NANGAULI ŵantu ŵakanjira mu ukhaliro wa wakawaka cifukwa ca kugarukira muwuso wa Ciuta, iye kuti wakaŵaleka waka cara kwambura kuŵapa cilindizga. Baibolo likulongosora kuti: ‘Cakwatika cikalambikika ku vya waka, na khumbo la ceneco cara, kweni ncifukwa ca uyo wakacilambika, mu cilindizga cakuti cakwatika naco citi cisutukeko ku wuzga wa kuvunda, camkunjira mu wanangwa wa ucindami wa ŵana ŵa Ciuta.’ (Ŵaroma 8:20, 21) Inya, Ciuta wakapereka cilindizga ku ŵana ŵa mbumba yakudanka yira. Ici cikaŵa cilindizga cakusimikizgirika cakuti ŵantu ŵazamufwatuka ku kwananga na nyifwa ivyo ŵali kuhara. Iwo ŵazamuŵaso pa ubwezi weneco na Yehova Ciuta. Mwauli?

² Apo Adamu na Heva ŵakananga, iwo ŵakataya muntazi muweme mwa ŵana ŵawo ndiposo na umoyo wambura kumara pacaru capasi. Pakukhumba wanangwa wa kujisankira ŵekha ico nciweme na ico nciheni, iwo ŵakaguriska mbumba yawo ya muntazi ku wuzga wa kwananga na nyifwa. Ŵana ŵakubabikira mu mbumba iyo ŵangayerezgereka na muzga uyo wakusungika pa cirwa cakutali ico cikuwusika na mathemba ghankaza. Inya nadi, nyifwa yawusa nga ni themba pa ŵantu awo mbazga kale kwa themba linyake—kwananga. (Ŵaroma 5:14, 21) Pakuwoneka nga kuti palije waliyose uyo wangaŵafwatula. Inya, ni sekuru wawo yekha uyo wakaŵaguriska ku wuzga uwu! Kweni muntu walusungu wakutuma mwana wake, mweneuyo wayeya malipiro ghakukwana gha kuwombolera wose awo ŵali mu wuzga uwu.—Salmo 51:5; 146:4; Ŵaroma 8:2.

³ Mu ciyerezgero ici, muntu uyo wakafwatula ŵazga wakuyimira Yehova Ciuta. Mwana uyo wayeya malipiro gha kufwatulira ŵazga ni Yesu Kristu. Mwana wa Ciuta, kananda wake uyo wakaŵako kale kucanya pambere wandaŵe muntu pacaru capasi. (Yohane 3:16) Iye wakaŵa cilengiwa cakwamba ca Yehova, ndipo vilengiwa vinyake vyose vikalengeka kwizira mwa iye. (Ŵakolose 1:15, 16) Yehova  wakacita mu ntowa yapadera mwa kusamuska umoyo wa Mwana wauzimu uyu kunjira mu ntumbo ya mwali wakulangwa mwakuti bonda wazakababike kuŵa muntu murunji uyo wazamuŵa na malipiro ghakukwanira pa vyakukhumbikwa vya urunji wa Ciuta.—Luka 1:26-31, 34, 35.

⁴ Apo Yesu wakaŵa na vyaka pafupifupi 30, wakabapatizika mu Mronga wa Yordani. Pa ubapatizo wake, wakaphakazgika na mzimu utuŵa, panji kuti nkongono yakugwira ncito ya Ciuta. Mwanteura, wakaŵa Kristu, kung’anamura “Wakuphakazgika.” (Luka 3:21, 22) Uteŵeti wa Yesu pacaru capasi ukaŵa ŵa vyaka vitatu na nusu. Mu vyaka ivi, iye wakasambizga ŵalondezgi ŵake za “Ufumu wa Ciuta,” uwo ni boma lakucanya ilo lizamuwezgerapo ubwezi wamtende wa ŵantu na Yehova Ciuta. (Luka 4:43; Mateyu 4:17)  Yesu wakamanya umo ŵantu ŵangakhalira na umoyo wakusangwa, ndipo wakapereka kwa ŵalondezgi ŵake urongozgi wa umo ŵangaŵira na cimwemwe. Mwalekeraci kujura Baibolo linu pa Mateyu vipaturo 5 mupaka 7 ndipo muŵazge vinyake mwa visambizgo vyake vya Upharazgi wa pa Lupiri?

⁵ Mwakupambana na Adamu, Yesu wakapulikira Ciuta mu vintu vyose. “Wakacita uheni cara.” (1 Petros 2:22; Ŵahebere 7:26) Mwaunenesko, wakaŵa na wanangwa wakukhala na umoyo wamuyirayira pacaru capasi, kweni ‘wakaŵika pasi umoyo wake’ kuti wapereke kwa Ciuta ico Adamu wakataya. Pa khuni lakusuzgikirapo, Yesu wakapereka umoyo wake waurunji. (Yohane 10:17; 19:17, 18, 28-30; Ŵaroma 5:19, 21; Ŵafilipi 2:8) Mwanteura, Yesu wakapereka ciwombolero, panji kuti wakapereka mtengo wakukhumbikwa wakuwombolera ŵantu ku wuzga wa kwananga na nyifwa. (Mateyu 20:28) Jiyerezgerani mwaŵene kuti mukugwira ncito yinonono comene mu fakitare iyo malipiro ngacoko, ndipo njaukazuzi, mukukhala mwakusuzgika na mwawuzga. Kasi mungamuwonga comene cara muntu uyo wapanga manozgero ghakuti wamufwatulani ku wuzga uwo, na kumuwongaso muntu uyo wapereka umoyo wake kuwombora umoyo winu? Kwizira mu sembe ya ciwombolero, ntowa yikajurika yakuti muwelere ku mbumba ya Ciuta ya mu cilengiwa cose na kukhala na umoyo wakukhorweska nadi, wambura kuŵaso mu wuzga wa kwananga na nyifwa.—2 Ŵakorinte 5:14, 15.

⁶ Kumanya na kuwongera lusungu lwa Yehova ulu kumupaninge cifukwa cakwenelera cakuti mugwiriskire ncito mu umoyo winu mazgu gha mahara gha mu Baibolo. Mwaciyerezgero, titore limoza la marango ghakusuzga comene kughagwiriskira ncito—kugowokera ŵanji para ŵamubudirani. Kasi mukukumbuka mazgu agho ghali pa Ŵakolose cipaturo 3, mavesi 12 mupaka 14, gheneagho tikakonkoska mu Sambiro 2? Mavesi agha ghakuciska za kugowokera ŵanji nanga pangaŵa kacifukwa kakukwenyerezga comene. Lemba ili likukonkoska za cifukwa ico tikwenera kucitira ntena, lemba ilo likuti: ‘Umo [Yehova, NW] wakamugowokerani imwe, namweso ndimo mucitirenge.’ Usange mukuwongera comene ivyo Yehova na Yesu Kristu ŵacitira ŵantu, muzamutemwa kugowokera ŵanyinu pa maubudi ghalighose agho ŵangacita, comene-comene para ŵarapa na kuphepeska.