Kasi Imwe Mukugomezga Ntchi?
Ŵanthu ŵanyake awo ŵakusopa ŵakuti ivyo Baibolo likuyowoya pa nkhani ya kulenga vikachitika nkhanira ndendende. Iwo ŵakugomezga kuti charu na vyose ivyo vilipo vikalengeka mu mazuŵa 6, lililose la maora 24. Ŵakuti ivi vikachitika vyaka masauzandi ghachoko waka ivyo vyajumpha. Kweni pali ŵanthu ŵanyake awo ŵakuti kulije Chiuta ndipo Baibolo likuyowoya waka vidokoni. Iwo ŵakusambizga kuti umoyo ukaŵako mwamwaŵi waka.
Ŵanthu ŵanandi ŵakukora fundo zose ziŵiri. Panji ndimwe yumoza wawo, lekani mukuŵazga kabuku aka. Panyake mukugomezga kuti Chiuta waliko ndipo Baibolo mukulichindika. Kweni panji mukuchindikaso visambizgo vya ŵasayansi ŵakumanyikwa, awo ŵakugomezga yayi kuti vyamoyo vikachita kulengeka. Usange ndimwe mupapi, panji vikumusuzgani kuŵazgora vyakupulikikwa ŵana ŵinu para ŵamufumbani usange vyamoyo vikachita kulengeka panji vikachita kusintha.
Kasi Ntchito ya Kabuku Aka ni Vichi?
Ntchito yake njakususka ŵanthu yayi, kwali awo ŵakuti charu chikalengeka mu mazuŵa ghachoko waka, panji awo ŵali kusankha kuleka kugomezga mwa Chiuta. M’malo mwake, tikugomezga kuti kabuka aka kamovwiraninge kuti mughanaghanireposo vinyake ivyo mukugomezga. Kakulongosora ivyo Baibolo likuti vikachitika apo vinthu vikalengekanga. Panji mukaŵa mundaghanaghanirepo nkhani iyi. Kweniso kabuku aka kamovwiraninge kuwona kuti ivyo mukugomezga pa nkhani ya umo umoyo ukambira vili na ntchito.
Kasi mugomezgenge awo ŵakuti kulije Mlengi ndipo Baibolo ndambura kugomezgeka? Panji muwonenge dankha ivyo Baibolo likusambizga nadi? Ni visambizgo vya njani ivyo mukwenera kugomezga: vya mu Baibolo panji vya awo ŵakuti vinthu vikachita kusintha? (Ŵahebere 11:1) Wuli muwone maukaboni?
