ABRAHAMU, mwanarumi wa cipulikano capadera mu mdauko wa mu Baibolo, wakasida umoyo wacuma mu msumba usambazi wa Uri. Wakati wakhala kanyengo kacoko mu Harani, umoyo wake wose ukaŵa wakuyingayinga, wakukhala mu mahema, wambura nyumba yiweme. (Genesis 12:1-3; Milimo 7:2-7; Ŵahebere 11:8-10) Ndipouli, malemba ghakuti: ‘Abrahamu wakafwa mu ucekuru wake wakufikapo, mucekuru wa virimika vinandi.’ (Genesis 25:8) Ncivici cikapangiska umoyo wake kuŵa wakukhorweska? Iye wakaŵa mucekuru bweka cara mweneuyo wakakhorwa mupaka kufikira nyifwa yake cifukwa ca vintu vinandi ivyo wakacita mu umoyo wake, yayi. Pamanyuma pake Abrahamu wakazakacemeka “mbwezi wa Ciuta,” cifukwa ca kuŵa na cipulikano cakukhora mwa Ciuta. (Yakobe 2:23; Yesaya 41:8) Uwu ukaŵa ubwezi wacandulo uwo Abrahamu wakaŵa nawo na Mlengi wake weneuwo ukapangiska umoyo wake kuŵa wakukondweska.

² Nga ni umo Abrahamu wakacitira vyaka 4,000 ivyo vyajumpa, imwe namwe lero mungaŵa na umoyo wacandulo ndiposo wakukhorweska usange muŵenge pa ubwezi na Ciuta. Panyake mungazizwa na kayowoyero kakuti kuŵa bwezi la Mlengi wa cilengiwa cose, kweni ndipouli, ici ncamacitiko nadi. Mwauli? Mukwenera kumumanya na kumutemwa. (1 Ŵakorinte 8:3; Ŵagalatiya 4:9)  Ubwezi uwu na Mlengi ungapangiska umoyo winu kuŵa wacandulo na wakukhorweska.

³ Kwa awo ŵakukhumba kupokera sembe yakuwombora ya Yesu Kristu, Yehova wapereka maurongozgi gha umo ŵangakhalira na umoyo wacimwemwe. (Yesaya 48:17) Kumbukirani kuti, Adamu wakagarukira Ciuta mwa kujisankira yekha ciweme na ciheni. Nangauli Yehova kwizira mu sembe yakuwombora ya Mwana wake wakagura mbumba ya ŵantu, kuŵapa ntowa yakufumiramo mu wuzga wa kwananga na nyifwa, muntu waliyose payekha wakwenera kupokera ciwombolero na kuleka kujiŵikira yekha mphaka ya ciweme na ciheni. Tikwenera kujilambika ku marango na maurongozgi agho Ciuta wakupereka usange tikuzomerezga sembe yakuwombora ya Yesu.

⁴ Penepapo mukurutilira kuŵazga Baibolo na kurondezga marango ghake, kwambura kukayika mumanyenge kuzirwa kwa marango gha Ciuta ghakukhwaskana na ico nciweme na ciheni. (Salmo 19:7-9) Muzamutoreka mtima kuti muyowoye kwa Ciuta nga ni umo Moses, ncimi ya Yehova yikayowoyera kuti: “Sono, usange ndasanga ucizi pamaso pinu, mundilongore ntowa yinu, kuti ndimumanyeni imwe.” (Exodus 33:13; Salmo 25:4) Baibolo likupereka marango kuti ghamurongozgani kutonda vyakumara-mahara vya mu “nyengo zinonono” izi. (2 Timote 3:1) Mahara ghinu ghazamusazgikira, ndipo ghazam’mupangiskani kumanya makora Yehova ndiposo na kukhozga ubwezi winu na iye.

⁵ Abrahamu wakafwa ‘mucekuru wakuzura virimika’ kweni usange muntu wafwa, umoyo ukuŵakoso cara. Nanga tingacekura wuli, khumbo la kukhala na umoyo ndakawiro kwa tose. Ici ncifukwa cakuti “[Ciuta] walikuŵika umuyirayira mu mitima ya ŵantu; ndipouli ŵangamanyisiska cara ivyo Ciuta wacita kufuma ku mtendeko mupaka ku umaliro.” (Mupharazgi 3:11, New International Version) Nanga tingakhala na umoyo wamuyirayira, kweni tizamumanyisiska vyose cara ivyo Yehova walikulenga. Palije kugota kwa ivyo tingawona, kusambira, na kukondwera navyo mu milimo yakuziziswa ya Yehova.—Salmo 19:1-4; 104:24; 139:14.

⁶ Mungadokera cara kukhala na umoyo wamuyirayira usange caru cingazura na masuzgo agho tikughawona lero. Kweni ndipouli, lekani kufipa mtima na ici. Baibolo likulayizga kuti: “Kwakulingana na cilayizgano cake, tikulindirira macanya ghapya na caru cipya mwenemumo  mukukhala urunji.” (2 Petros 3:13) Lizgu lakuti “macanya ghapya” likung’anamura boma lipya lakucanya—Ufumu wa Ciuta uwo uzamuwusa pacaru cose capasi. “Caru cipya” ni mtundu wupya wa ŵantu ŵakupulikira muwuso wa Ufumu uwo. Kuti ici cizakacitike, Yehova sono-sono apa wacitengepo kantu pa awo “ŵakuparanya caru.”—Civumbuzi 11:18; 2 Petros 3:10.

⁷ Kwakhala utali wuli kuti ici cizakacitike? Kuyana na cigaŵa ca “cimanyikwiro . . . ca umariro wa mgonezi,” Yesu Kristu wakayowoya kuti kuzamuŵa nkondo za pakati pa mitundu, ‘[kupereŵera kwa vyakurya, NW] ndipo vindindindi viti viŵengepo mu malo na malo,’ “vilengo,” ndiposo na “kwandana kwa ucikana-marango.” (Mateyu 24:3-13; Luka 21:10, 11; 2 Timote 3:1-5) Pamanyuma pake wakayowoyerathu kuti: “Para mukuwona vyeneivi vikucitika, manyani kuti Ufumu wa Ciuta uli pafupi.” (Luka 21:31) Inya nadi, nyengo ya Yehova ya kuparanyira ŵantu ŵaheni yaneng’enera. *

⁸ Pamanyuma pakuti “nkondo ya zuŵa likuru la Ciuta, Mwene-nkongono-zose” yacitika, Yehova wazamuwuskapo uheni wose, ndipo caru cithu capasi cizamuzgoka paradiso. (Civumbuzi 16:14, 16; Yesaya 51:3) Panyengo iyo, ‘ŵakunyoroka ŵazamuhara caru na kukhala mwenemumo kwandanda.’ (Salmo 37:29) Wuli pakuyowoya za awo ŵalikufwa? Yesu wakati: “Mungazizwanga na ici: pakuti ora likwiza mu leneilo ŵose aŵo ŵali mu mararo ŵati ŵapulike mazgu ghake, ndipo ŵati ŵafumengemo; aŵo ŵakacitanga uweme, ŵati ŵawukire ku umoyo; kweni aŵo ŵakacitanga uheni, ŵati ŵawukire ku njeruzgo.” (Yohane 5:28, 29) Yehova, mweneuyo wakutemwa muntu waliyose, wazamuwuska wose awo ŵalikugona mu madindi. Ŵasayansi ŵangayezga kubabiska ŵantu ŵakukozgana mwakugwiriskira ncito majini kwambura kugonana kwa mwanarumi na mwanakazi, kweni Mlengi wangababiska ŵantu mu ntowa iyi cara. Iye wakumanya kukumbukira ciŵaro cilicose ca muntu waliyose uyo ngwakwenelera  kuwuskika kuti waŵeso na umoyo. Inya, muli na cilindizga ca kuzakawonanaso na ŵakutemweka ŵinu awo ŵalikufwa, mu paradiso pa caru capasi.

⁹ Kasi umoyo uzamuŵa wuli mu Paradiso? Caru cizamuzura na ŵanarumi na ŵanakazi ŵacimwemwe, ŵakurumba Mlengi wawo mwakukolerana. “Nanga njumoza wa ŵenecaru tiwanene, ‘Ndarwara.’” (Yesaya 33:24; 54:13) Pazamuŵavya muntu wakusuzgika mu maghanoghano panji wakukwiya panji wakurwara ntenda ya vifusi. Wose ŵazamuŵa na cakurya cinandi ndipo ŵazamukondwa pakugwira ncito yacandulo mwakuyana na cilato ca Ciuta. (Salmo 72:16; Yesaya 65:23) Ŵazamusangwa kukhala mwamtende na vinyama, mtende na ŵantu ŵanyawo, kweni kuruska vyose, ŵazamuŵa na ‘mtende na Ciuta.’—Ŵaroma 5:1; Salmo 37:11; 72:7; Yesaya 11:6-9.

¹⁰ Kasi mukwenera kucitaci kuti muzakakhale mu Paradiso na kusangwa na umoyo wakukhorweska? Yesu Kristu wakati: “Uwu mbumoyo wa muyirayira, kuti ŵamumanyani imwe, Ciuta mweneco yeka, na Yesu Kristu, mweneuyo mukamutuma.” (Yohane 17:3) Mwanteura rutilirani kusambira za Yehova na Yesu Kristu, na kumanya ivyo Ciuta wakukhumba kwa imwe. Para mucitenge ntena muzamukondweska mtima wa Yehova Ciuta ndipo kacitiro aka kazamupangiska umoyo winu kuŵa wakukhorweska nkanira.