KASI kumumanya Yehova khwacandulo wuli? Mwa vinyake, kumwanduliraninge kuti musange zgoro la fumbo ilo likutonda ŵantu ŵanandi kuti ŵalizgore: ‘Ncifukwa wuli ine niliko?’ Mutepanji mulikujifumbapo fumbo ili. Themba lavinjeru ilo likaŵa lisambazi ‘kujumpa mafumu ghose’ gha mu nyengo yake, likasanda fumbo ili lakukhwaskana na cilato ca umoyo. (2 Midauko 9:22; Mupharazgi 2:1-13) Themba Solomon, likaŵa na nkongono zinandi, usambazi wambura kuyowoyeka, ndiposo na vinjeru vyambura mayerezgereko. Kasi iye wakasangaci pakusanda kwake uku? Iye wakati: “Tipulike umaliro wa makani ghose: Muwope Ciuta, na kusunga marango ghake, cifukwa ici ndico mlimo wose wa muntu.” (Mupharazgi 12:13) Pakuti Solomon wakajiwonera yekha vintu vinandi kuruska ŵantu ŵanandi, kaghanaghaniro kake nkakwenelera kuti tighanaghanirepo.—Mupharazgi 2:12.

² Kuwopa Ciuta uko Solomon wakayowoya kuti nkopa kupwetekeka na nkongono ya mizimu yambura kumanyikwa cara. Mumalo mwake, ni wofi uweme wa kopa kukwiyiska muntu munyake uyo mukumutemwa comene. Usange muntu mukumutemwa fikepo, kwambura kukayika muzamukhumba kuti m’mukondweske nyengo zose na kuleka kucita cilicose ico cingamukhuŵazga. Penepapo mukwamba kutemwa Yehova, muzamuwona kuŵa camahara kucita ntena pakuyowoya za iye.

³ Mwakuŵazga Baibolo, mungamanya ivyo Mlengi withu wakutemwa na ivyo wakutinka ndiposo na cilato cake pakulenga caru capasi. Pakuyowoya za Yehova kuŵa uyo “wakawumba caru na kucicita,” Baibolo likuyowoyaso kuti iye “wakacilenga waka cara, wakaciwumba kuti ciŵenge cakukhalamo!” (Yesaya 45:18) Yehova wakanozga caru capasi kuti ŵantu ŵakhalemo, ŵeneawo ŵakenera kupwererera caru capasi na vyamoyo vyose ivyo vilimo. (Genesis 1:28) Kweni kasi cilato ca Yehova pakulenga ŵantu cikaŵa cenecici pera—cakuti ŵapwererere waka caru?

⁴ Yayi, pakaŵaso cilato cikuru. Muntu wakwamba, Adamu, wakaŵa na ubwezi wacandulo na Yehova. Adamu wakamanya kuyowoyeskana na Mlengi mwakudunjika. Pose paŵiri, iye wakamanya kutegherezga ku ivyo Ciuta wakamuphaliranga ndiposo wakamanya kumuphalira Yehova maghanoghano ghake. (Genesis 1:28-30; 3:8-13, 16-19; Milimo 17:26-28) Pa cifukwa ici, Adamu na muwoli wake, Heva, ŵakaŵa na mwaŵi ukuru wa kumumanya makora Yehova na kuŵa na ubwezi weneco na iye. Kumumanya Yehova na kumurondezga kukapangiska umoyo wawo kuŵa wacimwemwe, cifukwa iye ni “Ciuta wacimwemwe.” (1 Timote 1:11, NW) Pakuŵa Ciuta “mweneuyo wakutipa vyose vyakuzara na kuzara vyakutikondweska,” Yehova wakaŵika mwanarumi wakwamba yura mu paradiso, uwo ukucemeka munda wa Eden, ndipo wakamupa khumbo la kukhala na umoyo wamuyirayira.—1 Timote 6:17; Genesis 2:8, 9, 16, 17.

⁵ Umoyo wamuyirayira? Panyake mungakana kuti ncambura macitiko kuti muntu wakhale na umoyo wamuyirayira, kweni kasi cingatondeka nadi? Ŵasayansi ŵakugomezga kuti sono ŵakumanya ico cikucitiska maselo kucekura. Tuntu tunyake twa mu majini uto tukucemeka ma telomere, tukuŵa ku umaliro kwa ma chromosome, tukufupikira-fupikira nyengo zose para selo limoza likuswekana. Usange selo laswana kufika pa vigaŵa 50 mupaka 100, ma telomere ghakumara ndipo maselo ghanandi ghakuleka kuswekana. Ivyo ŵasayansi ŵabowozga mwasono-sono apa vikurongora kuti mwakovwirika na ma telomerase, maselo gha ŵantu ghangarutilira kuswekana kwambura kulekezga. Nangauli kubowozga uku kukung’anamura kuti Yehova wakupangiska umoyo wamuyirayira cara kwizira mu selo ili, kweni vikurongora cintu cimoza: Ncamacitiko nadi kukhala na umoyo wamuyirayira.

⁶ Inya, nkani ya mu Baibolo iyo yikuyowoya kuti ŵantu ŵakwamba ŵakalengeka kuti ŵakhale na umoyo wamuyirayira, njaunenesko. Inya, ŵantu ŵakenera kukuzga ubwezi wawo na Yehova ku nyengo zambura mapendeko. Iwo ŵakenera kuŵa na umoza wakukhora na Ŵadada ŵawo ŵakucanya, kumanya makoraghene za cilato cawo ku ŵantu pa caru capasi na kucikwaniriska. Umoyo wawo ukenera kuŵa wakuvuska yayi. Adamu na Heva ŵakaŵa na umoyo wakukondweska wa kuzuzga caru capasi na ŵana ŵacimwemwe, ŵambura zakwananga. Iwo mpanyi ŵakaŵa na ncito yacimwemwe na yacandulo kwamuyirayira. Mwee, nawo mbumoyo wakukhorweska umo ukatenge uŵirenge!—Genesis 1:28.