KWENJERWA kuli nga ntchikatundu chizito mu mtima withu. (Zinth. 12:25) Kasi muli kwenjerwapo chomene pa umoyo winu m’paka kwamba kujipulika nga mwalwara? Kasi muli kujipulikapo kuti sono vyajumpha mzere mwakuti mungazizipizgaso yayi? Usange ni nthena, muli mwekha yayi. Taŵanandi ŵa ise nkhongono zikutimalira, tikwenjerwa chomene, kweniso tikusuzgika maghanoghano pa vifukwa vyakupambanapambana. Mwachiyelezgero, ŵanyake ŵakulwazga mubali wawo, ŵanji wakutemweka wawo wali kutayika, ndipo ŵanyake ŵakusuzgika chifukwa cha masoka ghachilengiwa. Kweni kasi ntchivichi chingatovwira kuti tizizipizgenge para tikwenjerwa? *

Tingasambira vinandi kufuma kwa Themba Davide pa umo tingachitira para tikwenjerwa. Davide wakasangana na masuzgo ghanandi pa umoyo wake, ndipo nyengo zinyake umoyo wake ukaŵanga pangozi. (1 Sam. 17:34, 35; 18:10, 11) Kasi ntchivichi chikamovwira Davide kuzizipizga apo wakenjerwanga? Kasi ise tingamuyezga wuli?

Davide wakasangana na masuzgo ghanandi pa nyengo yimoza. Mwachiyelezgero, wonani ivyo vikachitika apo iyo wakachimbiranga Themba Sauli ilo likakhumbanga kumukoma. Zuŵa linyake apo Davide na ŵanthu awo wakaŵa nawo ŵakafumanga ku nkhondo, ŵakati waka pwaza kuwona kuti ŵalwani ŵaŵibira vinthu vyawo, ŵawotcha nyumba zawo, na kukora wuzga mbumba zawo. Kasi Davide wakachita wuli? “Davide na ŵanthu awo wakaŵa nawo ŵakamba kulira chomene, m’paka ŵakaŵavya nkhongono zakulilira.” Davide wakenjerwaso chomene chifukwa ŵanthu ŵake “ŵakayowoyanga vyakuti ŵamudinye na malibwe.” (1 Sam. 30:1-6) Apa Davide wakasangana na masuzgo ghatatu ghakurughakuru panyengo yimoza: Mbumba yake yikaŵa pangozi, ŵanthu awo wakendanga nawo ŵakakhumbanga kumukoma, kweniso Themba Sauli likamuchimbizganga. Apa Davide wakwenera kuti wakenjerwa chomene!

Kasi Davide wakachita vichi? Nyengo yeneyiyo “wakajikhozga mwa Yehova Chiuta wake.” Kasi Davide wakakwaniska wuli kuchita nthena? Tikumanya kuti Davide wakatemwanga kulomba wovwiri kwa Yehova na kughanaghanira umo wakamovwilirapo kumasinda. (1 Sam. 17:37; Sal. 18:2, 6) Davide wakamanya kuti wakakhumbikwiranga ulongozgi wa Yehova, ntheura wakapempha Yehova kuti wamuphalire ivyo wakwenera kuchita. Davide wati waphalirika chakuchita na Yehova, nyengo yeneyiyo wakachitapo kanthu. Pa chifukwa ichi, Yehova wakaŵawovwira, iyo na ŵanthu awo wakaŵa nawo, ndipo ŵakathaska mbumba zawo kweniso vinthu vyawo. (1 Sam. 30:7-9, 18, 19) Kasi mwaviwona vinthu vitatu ivyo Davide wakachita? Wakalomba wovwiri kwa Yehova, wakaghanaghanira ivyo Yehova wakamuchitirapo kumanyuma, ndipo wakachitapo kanthu pa ivyo Yehova wakamuphalira. Kasi ise tingamuyezga wuli Davide? Wonani nthowa zitatu.

1. Lombani. Nyengo yiliyose para tamba kwenjerwa, tingalomba Yehova kuti watovwire na kutipa vinjeru. Tipepukenge mu mtima para tingakhutulira mtima withu kwa iyo na kumuphalira vyose ivyo tikwenjerwa navyo. Panji tingalomba lurombo lufupi chamumtima kuyana na umo vinthu viliri. Nyengo yiliyose para tikulomba wovwiri kwa Yehova, tikulongora kuti nase tikumuthemba nga umo wakachitira Davide, uyo wakati: “Yehova ni mphanji yane, linga lane lakukhora, na Muthaski wane.  Chiuta wane ni jalawe lane, nkhubisama mwa iyo.” (Sal. 18:2) Kasi lurombo lukovwira nadi? Mudumbu munyake mupayiniya zina lake Kahlia wakuti: “Para nalomba, nkhuŵa na mtende mu mtima. Lurombo lukovwira kuti maghanoghano ghane ghayane na gha Yehova, ndipo chigomezgo chane mwa iyo chikusazgikira chomene.” Nadi, lurombo ntchawanangwa chapadera chakufuma kwa Yehova icho chikutovwira kuti tizizipizgenge para tikwenjerwa.

2. Ghanaghaniranipo. Para mukughanaghanira ivyo muli kujumphamo kumasinda, kasi vilipo viyezgo ivyo mukuwona kuti mukakwaniska kuzizipizga chifukwa cha wovwiri wa Yehova? Para tikughanaghanira umo Yehova wali kutovwilirapo ise kweniso ŵateŵeti ŵake ŵakumasinda, nkhongono zikukwera ndipo tikumugomezga chomene. (Sal. 18:17-19) Mulara munyake zina lake Joshua wakuti: “Nili kulemba malurombo agho ghali kuzgoreka. Ivi vikunovwira kuti nikumbukenge nyengo izo nkhapempha Yehova chinthu chinyake ndipo wakanipa icho nkhakhumbikwiranga.” Nadi, para tikughanaghanirapo pa ivyo Yehova wali kutichitirapo kale kumasinda, tikusanga nkhongono izo zingatovwira kuzizipizga para tikwenjerwa.

3. Chitanipo kanthu. Pambere tindasankhe chakuchita pa suzgo linyake, tikwenera kupenja dankha ulongozgi wakugomezgeka mu Mazgu gha Chiuta. (Sal. 19:7, 11) Ŵanandi ŵasanga kuti para ŵakuchita kafukufuku pa lemba linyake, ŵakupulikiska makora umo vesi ilo likugwilira ntchito pa umoyo wawo. Mulara munyake zina lake Jarrod wakuti: “Kuchita kafukufuku kukunovwira kuwona vigaŵa vyose vya vesi ndipo nkhupulikiska ivyo Yehova wakuniphalira. Ichi chikunovwira kuti nigomezgenge nadi ivyo nkhuŵazga mwakuti nkhuchitapo kanthu pa ulongozgi wake.” Usange tikupenja ulongozgi wa Yehova mu Malemba kweniso kulondezga ulongozgi uwu, chikuŵako chipusu kuzizipizga para tikwenjerwa.

Davide wakamanya kuti wakukhumbikwira wovwiri wa Yehova kuti wakwaniske kuzizipizga para wakwenjerwa. Wakawonganga chomene wovwiri uwo Yehova wakamupa mwakuti wakafika na pakuyowoya kuti: “Ningaŵenuka chiliŵa na nkhongono ya Chiuta. Chiuta waunenesko ndiyo wakunivwalika nkhongono.” (Sal. 18:29, 32) Nyengo zinyake tingawona nga kuti viyezgo ivyo tasangana navyo ni vikuru chomene mwakuti palije icho tingachitapo kuti timalane navyo. Kweni na wovwiri wa Yehova, tingaŵenuka panji kuti kuzizipizga masuzgo agho ghangawoneka nga ntchiliŵa chitali! Nadi, para tikulomba wovwiri kwa Yehova, kughanaghanira vyose ivyo watichitirapo, na kuchitapo kanthu pa ulongozgi wake, tiŵenge na chigomezgo chose kuti watipenge nkhongono na vinjeru ivyo tikukhumbikwira kuti tizizipizge para tikwenjerwa!