PARA mukukhumba urongozgi, asi mukuruta kwa muntu uyo ngwakugomezgeka? Usange urongozgi ngwakufuma ku muntu uyo ngwakugomezgeka, mbwenu muwutemwenge comene, kwali nkhwakuti mungasanga candulo nyengo yeneyiyo panji pangajumpa danka nyengo. Usange mukukhumba nadi kwandula na urongozgi uweme wa mu Baibolo, ipo mukwenera kumumanya Mulembi wake. Inya, apo ndipo iye wamuwonaninge kuŵa “bwezi” lake.—Yesaya 41:8, NW.

² Usange mukukhumba kuŵa pa ubwezi na muntu munyake, kwambura kukayika mungatemwa kumumanya zina lake. Kasi Ciuta uyo wakalemba Baibolo wali na zina? Iye wakayowoya kuti: “Ine ndine Yehova; ili ndilo zina lane; ucindami wane kuti ndipenge munyake cara, nesi marumbo ghane ku vikozgo vyakuŵaja.” (Yesaya 42:8) Lizgu lakuti “Yehova,” ilo likulembeka ntena הוהי (likuŵazgika kufumira ku maryero kuya ku mazere) mu ciyowoyero ca Cihebere, ndilo zina lake. Zina ili likusangika pafupifupi mu malo 7,000 mu Malemba gha Cihebere mu Baibolo. Zina la Ciuta ili likung’anamura “Wakupangiska Kuŵako,” kurongora kuti Yehova wakujipanga yekha kuŵa cilicose ico wakukhumba mwakuti wakwaniriske khumbo lake. Kweniso, mu Cihebere zina lake liri mu mazgu agho ghakurongora kuti ncito yili mukati kucitika. Kasi ici cikung’anamuraci? Ici cikutiphalira kuti Yehova wajipanga ndipo wacali kujipanga kuŵa cilicose ico wakhumba kuti wakwaniriske khumbo lake. Iye ni Ciuta wamoyo, ndipo wali na nkongono zakuyana na ŵantu cara

³ Yehova wakaŵa Mlengi. (Genesis 1:1) Iye ni “Ciuta wamoyo, mweneuyo wakata mtambo na caru na nyanja na vyose ivyo viri mumo.” (Milimo 14:15) Yehova wakalenga vyose, kusazgapo ŵantu ŵakwamba, Adamu na Heva. Ndico cifukwa Ciuta wakucemeka “cisimi ca umoyo.” (Salmo 36:9) Iye wakaŵaso Musungiliri wa umoyo. Mwanteura “wali kujisida wambura ukaboni cara, uku wakucita uweme na kumupani vura ya kucanya, na nyengo za vipambi, wakuzuzga mitima yinu na vyakurya na cimwemwe.” (Milimo 14:17) Mu vyaru vya mu Africa na ku Asia, ŵantu ŵanandi ŵakusopa ŵapapi ŵawo awo ŵali kufwa kale cifukwa cakuti ndiwo ŵakaŵababa. Asi iwo ntena ŵakurumba Mlengi na Musungiliri wa umoyo, Uyo wakalenga ŵantu ŵaŵiri ŵakwambilira na kuŵapa nkongono zakubabira? Kuranguruka pa fundo iyi kumupangiskaninge kuyowoya kuti: ‘Ŵakwenerera ndimwe, [Yehova withu, NW] na Ciuta withu, kupokera ncindi na tumbiko na nkongono: Pakuti imwe mukalenga vyose, ndipo cifukwa ca khumbo linu vikaŵako, ndipo vikalengeka.’—Civumbuzi 4:11.

⁴ Mwa kuŵazga Baibolo, m’mumanyenge Mlengi winu, Yehova, na kusambira kuti ni Ciuta wa mtundu wuli. Ilo likuvumbura kuti “Ciuta nkutemwa.” (1 Yohane 4:16; Exodus 34:6, 7) Penepapo mukuŵazga Baibolo kufuma ku Genesis mupaka Civumbuzi, muwonenge nkani zinandi izo zikurongora kuti iye ni Ciuta wacitemwa nadi. Mwalekeraci kuŵa na kaluso ka kuŵazga Mazgu gha Ciuta zuŵa na zuŵa mwakuti m’mumanye Mlengi winu? Ŵazgani Baibolo mwakupwererera mwa kovwirika na awo ŵakumanya makora nkani zake. (Milimo 8:26-35) Para mucitenge ntena, muzamuwona kuti iye waliso Ciuta waurunji, mweneuyo wazomerenge cara kuti uheni urutilire. (Duteronome 32:4) Nkhwakusuzga kwa muntu kuti wacitire vyose pamoza citemwa na urunji kurazga ku munyake, kweni kwa Yehova cifukwa ca vinjeru Vyake nkhwamacitiko. (Ŵaroma 11:33; 16:27) Pakuŵa Ciuta Wankongono-zose, iye wali na nkongono zakucitira cilicose ico wakhumba mwakuti wakwaniriske khumbo lake. (Genesis 17:1) Yezgani kugwiriskira ncito urongozgi uwo mukusambira mu Baibolo, apo ndipo m’mumanyenge fikepo Mlengi winu, pakumanya kuti urongozgi wake nyengo zose ngwacandulo kwa ise.

⁵ Paliso ntowa yinyake iyo tingamufikira Ciuta. Iyi ndiyo pempero. Yehova ‘wakupulika malurombo.’ (Salmo 65:2) Iye wakuzgora ‘vyose vyeneivyo tikuromba.’ (Ŵaefeso 3:20) Ndipouli, kasi mungalighanaghanira wuli “bwezi” linu ilo likutemwa kwiza kwa imwe pekha para likukhumba covwiro? Mwaunenesko, muliwonenge kuŵa bwezi la pamtima cara. Mwakuyana waka, imwe namwe mukwenera kugwiriskira ncito mwaŵi wa pempero kuleka kupempa pera kwa Ciuta ivyo vyamusoŵani, kweniso kumuwonga na kumucindika.—Ŵafilipi 4:6, 7; 1 Ŵatesalonika 5:17, 18.