NKHANI YAKUSAMBIRA 51
SUMU 3 Nkhongono na Chigomezgo Chithu
Masozi Ghinu Ngakuzirwa kwa Yehova
“Sungani masozi ghane mu thumba linu lachikumba. Asi ghali kulembeka mu buku linu?”—SAL. 56:8.
FUNDO YIKURU
Mu nkhani iyi tiwonenge kuti Yehova wakumanya umo tikujipulikira para tasangana na masuzgo ndipo watipenge ivyo tikukhumbikwira kuti tijipulikengeko makora.
1-2. Kasi ni vinthu wuli ivyo vingatipangiska kuthiska masozi?
TOSE nyengo yinyake tili kulirapo. Nyengo zinyake tikuthiska masozi chifukwa cha kukondwa. Mwachiyelezgero, nyengo zinyake mukathiska masozi apo chinthu chakuzirwa panji chapadera chikamuchitikirani, nga ni apo mukaŵa na mwana. Panjiso mukathiska masozi mukati mwakumbukira nyengo yakukondweska pa umoyo winu, panji mukati mwawonana na mubwezi winu uyo mukawonana nikale.
2 Kweni kanandi tikuthiska masozi chifukwa cha chitima. Mwachiyelezgero, tingalira para munthu munyake watikhuŵazga chomene. Tingaliraso para tikupulika vyakuŵinya chifukwa cha ulwari panji para wakutemweka withu wafwa. Pa nyengo zanthena izi, tingajipulika nga umo yikajipulikira ntchimi Yeremiya apo Yerusalemu wakabwangandulika na Ŵababuloni. Yeremiya wakati: “Tumilonga twa maji tukukhira mu maso ghane . . . Maso ghane ghakulira kwambura kuleka, kwambura kupumura.”—Chit. 3:48, 49.
3. Kasi Yehova wakujipulika wuli para wakuwona ŵateŵeti ŵake ŵakusuzgika? (Yesaya 63:9)
3 Yehova wakumanya masozi ghithu agho tathiska chifukwa cha masuzgo agho tasangana nagho. Baibolo likutiphalira kuti wakumanya suzgo lililose ilo ŵateŵeti ŵake ŵakukumana nalo, ndipo wakupulika para tikumulilira kuti watovwire. (Sal. 34:15) Kweni Yehova wakuchita vinandi padera pakuwona na kupulika kulira kwithu. Nga umo mupapi wachitemwa wakuchitira, nayo vikumuŵinya chomene para wakuwona ŵana ŵake ŵakulira, ndipo ngwakunozgeka kuŵawovwira.—Ŵazgani Yesaya 63:9.
4. Kasi tiwonenge viyelezgero wuli vya mu Baibolo, ndipo tisambirenge vichi vyakukhwaskana na Yehova?
4 Mu Mazgu ghake, Yehova wakutiphalira umo wakachitira apo ŵateŵeti ŵake ŵakathiskanga masozi. Mwachiyelezgero, tingamanya fundo iyi para tingawona ivyo vikachitikira Hana, Davide na Themba Hezekiya. Kasi ni vichi vikapangiska kuti ŵanthu aŵa ŵathiske masozi? Kasi Yehova wakachita wuli apo ŵakamuliliranga wovwiri? Ndipo kasi viyelezgero vyawo vingatipembuzga wuli para nase tikuthiska masozi chifukwa cha chitima, kwendereka mphiska, panji para tikuwona kuti palije chigomezgo chilichose?
KUTHISKA MASOZI CHIFUKWA CHA CHITIMA
5. Kasi Hana wakajipulikanga wuli chifukwa cha masuzgo agho wakasangananga nagho?
5 Hana wakasangana na masuzgo ghanandi agho ghakamupangiska kuti wathiske masozi. Limoza mwa masuzgo agho wakakumananga nagho likaŵa la mu nthengwa. Mfumu wake wakaŵa na mwanakazi munyake zina lake Penina uyo wakamutinkhanga chomene. Kweniso Hana wakaŵa chumba, apo Penina wakaŵa na ŵana ŵanandi. (1 Sam. 1:1, 2) Kanandi Penina wakamunyozanga Hana chifukwa cha kuŵa chumba. Kasi muŵenge imwe mphanyi mukajipulika wuli? Hana wakaŵa na chitima chomene mwakuti “wakaliranga waka na kuleka kurya,” ndipo wakaŵa wakupwetekeka chomene mu mtima.—1 Sam. 1:6, 7, 10.
6. Kasi Hana wakachita wuli kuti wajipulikeko makora?
6 Kasi Hana wakachita wuli kuti wajipulikeko makora? Chinthu chimoza icho chikamovwira, nkhuluta kukasopa Yehova ku chihema. Wakati wafika kura, ndipo panji wakaŵa cha pafupi na mulyango wakunjilira ku luŵaza lwa chihema, “wakamba kulomba kwa Yehova na kulira kwambura kuleka.” Wakamupempha Yehova kuti: ‘Laŵiskani pa suzgo ya ine muteŵeti winu na kunikumbuka.’ (1 Sam. 1:10b, 11) Hana wakamukhutulira Yehova mu lurombo vyose ivyo vikaŵa mu mtima wake. Yehova wakwenera kuti wakakhwaskika chomene kuwona mwana wake wakutemweka uyu wakuthiska masozi.
7. Kasi Hana wakakhozgeka wuli wati wamukhutulira Yehova vyose ivyo vikaŵa mu mtima wake?
7 Kasi Hana wakajipulika wuli pamanyuma pakuti wamukhutulira Yehova vya mu mtima wake, kweniso pamanyuma pakuti Wasembe Mukuru Eli wamusimikizgira kuti Yehova wazgorenge lurombo lwake? Baibolo likuti: “Wakaluta ndipo wakarya chakurya, chisko chake chikaŵaso chachitima chara.” (1 Sam. 1:17, 18) Nangauli suzgo lake likamara yayi, kweni Hana wakajipulika makora mu mtima. Wakamuthulira Yehova vyose ivyo wakasuzgikanga navyo mu mtima. Yehova wakawona masuzgo ghake, kupulika kulira kwake, ndipo pamanyuma wakamutumbika mwa kumovwira kuŵa na ŵana.—1 Sam. 1:19, 20; 2:21.
8-9. Kuyana na Ŵahebere 10:24, 25, chifukwa wuli tikwenera kuŵikapo mtima chomene kuwungana? (Wonaniso chithuzi.)
8 Ivyo tikusambirapo. Kasi mukusangana na suzgo ilo likumupangiskani kuti muthiskenge masozi chifukwa cha chitima? Panji muli na chitima chifukwa cha nyifwa ya wachibali panji mubwezi winu. Para vyanthena vyachitika, ntchakawiro kukhumba kuti mukhale kwamwekha. Kweni nga umo vikaŵira na Hana kuti wakakhozgeka pamanyuma pakuluta ku chihema, namweso mungakhozgeka chomene para mungaluta ku maungano Ghachikhristu nanga mungaŵa kuti mukujipulika makora viŵi yayi. (Ŵazgani Ŵahebere 10:24, 25.) Apo tikutegherezga nkhani zakukhozga zakufuma mu Baibolo pa maungano, Yehova wangatovwira kuti tiwuskemo maghanoghano ghaheni mu mtima withu na kuzuzgamo maghanoghano ghakwenelera. Ivi vingatovwira kuti tijipulikeko makora, nanga vingaŵa kuti suzgo lithu lindamare nyengo yeneyiyo.
9 Pa maungano ghithu, ŵabali na ŵadumbu ŵithu ŵakutichiska kweniso ŵakutilongora chitemwa, ndipo tikujipulika makora para tili pamoza nawo. (1 Tes. 5:11, 14) Wonani chiyelezgero cha mupayiniya munyake wapadera uyo muwoli wake wali kufwa. Iyo wakati: “Nichali kulira nyifwa yake. Ndipo nyengo zinyake nkhukhala waka kwanekha na kulira. Kweni para naluta ku maungano nkhukhozgeka chomene. Mazgu agho ŵabali na ŵadumbu ŵakuniphalira kweniso mazgoro ghawo, ghakunipembuzga chomene. Nanga vingaŵa kuti nenjerwa chomene pambere nindafike pa maungano, kweni para nili pa maungano nkhujipulika makora.” Para tili pa maungano ghithu, Yehova wakugwiliskira ntchito ŵabali na ŵadumbu ŵithu kutovwira.
Tingakhozgeka na ŵabali na ŵadumbu ŵithu (Wonani ndime 8-9)
10. Kasi tingamuyezga wuli Hana para tili na chitima chikuru chomene?
10 Hana wakajipulikaso makora wati wamukhutulira Yehova mu lurombo vyose ivyo vikaŵa mu mtima wake. Namwe “muthulirani [Yehova] vyose ivyo mukwenjerwa navyo” ndipo manyani kuti wategherezgenge na kumovwirani. (1 Pet. 5:7) Mudumbu munyake uyo mfumu wake wakakomeka na ŵankhungu awo ŵakaŵa na futi, wakuti: “Nkhajipulika nga kuti mtima wasweka tuvibenthu tuchokotuchoko mwakuti uzamuchizgikaso yayi. Ndipouli, para nalomba kwa Adada ŵane a Yehova awo ŵakunitemwa chomene, nkhajipulikanga makora chomene. Ndipo nyengo zinyake, nkhatondekanga na kusanga mazgu ghakwenelera, kweni ŵakanipulikiskanga. Ntheura para nasuzgika chomene maghanoghano, nkhalombanga kuti ŵanipe mtende. Para nachita nthena, mwaluŵiro mtima ukawelerangaso m’malo, ndipo nkhachitanga ivyo nkhakhumbikwiranga kuchita zuŵa ilo.” Para mukumuthulira Yehova vyose ivyo mukwenjerwa navyo, nayo wakukhwaskika na masozi ghinu, ndipo wakupulikiska umo mukujipulikira mu mtima. Nanga vingaŵa kuti suzgo linu lindawukepo, kweni Yehova wangamovwirani kuti mujipulikenge makora. (Sal. 94:19; Fil. 4:6, 7) Ndipo wazamumutumbikani chifukwa chakuti mukuzizipizga mwakugomezgeka.—Heb. 11:6.
KUTHISKA MASOZI CHIFUKWA CHA KWENDEREKA MPHISKA
11. Kasi Davide wakajipulika wuli na masuzgo agho wakasangananga nagho?
11 Pa umoyo wake, Davide wakazizipizga masuzgo ghakupambanapambana agho ghakamupangiskanga kuti wathiske masozi. Ŵanthu ŵanyake ŵakamutinkhanga ndiposo ŵanyake awo wakaŵagomezganga ŵakamwendera mphiska. (1 Sam. 19:10, 11; 2 Sam. 15:10-14, 30) Pa nyengo yinyake wakalemba kuti: “Navuka na kutampha kwane. Usiku wose nkhunyeweska bedi lane na masozi. Nkhuzumbwiska chakugonapo chane na kulira.” Chifukwa wuli Davide wakajipulika nthena? Iyo wakalongosora kuti: “Chifukwa cha wose awo ŵakunisuzga.” (Sal. 6:6, 7) Viheni ivyo ŵanji ŵakamuchitiranga vikapangiskanga kuti Davide wasuzgike chomene maghanoghano ndipo wakathiskanga masozi.
12. Kuyana na Salimo 56:8, kasi Davide wakakhorwa kuti vichi?
12 Nangauli Davide wakasangananga na masuzgo, kweni wakakhorwa kuti Yehova wakumutemwa. Iyo wakalemba kuti: “Yehova wapulikenge kulira kwane.” (Sal. 6:8) Pa nyengo yinyake, Davide wakalemba mazgu ghakukondweska agho tikughasanga pa Salimo 56:8. (Ŵazgani.) Mazgu agha ghakulongora kuti Yehova wakutitemwa chomene ndipo wakuŵikako mahara kwa ise. Davide wakajipulika nga kuti Yehova wakusunga masozi ghake mu thumba lachikumba panji kughalemba mu buku. Nakuti wakagomezganga kuti Yehova wakawonanga kweniso kukumbuka masuzgo ghake. Ndipo wakaŵa wakusimikizga kuti Adada ŵake ŵachitemwa ŵakuchanya ŵakamanyanga waka yayi ivyo wakujumphamo, kweni ŵakamanyangaso umo vikamukhwaskiranga.
13. Para ŵanji ŵatikhuŵazga, kasi tikwenera kukumbuka vichi? (Wonaniso chithuzi.)
13 Ivyo tikusambirapo. Kasi mukusuzgika maghanoghano chifukwa chakuti muli kukhuŵara panji munyake uyo mukamugomezganga wali kumwenderani mphiska? Panji muli na chitima chifukwa chakuti chibwezi chinu panji nthengwa yinu vili kumara mwamabuchi, panjiso munyake uyo mukutemwa wali kuleka kuteŵetera Yehova. Mubali munyake uyo muwoli wake wakachita uleŵi na kumuleka, wakati: “Nkhagomezganga yayi kuti ivi vikuchitikira ine. Nkhakwiya chomene, chitima chikanikora, kweniso nkhajiwonanga wawakawaka.” Usange munyake wali kumwenderanipo mphiska panji kumukhuŵazgani, mungapembuzgika pakumanya kuti Yehova wazamumutayanipo yayi. Mubali uyu wakatiso: “Nawamo kuti ŵanthu ŵangaŵa ŵakugomezgeka yayi nyengo zose kwa iwe, kweni Yehova ni Jalawe lithu. Mulimose umo vingaŵira, iyo wakuŵapo kutovwira. Wazamuŵalekapo yayi ŵakugomezgeka ŵake.” (Sal. 37:28) Nyengo zose kumbukani kuti Yehova wakumutemwani chomene kuluska munthu waliyose. Nangauli vikuŵinya chomene para munyake uyo mukumugomezga wamwenderani mphiska, kweni Yehova wakusintha yayi umo wakumuwonerani, ndimwe ŵakuzirwa kwa iyo. (Rom. 8:38, 39) Fundo njakuti: Mulimose umo munthu wangachitira namwe vinthu, manyani kuti Adada ŵinu ŵakuchanya ŵakumutemwani chomene.
Buku la Masalimo likutisimikizgira kuti Yehova wali pafupi na ŵakusweka mu mtima (Wonani ndime 13)
14. Kasi lemba la Salimo 34:18 likutisimikizgira vichi?
14 Usange munthu munyake watiyendera mphiska, tingapembuzgika na mazgu gha Davide agho ghakusangika pa Salimo 34:18. (Ŵazgani.) Buku linyake likuyowoya kuti mazgu ghakuti ‘awo ŵateketeka mu mzimu’ ghangang’anamuraso “awo ŵakuwona kuti palijeso kawemi mu umoyo wawo.” Kasi Yehova wakuŵawovwira wuli awo ŵakujipulika munthowa iyi? Nga ni mupapi wachitemwa uyo wakupembuzga kamwana kake ako kakulira chifukwa cha vyakuŵinya, Yehova “wali pafupi” nase, ndipo ngwakunozgeka kutilongora chiwuravi na kutovwira para nase tateketeka mu mzimu chifukwa cha kwendereka mphiska. Nakuti iyo ngwakukhumbisiska chomene kutipembuzga para tasweka mtima kweniso para mzimu withu wateketeka. Ndipo wakutipa vinthu vinandi ivyo vingatovwira kuzizipizga masuzgo agho tikukumana nagho pasono.—Yes. 65:17.
KUTHISKA MASOZI CHIFUKWA CHA KUWONA KUTI PALIJE CHIGOMEZGO CHILICHOSE
15. Kasi Hezekiya wakasangana na suzgo wuli ilo likamupangiska kuti walire?
15 Apo likaŵa na vyaka 39, Themba Hezekiya la Yuda likalwara chomene. Ntchimi Yesaya yikaliphalira uthenga wakufuma kwa Yehova wakuti lichirenge yayi. (2 Mathe. 20:1) Hezekiya wakawonanga kuti palije chigomezgo chilichose, ndipo wakalira wakati wapulika uthenga kufuma kwa ntchimi iyi. Iyo wakalomba na kumuŵeyelera chomene Yehova.—2 Mathe. 20:2, 3.
16. Kasi Yehova wakamuchitira vichi Hezekiya?
16 Yehova wakakhwaskika chomene na ŵeyelero lwa Hezekiya ndipo wakamuphalira kuti: “Napulika lurombo lwako. Nawona masozi ghako. Wona, nikuchizgenge.” Kwizira mwa Yesaya, Yehova wakamulongora lusungu na kumulayizga kuti wasazgirengeko umoyo wake na kuthaska Yerusalemu mu mawoko gha Ŵaasiriya.—2 Mathe. 20:4-6.
17. Kasi Yehova wakutovwira wuli para tikulwara nthenda yambura kukonda munkhwala? (Salimo 41:3) (Wonaniso chithuzi.)
17 Ivyo tikusambirapo. Kasi mukulwara nthenda yambura kukonda munkhwala? Muphalirani Yehova umo mukujipulikira, ndipo iyo wategherezgenge nanga mungaŵa kuti mukuthiska masozi apo mukulomba. Baibolo likutisimikizgira kuti “Dada wa mtima walusungu na Chiuta wa chisangulusko chose” watisanguluskenge pa masuzgo ghithu ghose. (2 Kor. 1:3, 4) Mbunenesko kuti pasono tingakhazga kuti Yehova wawuskirengepothu yayi masuzgo ghithu ghose, kweni nyengo zose iyo watovwirenge. (Ŵazgani Salimo 41:3.) Kwizira mu mzimu wake utuŵa, Yehova wakutipa nkhongono, vinjeru, na mtende wa mu mtima kuti tilutilire kuzizipizga. (Zinth. 18:14; Fil. 4:13) Iyo wakutipembuzgaso na chilindizga chiwemi icho wali kutipa chakuti kunthazi matenda ghose kuzamuŵavya.—Yes. 33:24.
Yehova wazgorenge malurombo ghithu mwa kutipa nkhongono, vinjeru, na mtende wa mu mtima (Wonani ndime 17)
18. Kasi ni lemba wuli ilo likumukhozgani chomene para mwasangana na suzgo lakumara mahara? (Wonani bokosi lakuti “ Mazgu Agho Ghangatipembuzga Para Tili na Chitima.”)
18 Hezekiya wakakhozgeka na mazgu gha Yehova. Nase tingakhozgeka na Mazgu gha Chiuta. Yehova wali kusunga mazgu ghakukhozga kuti ghatovwirenge kujipulikako makora para tasangana na masuzgo agho ghakutipangiska kusuzgika maghanoghano. (Rom. 15:4) Mudumbu munyake ku West Africa wakati wasangika na kansa, kanandi wakaliranga waka. Iyo wakuti: “Lemba limoza ilo likunikhozga chomene nda Yesaya 26:3. Nangauli ni nyengo zose yayi apo tingamazga suzgo ilo tikusangana nalo, kweni lemba ili likunisimikizgira kuti Yehova wanganipa mtende wa mu mtima uwo unganovwira kuzizipizga suzgo lililose.” Kasi lilipo lemba ilo mukuwona kuti likumukhozgani chomene para mwasangana na suzgo lakumara mahara, panji mukuwona kuti palije chigomezgo chilichose?
19. Kasi tikukhazga vinthu wuli vyakukondweska munthazi?
19 Tikukhala kuumaliro chomene kwa mazuŵa ghaumaliro, ndipo tikukhazga kuti vinthu ivyo vingapangiska kuti tithiske masozi visazgikirenge. Kweni nga umo tanguwonera mu chiyelezgero cha Hana, Davide, na Themba Hezekiya, Yehova wakuwona masozi ghithu ndipo wakukhwaskika chomene. Masozi ghithu ngakuzirwa chomene kwa iyo. Ntheura para tasangana na masuzgo agho ghakutipangiska kusuzgika chomene maghanoghano, tikwenera kumuthulira Yehova mu lurombo vyose ivyo vili mu mtima withu. Tikwenera yayi kujipatura ku ŵabali na ŵadumbu ŵithu mu mpingo awo ŵakutitemwa chomene. Ndipo mphanyi talutilira kukhozgeka na mazgu ghakupembuzga agho ghakusangika mu Baibolo. Tingaŵa na chigomezgo chose kuti para talutilira kuzizipizga mwakugomezgeka, Yehova watitumbikenge. Ivi vikusazgapo layizgo lakukondweska chomene lakuti wazamufyura masozi ghose agho ghakwiza chifukwa cha chitima, kwendereka mphiska, na kuŵavya chigomezgo chakuti vinthu vingaŵaso makora. (Chivu. 21:4) Pa nyengo iyo tizamuthiskanga waka masozi gha chimwemwe.
SUMU 4 “Yehova Ni Muliska Wane”
