ŵakasuska awo ŵakovwirika na mudumu wa mazgu ghawo kuti ŵamanye malo na vinthu vinyake. Palije ukaboni wakuti ŵakasuska aŵa ŵakazgoka kufuma ku ŵakasuska ŵanyake ŵakale.

Nakuti vikuwoneka kuti magulu ghakurughakuru gha vyamoyo ghakujumpha hafu ghakaŵako kamoza na kamoza. Para ŵasayansi ŵakupima ivyo ŵakusanga mu dongo, ŵakuwona ukaboni wakuti vyamoyo vinandi vyakupambanapambana vikabulika panyengo yichoko waka. Pa chifukwa ichi, nyengo iyi ŵakuyichema “Cambrian explosion.” Kasi pakaŵa pawuli chomene?

Tiyelezgere waka kuti ivyo ŵakaswiri ŵakusachizga ni vyaunenesko. Mbiri ya charu chapasi tingayiyaniska na utali wa girawundi la bola (1). Para tingapima mwanthowa iyi, ndikuti mwendenge kufuma ku golo limoza m’paka kufupi chomene na golo linyake kuti mufike pa nyengo iyo ŵasayansi ŵakuti vyamoyo vinandi vikaŵirako, panji kuti Cambrian period (2). Kuyana na ivyo ŵasanga, pakaŵa kanyengo kanyake mukati mwa nyengo iyi apo kukaŵira vinyama vyamitundumitundu. Kasi ivi vikachitika mwaluŵiro wuli? Mu chiyelezgero chithu ichi, apo mukwenda kulazga ku golo, mukutamphuska waka lundi kuti mwende sitepu yimoza, mbwenu kukubamuka vinyama nyomi, vyamitundu yinandi!

Pakuti vyamoyo vyamitundumitundu vikaŵako panyengo yichoko waka, ŵanyake awo ŵakugomezga kuti vyamoyo vikaŵako vyekha  ŵamba kukayika usange Darwin wakaneneskanga. Yumoza wawo ni Stuart Newman, wasayansi uyo nayo wakugomezga kuti vyamoyo vikaŵako vyekha. Mu 2008, wakati pakwenera kusangika sachizgo linyake ilo lingayana na ukaboni uwo ukulongora kuti vyamoyo vyamitundumitundu vikaŵako kamoza na kamoza. Wakatiso: “Nkhuwona kuti fundo izo Darwin wakayowoya pakulongosora umo vinthu vikasinthira, nagho ni masachizgo waka, nakuti ngakuzirwa viŵi yayi kuti tipulikiske umo vyamoyo vikasinthira mathupi ghawo.”³³

Kasi unenesko ngwakuti wuli pa sachizgo lakuti somba zikazgoka kuŵa vyamoyo ivyo vikukhala mu maji na pamtunda wuwo, ndipo vinyama vyakukhwaŵa vikazgoka vyakonkheska? Kasi ivyo ŵali kusanga mu dongo vikukhozgera nadi kuti vyamoyo vikachita kusintha? Para tawoneseska ukaboni uwo wasangika mu dongo, pakusangika masuzgo pa fundo iyi.

Lakwamba ni ili: Mu mabuku ghanyake ŵakusintha sayizi ya viwangwa vya nyama zakonkheska izo ŵakuti zikafuma ku vyakukhwaŵa. Unenesko ngwakuti viwangwa vinyake ni vikuru, apo vinyake ni vichoko, kweni mu mabuku ŵakujambura nga vikuyana waka sayizi.

Suzgo lachiŵiri kweniso likuru chomene ndakuti palije ukaboni wakuti vyamoyo ivi vikafuma kumoza. Ŵakaswiri ŵakuyezga kundandika viwangwa, ndipo pakulongosora ŵakuti pakajumpha vyaka mamiliyoni kuti chamoyo chisinthe na kuŵa chamtundu unyake. Kweni kaswiri wakumanya vya vinyama, zina lake Henry Gee wakuti: “Vyaka ivyo vikajumphapo pakati pa vyamoyo ivi vikaŵa vinandi chomene, ndipo ntchakusuzga kumanya usange pakaŵa nadi ubali.”³⁴ *

Malcolm S. Gordon wakayowoyapo maghanoghano ghake pa viwangwa vya somba na vyamoyo ivyo vikukhala mu maji na pamtunda wuwo. Wakati ivyo vyasangika mu dongo “vikutiphalira tuchoko waka, nakuti panji kukaŵa mitundu yinandi ya vyamoyo vya magulu agha iyo tindayimanye.” Wakayowoyaso kuti: “Palije nthowa yakumanyira usange mitundu iyi nayo yikazgoka kuŵa  vyamoyo vyamtundu unyake, usange vikachitika nadi, kweniso tingamanya yayi ubali uwo ukaŵapo.”³⁵ *

Mu 2004, mu magazini ya National Geographic mukalembeka nkhani yakulongosora ivyo ŵasayansi ŵasanga mu dongo. Yikati ivyo ŵasanga vingayana waka na filimu iyo pa vithuzi 1000, vithuzi 999 ŵali kuwuskamo, ndipo vili kuzgeŵa.” ³⁶ Kasi fundo njakuti wuli mu chiyelezgero ichi?

Tiyelezgere kuti mwasanga vithuzi 100 vya filimu iyo yikaŵa na vithuzi 100,000. Kasi mungawumanya wuli mutu wa nkhani mu filimu iyi? Panji mungasachizga waka. Kweni wuli usange mungaŵa na vithuzi 5 pa vithuzi 100, na kundandika vithuzi 5 ivi munthowa yakuti vikolerane na mutu uwo mwasachizga, kweni vithuzi 95 vikumuphalirani kuti filimu yikuyowoya vinyake? Kasi ghangaŵa mahara kuyowoya kuti ivyo mwasachizga ndiwo mbunenesko chifukwa cha vithuzi 5? Pakundandika vithuzi 5 mwakhumbanga waka kusanga ukaboni wakuti ivyo mwasachizga ndiwo mbunenesko, asi nthe? Kweni chingaŵa chamahara kusintha maghanoghano chifukwa cha ukaboni wa vithuzi 95. Imwe mukuwona wuli?

Kasi chiyelezgero ichi chikukolerana wuli na umo ŵasayansi ŵakuwonera ivyo ŵasanga mu dongo? Ukaboni unandi uwo ŵasanga mu dongo ukulongora kuti vyamoyo vikusintha viŵi yayi. Kweni kumanyuma kose uku, ŵakaswiri ŵakazomeranga yayi fundo iyi. Vikuyana waka na munthu uyo vithuzi 95 vikumuphalira nkhani yakupambanako na iyo wakusachizga. Chifukwa wuli ŵakakhalapo waka chete pa ukaboni wakuzirwa uwu? Wakulemba mabuku zina lake Richard Morris wakuti: “Vikuwoneka kuti ŵakaswiri ŵakakora chomene fundo yakuti vinthu vikachita kusintha pachokopachoko. Iwo ŵakakhumba yayi kusintha, nangauli ukaboni uwo ŵasanga ukupambana na fundo iyi. Ŵakayezganga kulongosora ukaboni uwo ŵasanga mu dongo munthowa yakuti ukolerane na fundo iyo ŵanandi ŵakugomezga, yakuti vyamoyo vikasintha kufuma ku vinyake.”³⁷

 Wuli awo ŵachali kugomezga kuti vyamoyo vikachita kusintha? Kasi vingachitika kuti nawo ŵakuyezga kundandika viwangwa kuti viŵe nga vikupeleka ukaboni uwo ŵakukhumba? Enya. Ŵakuchita ivi kuti ŵakolerane na ŵanandi awo ŵakuti umoyo ukaŵako wekha, nangauli ŵakumanya kuti ukaboni unandi wakufuma mu dongo kweniso mu majini ukulongora kuti ndimo vikaŵira yayi. *

Imwe mukutipo wuli? Ukaboni ukulongora kuti unenesko ni ngu? Sono tiyeni tiweleremo ivyo tasambira kufuma pakwamba.

• Mbutesi kuti umoyo ukambira ku selo lambura vinandi.

• Ntchakukayikiska usange ivyo vikuŵa mu selo vikakumana waka na kupanga chinthu chimoza.

• Ulongozgi panji kuti “pulogiramu” (DNA) yakwendeska vinthu mu selo njapachanya, kulongora kuti yikapangika mwamahara, nakuti palije chinthu chakupangika na munthu chingafikapo pa ivyo yikuchita panji umo yikusungira vinthu.

• Pakusambira vya majini, vyawoneka kuti vyamoyo vikafuma kumoza yayi. Chinyake ntchakuti kuyana na ukaboni uwo wasangika mu dongo, magulu ghakurughakuru gha vinyama ghakaŵako kamoza na kamoza.

Pakuwona fundo zose izi, kasi imwe mukuwona kuti ukaboni ukukolerana na fundo ya mu Baibolo yakuti vyamoyo vikalengeka? Kweni pali ŵanthu ŵanandi awo ŵakuti pa vinandi, sayansi yikukolerana yayi na ivyo Baibolo likuyowoya vyakuti vyamoyo vikachita kulengeka. Kasi mbunenesko uwu? Kasi Baibolo likuti wuli chomene?