ŴABALI na ŵadumbu ŵanandi awo ŵakafumamo mu charu chawo na kuluta mu vyaru vinyake kuti ŵakasange ndalama zinandi, ŵali kuweleraso ku charu chawo. Chifukwa chakuti ŵakutemwa Yehova na ŵanthu, ŵali kusamira uko kukukhumbikwa ŵapharazgi ŵanandi ŵa Ufumu. (Mat. 22:37-39) Kasi iwo ŵali kusida vichi, ndipo Yehova waŵatumbika wuli? Kuti tisange zgoro, tiyeni tiwone ivyo vikuchitika mu charu cha Cameroon icho chili ku western Africa.

Mu 1998 mubali munyake wa ku Cameroon zina lake Onésime wakaluta ku charu chinyake. Ku charu ichi wakakhalako vyaka 14. Zuŵa linyake pa maungano gha mpingo, pakayowoyeka chiyelezgero chakukhwaskana na mulimo wakupharazga. Muyowoyi wakati, “Usange ŵanthu ŵaŵiri ŵakukora somba pa malo ghakupambana ndipo munyake wakukora somba zinandi kuluska munyake, kasi uyo wakukora somba zichoko, walutenge yayi pa malo apo munyake wakukora somba zinandi?”

Chiyelezgero ichi, chikapangiska Onésime kughanaghana za kuwelera ku Cameroon uko ŵanthu ŵanandi ŵakakhumbanga kusambira Baibolo. Iyo wakakhumbanga kukawovwira ŵapharazgi ŵa mu mpingo wa kwake pa mulimo uwu. Kweni wakafipanga mtima chifukwa wakakhala kuwaro vyaka vinandi. Kasi wamuzgoŵeraso kukhala mu charu ichi? Kuti wamanye usange wamufiska kukhala, Onésime wakaluta ku Cameroon na kukhalako dankha myezi 6. Ndipo mu 2012 wakawelerathu ku charu ichi, ndipo wakamba kukhala kwawo.

Onésime wakuti: “Nkheneranga kuzgoŵera kukhalaso ku malo ghakotcha kweniso umoyo unyake. Mu Nyumba ya Ufumu, nkheneranga kuzgoŵera kukhalaso pa mipando ya mathabwa. Kweni para nkhutegherezga chomene pa maungano, nkhaluwangako za mipando yiwemi ya mu Nyumba za Ufumu zinyake.”

Mu 2013 Onésime wakatorana na Géraldine uyo nayo wakaŵa kuti wakawelera ku Cameroon wati wakhala vyaka 9 ku France. Kasi Yehova waŵatumbika wuli ŵakutorana aŵa chifukwa cha kudangizga vinthu vya Ufumu pa umoyo wawo? Onésime wakuti: “Tose tikanjira Sukulu ya Ŵapharazgi ŵa Ufumu na kuteŵetera pa Beteli. Chaka chamara, ŵanthu 20 awo ŵakasambiranga Baibolo, ŵakabatizika mu mpingo withu. Sono nkhujipulika kuti nili ku malo ghawemi chomene ‘ghakukolera somba.’” (Mrk. 1:17, 18) Géraldine wakusazgirapo kuti: “Nasanga vitumbiko vinandi kujumpha umo nkhaghanaghaniranga.”

Judith wakasamira ku United States kweni wakakhumbanga kusazgirako uteŵeti wake. Iyo wakuti, “Nyengo yiliyose para naluta kukawona ŵanthu ku Cameroon, pakuwerako nkhaliranga chifukwa nkhalekanga masambiro ghanandi gha Baibolo.” Ndipouli, Judith wakawelera luŵiro yayi ku Cameroon. Wakaŵa pa ntchito iyo wakapokeranga ndalama  zinandi, iyo yikamovwiranga kulipilira adada ŵake wovwiri wa chipatala ku Cameroon. Kweni Judith wakagomezga Yehova ndipo wakawelera ku Cameroon. Iyo wakuzomerezga kuti wakuvisoŵa vinthu vinyake ivyo wakakondwanga navyo apo wakaŵa ku United States. Wakalomba kwa Yehova kuti wamovwire kusintha vinthu vinyake, ndipo wakakhozgeka na mulaŵiliri wa dera na muwoli wake.

Para wakukumbuka umo vinthu vikaŵira wati wawelera ku Cameroon, Judith wakuti, “Vyaka vitatu pera nkhakondwa kovwira ŵanthu 4 kubatizika.” Judith wakambaso kuchita upayiniya wapadera. Pasono wakuteŵetera na mfumu wake Sam-Castel, uyo wakwendera dera. Kweni kasi ntchivichi chikachitikira adada ŵake? Iyo na mbumba ya kwawo ŵakasanga chipatala mu charu chinyake, icho chikajipeleka kuchita opareshoni adada ŵake kwambura kulipira. Chakukondweska chomene ntchakuti opareshoni iyi yikenda makora.

Mubali munyake zina lake Victor wakasamukira ku Canada. Wakati waŵerenga nkhani yinyake mu Gongwe la Mulinda iyo yikayowoyanga za masambiro gha pachanya, wakaghanaghanirapo za sukulu yake. Ntheura wakaleka masambiro gha ku yunivesite nakwamba kusambira sukulu yakusambizga ntchito za mawoko iyo yikaŵa ya nyengo yifupi. Iyo wakuti: “Ivi vikanovwira kuti nisange ntchito mwaluŵiro na kwamba kuchita upayiniya, mulimo uwo nkhawukhumbanga kwanyengo yitali.” Pamanyuma, Victor wakatorana na Caroline ndipo mbumba iyi, nyengo yinyake yikaluta ku Cameroon. Apo ŵakaŵa ku Cameroon, ŵakalutaso kukawona ofesi ya munthavi, ndipo apo ŵakaŵa ku ofesi, ŵabali ŵanyake ŵakaŵachiska kuti ŵaghanaghanirepo za kuzakateŵetera ku Cameroon. Victor wakuti: “Tikawona kuti palije chifukwa chakukanira, nakuti tikakhalanga kale umoyo wambura kukhumba vinandi, ntheura tikazomera.” Nangauli Caroline wakaŵa na masuzgo gha muthupi kweni tikasankha kuti tisamire ku Cameroon.

Victor na Caroline ŵakamba kuchita upayiniya wanyengozose kuti ŵawovwire ŵanthu wose ŵakunweka awo ŵakukumana nawo. Apo ŵakambanga upayiniya ŵakaŵa kuti ŵasungako ndalama, ndipo ndizo zikaŵawovwira kwakanyengo. Pamanyuma ŵakalutaso ku Canada kukagwira ntchito kwa myezi yichoko waka kuti ŵasange ndalama izo zikaŵawovwira kulutizga kuchita upayiniya ku Cameroon. Kasi ŵakatumbika wuli? Ŵakanjira Sukulu ya Ŵapharazgi ŵa Ufumu, kuchitako upayiniya wapadera, ndipo sono ŵakuchita mulimo wa vyakuzenga. Victor wakuti, “Chifukwa chakuti tikaleka umoyo wapachanya, vyatovwira kuwona kuti Yehova wakutipwelelera.”

Mu 2002, Alain uyo wakasambiranga pa yunivesite yinyake ku Germany, wakaŵerenga thirakiti la mutu wakuti Ŵawukirano—Kasi Muchitengechi na Umoyo Winu? Ivyo wakaŵerenga vikamovwira kuŵa na vilato vinyake. Mu 2006, wakanjira Sukulu Yakusambizga Uteŵeti, ndipo wakatumizgika kukateŵetera ku Cameroon, charu icho wakababikira.

Ku Cameroon, Alain wakasanga ntchito ya mazuŵa ghachoko waka. Pamanyuma wakasanga ntchito yiwemi iyo wakapokeranga ndalama zinandi. Kweni wakamba kwenjerwa kuti yimutimbanizgenge kupharazga mwakukwana. Ntheura wakati wachemeka kuti wakambe kuchita upayiniya wapadera, wakazomera nyengo yeneyiyo kwambura kuchedwa. Bwana wake wakamuphalira kuti wamulipirenge ndalama zinandi, kweni Alain wakakana ndipo wakamba upayiniya wapadera. Pamanyuma, Alain wakatorana na Stéphanie, uyo wakakhala vyaka vinandi ku France. Kasi Stéphanie wakasangana na masuzgo wuli wati wasamira ku Cameroon?

Stéphanie wakuti: “Nkhamba kulwara tumatenda twakupambanapambana, kweni pamanyuma nkhasanga wovwiri ndipo nkhaŵa makora.” Ŵakutorana  aŵa ŵakatumbikika chifukwa cha kuzizipizga kwawo. Alain wakuti: “Para taluta kukapharazga ku muzi unyake wa kutali wakuchemeka Katé, tikasanganga ŵanthu ŵanandi awo ŵakakhumbanga kusambira Baibolo. Ndipo pamanyuma tikamba kusambira nawo Baibolo kwizira pa foni. Ŵaŵiri mwa ŵanthu awo tikasambiranga nawo Baibolo ŵakabatizika, ndipo kagulu ka ŵapharazgi ŵakukwana 5 kakapangika ku malo agha.” Stéphanie wakusazgirapo kuti: “Palije chinthu chinyake chakukondweska chomene kuluska kovwira ŵanthu m’paka kufika pa kujipeleka kwa Yehova. Ndipo chifukwa cha kuteŵetera kuno, tajiwonera tekha chimwemwe icho chikuŵapo para wawovwira munthu kujipeleka kwa Yehova.” Pasono, Alain wakwendera dera pamoza na Stéphanie.

Gisèle wakabatizika apo wakasambiranga sukulu ya vyaudokotala ku Italy. Iyo wakakopeka na umoyo wambura kukhumba vinandi wa ŵakutorana ŵanyake awo ŵakachitanga upayiniya, awoso ŵakamusambizganga Baibolo ndipo nayo wakamba kukhumba kuchita vinandi mu uteŵeti. Ntheura Gisèle wakamba kuchita upayiniya wanyengozose uku wakumalizga kusambira sukulu yake.

Gisèle wakakhumbanga kuwelera ku Cameroon kuti wakateŵetere Yehova mwakukwana, kweni wakafipanga mtima. Iyo wakuti: “Mwaŵi wakukhala mu charu cha Italy uwo nkhapika, nkheneranga kuwutaya. Nkhenerangaso kulekana na ŵanyane na ŵabali ŵane ku Italy.” Nangauli vikaŵa nthena, mu Meyi 2016, Gisèle wakawelera ku Cameroon. Pamanyuma, wakatengwa kwa Léonce, ndipo ofesi ya munthavi ya Cameroon yikaŵatumizga ku Ayos, tawuni iyo kukakhumbikwiranga ŵapharazgi ŵanandi ŵa Ufumu.

Kasi umoyo ukaŵa wuli ku Ayos? Gisèle wakuti: “Kwa masabata ghanandi, kanandi kukaŵavyanga magesi, ndipo tikatchajanga yayi mafoni ghithu. Kanandi yakaŵanga yakuzimwa. Nkhasambira kuphika pa moto wa nkhuni, ndipo pa kukateka maji tikakankhanga wilibala uku tanyamura tochi usiku chifukwa ndipo kukaŵanga ŵanthu ŵachoko.” Kasi ntchivichi chikawovwira ŵakutorana aŵa kuzizipizga? Gisèle wakuti: “Mzimu wa Yehova ndiwo ukatovwiranga. Kweniso ine na mfumu wane tikawovwirananga. Ndipo mbumba yakwithu na ŵabwezi ŵithu ŵakatikhozganga kweniso nyengo zinyake ŵakatovwiranga na ndalama.”

Kasi Gisèle ngwakukondwa chifukwa chakuti wakawelera ku charu chake? Iyo wakuti: “Ndise ŵakukondwa chomene. Nangauli tasangananga na masuzgo kweniso nyengo zinyake tagongowanga, kweni para tatonda ivi, ine na mfumu wane tikajipulikanga kuti tachita ndendende ivyo takhumbikwiranga kuchita. Tikugomezga Yehova ndipo tikujipulika kuti tili pafupi chomene na iyo.” Léonce na Gisèle ŵakanjira Sukulu ya Ŵapharazgi ŵa Ufumu, ndipo pasono ŵakuchita upayiniya wapadera wakanyengo.

Nga ni mulovi uyo wakukumana na nyengo zakupambanapamba pa nyanja kuti wakakore somba, awo ŵakuwelera kwawo nawo ŵakujipeleka chomene chifukwa ŵakuleka vinthu vinyake mwakuti ŵawovwire ŵanthu ŵamitima yiwemi kupulika uthenga wa Ufumu. Yehova wakukumbuka chitemwa icho ŵapharazgi ŵakulimbikira aŵa ŵalongora ku zina lake. (Neh. 5:19; Heb. 6:10) Usange muli ku charu chinyake ndipo mwapulika kuti ku charu chinu kukukhumbikwa ŵapharazgi ŵanandi ŵa Ufumu, kasi muwelenge? Para muchitenge nthena, Yehova wamutumbikaninge.—Zinth. 10:22.