Nkhababika mu 1983. Kukwambilira nkhaŵa makora waka, kweni nati nafika vyaka 10, nkhamba kupulika ulwilwi ukuru thupi lane lose. Pakati pajumpha vyaka viŵiri, zuŵa linyake nkhawuka mulenji, kweni nkhatondekanga kwenda. Nkhayezgera umu na umu kuti nende, kweni nkhaŵavyirathu nkhongono mu malundi ghane. Kufuma pa zuŵa ili, nkhwenda yayi m’paka sono. Ulwari uwu wapangiskaso kuti nileke kukura. Ndipo m’paka sono nkhuwoneka nga mwana.

Myezi yichoko waka kufuma apo nkhalwalira, nkhafumangapo yayi panyumba, mbwenu zuŵa linyake kukiza Ŵakaboni ŵa Yehova ŵaŵiri. Kanandi para kwiza ŵalendo, nkhabisamanga, kweni pa zuŵa ili nkhazomera kuti ŵanakazi aŵa ŵayowoye nane. Apo ŵakayowoyanga vya Paradiso, nkhakumbukira ivyo nkhapulika apo nkhaŵa na vyaka pafupifupi 5. Panyengo iyo, mishonale munyake zina lake Jethro uyo wakakhalanga ku Suriname wakizanga mu muzi withu kamoza pamwezi, ndipo wakasambiranga Baibolo na adada ŵane. Jethro wakachitanga nane vinthu mwalusungu chomene. Nkhamutemwanga chomene. Kweniso asekuru na abuya ŵakubaba adada nyengo zinyake ŵakanitoranga kuluta ku maungano ya Ŵakaboni agho ghakachitikiranga mu muzi withu. Ntheura yumoza mwa ŵanakazi awo ŵakiza, zina lake Florence, wati wanifumba usange ningatemwa kusambira vinandi, nkhati enya ningatemwa.

Florence wakizaso na mfumu wake, Justus ndipo ŵakamba kusambira nane Baibolo. Ŵakati ŵamanya kuti nkhumanya yayi kuŵerenga, ŵakanisambizga kuŵerenga. Pati pajumpha nyengo, nkhamanya kuŵerenga. Zuŵa linyake mbumba iyi yikaniphalira kuti yamwamba kuteŵetera ku Suriname. Chachitima ntchakuti ku Orealla kukaŵavya munthu wakuti walutizge kusambira nane Baibolo. Kweni chakukondweska ntchakuti Yehova wakaniluwa yayi.

Pakati pajumpha kanyengo kachoko waka, kukiza mupayiniya munyake ku Orealla, zina lake Floyd, ndipo wakanisanga apo wakapharazganga ku nyumba na nyumba. Wati wayowoya kuti tambe kusambira Baibolo, nkhamwemwetera. Mbwenu wakanifumba kuti: “Ukumwemwetera vichi? Nkhamuphalira kuti nili kusambira kale burosha lakuti Kasi Ntchichi Icho Chiuta Wakukhumba kwa Ise? Ndipo nkhwenera kwamba kusambira buku lakuti Chimanyisko Cheneicho Chikulongozgera ku Umoyo Wamuyirayira. * Kweniso nkhamuphalira chifukwa icho panyengo iyi nkhasambiranga yayi. Floyd wakamalizga kusambira nane buku la Chimanyisko, kweni nayo ŵakamutuma kuti wakateŵeterenge kunyake.  Ntheura nkhakhalaso kwambura msambizgi wa Baibolo.

Ndipouli, mu 2004 ku Orealla kukizaso ŵapayiniya ŵanyake ŵapadera ŵaŵiri, Granville na Joshua. Ŵapayiniya aŵa ŵakapharazganga nyumba na nyumba ndipo ŵakanisanga. Ŵati ŵanifumba usange ningatemwa kusambira, nkhamwemwetera. Nkhaŵapempha kuti ŵambeso kusambira nane buku la Chimanyisko kufuma pakwamba. Nkhakhumbanga kuwona usange ivyo ŵanisambizgenge viyanenge waka na ivyo ŵakanisambizga ŵasambizgi ŵane ŵakale. Granville wakaniphalira kuti mu muzi mwithu mukuchitikanga maungano. Nangauli nkhaŵa kuti nindafumepo panyumba kwa vyaka pafupifupi 10, kweni nkhakhumbisiskanga kuluta. Ntheura Granville wakiza kunyumba na kuniŵika pa njinga ya ŵanthu ŵakupendera na kunendeska m’paka ku Nyumba ya Ufumu.

Pamanyuma, Granville wakanichiska kuti nilembeske mu Sukulu ya Uteŵeti wa Chiuta. Wakati: “Ndiwe wakupendera, kweni ukuyowoya. Zuŵa linyake uzamuyowoya nkhani yachisanisani. Ivi vizamuchitika nadi.” Mazgu ghake ghakanipa chikanga.

Nkhamba kupharazgira lumoza na Granville. Kweni misewu yinandi mu muzi withu yikaŵa yakunangika, ntheura chikaŵa chakusuzga kwendamo na njinga yane. So nkhapempha Granville kuti wanikankhenge mu wilibala. Nthowa iyi yikakora ndipo yikaŵa yiwemi. Nkhabatizika mu Epulero 2005. Kufuma apo, ŵabali ŵakamba kunisambizga mulimo wakupwelelera mabuku na vyakukuzgira mazgu pa Nyumba ya Ufumu.

Chachitima ntchakuti mu 2007, adada ŵane ŵakafwa pangozi ya boti. Mahara ghakatimalira chomene pa mbumba yithu. Granville wakalomba nase ndipo wakatiŵazgira malemba ghakukhozga. Pati pajumpha vyaka viŵiri tikaŵaso na chitima chomene chifukwa Granville nayo wakafwa pangozi ya boti.

Mpingo withu ukakhala kwambura ŵalara, tikaŵa waka na muteŵeti wakovwira yumoza. Nyifwa ya Granville yikaniŵinya chomene chifukwa wakaŵa mubwezi wane wapamtima. Nyengo zose wakanovwiranga mwauzimu na mwakuthupi wuwo. Maungano ghakulondezgapo wati wafwa waka, ndine nkhaŵa wakuŵerenga ndime pa Sambiro la Gongwe la Mulinda. Nkhakwaniska waka kuŵerenga ndime ziŵiri zakwambilira, kufuma apo nkhamba waka kulira ndipo masozi ghakathikanga waka. Mbwenu nkhafumako ku pulatifomu.

Nkhamba kujipulikako makora, kwati kwiza ŵabali kufuma ku mpingo unyake kuti ŵazakatovwire ku Orealla. Kweniso ofesi ya munthavi yikatumizga mupayiniya wapadera zina lake Kojo. Chakukondweska chomene chikaŵa chakuti amama na munung’una wane ŵakamba kusambira Baibolo ndipo ŵakabatizika. Kufuma apo, mu Malichi 2015, nkhimikika kuŵa muteŵeti wakovwira. Pati pajumpha nyengo yichoko waka, nkhayowoya nkhani yane yachisanisani kakwamba. Pa zuŵa ili nkhaŵa wakukondwa chomene, ndipo uku nkhumwemwetera na kuthiska masozi, nkhakumbuka ivyo wakaniphalira Granville kuti: “Zuŵa linyake uzamuyowoya nkhani yachisanisani. Ivi vizamuchitika nadi.”

Kwizira pa pulogiramu ya JW Broadcasting^® nkhusambira vinandi kufuma ku ŵabali na ŵadumbu awo ŵakukumana na masuzgo ghakuyana waka na ghane. Nangauli nawo mbalwari, kweni ŵakuchita vinthu vinandi ndipo mbakukondwa. Nane nkhukwaniska kuchitako vinthu vinyake. Chifukwa chakuti nkhakhumbanga kumupa Yehova vyose ivyo ningafiska, lekani nkhamba upayiniya. Ndipo mu Seputembala 2019 nkhapokera uthenga uwo nkhakhazganga yayi. Nkhaphalirika kuti ndine mulara mu mpingo withu uwo mukaŵa ŵapharazgi pafupifupi 40.

Nkhuŵawonga chomene ŵabali na ŵadumbu awo ŵakasambiranga nane na kunovwira kuteŵetera Yehova. Kuluska vyose, nkhuwonga chomene kuti Yehova wandaniluwe.